‘Mutamukalalili Jehova’
‘Mutamukalalili Jehova’
“Bufubafuba bwamuntu bulapilinganya inzila yakwe, elyo moyo wakwe ulakalalila Jehova.”—TUS. 19:3.
INO INGA MWAINGULA BUTI?
Ncinzi cikonzya kupa kuti ‘tumukalalile Jehova’?
Ino ntwaambo nzi tosanwe tukonzya kutugwasya kutegwa tutamukalalili Leza?
Ncinzi ncotweelede kuyeeya ciindi notujisi mapenzi?
1, 2. Nkaambo nzi ncotuteelede kupa Jehova mulandu akaambo kamapenzi aacitikila bantu? Amupe cikozyanyo.
AMWEEZEEZYE kuti mwaalumi umwi uukwete alimwi uumvwana kapati amukaintu wakwe naasika aŋanda wajana kuti zyintu muŋanda zilinyongene. Tebule azyuuno zyanyonyoonwa, mitiba ankomeki zyapwayaulwa, kkapeti yanyonyooka cakuti tiikonzyi kubambwa alimwi. Ŋanda yakwe mbotu njaali kuyanda yanyonyooka. Ino muyeeya kuti inga wapa bani mulandu? Sena inga waamba kuti: “Nkaambo nzi mukaangu ncaacitila boobu?” Peepe, cakutadooneka inga waamba kuti: “Nguni wacita boobu?” Ino nkaambo nzi? Akaambo kakuti ulizyi kuti mukaakwe ngwayanda takonzyi kucita boobu.
2 Mazuba aano, munzi wabantu wabija akaambo kakusofwaala kwamasena motukkala, lunya, alimwi akutalilemeka. Mbotuli bantu baiya Bbaibbele, tulizyi kuti Jehova talinguwe uutalisya mapenzi. Wakalenga nyika ino kuti ibe paradaiso iikondelezya. (Matl. 2:8, 15) Jehova ngu Leza siluyando. (1 Jo. 4:8) Kwiiya Magwalo kwatugwasya kuzyiba cini citalisya mapenzi manji munyika. Taakwe uumbi, pele ngu Saatani Diabolosi, “mweendelezi wanyika.”—Joh. 14:30; 2 Ko. 4:4.
3. Mbuti kuyeeya kwesu mbokukonzya kunyonganizyigwa?
3 Nokuba boobo, tatukonzyi kupa mulandu Saatani akaambo kamapenzi oonse ngotujisi. Nkaambo nzi? Akaambo kakuti mapenzi amwi alaboola akaambo kakulubizya kwesu. (Amubale Deuteronomo 32:4-6.) Nokuba kuti tulakonzya kukazumina kaambo aaka, kutalondoka kwesu kulakonzya kunyonganya mbotuyeeya alimwi akupa kuti tutole nzila iikonzya kutusololela kumapenzi. (Tus. 14:12) Munzila nzi? Muciindi cakulipa mulandu naa kupa Saatani akaambo kapenzi limwi, tulakonzya kupa Jehova mulandu. Ambweni tulakonzya ‘kumukalalila Jehova.’—Tus. 19:3.
4, 5. Mbuti Munakristo mbwakonzya ‘kumukalalila Jehova’?
4 Mubwini, sena cilakonzyeka ‘kukalalila Jehova’? Inzya, pele kucita boobo inga tiikwagwasya pe. (Is. 41:11) Ncinzi ncotukonzya kulangila kujana? Sikweema umwi wakaamba kuti: “Kuboko kwako nkufwaafwi kapati kuti ulwane a Leza.” Andiza inga tiitwasika mpotwaamba majwi aakutongooka Jehova. Pele lugwalo lwa Tusimpi 19:3, lwaamba kuti bufwubafwuba “bulapilinganya inzila yakwe, elyo moyo wakwe ulakalalila Jehova.” Inzya, muntu ulakonzya kukalalila Leza mumoyo wakwe. Muuya ooyu ulakatazya kubona. Muntu umwi, ulakonzya kumubikkilila Jehova. Akaambo kakucita boobo, ulakonzya kucileka kuyanzana ambungano naa kucileka kugwasyilizya bubambe bwakukomba Jehova.
5 Ncinzi cikonzya kutupa ‘kumukalalila Jehova’? Mbuti mbotukonzya kukeeleba kakole aako? Cilayandika kuzyiba bwiinguzi kumibuzyo eeyi. Nkaambo nzi? Akaambo kakuti cilongwe cesu a Jehova Leza cilijatikizyidwe.
NCINZI CIKONZYA KUTUPA ‘KUMUKALALILA JEHOVA’?
6, 7. Nkaambo nzi bana Israyeli mumazuba aa Musa ncobakatalika kutongooka Jehova?
6 Ncinzi cikonzya kupa kuti mubelesi wa Jehova uusyomeka atalike kutongooka Leza? Atulange-lange twaambo tosanwe alimwi azikozyanyo zyamu Bbaibbele izitondezya bamwi kaindi mbobakawida mukakole aaka.—1 Ko. 10:11, 12.
7 Ŋambawido yabamwi iitali kabotu ilakonzya kutunyonganya. (Amubale Deuteronomo 1:26-28.) Kwakaindide buyo ciindi cisyoonto kuzwa ciindi bana Israyeli nobakavwunwa kuzwa mubuzike mu Egepita. Munzila yamaleele Jehova wakaletede zipenzyo zili kkumi kucisi eeciya icakali kubadyaaminina, kumane wakanyonyoona Farao abasikalumamba bakwe mu Lwizi Lusalala. (Kul. 12:29-32, 51; 14:29-31; Int. 136:15) Bantu ba Leza bakalilibambilide kunjila Munyika Yakasyomezyedwe. Pele, aciindi eeci ciyandika kapati, bana Israyeli bakatalika kutongooka Jehova. Ncinzi cakapa kuti babule lusyomo? Bantu bakatyompwa akaambo kazyintu zitali kabotu nzyobakali kwaamba bamwi ibakatumidwe kuyakutwela nyika iilya. (My. 14:1-4) Ncinzi cakacitika? Izyalani lyoonse tiilyakazumizyigwa kunjila ‘munyika iilya mbotu.’ (Dt. 1:34, 35) Sena andiswe zimwi ziindi inga twazumizya ŋambawido yabamwi iitali kabotu kunyonganya lusyomo lwesu alimwi akutupa kuti tutalike kutongooka mbwatweendelezya Jehova?
8. Ncinzi cakapa kuti bantu ba Leza mumazuba aa Isaya bape Jehova mulandu akaambo kabukkale mobakabede?
8 Mapenzi alimwi abuyumuyumu bulakonzya kututyompya. (Amubale Isaya 8:21, 22.) Mumazuba Isaya ngaakali kupona, cisi caba Juda cakalijana mubuyumuyumu bupati. Bakazingulukidwe abasinkondonyina. Cakulya cakali kukatazya kujana. Bantu banji bakali anzala. Kuyungizya waawo kwakali penzi lipati, nzala yakumuuya. (Am. 8:11) Muciindi cakulangila kuli Jehova kuti abagwasye kumana mapenzi aaya, bakatalika ‘kusampaula’ mwami wabo alimwi a Leza wabo. Inzya, bakapa Jehova mulandu akaambo kamapenzi aabo. Ikuti twacitikilwa ntenda naa mapenzi aatugeme, sena andiswe mumoyo wesu inga twaamba kuti, ‘Ino Jehova wakali kuli ciindi nondakali kuyanda kuti andigwasye?’
9. Nkaambo nzi bana Israyeli mumazuba aa Ezekieli ncobakali kuzilanga munzila iitaluzi zyintu?
9 Tatuzyi twaambo toonse tujatikizyidwe. Akaambo kakutazyiba twaambo toonse tujatikizyidwe, bana Israyeli mumazuba aa Ezekieli bakali kuyeeya kuti nzila zya Jehova ‘taziluleme.’ (Ezk. 18:29) Cakali mbuli kuti balibikka kuba babetesi ba Leza, akubikka zyeelelo zyabo beni zyabululami ambele aali zyeezyo zya Jehova alimwi akumubeteka kweelana aluzyibo lusyoonto ndobakajisi muzyintu. Ikuti zimwi ziindi tatucimvwisyi kabotu cibalo camu Bbaibbele naa zyintu mbozicitika mubuumi bwesu, sena tweelede kulimvwa kuti nzila ya Jehova tiili kabotu, ‘tiiluleme’?—Job. 35:2.
10. Mbuti umwi mbwakonzya kutobela cikozyanyo ca Adamu citali kabotu?
10 Tupa bambi mulandu akaambo kazibi zyesu alimwi akulubizya kwesu. Kuzwa buyo kumatalikilo, Adamu wakapa Leza mulandu akaambo kacibi cakwe. (Matl. 3:12) Adamu wakapa Jehova mulandu, nokuba kuti wakacita caali alimwi wakalizyi izyakali kuyakuboola akaambo kakutatobela mulawo wa Leza. Munzila imwi wakali kwaamba kuti Jehova wakamupa mukaintu uutali kabotu. Kuzwa ciindi eeco, abamwi batobela cikozyanyo ca Adamu cakupa mulandu Leza akaambo kakulubizya kwabo. Inga twacita kabotu kulibuzya kuti, ‘Sena kutyompwa akaambo kakulubizya kwangu inga kwandipa kutakkomana azyeelelo zya Jehova?’
11. Ino nciiyo nzi ncotukonzya kwiiya kuli Jona?
11 Tulatalika kuliyanda kapati. Musinsimi Jona tanaakakkomana akusala kwa Jehova kwakufwida luzyalo bana Nineve. (Jon. 4:1-3) Nkaambo nzi? Kweelede kuti wakali kulibilika kapati kujatikizya bantu mbobakali kuyakumubona ikuti lunyonyooko ndwaakali kwaambilizya tiilwacitika. Jona wakazumizya kulibilika kujatikizya mpuwo yakwe kusinkila luzyalo ndwakeelede kuba andulo kubana Nineve bakeempedwe. Sena andiswe tulakonzya kuliyanda kapati cakuti twatalika ‘kukalalila Jehova’ akaambo kakutafwambaana kuleta mamanino? Ikuti twali kukambauka kwamyaka minji kuti buzuba bwa Jehova buli afwaafwi, sena inga twacileka kumusyoma Jehova ciindi bamwi nobatukazya akaambo kakukambauka ncolyaamba Bbaibbele?—2 Pe. 3:3, 4, 9.
MBOTUKONZYA KUCITA KUTEGWA ‘TUTAMUKALALILI JEHOVA’
12, 13. Ikuti mumoyo wesu twatalika kudooneka milimo imwi ya Jehova, ncinzi ncotweelede kubikkila maano?
12 Ncinzi ncotukonzya kucita ikuti moyo wesu uutalondokede watalika kudooneka milimo imwi ya Jehova? Amuyeeye kuti kucita boobo tacili camaano. Busanduluzi bumwi bwa Tusimpi 19:3, bwaamba kuti: “Ciindi bufuba-fuba bwamuntu nobumutola kukunyonyooka, moyo wakwe uzonda Mwami Leza.” (BT) Katuyeeyede oobo, lino atulange-lange twaambo tosanwe tuyakutugwasya kutazumizya kutyompwa mubuumi kutupa kupa mulandu Jehova.
13 Amuzumanane kuyumya cilongwe canu a Jehova. Tulakonzya kutantamuka ciyanza eeci ciboola akaambo kakutalondoka cakukalalila Leza ikuti twazumanana kuyumya cilongwe cesu anguwe. (Amubale Tusimpi 3:5, 6.) Tweelede kusyoma muli Jehova. Alimwi tatweelede kuba basongo mumeso eesu tobeni naa kuliyanda. (Tus. 3:7; Muk. 7:16) Ikuti twacita oobo ciindi zyintu zibi nozyacitika, tatukamupi mulandu Jehova.
14, 15. Ncinzi ciyakutugwasya kutajatikizyigwa azyintu zibi nzyobakonzya kwaamba bamwi?
14 Mutalekeli zyintu nzyobaamba bamwi zitali kabotu kumunyonganya. Bana Israyeli mumazuba aa Musa bakajisi twaambo tubotu twakusyoma kuti Jehova wakali kuyakuzwidilila kubanjizya mu Nyika Yakasyomezyedwe. (Int. 78:43-53) Pele ciindi nobakamvwa makani aatyompya aabasikutwela bali kkumi, ‘tiibakayeeya janza lyakwe.’ (Int. 78:42) Ikuti twazinzibala kuyeeya milimo ya Jehova, katuziyeeyede zyintu zibotu zyoonse nzyaatucitila, tuyakuyumya cilongwe cesu anguwe. Akaambo kakucita boobo, tatukazumizyi zyintu zibi nzyobaamba bamwi kutwaandaanya a Jehova.—Int. 77:11, 12.
15 Mbuti kuti katujisi mizeezo mibi kujatikizya bakombima? Mubukkale buli boobo, cilongwe cesu a Jehova cilakonzya kujatikizyigwa. (1 Jo. 4:20) Ciindi bana Israyeli nobakadooneka kusalwa kwa Aroni alimwi amukuli ngwaakajisi, Jehova wakabona kuti kucita boobo kwakali kutongooka nguwe. (My. 17:10) Mbubwenya buyo, andiswe ikuti twatalika kutongooka kujatikizya baabo Jehova mbabelesya kweendelezya mbunga yakwe yaanyika, inga twaamba kuti tutongooka Jehova.—Heb. 13:7, 17.
16, 17. Ncinzi ncotweelede kuyeeya ciindi notujisi mapenzi?
16 Amuyeeye kuti Jehova talinguwe uutuletela mapenzi. Nokuba kuti bana Israyeli mumazuba aa Isaya bakalilekede kukomba Jehova, wakacili kuyanda kubagwasya. (Is. 1:16-19) Kufwumbwa mapenzi ngotukonzya kujana, tulakonzya kuumbulizyigwa kuzyiba kuti Jehova ulatubikkila maano alimwi uyanda kutugwasya. (1 Pe. 5:7) Masimpe ngakuti, utusyomezya kutupa nguzu ziyandika kutegwa tuzumanane kuliyumya.—1 Ko. 10:13.
17 Ikuti penzi lyesu ndyakweendelezyegwa cakutalulama—mbubwenya mbocakamucitikila Jobu muntu uusyomeka—tweelede kuyeeya kuti Jehova tali nguwe uutalisya kutalulama ooko. Jehova takuyandi kutalulama; uyanda bululami. (Int. 33:5) Mbubwenya mbuli Elihu, mulongwe wa Jobu, andiswe atuzumine kuti: “Cili kule a-Leza kuti acite bubi, akuli-Singuzuzyoonse kuti alubizye.” (Job. 34:10) Muciindi cakutalisya mapenzi, Jehova nguutupa “zipego zibotu zyoonse azyoolwe zyoonse zilondokede.”—Jak. 1:13, 17.
18, 19. Nkaambo nzi ncotuteelede kumudooneka Jehova? Amupe cikozyanyo.
18 Mutamudooneki Jehova. Leza ulilondokede, alimwi mizeezo yakwe ilisumpukide kwiinda yesu. (Is. 55:8, 9) Aboobo, kulicesya alimwi akulibombya kweelede kutugwasya kuzumina kuti kuli mpotugolela mukumvwisya kwesu. (Lom. 9:20) Kanji-kanji inga tatujisi twaambo toonse tujatikizya bukkale bumwi. Cakutadooneka, mwakabona mbokali kamasimpe kaambyo kakuti: “Uusaanguna kwaamba zyamulandu wakwe ulangika mbuli kuti nguuluzi, mane kusikila umwi aboole amubuzye-buzye.”—Tus. 18:17, BT.
19 Ikuti katujisi mulongwe uusyomeka iwacita cintu cimwi ncotutakonzyi kumvwisya ciindi cakusaanguna naa cigambya, sena inga twafwambaana kumupa mulandu wakucita cintu citaluzi? Naa tuyakusaanguna kumwiiminina kuti takonzyi kucita cintu citaluzi, ikapati kuti twalizyibene kwamyaka minji? Ikuti twamweendelezya munzila yaluyando iili boobo mulongwe wesu uutalondokede, nkokuti Taateesu wakujulu, uujisi nzila alimwi amizeezo iisumpukide kwiinda yesu, tweelede kumusyoma kwiinda waawo!
20, 21. Nkaambo nzi ncociyandika kulindiswe kuzyiba cini cileta mapenzi?
20 Amuyeeye cini cituletela mapenzi. Nkaambo nzi ncotweelede kucita boobo? Zimwi ziindi mapenzi aamwi ndiswe tukonzya kwaatalisya tobeni. Ikuti kacili boobo, tweelede kukazumina kaambo aako. (Gal. 6:7) Tamweelede kupa Jehova mulandu akaambo kamapenzi aayo. Nkaambo nzi kucita boobo ncokutali kabotu? Amubone cikozyanyo eeci: Mootokala ulakonzya kuti kaubalika kapati. Amweezeezye kuti namutekenya waindilizya kuubalisya abusena butali kabotu, kumane wacita ntenda. Sena basikuubamba mbabeelede kupegwa mulandu akaambo kantenda eeyo? Peepe! Mbubwenya buyo, Jehova wakatupa nguzu zyakulisalila. Nokuba boobo, watupa alimwi amalailile aakonzya kutugwasya kusala camaano. Aboobo, nkaambo nzi ncotunga twapa mulandu Mulengi wesu akaambo kakulubizya kwesu?
21 Masimpe ngakuti, taali mapenzi oonse aboola akaambo kakulubizya kwesu alimwi amicito yesu iitaluzi. Zyintu zimwi zilacitika akaambo ‘kaziindi zyalufu azyamapenzi.’ (Muk. 9:11) Nokuba boobo, tatweelede kuluba kuti Saatani Diabolosi nguutalisya bubi boonse. (1 Jo. 5:19; Ciy. 12:9) Ngosinkondoma—kutali Jehova pe!—1 Pe. 5:8.
AMUCIBIKKILE MAANO CILONGWE CANU A JEHOVA
22, 23. Ncinzi ncotweelede kuyeeya ciindi notutyompedwe akaambo kamapenzi?
22 Ciindi nomujisi mapenzi abuyumuyumu, amuyeeye cikozyanyo ca Joshua a Kalebe. Mukwiimpana abasikutwela bali kkumi, aaba baalumi basyomeka balo bakaleta mulumbe uukulwaizya. (My. 14:6-9) Bakatondezya kuti bakali kumusyoma Jehova. Nokuba boobo, bakeelede kukkala munkanda kwamyaka iili 40 antoomwe abana Israyeli bamwi. Sena Joshua a Kalebe bakatongooka naa kunyema akulimvwa kuti balekelezyegwa? Peepe. Bakasyoma muli Jehova. Sena bakalongezyegwa? Inzya! Nokuba kuti zyalani lyoonse lyakafwa munkanda, baalumi aaba bobilo balo bakanjila mu Nyika Yakasyomezyegwa. (My. 14:30) Mbubwenya buyo, tuyakutambula zilongezyo zya Jehova ikuti naa “tiitwatyompwa” kucita kuyanda kwakwe.—Gal. 6:9; Heb. 6:10.
23 Ikuti mulityompedwe akaambo kamapenzi, kutalondoka kwabamwi naa kutalondoka kwanu, ncinzi ncomweelede kucita? Mweelede kuyeeya bube bwa Jehova butaliboteli. Amubuyeeye bulangizi Jehova mbwamupede. Amulibuzye kuti, ‘Ino buumi bwangu nobwali buti nondatalimuzyi Jehova?’ Amuzumanane kumvwana a Leza, alimwi mutazumizyi moyo wanu kumukalalila!
[Mibuzyo yaciiyo]
[Cifwanikiso icili apeeji 12]
Kuswiilila zyintu zibi nzyobaamba bamwi kulakonzya kumujatikizya (Amubone muncali 7)
[Cifwanikiso icili apeeji 14]
Joshua a Kalebe bakalongezyegwa akaambo kakusyoma muli Jehova (Amubone muncali 22)
