Basikubala Balabuzya

Sena Bwami Bwa Leza Buli Mumoyo Wanu?

Bantu banji mazuba aano basyoma kuti bwiinguzi bwamubuzyo uuli atala aawa mbwakuti ee. Mucikozyanyo, The Catholic Encyclopedia lyaamba kuti: “Bwami bwa Leza . . . bwaamba nzila njabelesya Leza kweendelezya myoyo yesu.” Basololi bazikombelo bayiisya njiisyo eeyi. Sena masimpe Bbaibbele liyiisya kuti Bwami bwa Leza buli mumyoyo yabantu?

Bamwi bayeeya kuti Jesu ngowakatalisya njiisyo yakuti Bwami bwa Leza buli mumyoyo yabantu. Jesu wakaamba kuti: “Amubone, Bwami bwa-Leza buli mukati kanu.” (Luka 17:21) Busanduluzi bumwi aawa bwaamba boobu: “Bwami bwa Leza buli mukati kanu” naa “buli mulindinywe.” Sena busanduluzi oobo buliluzi kweelana amajwi aa Jesu? Sena wakali kwaamba ncobeni kuti Bwami bwa Leza buli mukati kamyoyo yabantu?

Cakutaanguna, amulange-lange moyo wamuntu ncowaamba. Nowaambwa mu Bbaibbele, moyo wacikozyanyo waamba muntu wamukati, kuzwa mizeezo yamuntu, mbwazilanga zintu ambwalimvwa. Mucikozyanyo njiisyo yakuti cintu cimwi cisumpukide kapati mbuli Bwami bwa Leza buli mumoyo wamuntu munzila yakuti bulakonzya kumuncinca muntu kuba kabotu, ilakonzya kulimvwisya kabotu, sena masimpe ncamaano kuyeeya boobo?

Ibbaibbele litwaambila kuti: “Moyo wamuntu uleena kwiinda zintu zyoonse, ulijisi bulwazi bukaka kupona, taakwe uukonzya kuzibisya mbuubede.” (Jeremiya 17:9) Jesu mwini wakati: “Kuzwa mumoyo wamuntu, mulazwa miyeeyo mibi, bwaamu, bubbi, bujayi, bumambi, kulikumbuzya, zibi.” (Marko 7:20-22) Amulange-lange kaambo aaka: Sena tatukonzyi kwaamba kuti mapenzi ngotubona munyika mazuba aano akazwa mumyoyo iitalondokede yabantu? Aboobo, mbuti Bwami bwa Leza bulondokede mbobukonzya kuzwa mumyoyo iili boobu? Masimpe, moyo wamuntu takusi nkokuzwa Bwami bwa Leza mbubonya mbuli mamvwa mbwaatakonzyi kuzyala nkuyu.—Matayo 7:16.

Cabili, amulange-lange bantu Jesu mbaakali kwaambila naakali kwaamba majwi aaya aazibidwe aalembedwe ku Luka 17:21. Kapango kamunsi kabalwa kuti: “Elyo ba-Farisi nobakamubuzya kuti, Bwami bwa-Leza buzoosika lili? Wakabavuwa.” (Luka 17:20) Ba Farisi bakali basinkondonyina Jesu. Jesu wakaamba kuti basikuupa-upa ameso aaba tabakanjili mu Bwami bwa Leza. (Matayo 23:13) Ikuti ba Farisi tabakanjili mu Bwami bwa Leza, sena Bwami bwakali kukonzya kuba mumyoyo yabo? Peepe! Aboobo, ncinzi Jesu cini ncaakali kwaamba?

Nobakali kulemba majwi aaya aa Jesu, busanduluzi bunji busanduludwe kabotu bwa Bbaibbele bubelesya mabala aakozyenyi ayaayo aajanika mu New World Translation. Busanduluzi bumwi bwaamba kuti Bwami buli “akati kanu.” Mbuti Bwami bwa Leza mbobwakali akati kabantu aabo aciindi eeco kubikkilizya aba Farisi? Jesu ngomuntu Jehova Leza ngwaakabikka kuba Mwami wa Bwami. Mbwaakali Mwami Uusalidwe, Jesu wakali akati kabantu aabo. Wakabayiisya makani aamba Bwami bwa Leza nokuba kucita maleele, akubatondezya Bwami oobo ncobuyoocita. Aboobo, tulakonzya kwaamba kuti Bwami bwakali akati kabo.

Aboobo, kunyina Magwalo aamba kuti Bwami bwa Leza buli mumyoyo yabantu. Muciindi caboobo, nimfwulumende ini-ini, iyooleta kuncinca anyika, kweelana abasinsimi mbobakaamba.—Isaya 9:6, 7; Daniele 2:44.