1. Mbuti mbotukonzya kuubelesya mupailo uulembedwe mulugwalo lwa Matayo 6:9-13 ciindi notuli mumulimo wakukambauka?

BANTU banji balakonzya kuwaamba Mupailo wa Mwami kakunyina kubala buya. Kanji-kanji, ciindi notukambauka kuŋanda aŋanda tulabagwasya bamukamwini ŋanda kumvwisya kuti Bwami bwa Leza nimfwulumende yancobeni iiyooleta zintu zinji zibotu anyika. Ambweni tulakonzya kumutondezya kulomba kwakusaanguna mumupailo kutondezya kuti Leza ulijisi zina limugeme, ilyeelede kusalazyigwa.—Mt. 6:9.

2. Ino tuzyi buti kuti Jesu taakwe naakali kuyanda kuti mupailo wacikozyanyo kawiindulukwa bbala abbala kufwumbwa ciindi notupaila?

² Sena Jesu wakali kuyanda kuti mupailo wakwe kawiindulukwa bbala abbala kufwumbwa ciindi notupaila, kweelana ambobacita muzikombelo zya Bunakristo Bwanyika? Peepe. Katanaamba mupailo ooyu wacikozyanyo, wakati: “Ciindi nomupaila, mutanikwaambi majwi ngoonya cakwiinduluka-induluka.” (Mt. 6:7) Aciindi cimwi, wakawaamba alimwi mupailo ooyu pele wakabelesya  majwi aaindene. (Lk. 11:1-4) Aboobo, Jesu wakatugwasya kuzyiba zintu nzyotweelede kulomba kweelana ambozitobelana. Aboobo, cileelela kwaamba kuti mupailo ooyu ngwacikozyanyo buyo.

3. Ino mibuzyo nzi njotukonzya kuzinzibala kuyeeya ciindi notulanga-langa mupailo wacikozyanyo?

³ Mucibalo eeci amucibalo citobela, tulalanga-langa twaambo ntotujana mumupailo wacikozyanyo. Notulanga-langa twaambo ootu, amulibuzye kuti: ‘Ino mupailo wacikozyanyo ooyu inga wandigwasya buti kubotya mipailo yangu? Alimwi iciyandika kapati, sena ndipona kweelana ambowaamba mupailo ooyu?’

4. Ino bbala lyakuti “Taateesu” lituyeezya nzi, alimwi muunzila nzi Jehova mbwali “Taata” ku Banakristo ibajisi bulangizi bwakuyoopona anyika?

⁴ Ibbala lyakuti “Taateesu,” kutali “Taata,” lituyeezya kuti tuzulilwa ‘muciinga cabakwesu’ ibayandana ncobeni. (1Pet. 2:17) Eelo kaka eeci ncoolwe citaliboteli! Banakristo bananike, ibakazyalwa kwiinda mumuuya kuba bana ba Leza ibajisi bulangizi bwakupona kujulu, cakweelela baamba Jehova kuti “Taata” kweelana abupanduluzi bwini bwabbala eeli. (Rom. 8:15-17) Banakristo ibajisi bulangizi bwakupona anyika kukabe kutamani abalo balakonzya kwaamba Jehova kuti “Taata.” Ngonguwe uubapa buumi, alimwi caluyando ulabapa zintu nzyobayandika bakombi bakasimpe boonse. Aabo ibajisi bulangizi bwakupona anyika bayooba bana ba Leza cakumaninina baakulondoka akusinizya kuti balasyomeka cakumaninina.—Rom. 8:21; Ciy. 20:7, 8.

5, 6. Ino ncipego nzi cibotu kapati bazyali ncobakonzya kupa bana babo, alimwi ncinzi mwana umwi aumwi ncayelede kucita acipego eeci? (Amubone cifwanikiso icili kumatalikilo aacibalo.)

⁵ Bazyali bapa bana babo cipego cibotu ciindi nobabayiisya kupaila akubagwasya kubona Jehova kuti ngu Taata wakujulu uubikkila maano. Mukwesu umwi lino uubeleka kali mulangizi wabbazu mu South Africa wakati: “Kuzwa ciindi bana besu basimbi nobakazyalwa, ndakali kupaila ambabo buzuba abuzuba masiku ccita buyo ciindi nondatakaliko aŋanda. Bana bangu kanji-kanji baamba kuti tabaayeeyi majwi eeni ngondakali kwaamba mumipailo eeyo yamasiku. Nokuba boobo, balayeeya kuti ziindi zili boobo zyakali ziindi zibotu, zisetekene zyakubandika a Taateesu, Jehova, alimwi akuti bakali kuliiba akulimvwa kukwabililwa. Mbobakatalikila buyo kucikonzya kupaila balikke, ndakabakulwaizya kunoopaila cakupozya kutegwa kandimvwa nzyobamwaambila Jehova. Eeci cakali coolwe cibotu cakuzyiba zintu izyakali mumyoyo yabo. Mpoonya kabotu-kabotu ndakali kukonzya kubayiisya kubikkilizya twaambo tuyandika ituli mumupailo wacikozyanyo kutegwa mipailo yabo kaijisi ntalisyo mbotu.”

⁶ Tacigambyi kuti bana basimbi bamukwesu ooyu bakali kukomena kabotu kumuuya. Bakakwatwa kabotu, antoomwe abalumi babo, bacita kuyanda kwa Leza mumulimo waciindi coonse. Taakwe cipego bazyali ncobakonzya kupa bana babo iciinda kubagwasya kuba acilongwe ciyumu a Jehova. Pele cili kuli umwi aumwi kuzumanana kuba acilongwe eeci ciyumu. Kucita boobu kulabikkilizya akwiiya kuyanda zina lya Leza, kulilemeka kapati.—Int. 5:11, 12; 91:14.

7. Ino ncoolwe nzi ncobajisi bantu ba Leza, pele ncinzi ncotuyandika kucita?

⁷ Eelo kaka ncoolwe citaliboteli ncotujisi kuzyiba zina lya Leza alimwi akuba “bantu bazina lyakwe.” (Mil. 15:14; Is. 43:10) Tukombelezya Taateesu wakujulu kuti: “Alisalazyigwe zina lyako.” Kulomba kwanu kuli boobu inga kwamukulwaizya kumulomba Jehova kuti atugwasye kweeleba kucita naa kwaamba cintu cili coonse icikonzya kusampaula zina lyakwe lisalala. Tatuyandi  kuba mbuli bantu bamwi bamumwaanda wamyaka wakusaanguna ibatakali kucita nzyobakali kukambauka. Mwaapostolo Paulo wakabalembela kuti: “Izina lya Leza lilasampaulwa akati kabamasi akaambo kandinywe.”—Rom. 2:21-24.

8, 9. Amupe cikozyanyo icitondezya Jehova mbwabalongezya aabo ibabikkila maano kusalazya zina lyakwe.

⁸ Tuyanda kusalazya zina lya Leza. Ciindi mulumaakwe naakafwa cakutayeeyela, mucizyi umwi waku Norway wakacaala buyo amwanaakwe musankwa iwakajisi myaka yobilo. Wakati: “Eeci cakali ciindi cikatazya kapati kulindime. Ndakali kupaila buzuba abuzuba, kwainda woola lyomwe, kutegwa ndiyumizyigwe akuzumanana kuyeeya kabotu kutegwa nditapi Saatani kaambo kakusampaula Jehova akaambo kazintu nzyondisala cabufwubafwuba naa akaambo kakutasyomeka kwangu. Ndakali kuyanda kusalazya zina lya Jehova, alimwi ndakali kuyanda mwanaangu kuti akababone bausyi alimwi mu Paradaiso.”—Tus. 27:11.

⁹ Sena Jehova wakaingula mipailo yakwe? Inzya. Mucizyi ooyu wakagwasyigwa kwiinda mukuyanzana lyoonse abasyominyina ibabikkila maano. Nokwakainda myaka yosanwe, wakakwatwa kumwaalu. Mwanaakwe lino ulaamyaka iili 20, alimwi mukwesu uubbapatizyidwe. Mucizyi ooyu wakati: “Ndilikkomene kapati kuti balumi bangu bakandigwasya kumulela.”

10. Ino ncinzi ciyandika kutegwa zina lya Leza likasalazyigwe cakumaninina?

¹⁰ Ino ncinzi ciyandika kutegwa zina lya Leza lisalazyigwe cakumaninina kukusampaula koonse nkolisampaulwa? Kutegwa eeci cicitike, Jehova weelede kubweza ntaamo yakugwisya baabo boonse ibakaka bweendelezi bwakwe acaali. (Amubale Ezekieli 38:22, 23.) Bucebuce bantu bayoolondoka. Eelo kaka tulacilangila ciindi eeci, ciindi bantu boonse abangelo nobanoosalazya zina lya Jehova! Mpoonya kumamanino, Taateesu wakujulu siluyando uyooba “mweendelezi wazintu zyoonse.”—1Kor. 15:28.

11, 12. Kumamanino aamwaanda wamyaka wa 19, ino Banakristo bakasimpe bakagwasyigwa kumvwisya nzi?

¹¹ Jesu katanaunka kujulu, baapostolo bakwe bakamubuzya kuti: “Mwami, sena ulapilusya Bwami ku Israyeli aciindi ecino?” Bwiinguzi bwa Jesu bwakatondezya kuti tiicakali ciindi ceelede kuli mbabo cakuzyiba Bwami bwa Leza nobuyootalika kulela. Wakaambila basikwiiya bakwe kubikkila maano kuncito yakukambauka iiyandika kapati njobakeelede kubeleka. (Amubale Milimo 1:6-8.) Nokuba boobo, Jesu wakayiisya basikumutobela kulangila kuboola kwa Bwami bwa Leza. Aboobo, kutalikila muciindi cabaapostolo, Banakristo bali kupailila Bwami kuti buboole.

¹² Nocakaswena ciindi cakuti Bwami bwa Leza butalike kulela kujulu ansi abweendelezi bwa Jesu, Jehova wakagwasya bantu bakwe kumvwisya mwaka nobwakali kuyootalika kulela. Mu 1876, cibalo icakalembwa aba Charles Taze Russell cakamwaigwa mumagazini iyakali kwiitwa kuti Bible Examiner. Cibalo eeco icakajisi mutwe wakuti “Gentile Times: When Do They End?,” (Ciindi ca Bamasi: Ino Ciyoomana Lili?) cakatondezya kuti mwaka wa 1914 wakali mwaka waalubazu. Cibalo eeci cakatondezya kuti “ziindi zili ciloba” izyaambidwe mubusinsimi bwa Daniele zileendelana ‘aciindi cibikkidwe camasi’ ncaakaamba Jesu. *—Dan. 4:16; Lk. 21:24.

13. Ncinzi cakacitika mu 1914, alimwi ino zintu izyali kucitika munyika kuzwa kuciindi eeciya zisinizya nzi?

¹³ Mu 1914, nkondo yakatalika akati kazisi zyaku Europe—eeyi yakali nkondo yakalwanwa  nyika yoonse mbwiizulwa. Kuzikusika ciindi noyakamana nkondo eeyi mu 1918, kwakali nzala mpati, alimwi kwakali bulwazi bwa influenza ibwakajaya bantu banji kwiinda bantu ibakajaigwa munkondo. Aboobo, “citondezyo” ncaakaamba Jesu icakali kuyoozyibya kubako kwakwe kutalibonyi kali Mwami wanyika mupya cakatalika kuzuzikizyigwa. (Mt. 24:3-8; Lk. 21:10, 11) Bumboni bukkwene butondezya kuti mwaka wa 1914 nceciindi Mwami Jesu Kristo ‘naakapegwa musini.’ “Wakaunka kayaabuzunda akuti amanizye kuzunda.” (Ciy. 6:2) Wakasalazya julu munkondo njaakalwana Saatani amadaimona aakwe, akubawaala ansi. Kuzwa kuciindi eeco, asinizyigwa majwi aakasololelwa amuuya aakuti: “Maawe kunyika alimwi akulwizi, nkaambo Diabolosi wamuselukila abukali bupati, mbwaanga ulizyi kuti ujisi buyo kaindi kaniini.”—Ciy. 12:7-12.

14. (a) Nkaambo nzi ncociciyandika kapati kupailila Bwami bwa Leza kuti buboole? (b) Ino tujisi coolwe cakucita nzi?

¹⁴ Businsimi ibulembedwe mulugwalo lwa Ciyubunuzyo 12:7-12 bulatondezya ikaambo Bwami bwa Leza ncobwakatalika kulela aciindi nciconya naakatalika mapenzi alo aazumanana kupenzya bantu kusikila asunu. Jesu, Mwami wa Bwami bwa Leza, wakatalika kulela akati kabasinkondonyina. Kusikila akamanizye kuzunda alimwi akumanizya bubi anyika, tuyoozumanana kupailila Bwami bwa Leza kuti buboole. Aciindi nciconya, tweelede kupona kweelana azyaambwa mumipailo eeyo kwiinda mukutola lubazu mukuzuzikizyigwa kwacibeela ‘cacitondezyo’ cigambya  kapati.’ Jesu wakasinsima kuti: “Makani mabotu aa Bwami aaya ayookambaukwa munyika yoonse kuti bukabe bumboni kumasi oonse, mpoonya mamanino ayoosika.”—Mt. 24:14.

15, 16. Ino inga twapona buti kweelana akulomba kwakuti kuyanda kwa Leza kucitwe ansi aano?

¹⁵ Myaka iibalilwa ku 6,000 yainda, kuyanda kwa Leza kwakali kucitwa anyika munzila iilondokede. Nkakaambo kaako Jehova wakali kukonzya kwaamba kujatikizya matalikilo ngaakabambila bantu kuti akali: ‘mabotu kapati.’ (Matl. 1:31) Mpoonya Saatani wakazanga, kuzwa kuciindi eeco mbantu buyo basyoonto ibali kucita kuyanda kwa Leza anyika. Pele sunu tulijisi coolwe cakupona muciindi Bakamboni ibabalilwa ku 8 miliyoni nobatapailili buyo kuti kuyanda kwa Leza kucitwe anyika pele alimwi balasolekesya kupona kweelana ambowaamba mupailo ooyu. Balacita oobu kwiinda munzila njobapona alimwi akwiinda mukutola lubazu cabusungu mumulimo wakuyiisya bantu kuti babe basikwiiya.

¹⁶ Mucikozyanyo, mucizyi iwakabbapatizyigwa mu 1948 alimwi lino uubeleka kali misyinali mu Africa wakaamba kuti: “Kweelana ambowaamba mupailo ooyu wacikozyanyo, ndilapaila lyoonse kuti bantu boonse ibali mbuli mbelele bakonzye kukambaukilwa akubagwasya kuzyiba Jehova kacitanamana ciindi. Alimwi ciindi nondiyanda kukambaukila muntu umwi, ndilomba busongo bwakuti ndikonzye kumusika amoyo muntu ooyo. Alimwi kujatikizya bantu bali mbuli mbelele ibakajanika kale, ndilapaila kuti Jehova alongezye kusoleka kwesu kwakubagwasya.” Tacigambyi kuti mucizyi ooyu uujisi myaka yakuzyalwa iili 80 wazwidilila mumulimo wakwe wakukambauka alimwi kwiinda mukugwasyigwa abambi wagwasya bantu banji kuti babe Bakamboni ba Jehova. Cakutadooneka, mulakonzya kuyeeya zikozyanyo zibotu azimbi zyabantu ibasolekesya kucita kuyanda kwa Leza nokuba kuti bajisi buyumuyumu buboola akaambo kakucembaala.—Amubale Bafilipi 2:17.

17. Ino mulimvwa buti kujatikizya nzyayoocita Jehova kwiingula kulomba kwesu kwakuti kuyanda kwakwe kucitwe ansi aano?

¹⁷ Tuyoozumanana kupailila kuyanda kwa Leza kuti kucitwe kusikila ciindi nobayoogwisyigwa basinkondo ba Bwami bwa Leza anyika. Mpoonya kuyanda kwa Leza kuyoocitwa cakumaninina ciindi mabbiliyoni aabantu aakubusyigwa munyika yaparadaiso. Jesu wakaamba kuti: ‘Mutagambwi amakani aaya, nkaambo ciyoosika ciindi eelyo aabo boonse ibali muzyuumbwe nobayoomvwa ijwi lyangu akuzwa mulinzizyo.’ (Joh. 5:28, 29) Eelo kaka eeco cinooli ciindi cibotu cakupona akutambula bayandwa besu bafwide! Leza ‘uyoosindula misozi yoonse kumeso eesu.’ (Ciy. 21:4) Ibantu banji ibayoobusyigwa mbantu “bataluleme,” ibakapona mpoonya akufwa kakunyina kwiiya kujatikizya Jehova Leza alimwi a Mwanaakwe. Cinooli coolwe eeci cakuyiisya bantu bayoobusyigwa kuti babe aluzyibo lujatikizya kuyanda kwa Leza amakanze aakwe, kubagwasya kuti beelele kuba ‘abuumi butamani.’—Mil. 24:15; Joh. 17:3.

18. Nzintu nzi nzyobayandika kapati bantu?

¹⁸ Luumuno alukamantano kujulu alimwi aanyika ziyeeme aakusalazyigwa kwazina lya Jehova kwiinda mu Bwami bwa Leza. Aboobo, bwiinguzi buzwide bwazintu zyotatwe zyakusaanguna nzyotulomba mumupailo wacikozyanyo buyoozuzikizya zintu nzyobayandika kapati bantu. Pele kucili zintu zimbi ziyandika izyaambidwe muzintu zyone zyamamanino mumupailo wa Jesu wacikozyanyo. Zintu eezyi ziyoobandikwa mucibalo citobela.