KWAMYAKA iibalilwa kuli yosanwe yainda, ba Choong Keon aba Julie, banabukwetene lino ibajisi myaka yakuzyalwa iibalilwa kuma 30, bakali kubeleka kabali bapainiya baciindi coonse mudolopo lya Sydney, mu Australia. Ba Choong Keon bakaamba kuti: “Twakali kubeleka mulimo wakumubili uubelekwa mawoola masyoonto alimwi twakali kukkala kabotu. Nkotwakali kukkala, kwakali kuca kabotu alimwi buumi bwakali kabotu. Twakalikkomene kukkala afwaafwi abanamukwasyi alimwi abalongwe.” Nokuba boobo, manjezyeezya aabo ba Choong Keon aba Julie akali kubapenzya. Ino nkaambo nzi? Bakalizyi kuti bukkale bwabo bwakali kubazumizya kucita milimo minji mumulimo wa Jehova, pele bakali kuwayawaya kubweza ntaamu zyeelede kutegwa bacite oobo.

Mpoonya kumuswaangano wacooko mu 2009, bakaswiilila kumakani aakabanjila kapati mumoyo. Mwaambi wakagamika majwi aakwe kuli baabo ibakali kukonzya kuyungizya mulimo wabo wakukambauka. Wakaamba kuti: “Amweezyeezye cikozyanyo eeci: Namutekenya ulakonzya kuunyona mootokala kuti ugame kulumwensyi naa kululyo lilikke buyo kuti mootokala kaweenda. Mbubwenya buyo, Jesu ulakonzya kutusololela kuti tuyungizye mulimo wesu lilikke buyo kuti katweenda—nkokuti ikuti naa twabweza ntaamu ziyandika kuti tuzuzikizye mbaakani yesu.” * Banabukwetene aaba bakalimvwa mbuli kuti mwaambi wakali kwaambila mbabo kubagama. Kumuswaangano nguwenya ooyu, banabukwetene bamisyinali ibabelekela mucisi ca Taiwan bakabuzyigwa-buzyigwa. Bakaamba lukkomano ndobajana mumulimo wabo wakukambauka alimwi bakakankaizya kuti kucili mulimo mupati uuciyandika kubelekwa. Aciindi eeci alimwi, ba Choong Keon aba Julie bakalimvwa mbuli kuti majwi aaya akagamikidwe kulimbabo.

Ba Julie bakaamba kuti: “Notwakazwa kumuswaangano ooyu, twakapaila kuli Jehova kutegwa atupe busicamba ibwakali kuyandika kutegwa tubweze ntaamu yakulongela kucisi ca Taiwan. Pele twakaliyoowede. Twakalimvwa mbuli kuti tuyanda kusotokela mucizyiba camaanzi malamfwu ciindi cakusaanguna.” Lugwalo ilwakabagwasya kubweza ntaamu, ndugwalo lwa Mukambausi 11:4, ilwaamba kuti: “Uuyeeya muuwo takonzyi kubyala, ayooyo uulanga mayoba takonzyi kutebula.” Ba Choong Keon  bakaamba kuti: “Twakasala kuti tucileke ‘kulanga’ buyo, muciindi caboobo twakatalika ‘kubyala akutebula.’ “ Bakapaila cakutaleka—bakabala makani aabuumi bwabamisyinali alimwi akulembelana tugwalo abaabo ibakalongede kale kuya ku Taiwan, bakasambala mootokala wabo alimwi azintu zyamuŋanda, mpoonya bakaunka ku Taiwan nokwakainda myezi yotatwe yakatobela.

Bakwesu alimwi abacizyi bainda ku 100 kuzwa mumasi aambi babelekela mumasena aabulide basikumwaya ba Bwami mucisi ca Taiwan. Bamwi bazwa ku Australia, Britain, Canada, France, Japan, Korea, Spain, a United States, alimwi bajisi myaka yakuzyalwa iili akati ka 21 a 73. Akati kabo, kuli bacizyi batakwetwe bainda ku 50. Ncinzi cagwasya bakwesu abacizyi aaba basungu kubeleka mulimo wakukambauka mucisi citali cokwabo? Atulange-lange nzyobakaamba.

Mucizyi uutakwetwe uutegwa Laura iwakucisi ca Canada, mupainiya uubelekela mucisi ca Taiwan nkocili kumbo. Kaindi tanaakali kuukkomanina mulimo wakukambauka, pele wakatalika kuukkomanina myaka iili kkumi yainda. Laura wakaamba kuti: “Tiindakali kuukkomanina mulimo wakukambauka akaambo kakuti ndakali kubeleka buyo ciindi cisyoonto, aboobo tiindakajisi luzyibo.” Mpoonya beenzinyina baku Canada bakamukulwaizya kuti baunke limwi kuyakubeleka mulimo wakukambauka kucisi ca Mexico kwamwezi omwe buyo. Wakaamba kuti: “Eeci cakali ciindi cakusaanguna kubeleka ciindi cilamfwu mumulimo wakukambauka alimwi cakali kukondelezya kapati!”

Cintu eeci cikkomanisya icakamucitikila mucizyi Laura cakamukulwaizya kulongela kumbungano iyakali kubelesya mwaambo wakunze aacisi mu Canada. Wakalilembya kwiiya mwaambo waci Chinese, wakali kugwasyilizya mukabunga ikakali kubelesya mwaambo waci Chinese, alimwi wakabikka mbaakani yakuunka ku Taiwan, mbaakani eeyi wakaizuzikizya mu September 2008. Mucizyi Laura wakaamba kuti: “Cakanditolela ciindi citandila kumwaka omwe kutegwa ndizyibile, pele lino tandiyeeyi zyakupilukila ku Canada.” Mbuti mbwalimvwa kujatikizya mulimo wakukambauka? Wakaamba kuti: “Ndilaukkomanina kapati lino mulimo wakukambauka. Cindipa kukkutila kubona bantu mbondiyiisya Bbaibbele kabacinca buumi bwabo ciindi nobayaabwiiya kujatikizya  Jehova. Kubelekela mu Taiwan kwandipa kujana lukkomano luli boobu ziindi zinji.”

Ba Brian alimwi aba Michelle, banabukwetene baku United States ibajisi myaka yakuzyalwa iili kuma 30, bakalongela ku Taiwan myaka iitandila kulusele iyainda. Kumatalikilo, bakali kulimvwa kuti tiibakali kutola lubazu mumulimo wakukambauka cakumaninina. Pele misyinali umwi iwabeleka kwaciindi cilamfwu wakabaambila kuti: “Nokuba buyo kwaabila katulakiti kumuntu, mweelede kuyeeya kuti ambweni nciindi cakusaanguna muntu ooyo kutambula mulumbe wa Jehova. Aboobo, inga caambwa kuti muli mukutola lubazu mumulimo wakukambauka!” Majwi aaya aakukulwaizya akabagwasya kapati ba Brian aba Michelle kuti bazumanane. Aumbi mukwesu wakabaambila kuti: “Kutegwa mutatyompwi, amubone mbomuyaambele kwiiya mwaambo waci Chinese, kutali buzuba abuzuba pele ciindi nomujanika kumuswaangano wabbazu umwi aumwi.” Masimpe bayaambele, alimwi lino balalibonya kuti mbapainiya basungu.

Ncinzi cikonzya kumukulwaizya kwiiya mwaambo wakunze acisi? Amusole kuswaya kucisi nkomulombozya kuyakubelekela. Mpoonya amuunke kumiswaangano akuyanzana abakwesu abacizyi bakubusena ooko, alimwi amubeleke ambabo mumulimo wakukambauka. Ba Brian bakaamba kuti: “Ciindi nomwabona kuti bantu banji balautambula mulumbe wa Bwami alimwi akubona bakwesu abacizyi mbobamuyanda, cilakonzya kumukulwaizya kulwana buyumuyumu bujanika mukubelekela kunze aacisi.”

Bantu banji ibaunka kuyakubelekela kubusena bubulide ku Taiwan bali kucikonzya kuligwasyilizya mumulimo wabupainiya kwiinda mukuyiisya mwaambo wa Chingisi. Ba Kristin alimwi aba Michelle basambala nswi. Ba Kristin bakaamba kuti: “Taakwe nondakasambalide kale nswi mubuumi bwangu, pele candigwasya kuti ndizumanane kukkala mucisi eeci.” Mukuya kwaciindi, ba Kristin bakajana bantu ibabaula nswi lyoonse. Mulimo ooyu ulabagwasya banabukwetene aaba kujana mali aakubelesya, alimwi akubapa ciindi cinji cakucita mulimo mupati ngobakaunkila—mulimo wabupainiya, imulimo wakuzuba bantu.

Ba William aba Jennifer, mbaanabukwetene baku United States, ibakalongela ku Taiwan myaka iitandila kuciloba yainda. Ba William bakaamba kuti: “Zimwi ziindi cilakatazya kwiiya mwaambo, kubeleka mulimo wabupainiya, kulanganya mbungano, alimwi akujana mali aakubelesya mumukwasyi.” Ncinzi cabagwasya kuti bazwidilile alimwi akuti kabakkomene? Balalibikkila mbaakani nzyobakonzya kuzuzikizya. Mucikozyanyo, akaambo kakutaciindizya kulibikkila mbaakani kujatikizya mpobakeelede kusika mukwiiya mwaambo waci Chinese, tiibakatyompwa nobatakali kuyaambele cakufwambaana mukwiiya mwaambo ooyu.

Ba William balayeeya kuti cimwi ciindi mulangizi weendeenda wakabaambila kuti: “Amuukkomanine mulimo wanu wakubelekela kunze aacisi, ikutali kwiile kuyanda kuuzuzikizya.” Munzila imwi inga twaamba kuti, ikuti twabikka mbaakani yakumuuya, tweelede kuukkomanina mulimo ngotucita mukuzuzikizya mbaakani eeyo. Ba William bakaamba kuti, kutobela lulayo oolu kwakabagwasya balo abakaintu babo kucinca kweelana abukkale, kutambula lulayo kuzwa kubakwesu ibali mumikuli ibakubusena oobo, alimwi akucinca mbobakali kucita zintu kutegwa bazwidilile mumulimo wabo wakukambauka kubusena oobo bupya. Bakayungizya kwaamba kuti: “Alimwi cakatugwasya kuyeeya kuti zimwi ziindi twakali kuyandika kulikondelezya akweebelela bubotu bwansumbu nkotwakali kubelekela.”

Mbubwenya mbuli ba William aba Jennifer, mucizyi mupainiya uutakwetwe uutegwa Megan waku United States, ‘ulaukkomanina mulimo wakwe wakubelekela kunze aacisi’ kumwi kaiya mwaambo waci Chinese. Kumamanino aansondo imwi aimwi ulasangana kabunga kabasikumwaya ibabelekela mucilawo cimwi—cilawo ca Kaohsiung, cito cipati mucisi ca Taiwan. Mucizyi Megan wali kukambauka makani mabotu mumato aabantu alimwi akubazubi banswi ibazwa kucisi ca Bangladesh, India, Indonesia, Philippine, Thailand, alimwi a Vanuatu.  Wakaamba kuti: “Akaambo kakuti bazubi banswi tabakkali kwaciindi cilamfwu acito, tulatalisya ziiyo zya Bbaibbele ambabo mpoonya-mpoonya. Kutegwa ndicikonzye kwiiya ambabo boonse, kanji-kanji ndibayiisya mutubunga twabantu bali bone naa bosanwe aciindi comwe.” Ino kwiiya mwaambo waci Chinese kumweendela buti? Wakaamba kuti: “Ndali kulombozya kuti kubota ndacizyiba cakufwambaana, pele ndilaayeeya majwi ngaakaamba mukwesu umwi aakuti: ‘Tweelede kusolekesya kusikila mpotugolela, alimwi Jehova uyakutugwasya notucita boobo.’”

Ba Cathy ibaku Britain kabatanaunka kuyakubelekela kunze aacisi, bakavwuntauzya akubona cisi icakali cibotu nkwakonzya kubelekela mucizyi uutakwetwe. Bakapaila kuli Jehova kujatikizya nzyobakali kulibilika alimwi akulemba magwalo kumitabi iili mbwiibede, kubuzya kujatikizya ntenda nzyakonzya kuyaanya mucizyi uutakwetwe. Nobakamana kucita boobo, bakabikkila kapati maano kubwiinguzi bwamagwalo aabo ngobakatambula alimwi akubona kuti Taiwan bwakali busena mbobakali kunga basala.

Mumwaka wa 2004 kabajisi myaka yakuzyalwa iili 31, ba Cathy bakalongela ku Taiwan, kwalo nkobabede lino alimwi bapona buumi buubauba. Bakaamba kuti: “Ndakali kubabuzya bakwesu abacizyi kujatikizya nkondakali kukonzya kuula micelo acisyumani amuulo uuli kabotu. Nobakandaambila, cakandigwasya kubelesya kabotu mali.” Ino ncinzi cabagwasya kuzumanana kupona buumi buubauba? Ba Cathy bakaamba kuti: “Lyoonse ndilapaila kuli Jehova kutegwa kandikkutila acakulya ncondijisi alimwi azisani zyangu zitaduli. Ndilimvwa kuti Jehova ulayiingula mipailo yangu kwiinda mukunditondezya zintu nzyondiyandika ncobeni alimwi akundigwasya kukkutila nokuba kuti tandijisi zintu zyoonse nzyondiyanda.” Bakayungizya kuti: “Ndilakkomana abuumi bwangu buubauba nkaambo cindigwasya kuti kandibikkila kapati maano kuzintu zyakumuuya.”

Nokuba boobo, buumi bwaba Cathy tabuli buyo buubauba pele alimwi bulakkomanisya. Bakaamba kuti: “Ndilacikonzya kukambauka mubusena bantu banji mobaatambula kapati makani mabotu. Eelo kaka eeci candipa kujana lukkomano lwini-lwini!” Nobakasika ku Taiwan, kwakali mbungano zyobilo zyamwaambo waci Chinese mubusena mobakatalikila kubeleka mulimo wabupainiya, pele mazuba aano kuli mbungano zili ciloba. Ba Cathy bakaamba kuti: “Kulibonena aameso kuyaambele ooku kugambya alimwi akutola lubazu mumulimo wakukambauka cindipa kuti kandikkomene kapati mubuumi bwangu buzuba abuzuba!”

Ino zintu zyabeendela buti ba Choong Keon aba Julie, ibaambidwe kumatalikilo aacibalo? Ba Choong Keon kumatalikilo bakali kulimvwa kuti tabakwe mulimo mumbungano mbwaanga tiibakauzyi kabotu mwaambo waci Chinese. Pele bakwesu bakubusena oobo tabusi mbobakali kulimvwa oobo. Ba Choong Keon bakaamba kuti: “Ciindi mbungano yesu noyakaba mbungano zyobilo, ndakapegwa mikuli minji iiyungizyidwe kandili mukutausi. Aciindi eeco, ndakalimvwa ncobeni kuti ndibelekela kubusena kubulide kapati.” Kumwi kabamweta-mweta bakaamba kuti: “Cakali kukkomanisya kapati kaka kubona kuti andime ndakali kuyandika!” Lino mbaalu. Ba Julie bakayungizya kuti: “Tulimvwa kukkutila, alimwi tulikkomene kwiinda kaindi. Twakaboola okuno kutegwa tugwasye, pele lino tulimvwa kuti twagwasyigwa azintu zikkomanisya izyatucitikila. Tulamulumba Jehova akaambo kakutupa coolwe cakubelekela kokuno!”

Muzisi zinji, kuciyandika babelesi banji mumulimo wakumuuya wakutebula. Sena mulaafwaafwi kumanizya cikolo cakumubili alimwi tamuzyi ncomuyakucita mubuumi? Sena tamukwete naa kukwatwa alimwi mulayandisisya kubelesyegwa kapati mumbunga ya Jehova? Sena mulayanda kuugwasya mukwasyi wanu kuba aalukono lunji lwakumuuya? Sena mwakaleka mulimo wakumubili alimwi mulijisi luzyibo lunji mubuumi ndomukonzya kwaabila bamwi? Tacidoonekwi pe kuti zilongezyo zinji zilamulindila ikuti mwasala kuyungizya mulimo wanu kwiinda mukubelekela kubusena kubulide basikumwaya ba Bwami.