Makani Eesu Aakaindi Aayandika

Makani Eesu Aakaindi Kuyobola Makani Eesu Aakaindi Aayandika

BANTU ba Jehova balijisi makani aakkomanisya aajatikizya mbobali kubelekela Jehova. Makani aaya aakkomanisya kapati alakonzya kuyobololwa kutali buyo mumabbuku eesu pele alimwi kuzwa muzifwanikiso, magwalo, makani aakaluulwa abakwesu abacizyi alimwi atwaambo tumbi tukkomanisya tujatikizya bukombi bwesu, mulimo wesu wakukambauka amakani eesu aakaindi. Nimpindu nzi iijanika mukuyobola makani aali boobu akuvwuntauzya mumakani eesu aakaindi? Basilutwe bamikwasyi mu Israyeli wansiku bakeelede kubazyibya bana babo milawo alimwi amilimo mibotu ya Jehova kutegwa “babike myoyo yabo kuli-Leza.”—Int. 78:1-7.

Kwamyaka minji kuvwuntauzya makani aakaindi kwagwasya kuzuzikizya makanze aa Jehova. Mucikozyanyo, ciindi basikukazya nobakasola kulesya mulimo wakuyaka tempele ku Jerusalemu, buvwuntauzyi bwamakani aakaindi ku Medi dolopo lipati lya Akimeta, bwakayubununa mapepa aazumizya kuyaka tempele aazwa ku Mwami Koresi. (Ezr. 6:1-4, 12) Aboobo, tempele lyakayakululwa kweelana akuyanda kwa Leza. Makani aakaindi aakajanwa kwiinda mukuvwuntauzya akabelesyegwa alimwi asikulemba Makani Mabotu Luka, walo ‘wakaccililizya zyintu zyoonse kuzwa kumatalikilo cakulomya.’—Lk. 1:1-4.

Bakabunga Keendelezya balaayandisisya kapati makani aakaindi aajatikizya mbunga ya Leza. Mukwesu umwi wamu Kabunga Keendelezya wakaamba boobu kujatikizya bubotu bwakuyobola makani akwaambila  bamwi kutegwa batambule lubono lwakumuuya, naakati: “Kutegwa tuzyibe nkotuya, tweelede kuzyiba nkotwakazwida.” Akaambo kaceeci, Dipatimenti Iilemba Makani Aakaindi yakatalisyigwa kumaofesi mapati ku Brooklyn, mudolopo lya New York alimwi ilalanganizyigwa aba Kkomiti Iilanganya Zilembwa.

“MAKANI AAMUKWASYI” WESU ALIMWI “AZYINTU NZYOTWAKAKONA”

Mukuya kwaciindi, makani aamukwasyi wesu aakaindi alalubika, alimwi bunji bwesu tuyeeya kuti nitwakaayobola. Mudipatimenti Iilemba Makani Aakaindi kuli mulimo mupati uuli mukucitwa kutegwa bayobolole makani eesu aakaindi. Zifwanikiso zibambidwe kabotu Mumakani Aakaindi zilalanganizyigwa kuba cibeela “camakani aamukwasyi” wesu. Mabbuku eesu aakaindi, makani aakkomanisya aakaluulwa abakwesu abacizyi alimwi amakani aajatikizya zyakacitika mumbunga yesu aalo alayobolwa adipatimenti eeyi. Zyintu zili boobu ziitwa kuti “zyintu nzyotwakakona” zitumunikila muzyintu zyakumuuya zijatikizya mbunga ya Leza zyalo zitugwasya kuba abulangizi bwakuyookkala antoomwe mumukwasyi wesu wakumuuya.

Tumukulwaizya kuti mubone zitola busena mu Dipatimenti Iilemba Makani Aakaindi kwiinda mucibeela eeci cipya cakuti “Makani Eesu Aakaindi.” Cibeela eeci cinoojanika ziindi zyone amwaka mumagazini ya Ngazi Yamulindizi yakwiiya. Mucikozyanyo, mumagazini iitobela tujisi makanze aakuba acibeela cibambilidwe kwiingula mibuzyo eeyi: Ino Dawn Mobile ninzi? Ino mbaani bakali kubelesya Dawn Mobile? Ndilili Dawn Mobile noyakali kubelesyegwa, alimwi nkaambo nzi?

Mbubwenya mbuli makani aamukwasyi, Makani Aakaindi aayobwedwe alatwaambila kujatikizya bukkale bwesu bwakumuuya alimwi abwabaabo bakatusaangunina—kujatikizya lusyomo lwabo busicamba, lukkomano abuyumuyumu buliko mukubelekela Taateesu wakujulu siluyando alimwi akujatikizya busolozi bwa Leza alimwi alugwasyo ndwapa bantu bakwe. (Dt. 33:27) Tulaalusyomo lwakuti Jehova uyookulongezya kusoleka kwesu kuyobola makani eesu aakaindi aakumuuya kutegwa katuzumanana kukamantana akuyumizyigwa kucita luyando lwakwe.

[Kabbokesi/Cifwanikiso icili apeeji 31]

Kwaalanga-langa Cakusitikila Makani

Ibalembi, basikuzekaula alimwi abasikuvwuntauzya nobabamba mabbuku aa Bunakristo, ma DVD, alimwi amabbuku aambi aapandulula Bbaibbele, makani baajana muzyintu ziyobwedwe zyakaindi. Aboobo Dipatimenti Iilemba Makani Aakaindi ilabikkila kapati maano kubweza ntaamu zigwasya ikuyobolola alimwi akuyobola makani aaindene-indene aakaindi kuzwa kumasena mbuli maofesi aamitabi, madipatimenti aaku Bbeteli, mumbungano, kubantu alimwi akumbunga zyakunyika. Amulange-lange twaambo tutobela twamulimo ooyu mubufwaafwi:

Mbwaajanwa Makani Alimwi Akwaalanga-langa: Zyintu zilibedelede zilabikkilizyigwa kuzyintu zyakaindi ziyobwedwe. Bunji bwazyintu eezyi zilapegwa naa kulombwa kubantu bali mumikwasyi ibabelekela Jehova cakusyomeka kwaciindi cilamfwu. Kuzilanga-langa alimwi akuzikozyanisya zyintu zili boobo kulatugwasya kuyungizya kumvwisya makani eesu aakaindi alimwi abaabo bakapona kuciindi eeco.

Mulongo Wazyintu: Mulongo wazyintu ziyobodwe mu Dipatimenti Iilemba Makani Aakaindi ulijisi zyintu zinji kapati, zimwi zyakkala kwiinda amyaka iili mwaanda. Zibambidwe mumisyobo iindene-indene alimwi zyeelede kubambwa kabotu kutegwa zikabelesyegwe kumbele.

Kubambululwa Akuyobolwa: Mabbuku azyakuzekaula zizapukide zilabambululwa akuyobolwa kwiinda mukubelesya nzila zyabupampu. Mapepa, zifwanikiso, miteende, mafilimu alimwi amakani aakalekkoodwa zilayobolwa kabotu mukkompyuta. Aboobo, kucita boobo kulagwasya kutegwa zyintu ziyandika kazijanika cakufwambaana alimwi kuti eeziya zyakusaanguna zitanyonyooki.

Kuyobola Makani Alimwi Akwaabelesya Naayandika: Zyintu ziyobwedwe zilabambwa kabotu-kabotu mubusena buli kabotu kutegwa zitanyonyooki. Kuli bubambe bwabikkwa kutegwa kabugwasyilizya mukuvwuntauzya akwaabelesya makani eesu aakaindi aayandika ayobwedwe.

[Cifwanikiso icili apeeji 32]

1. Cikwankwani ca “Photo-Drama of Creation.” 2. Mulongo wabantu bakalembya kuti kabatambula magazini. 3. Mootokala uujisi zyakwaambawida. 4. Civwumbyo ca Ngazi Yamulindizi yamu April 15, 1912. 5. Lugwalo kuzwa kuntolongo lwakalembelwa ba J. F. Rutherford. 6. Caambawido ca WBBR. 7. Muncini wamalekkoodi. 8. Kabbokesi kakunyamwida mabbuku. 9. Twaambo twakwe mwini. 10. Lugwalo lwakalembelwa mukwesu J. F. Rutherford.