MYAKA misyoonto yainda, ba Cesar abakaintu babo ba Rocio bakali kupona buumi buli kabotu mu California, mwalo ba Cesar mobakali kubeleka mulimo wakubamba mincini iikasaazya naa kutontozya muŋanda mpoonya ba Rocio bakali kubeleka mazuba masyoonto munsondo muofesi yadokota. Bakajisi ŋanda yabo, alimwi tiibakajisi bana. Nokuba boobo, kuli cintu cimwi cakacitika icakacinca buumi bwabo. Ino ncintu nzi eeco?

Mu October 2009, ofesi yamutabi yaku United States yakatuma lugwalo kumbungano zyoonse mucisi ilwakali kutamba basikulisungula ibajisi luzyibo mumilimo iindene-indene kuti balembele mulimo waku Bbeteli waciindi cisyoonto kutegwa bagwasye mumulimo wakukomezya ofesi yamutabi ku Wallkill, New York. Nobaba baabo ibakainda amyaka iyeelede kulembela mulimo waku Bbeteli bakatambwa kulembela. Ba Cesar aba Rocio bakati: “Akaambo kamyaka yakuzyalwa njotujisi, twakalizyi kuti coolwe eeci cakubelekela ku Bbeteli tatukaciboni limbi pe mubuumi bwesu. Tiitwakali kuyanda kwiindwa coolwe eeci!” Banabukwetene aaba cakufwambaana bakatuma mafoomu aakulembela mulimo ooyu.

Ciindi iciinda kumwaka omwe cakainda, pele ba Cesar aba Rocio tiibakaningatambwa ku Bbeteli. Nokuba boobo, bakacita zintu zimwi kutegwa bazuzikizye mbaakani yabo kwiinda mukuubya-ubya buumi bwabo. Ba Cesar bakati: “Twakacinca busena motwakali kubikka myootokala kuba kaanda kakukkala kutegwa tukonzye kubikka bantu bakali kukonzya kukkala muŋanda mpati akwiibbadalila. Mpoonya twakazwa muŋanda yesu mpati njotwakali kuyandisya njotwakayakide myaka misyoonto yainda akunjila mukaanda kasyoonto. Kucinca zintu munzila eeyi kwakatugwasya kulibambila kuzumina kuyakubelekela ku Bbeteli kuti naa twakali kuyakutambwa kumbele.” Ino ncinzi cakatobela? Ba Rocio bakati: “Nokwakainda mwezi omwe kuzwa ciindi notwakanjila mukaanda kesu kasyoonto twakatambula lugwalo lwakututamba kuyakubeleka mulimo wakulisungula kwaciindi cisyoonto ku Wallkill. Cakalisalede kulindiswe kuti kwiinda mukuubya-ubya buumi bwesu, cakapa kuti Jehova atulongezye.”

Mbubwenya mbuli ba Cesar aba Rocio, myaanda-myaanda yabakwesu abacizyi balyaaba kutegwa bakonzye  kutola lubazu mumulimo wakuyaka uuli mukucitika mu New York State. Bunji bwabaaba balagwasyilizya mumulimo wakuyaka ku Wallkill, mpoonya bamwi bali acoolwe cakugwasyilizya mumulimo wakuyaka maofesi eesu mapati ku Warwick. * Banabukwetene banji basiya maanda aabo mabotu, milimo mibotu nozyiba zivwubwa zyabo kutegwa babelekele Jehova cakumaninina. Sena Jehova wabalongezya akaambo kamuuya wabo wakulyaaba? Inzya, wabalongezya ncobeni!

Mucikozyanyo, ba Way, ibabeleka mulimo wamagesi, alimwi aba Debra, boonse ibajisi myaka yakuzyalwa iili muma 50, bakasambala ŋanda yabo azintu zyabo zinji mu Kansas akulongela ku Wallkill kutegwa kabeenda buya kuunka kuyoobeleka ku Bbeteli. * Nokuba kuti kucita boobo kwakali kuyandika kucinca zintu mubuumi bwabo, balimvwa kuti kulyaaba kwabo kwagwasya kapati. Kujatikizya mulimo wabo ku Bbeteli, ba Debra bakati: “Zimwi ziindi ndilimvwa mbuli kuti ndili mukubeleka mulimo wakuyaka uutondezyegwa muzifwanikiso zya Paradaiso izili mumabbuku eesu!”

Ba Melvin aba Sharon bakasambala ŋanda yabo azintu zyabo mu South Carolina kutegwa bakonzye kugwasyilizya ku Warwick. Nokuba kuti tiicakali cuubauba kulyaaba munzila eeyi, banabukwetene aaba balimvwa kuti ncoolwe kutola lubazu mumulimo ooyu mupati wakuyaka. Bakati: “Talwaambiki ilukkomano ndotujana akaambo kakuzyiba buyo kuti tubeleka mulimo uuyakugwasya mbunga nyika yoonse mbwiizulwa.”

Ba Kenneth, ibakaleka kubeleka mulimo wakuyaka akaambo kakuti bakasika amyaka yakuleka mulimo, aba Maureen, boonse ibajisi myaka yakuzyalwa iili muma 50, bakalonga kuzwa ku California kutegwa bakagwasyilizye kubeleka mulimo uucitwa ku Warwick. Kutegwa balonge, bakabikka bubambe bwakuti mucizyi umwi mumbungano yabo kalanganya ŋanda yabo alimwi bakalomba kuti mukwasyi wabo kaugwasyilizya kulanganya bausyi baba Ken ibacembeede. Sena balimvwa kuti bakalubizya kulyaaba nkobakacita kuyakubelekela ku Bbeteli? Peepe! Ba Ken bakaamba kuti: “Twagwasyigwa kapati. Sena taakwe buyumuyumu buliko? Buyumuyumu nkobuli, pele tupona buumi bulaampindu, alimwi camoyo woonse tukulwaizya bamwi kuti babeleke mulimo ooyu.”

Bunji bwabaabo ibakalyaaba bakeelede kuzunda buyumuyumu bumwi. Mucikozyanyo, ba William aba Sandra, ibajisi myaka yakuzyalwa iili muma 60, bakakkede kabotu kabakkomene mubuumi ku Pennsylvania. Bakajisi kkampani iyakajisi babelesi ibali 17 iyakali kupanga zibeela zyamincini. Bakali mumbungano njiyonya njobakali kuyanzana anjiyo kuzwa kubwana, alimwi babbululu babo banji bakali kukkala mubusena oobu. Aboobo, nobakaba acoolwe cakunooyenda buya kuyoobekela ku Bbeteli lyaku Wallkill, bakalizyi kuti cakali kwaamba kusiya zintu zyoonse nzyobakazyibide.  Ba William bakaamba kuti: “Cakutadooneka, buyumuyumu bomwe bupati mbotwakajisi bwakali bwakusiya buumi bubotu mbotwakali kupona.” Nokuba boobo, nobakapaila cakwiinduluka-induluka, banabukwetene aaba bakasala kulonga—tabalimvwi kuti bakalubizya kucita boobu. Ba William bakaamba kuti: “Lukkomano luboola akaambo kakutola lubazu cacigaminina alimwi akubelekela antoomwe amukwasyi wa Bbeteli talukonzyi kweelanisyigwa acintu cili coonse. Mebo aba Sandra tulikkomene kapati kwiinda kaindi!”

Ba Ricky, ibalanganya mulimo wakuyaka mukkampani imwi ku Hawaii, bakatambwa kuti kabeenda buya kuyoobeleka mulimo ku Bbeteli kutegwa bagwasyilizye mumulimo ku Warwick. Bakaintu babo ba Kendra, bakali kuyanda kuti bakuzumine kutambwa ooku. Nokuba boobo, bakajisi kaambo kalimvwisya ikakali kubapa kulibilika ikajatikizya mbwaakali kuyoopona mwanaabo Jacob, iwakajisi myaka yakuzyalwa iili 11. Tiibakazyi naa cakali kabotu kuti mukwasyi wabo ulongele ku New York State alimwi naa mwanaabo wakali kukonzya kuzyibila kupona buumi bwiindene kapati ambwaakazyibide.

Ba Ricky bakaamba kuti: “Cintu cimwi ncotwakasaanguna kucita nkuyandaula mbungano iyakajisi bakubusi ibakali kucita kabotu kumuuya. Twakali kuyanda kuti Jacob kajisi balongwe babotu banji bakuyanzana abalo.” Cakacitika ncakuti, mbungano njobakatalika kuyanzana ayalo yakajisi bana basyoonto pele yakajisi bakwesu baku Bbeteli banji. Ba Ricky bakaamba kuti: “Notwakamana kuswaangana muswaangano wakusaanguna kumbungano eeyi, ndakabuzya Jacob mbwaakalimvwa kujatikizya mbungano mpya, mbwaanga kwakanyina bamusela wakwe. Wakandaambila kuti: ‘Mutalibiliki bataata. Balongwe bangu balaba bakwesu bakubusi baku Bbeteli.’”

Masimpe, bakubusi baku Bbeteli baba balongwe ba Jacob. Ino wajatikizyigwa buti? Ba Ricky bakati: “Bumwi buzuba masiku, ndakabona kuti malaiti akacili kuyaka muŋanda mwaona mwanaangu. Ndakali kuyeeya kuti ndilamujana kasobana zisobano zyaakkompyuta, pele wakali kubala Bbaibbele! Ciindi nondakamubuzya ncaakali kucita, Jacob wakandaambila kuti, ‘Ndiyanda kuba mukubusi waku Bbeteli, alimwi ndilamanizya kulibala Bbaibbele mumwaka omwe.’” Tacigambyi kuti ba Ricky aba Kendra balikkomene, kutali buyo akaambo kakuti ba Ricky balakonzya kutola lubazu mumulimo wakuyaka ku Warwick pele alimwi akaambo kakuti kulonga kwabo kwapa kuti mwanaabo akomene kumuuya.—Tus. 22:6.

Mulimo wakuyaka ku Wallkill aku Warwick uyakumana, aboobo aabo ibakatambwa kuti bagwasyilizye balizyi kuti mulimo wabo wakubeleka ku Bbeteli uyakumana. Sena bakwesu abacizyi aaba balalibilika kujatikizya nkobayakuunka naa nzyobayakucita? Peepe! Banji balimvwa mbobalimvwa banabukwetene bone ibajisi myaka yakuzyalwa yamuma 50 ibakazwa ku Florida. Ba John, ibalanganya mulimo wakuyaka mukkampani  imwi abakaintu babo ba Carmen, boonse bobilo ibabeleka mulimo wakulisungula ku Warwick, bakati: “Twabona Jehova mbwaatulanganya kwiinda mukutupa nzyotuyandika kuzikusika lino. Tulijisi lusyomo lwakuti Jehova takonzyi kutuleta buyo kuno mpoonya akutulekelezya kumbele.” (Int. 119:116) Ba Luis, ibapanga mincini yakuzimya mulilo, abakaintu babo ba Quenia, babelekela ku Wallkill. Bakaamba kuti: “Twabona kale kuti Jehova mwaabi alimwi ulatupa nzyotuyandika kumubili. Nokuba kuti tatuzyi mbwayakutulanganya, ciindi nayakucita boobo, naa kubusena nkotuyakukkala, tulijsi lusyomo lwakuti uyakuzumanana kutulanganya.”—Int. 34:10; 37:25.

Bunji bwabaabo ibagwasyilizya mumulimo wakuyaka mu New York bakali kukonzya kuba atwaambo twakali kukonzya kupa kuti batalisunguli kubeleka. Nokuba boobo, bakamusola Jehova—mbubwenya mbwatwaambila kucita kuti: “Amundisole buyo, . . . mubone naa tandikoomujalwida milyango yakujulu akumupoomweda zileleko zinji kapati cakuti tamukoobulizya cintu cili coonse.”—Malk. 3:10.

Sena andinywe muyakumusola Jehova akujana zileleko zinji? Kwiinda mumupailo, amulange-lange ncomukonzya kucita kutegwa mutole lubazu mumulimo uulimukubelekwa lino, tacikwe makani naa nku New York naa mumulimo uuli woonse wakuyaka uutola ambele ziyandika zya Bwami, akulibonena mbwayakumuleleka Jehova.—Mk. 10:29, 30.

Ba Dale, basyaazibwene mumakani aakuyaka, aba Cathy, ibazwa ku Alabama, bakulwaizya kubeleka mulimo uuli boobu. Balo babeleka mulimo wakulisungula ku Wallkill, aboobo bakati: “Kuti kamuli basicamba kusiya buumi bubotu mbomupona, muyooba acoolwe cakubona muuya wa Leza mboubeleka.” Ino ncinzi ciyandika kulindinywe kutegwa mulyaabe kubeleka mulimo ooyu? Ba Dale baamba kuti: “Amubuubye-ubye buumi bwanu, amubuubye-ubye buumi bwanu, amuzumanane kubuubya-ubya. Tamukatyompwi pe akusala nkomuyakucita!” Ba Gary, ibazwa ku North Carolina, balijisi luzyibo mukweendelezya mulimo wakuyaka ngobali kubeleka kwamyaka iili 30. Balo abakaintu babo ba Maureen, baamba kuti cimwi cazileleko nzyobajana ku Warwick “nkuswaangana akubelekela antoomwe abakwesu alimwi abacizyi banji ibajisi bube bubotu aabo ibabelesya buumi bwabo boonse kubelekela Jehova ku Bbeteli.” Ba Gary bakayungizya kuti: “Ikutegwa ubeleke a Bbeteli, weelede kupona buumi buubauba, oobo bwalo buli mbobuumi bubotu kapati mbotweelede kupona mubweende bwazintu oobu.” Ba Jason, ibakabeleka mukkampani iibamba zintu zibelesya magesi, alimwi aba Jennifer, kuzwa ku Illinois, bakaamba kuti kubeleka mulimo waku Bbeteli ku Wallkill “ncintu cimwi cikonzya kumupa kuti mumvwe mbobunoobede buumi munyika mpya.” Ba Jennifer bakayungizya kuti: “Cilakkomanisya kapati kulimvwa kuti Jehova ulalumba zyoonse nzyotucita alimwi zijisi mpindu kubuumi bwakumbele oobo mbwatubambila. Jehova ulabikkila maano kutegwa mulelekwe citaambiki.”