Bakalyaaba Amoyo Woonse Kuyakubelekela mu Philippines

MYAKA iibalilwa kukkumi iyainda, banabukwetene ibajisi myaka yakuzyalwa iili kuma 30, ba Gregorio aba Marilou, bakali kubeleka kabali bapainiya mudolopo lya Manila mpoonya aciindi nciconya eeco boonse bobilo bakali kubeleka milimo yakumubili. Kucita boobo tiicakali cuuba-uba, nokuba boobo bakacikonzya. Mpoonya ba Marilou bakasumpulwa akuba mupati wamulimo mubbanki mobakali kubeleka. Bakaamba kuti: “Milimo njotwakali kubeleka yakali kutuletela mali manji, twakali bukkede.” Mubwini, tiibakajisi penzi lyamali, aboobo bakasala kuti bayake ŋanda njobakali kulombozya lyoonse mubusena bubotu kapati, ibusena ibwakali kujwe aadolopo lya Manila, musinzo uulampa makkilomita aali 19. Bakazuminana akkampani imwi kutegwa ibayakile ŋanda alimwi akuti bakali kunoobbadela mali aayo mwezi amwezi myaka iili kkumi.

“NDAKALIMVWA KUTI NDAKALI KUBBIDA JEHOVA”

Ba Marilou bakaluula kuti: “Mulimo wangu mupya wakali kuyanda ciindi cinji akubeleka canguzu, aboobo busungu bwangu bwakucita milimo ya Bunakristo bwakaceya kapati. Ndakalimvwa kuti ndakali kubbida Jehova.” Mpoonya bakapandulula kuti: “Tiindakali kucikonzya kubelesya ciindi ncondakabikkide ambali kuti kandibeleka mumulimo wa Jehova.” Akaambo kakutakkomana  abukkale oobu, ba Gregorio aba Marilou bakakkala ansi bumwi buzuba akubandika kujatikizya buumi bwabo. Ba Gregorio bakaamba kuti: “Twakali kuyanda kucinca pele tiitwakalicizyi cini ncotwakeelede kucita. Twakabandika mbotwakali kunga twabelesya maumi eesu mumulimo wa Jehova kusikila mpotugolela, kwaambisya mbwaanga tiitwakajisi bana. Twakapaila kuli Jehova kulomba busolozi.”

Aciindi nciconya eeco, bakaswiilila makani aasiyene-siyene aakali kwaamba zyakubelekela kumasena kubulide basikumwaya ba Bwami. Ba Gregorio bakaamba kuti: “Twakalimvwa kuti makani aaya bwakali bwiinguzi kuzwa kuli Jehova kujatikizya mipailo yesu.” Banabukwetene aaba bakapaila kulomba lusyomo lunji kutegwa babe basicamba akusala kabotu. Buyumuyumu bumwi bupati mbobakajisi bwakali kujatikizya ŋanda njobakacili kuyaka. Bakabbadelede kale mali aakeelede kubbadelwa mumyaka yotatwe. Ncinzi ncobakali kunga bacita? Ba Marilou bakaamba kuti: “Kwiimika mayake, cakali kwaamba kusweekelwa mali manji kapati ngotwakabbadelede kale. Pele twakabona kuti twakeelede kusala akati kakubikka kuyanda kwa Jehova mubusena bwakusaanguna naa kuyanda kwesu.” Nobakayeeya majwi aamwaapostolo Paulo aajatikizya ‘kubona zyintu zimwi kuti nzyabuyo,’ bakasala kwiimika mayake, bakacileka kubeleka mulimo wakumubili, bakasambala mpasya zinji nzyobakajisi, mpoonya bakalongela kumunzi umwi uujanika ansumbu ya Palawan, musinzo uulampa makkilomita aali 480 kumusanza aadolopo lya Manila.—Flp. 3:8.

‘BAKAIYA ICAKALI KUKONZYA KUBAGWASYA’

Kabatanaunka, ba Gregorio aba Marilou bakasoleka kulibambila kupona buumi butayandiki zyintu zinji, pele tiibakazyi bwini buumi bwabo mbobwakali kuyakuba mane kusikila nobakasika kubusena oobo. Ba Marilou bakaamba kuti: “Cakali kugambya kapati. Kwakanyina magesi azyintu zimwi zipa kuti buumi buube-ube. Muciindi cakujikila acitofwu, twakeelede kugonka nkuni akujikila amulilo. Kwakanyina zintoolo zipati-pati, alimwi tiindakali kukonzya kucita zyintu zimwi zicitwa mudolopo.” Nokuba boobo, banabukwetene aaba lyoonse bakali kuyeeya kaambo ikakabapa kuti balongele kubusena oobu, kwakainda buyo ciindi cisyoonto bakazyibila. Ba Marilou bakaamba kuti: “Lino ndilakkomana kubona bubotu bwazilenge, kubikkilizya anyenyezi. Cikkomanisya kapati, nkubona bantu mbobakkomana mwabakambaukila. Kubelekela kokuno, kwatugwasya ‘kwiiya icikonzya kutugwasya’ kutegwa tukkutile.”—Flp. 4:12.

Ba Gregorio bakaluula kuti: “Notwakasika mubusena oobu, kwakali buyo Bakamboni bone. Bakakkomana kapati ciindi nondakatalika kupa makani aabuleya nsondo ansondo alimwi anondakatalika kulizya gita lyangu ciindi cakwiimba nyimbo zya Bwami.” Mumwaka buyo omwe, banabukwetene aaba bakabona kabunga aaka kasyoonto mbokakakomena akuba mbungano iicita kabotu iijisi basikumwaya bali 24. Ba Gregorio bakaamba kuti: “Tulalumba kapati kuluyando ndobatutondezya basimbungano.” Lino, balanga musyule myaka iinda kucisambomwe yainda njobali kubeleka mumunzi ooyu, baamba kuti: “Kunyina cintu ncotukonzya kweezyanisya alukkomano  luboola akaambo kakubona bantu bambi bapya kababoola mumbungano. Lino tulimvwa kuti buumi bwesu bulaampindu kapati kwiinda kaindi.”

“NDALABILA ALIMWI NDABONA KUTI JEHOVA MUBOTU!”

Mucisi ca Philippines, bakwesu abacizyi babalilwa ku 3,000 baunka kuyakubelekela mumasena mubulide basikumwaya ba Bwami. Akati kabo kuli bacizyi batanakwatwa ibababilwa ku 500. Amubone cikozyanyo caba Karen.

Ba Karen balo lino ibajisi myaka yakuzyalwa iili kuma 25, bakakomenena mudolopo lya Baggao, mu Cagayan. Nobakacili bakubusi, lyoonse bakali kuyeeya mbobakali kunga bayungizya mulimo wabo wakukambauka. Bakaamba kuti: “Kuzyiba kuti ciindi casyaala caceya alimwi akuti bantu bamisyobo yoonse beelede kuumvwa mulumbe wa Bwami, ndakasala kuti ndikabelekele kubusena kubulide bakambausi.” Nokuba kuti banamukwasyi bamwi bakasola kuboongelezya kuti bajane lwiiyo lwaatala muciindi cakuunka kumunzi kwaakukambauka, ba Karen bakapaila kuli Jehova kutegwa abasololele. Alimwi bakabandika abaabo ibakali kubelekela kubusena bwakumunzi. Nobakajisi myaka iili 18, bakalonga akuunka kumunzi umwi musinzo uulampa makkilomita aali 64 kuzwa mudolopo mobakali kukkala.

Kumbungano nsyoonto ba Karen nkobakaunka kuyakugwasyilizya, cilawo cili mumalundu mumbali aa Lwizi lwa Pacific. Ba Karen bakaamba kuti: “Kuzwa ku Baggao kuya kumbungano iimbi, twakali kweenda mazuba otatwe, nzila ziinda mumalundu alimwi akuzabuka milonga ziindi ziinda ku 30.” Bakayungizya kwaamba kuti: “Kutegwa ndisike kumaanda aabantu mbondakali kuyiisya Bbaibbele, ndakali kweenda mawoola aali cisambomwe, koona aŋanda yasikwiiya mpoonya bwaca alimwi ndakali kweenda mawoola aali cisambomwe kupiluka kuŋanda. Sena kuli bubotu bwakajanika? Ba Karen bakaamba kuti: “Zimwi ziindi, maulu inga alacisa, nokuba boobo inga kandili ndamana kale kusololela ziiyo zya Bbaibbele zili 18. Ndalabila alimwi ndabona kuti Jehova mubotu!”—Int. 34:8.

“NDAKAIYA KUSYOMA JEHOVA”

Ncinzi cakakulwaizya mucizyi uutakwetwe uujisi myaka yakuzyalwa iili kuma 40 ulaazyina lyakuti Sukhi uukkala mucisi ca United States kutegwa aunke kucisi ca Philippines? Mumwaka wa 2011 mucizyi ooyu wakajanika kumuswaangano wabbazu kwalo banabukwetene bamwi nkobakabuzyigwa-buzyigwa. Bakaluula mbobakasambala bunji bwampasya nzyobakajisi akulongela kucisi ca Mexico kutegwa bakagwasyilizye mumulimo wakukambauka. Ba Sukhi bakaamba kuti: “Kubuzya-buzya okuya, kwakapa kuti nditalike kuyeeya kujatikizya mbaakani nzyondatakali kuyeeya.” Ciindi ba Sukhi balo ibali mbaamweenye nobakazyiba kuti kwakali kuyandika lugwasyo lupati lwakugwasya bantu babelesya mwaambo waci Punjabi ibakkala mucisi ca Philippines, bakasala kuunka kuyakugwasyilizya. Sena kuli buyumuyumu mbobakajana?

Ba Sukhi bakaamba kuti: “Cakali ciyumu kusala akati kazyintu nzyondakeelede kusambala anzyondatakeelede kusambala. Alimwi, kwamyaka iili 13 ndakali kukkala  kabotu muŋanda yangu, lino ndakalonga akutalika kulelwa. Tiicakali cuuba-uba, pele kucita oobo kwakandigwasya kutegwa ndilibambile kutalika kupona buumi butayandiki zyintu zinji.” Mbuyumuyumu nzi mbobakajana ciindi nobakalongela kucisi ca Philippines? Bakaamba kuti: “Kuyoowa zyuuka mbuli insinsini akuyeeya kuŋanda bwakali buyumuyumu bupati kulindime. Ndakaiya kusyoma Jehova kwiinda kaindi!” Sena eeci cakabagwasya? Kumwi kabamweta-mweta, ba Sukhi bakaamba kuti: “Jehova utwaambila kuti, ‘Amundisole, mubone naa sikoomutilila coolwe cakufwasuka loko.’ Majwi aaya ndilaabona mbwaali aamasimpe ciindi beni ŋanda nobandibuzya kuti, ‘Ino muyakupiluka lili? Ndicijisi mibuzyo minji.’ Eeci cilandikkomanisya kapati kaka kugwasya bantu balaanzala yakumuuya!” (Malk. 3:10) Ba Sukhi bakayungizya akwaamba kuti: “Buyumuyumu bupati mbondakajisi mbwakusala kuti ndilonge. Nindakacita oobo, cakali kugambya kubona Jehova mbwaakali kundilanganya.”

“NDAKACILEKA KUYOOWA”

Ba Sime, mukwesu uukwete uujisi myaka yakuzyalwa iitandila ku 40, wakalonga kuzwa kucisi ca Philippines kuya kucisi cimwi icili kumusanza lwaambo mu Asia kutegwa akabeleke mulimo umwi waatala. Ciindi nobakali kokuya, mulangizi wabbazu wakabakulwaizya kapati alimwi aalo makani aakapegwa amukwesu umwi uuli mu Kabunga Keendelezya akabakulwaizya ba Sime kutegwa babikke kuyanda kwa Jehova mubusena bwakusaanguna mubuumi bwabo. Ba Sime bakaamba kuti: “Muzeezo wakuti ndicileke kubeleka wakali kundipa kuba acilabila.” Nokuba boobo, bakauleka mulimo wabo wakumubili akupiluka ku Philippines. Lino, ba Sime abakaintu babo ba Haidee, babelekela mucooko ca Davao del Sur, kumusanza kwacisi eeco alimwi ikuyandika basikumwaya ba Bwami kutegwa bakambauke mucilawo cipati icili kooko. Ba Sime bakaamba kuti: “Ikuti ndalanga musyule, ndilikkomene kapati kuti ndakacileka kuyoowa kusweekelwa mulimo wangu alimwi akuti ndacikonzya kubikka Jehova mubusena bwakusaanguna. Kunyina cintu ciletela lukkomano kapati mubuumi kwiinda kuzyiba kuti upa Jehova zyintu ziinda kubota!”

“KULATUKKOMANISYA KAPATI!”

Ciindi ba Ramilo aba Juliet, bapainiya banabukwetene ibajisi myaka yakuzyalwa iinda buyo asyoonto aa 30, nobakazyiba kuti mbungano imwi iyakali afwaafwi, musinzo uulampa makkilomita aali 30 yakali kuyandika lugwasyo, bakalisungula kuyakugwasya. Aboobo, nsondo ansondo, ziyume zitete, ba Ramilo aba Juliet ziindi izili mbozibede baleenda ahonda yabo kuya kumiswaangano amumulimo wakukambauka kumbungano eeyo. Nokuba kuti nzila taili kabotu alimwi amabbiliki taali kabotu, balikkomene akaambo kakuti bakayungizya mulimo wabo. Ba Ramilo bakaamba kuti: “Mebo abakaintu bangu tusololela ziiyo zya Bbaibbele izili 11! Kubelekela kubusena kubulide basikumwaya kuyandika kulyaaba kapati, pele kucita boobo kulatukkomanisya kapati!”—1 Ko. 15:58.

Sena mulayanda kuzyiba zinji kujatikizya kubelekela kubusena kubulide basikumwaya ba Bwami mucisi canu naa mucisi cimbi? Ikuti kacili boobo, amumwaambile mulangizi wanu wabbazu, alimwi amubale cibalo cakuti: “Sena Inga ‘Mwazabukila ku Makedoniya’?” mu Mulimo Wesu Wa Bwami wamu August 2011.

[Majwi aakwelelezya sikubala aali apeeji 3]

“Kunyina cintu ncotukonzya kweezyanisya alukkomano luboola akaambo kakubona bantu bambi bapya kababoola mumbungano. Lino tulimvwa kuti buumi bwesu bulaampindu kapati kwiinda kaindi.”

—Ba Gregorio aba Marilou

[Cifwanikiso icili apeeji 3]

[Kabbokesi kali apeeji 4]

BAMWI MBOBACIKONZYA KUJANA MALI AAKUBELESYA

Bakwesu abacizyi ibabalilwa ku 70—bunji bwabo ibajisi myaka yakuzyalwa iili akati ka 18 a 50 ibazwa muzisi zimbi babelekela mucisi ca Philippines. Ba Robert aba Mirjam, banabukwetene ibajisi myaka yakuzyalwa iibalilwa ku 45 ibakazwa ku Germany bakaamba kuti bakalonga kutegwa bakabeleke buyo mwaka omwe. Lino kwainda myaka 14, alimwi bacibelekela mucisi ca Philippines! Ino bacikonzya buti kujana mali aakubelesya? Ba Robert bakaamba kuti: “Mbwaanga nciyumu kujana mulimo okuno, ciindi comwe amwaka inga tulapiluka ku Germany kuyakubeleka myezi yotatwe. Mali ngotujana alatugwasya kuzumanana kupona buumi butayandiki zyintu zinji mpoonya akuzumanana kubelekela mucisi ca Philippines kwamyezi yoonse mane mwaka wamana.” Cakutadooneka, kukkala mucisi cimbi kulijisi buyumuyumu bumwi, nokuba boobo ba Mirjam bakaamba kuti: “Ndilimvwa kukkomana kapati mumoyo kubona Jehova mbweendelezya.” Ba Robert balaazumina makani aayo, baamba kuti: “Kubelekela kokuno kwayumya lusyomo lwesu.”

[Cifwanikiso]

[Cifwanikiso icili apeeji 5]

Ba Karen

[Cifwanikiso icili apeeji 5]

Ba Sukhi

[Cifwanikiso icili apeeji 6]

Ba Sime aba Haidee

[Cifwanikiso icili apeeji 6]

Ba Juliet aba Ramilo