Kukulwaizyigwa Kuzwa ‘Kumilomo Yabana Baniini’

Mu December 2009, Nkuta Mpati yaku Russia yakazuminizya kusala ikwakapa kuti mbunga yabukombi ya Bakamboni ba Jehova yamucilawo ca Taganrog, mu Russia ileke kubeleka, inyangwe Ŋanda ya Bwami alimwi akwaambilizya kuti mabbuku eesu aali 34 akali kusumpula kusulana. Makani aaya aagambya akabikkwa aa Web site ya Bakamboni ba Jehova alimwi azifwoto zya Bakamboni kubikkilizya abana baniini ibakajatikizyidwe akusala ooku.

Nokwakainda myezi misyoonto, Bweendelezi bwa Bakamboni ba Jehova mu Russia bakatambula kabbokesi alimwi alugwalo kuzwa kumukwasyi wa Bakamboni mu Queensland, ku Australia, walo iwakabona lipooti yakusala kwa Nkuta. Lugwalo lwakali kwaamba kuti: “Nomuyandwa bakwesu, lusyomo alimwi amasunko aakacitikila bana baku Russia zyakabanjila kapati mumoyo bana besu, Cody alimwi a Larissa. Bakalemba makkaadi amagwalo, alimwi twabamba zipego nzyotuyanda kutumina bana baku Taganrog, kubazyibya kuti kumasena aali kulamfwu, kuli bana bamwi ibabelekela Jehova cakusyomeka ibabayeeya. Babatumina mooni waluyando boonse.”

Bana baku Taganrog nobakatambula zipego, bakalemba magwalo kutondezya kulumba kumukwasyi waku Australia. Akaambo kakuti majwi aayumyayumya ‘kuzwa kumulomo wabana’ akamunjila kapati mumoyo, Kamboni umwi uubelekela kumutabi waku Russia wakalembela Cody alimwi a Larissa kuti: “Mulakonzya kweezyeezya mbocitakkomanisyi kubana alimwi abapati ciindi nobasubulwa akaambo kacintu ncobatacita. Ibakwesu abacizyi baku Taganrog kunyina ncobakalubizya, pele bakanyangwa Ŋanda yabo ya Bwami. Eeci cibapa kuusa kapati. Cilabayumyayumya kuzyiba kuti kuli bantu bamwi bali mumasena aambi ibabayeeya. Twamulumba kapati akaambo kakubikkila maano alimwi abwaabi bwanu.”—Int. 8:2.

Tuli cibeela cabunyina bwanyika yoonse alimwi luyando ndotujisi kuli umwi aumwi lulatugwasya toonse kuliyumya mumasunko alimwi amapenzi ngotujana mubuumi. Nkuta niicibandika kujatikizya mabbuku aa Bakamboni ba Jehova kuti naa akulwaizya kusulana, cakaumuumu bana besu balatondezya kubikkila maano kuli umwi amweenzyinyina, bakutantamuka kusalana mubala alimwi azilengwa akutondezya mbwaali aamasimpe majwi aa Jesu aakuti: “Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu.”—Joh. 13:35.”

[Cifwanikiso icili apeeji 32]

Bana baku Russia (kulumwensyi) ibakatambula zipego kuzwa kubana baku Australia (kululyo)