Mibuzyo Yabasikubala
Jesu wakaambila ba Saduki kuti aabo ibabusyigwa “tabakakwati nokuba kukwatwa.” (Lk. 20: 34-36) Sena wakali kwaamba zyabubuke bwaanyika?
Mubuzyo ooyu ulayandika kapati kwaambisya kuli baabo ibakafwidwa. Aabo ibakafwidwa inga bayanda kuti bakakwatane alimwi munyika mpya ayooyo ngobakakwetene limwi aakubusyigwa. Mwaalumi umwi iwakafwidwa wakaamba boobu: “Mebo abakaintu bangu tiitwakalisalila kuti cikwati cesu cimane. Kuzwa ansi aamyoyo yesu twakali kuyanda kuti tuzumanane katukamantene mubukombi alimwi katukwetene kukabe kutamani. Asunu ndicilimvwa mbubwenya oobo.” Sena kuli kaambo kalimvwisya ikapa kuti umwi abe aabulangizi bwakuti aabo ibayakubusyigwa bayakukwata naa kukwatwa? Bwiinguzi mbwakuti tatuzyi pe.
Kwamyaka minji, mabbuku eesu ali kwaamba kuti majwi aa Jesu aajatikizya bubuke alimwi akukwata kweelede kuti akali kwaamba bubuke bwaanyika alimwi akuti aabo babusyigwa kweelede kuti tabakakwati naa kukwatwa. * (Mt. 22:29, 30; Mk. 12:24, 25; Lk. 20:34-36) Nokuba kuti tatukonzyi kukazwida nzunzu kaambo aaka, sena majwi aa Jesu alakonzya kwaamba bubuke bwakujulu? Atulange-lange ncaakaamba Jesu.
Amulange-lange bukkale. (Amubale Luka 20:27-33.) Ba Saduki, ibatakali kusyoma mububuke, bakasola kumujanina kaambo Jesu kwiinda mumubuzyo uujatikizya kukwatwa kuli sikulya zina. * Jesu wakaingula kuti: “Bantu bamubweende bwazyintu oobu balakwata akukwatwa, pele aabo ibeelela kuyookkala mubweende bwazyintu oobo buboola akuyoobusyigwa kubafwu tabakakwati nokuba kukwatwa. Mubwini, tabakafwi limbi nkaambo bayooba mbuli bangelo, alimwi akaambo kakuti banooli bana babubuke, bayooba bana ba Leza.”—Lk. 20:34-36.
Nkaambo nzi mabbuku eesu ncaali kwaamba kuti majwi aa Jesu kweelede kuti akali kwaamba bubuke bwaanyika? Kuli twaambo tobilo itupa kwaamba boobo. Kaambo kakusaanguna nkakuti, ba Saduki kweelede kuti bakali kwaamba bubuke bwaanyika alimwi akuti Jesu wakabaingula kweelana akuyeeya kwabo. Kaambo kabili nkakuti, kumamanino abwiinguzi bwakwe Jesu wakaamba Abrahamu, Izaka, alimwi a Jacobo—basikale ibakali kusyomeka ibalangilwa kuyakubusyigwa ano anyika.—Lk. 20:37, 38.
Nokuba boobo, cilibonya kuti Jesu wakali kwaamba bubuke bwakujulu. Nkaambo nzi ncotukonzya kwaambila boobu? Atubone twaambo tobilo itujanika mumajwi aakwe.
“Aabo ibeelela . . . kuyoobusyigwa kubafwu.” Bananike basyomeka ‘baleelela kunjila mu Bwami bwa Leza.’ (2 Te. 1:5, 11) Baambwa kuti baliluleme alimwi akuti baleelela buumi akaambo kacinunuzyo; aboobo tabafwi mbuli basizibi. (Lom. 5:1, 18; 8:1) Aabo bali boobu baitwa kuti ‘balikkomene alimwi balasalala’ alimwi baleelela kubusyigwa kubuumi bwakujulu. (Ciy. 20:5, 6) Mukwiimpana, aabo ibayakubusyigwa kuti bapone anyika balabikkilizya “abataluleme.” (Mil. 24:15) Sena bataluleme balakonzya kwaambwa kuti ‘baleelela’ kubusyigwa?
“Tabakafwi limbi.” Ma Bbaibbele ambi aamba kuti “tabakonzyi kufwa alimwi” akuti “lufwu talucijisi nguzu alimbabo.” Bananike ibamanizya buumi bwabo bwaanyika cakusyomeka balabusyigwa kubuumi bwakujulu alimwi balapegwa buumi butafwi—butagoli, alimwi butakonzyi kunyonyoonwa. (1 Ko. 15:53, 54) Lufwu talucikwe nguzu kuli baabo ibayakubusyigwa kubuumi bwakujulu. *
Kujatikizya makani ngotwabandika kale, ncinzi ncotukonzya kwaamba? Kulangilwa kuti majwi aa Jesu aajatikizya kukwata naa kukwatwa alimwi abubuke akali kwaamba zyabubuke bwakujulu. Ikuti naa mbocibede oobo, majwi aakwe alakonzya kwaamba zintu zinji kujatikizya baabo ibayakubusyilwa kubuumi bwakujulu, kuti: Tabakwati, tabakonzyi kufwa, alimwi akuti bali mbuli bangelo—zilenge zyamuuya izili mubusena bwamuuya. Pele bupanduluzi oobo bulakonzya kubusya mibuzyo iili mbwiibede.
Mubuzyo wakusaanguna ngwakuti: Nkaambo nzi Jesu ncaakali kukonzya kwaamba zyabubuke bwakujulu naakali kwiingula ba Saduki, balo ibalangilwa kuti bakali kubuzya kujatikizya bubuke bwaanyika? Talili lyoonse Jesu naakali kwiingula basikumukazya kweelana ambobakali kuyeeya. Mucikozyanyo, ba Juda ibakali kuyanda kuti abatondezye citondezyo, wakabaingula kuti: “Amulimwaye tempele eeli, eelyo mumazuba otatwe ndiyooliimika.” Jesu wakalizyi kuti bakali kuyeeya bwaanda bwini bwatempele, “pele tempele ndyaakali kwaamba wakali mubili wakwe.” (Joh. 2:18-21) Ambweni Jesu wakabona kuti tiicakali kuyandika kubaingula ba Saduki ibatakajisi lusyomo, balo ibatakali kusyoma mububuke naa ibatakali kusyoma kuti kuli bangelo. (Tus. 23:9; Mt. 7:6; Mil. 23:8) Muciindi caboobo, ulakonzya wakali kuyanda kuyubununa kasimpe kujatikizya bubuke bwakujulu kutegwa agwasye basikwiiya bakwe ibakali kusyomeka, balo ibakali kulangila kuti buzuba bumwi bayakubusyilwa kubuumi bwakujulu.
Mubuzyo wabili ngwakuti: Nkaambo nzi Jesu ncaakamanizya makani aaya kwiinda mukwaamba Abrahamu, Izaka, alimwi a Jakobo, balo ibayakubusyilwa kubuumi bwaanyika? (Amubale Matayo 22:31, 32.) Amubone kuti Jesu wakaamba kujatikizya basinsiku ciindi naakamana kwaamba majwi aakuti “kujatikizya bubuke bwabafwide.” Majwi aaya alakonzya kutondezya kuti wakacinca mubandi ngwaakali kwaamba. Kumane, kuzwa kumalembe aa Musa, alo ba Saduki ngobakali kulyaamba kuti ngobakali kusyoma, Jesu wakabelesya majwi Jehova ngaakaambila Musa kuzwa mucitewo icakali kuyaka mulilo kutegwa atondezye bumboni bwakuti bubuke bwaanyika makanze aa Leza aasinizyide.—Kul. 3:1-6.
Mubuzyo watatu ngwakuti: Ikuti majwi aa Jesu aajatikizya bubuke alimwi akukwata naa kukwatwa aamba zyabubuke bwakujulu, sena eeci caamba kuti bantu ibayakubusyigwa aanyika bayakukwata naa kukwatwa? Jwi lya Leza kunyina nolipa bwiinguzi bugaminide kujatikizya mubuzyo ooyu wacigaminina. Pele ikuti naa Jesu wakali kwaamba kujatikizya bubuke bwakujulu, nkokuti majwi aakwe taatondezyi kuti naa bantu ibayakubusyigwa aanyika munyika mpya bayakukwata naa kukwatwa.
Pele tulizyi kuti Jwi lya Leza cakutainda mumbali lyaamba kuti lufwu ndolumana cikwati. Aboobo, iwafwidwa teelede kulipa mulandu ikuti wasala kukwata naa kukwatwa alimwi. Aaya makani aakulisalila, alimwi bantu bali boobo tabeelede kutongookwa pe ikuti naa basala kujana mweenzinyina wakukwatana limwi.—Lom. 7:2, 3; 1 Ko. 7:39.
Cakutadooneka, tulakonzya kuti tulijisi mibuzyo minji kujatikizya mbobuyakuba buumi munyika mpya. Muciindi cakutalika kuyeeyela buyo bwiinguzi kumibuzyo eeyo, tweelede kulindila buyo. Pele ncotusinizyide ncakuti: Bantu bamvwida bayakukkomana, nkaambo Jehova uyakubapa zintu zyoonse nzyobayandika alimwi anzyobalombozya.—Int. 145:16.
^ par. 4 Amubone Ngazi Yamulindizi yamu Chingisi ya June 1, 1987, mapeeji 30-31.
^ par. 5 Kaindi ciindi Bbaibbele nolyakali kulembwa kwakali cilengwa cakukwatwa kuli sikulya zina, mwalo mwaalumi mwaakali kukwata mulamwe iwakafwidwa katajisi mwana musankwa kutegwa amuzyalile mwana uukonzya kubamba zina lyamukwasyi wabausyi.—Matl. 38:8; Dt. 25:5, 6.
^ par. 9 Aabo ibayakubusyigwa kupona buumi bwaanyika banakujisi coolwe cakupegwa buumi butamani ikutali buumi butafwi. Kutegwa muzyibe zinji kujatikizya lwiindano luliko akati kabuumi butafwi alimwi abuumi butamani, amubone Ngazi Yamulindizi yamu Chingisi ya April 1, 1984, mapeeji 30-31.
