Mutabalekelezyi Bakombinyoko

“KWAMYAKA iili kkumi, twakalikkomene kapati akuzwidilila kwamakwebo, alimwi twakalivwubide kapati. Nokuba kuti twakakomenena mukasimpe, twakaleka kumubelekela Jehova alimwi tiitwakajisi nguzu zyakupiluka,” oobu mbobakaamba ba Jarosław abakaintu babo ba Beata. *

Umwi mukwesu ulaazyina lya Marek wakaamba kuti: “Akaambo kakucinca kwabukkale atwaambo twacisi mu Poland, ndakaleka ncito ziindene-indene. Ndakanyongana kapati. Ndakali kuyoowa kutalika kkampani yangu akaambo kakuti tiindakajisi luzyibo lwamakwebo. Nokuba boobo, ndakatalika kutegwa ndigwasye mukwasyi wangu kuzyintu zyakali kuyandika zyakumubili kakunyina kunyonganizyigwa kumuuya. Nokwakainda ciindi cili mbocibede ndakazyiba kuti ndakali kulicenga.”

Akaambo kakuyuma kwabukkale akubula milimo, bamwi balanyongana alimwi tabasali kabotu. Bunji bwabakwesu balabeleka mawoola manji alimwi balabeleka mulimo uumbi kunze aayooyo ngobabeleka naa balatalika makwebo kabatajisi luzyibo. Bayeeya kuti kuba amali manji kulakonzya kubagwasya mumukwasyi kakunyina kunyonganya cilongwe  cabo a Jehova. Aboobo zyintu zitucitikila abukkale bukatazya zilakonzya kutunyonganya kumuuya. Akaambo kaceeci, bamwi bacegwa akakole kabulyato alimwi baleka kubikkila maano zyintu zyakumuuya akaambo kakuyandisya zyintu zyakumubili.—Muk. 9:11, 12.

Bakwesu abacizyi bamwi balaziyanda zyintu zyanyika cakuti tabacijisi ciindi cakuba aciiyo cabo beni, kuswaangana akuunka mumuunda. Masimpe, kutabikkila maano ooku kulakonzya kubanyonganya kumuuya acilongwe cabo a Jehova. Alimwi balakonzya kuleka kucita cintu ciyandika kapati kucilongwe cabo—kuyanda baabo ‘baciinga cabo calusyomo.’ (Gal. 6:10) Bamwi mukuya kwaciindi balacileka kuyanzana a Banakristonyina. Amukalangisye kaambo aaka.

Mulimo Ngotujisi Kubasyomima

Mbotuli bakwesu abacizyi, kuli ziindi notukonzya kutondezya kuti tulabayanda bamwi. (Lom. 13:8) Ndiza mumbungano yanu kuli ‘bacete bayandika lugwasyo mbomwakabona.’ (Job. 29:12) Bamwi tabajisi zyakulya. Mwaapostolo Johane utuyeezya mbotukonzya kucita oobo. “Ikuti ooyo uujisi lubono lwamunyika eeyi wabona munyina uupengede nokuba boobo tayandi kumufwida luzyalo, ino luyando lwa Leza inga lwazumanana buti mulinguwe?”—1 Jo. 3:17.

Ambweni mwakagwasya kale bamwi bakapengede. Nokuba boobo, luyando lwesu kuli babunyina taluli buyo lwakubagwasya kujana zyintu zyakumubili pe. Bamwi balakonzya kuyanda lugwasyo akaambo kakulendelelwa naa kutyompwa. Balakonzya kulimvwa kuti tabeeleli kubelekela Jehova, bamwi balaciswa naa bakafwidwa bayandwa babo. Nzila yomwe njotukonzya kubakulwaizya nkubaswiilila akwaambaula ambabo, eeci ciyoopa kuti tubakatalusye mumizeezo akubagwasya kuyumya cilongwe cabo a Jehova. (1 Te. 5:14) Eeci ciyumya luyando lwesu abakwesu.

Baalu mumbungano kanji-kanji mbobeelede kuswiilila, ikubikkila maano alimwi akupa lulayo lwamu Magwalo. (Mil. 20:28) Kwiinda mukucita boobu, baalu bayiya mwaapostolo Paulo walo wakali ‘kubayanda kapati,’ bakwesu abacizyi bakumuuya.—1 Te. 2:7, 8.

Nokuba boobo, ikuti Munakristo wazanga, ino ncinzi cikonzya kucitika kumukuli wakwe ngwajisi wakugwasya basyominyina? Nobaba baalu balasunkwa kutalika kuyandisya zyintu zyakumubili. Ino mbuti kuti Munakristo wazundwa asunko eeli?

Kutyompwa Akaambo Kamapenzi

Mbuli mbokwaambwa kale, kubeleka canguzu kutegwa mujane ziyandika mumukwasyi kanji-kanji kulalibilisya alimwi kulakonzya kutupa kutazibikkila maano zyintu zyakumuuya. (Mt. 13:22) Ba Marek baambwa kumatalikilo, bakapandulula kuti: “Ciindi  nindakawa, ndakaunka kucisi cimbi kuyakuyandaula mulimo uuvwolwa mali manji. Ndakaakukkala kwamyezi yotatwe ndimane ndakaboola kubona mukwasyi, kwamana ndakaunka alimwi kwamyezi yotatwe, ndakazumanana kucita boobo. Mukaintu wangu watakali Kamboni wakapenga mumizeezo.”

Tabali buyo banamukwasyi bakapenga pe. Ba Marek bakazumanana kwaamba kuti: “Ndakali kubeleka mawoola manji mubusena mwakali kupya kapati” alimwi mbondakali kubelekalimwi bakali basimatusi, bakali kuyanda kunyonganya babelesinyina. Bakali kucita mbuli zigwebenga. Ndakatyompwa alimwi bakandizunda. Tiindakajisi aciindi cakulibikkila maano alimwi ndakatalika kudooneka kuti naa inga ndacikonzya kubelekela bamwi.

Zyintu eezyi zyakacitikila ba Marek akaambo kakusala kwabo, zilakonzya kutupa kuyeeya katutanasala. Nokuba kuti kulongela kucisi cimwi kulakonzya kulibonya kuti inga kwamugwasya, sena takukonzyi kuleta mapenzi aamwi? Mucikozyanyo, ino ncinzi cikonzya kucitika kumuuya akubukkale bwamukwasyi? Sena kulonga ooko kulakonzya kunyonganya cilongwe cesu ambungano nkomubede? Sena tacikonzyi kunyonganya coolwe ncotupedwe cakubelekela basyomima?—1 Ti. 3:2-5.

Mbuli mbomwabona kale, muntu teelede kuunka kucisi cimbi kutegwa ajane mulimo wakumubili ukonzya kumukkomanisya. Amubone cakabacitikila ba Jarosław aba Beata. Ba Jarosław bakaamba kuti: “Zyoonse zyakatalika buyo kabotu. Nitwakakwatana-kwatana buyo, twakajalula kantoolo motwakali kusambala zyakulya kubusena bubotu. Akaambo kakuti twakali kupanga mali manji, twakayeeya tukomezya makwebo eesu. Pele ciindi cakali kutuceela aboobo twakali kulovwa kumiswaangano ya Banakristo. Kalitanalampa, ndakacileka bupainiya alimwi tiindakacili mukutausi. Kandikkomene akaambo kamali manji ngotwakali kupanga, twakajalula cintoolo cipati amweenzuma watakali kamboni. Mukuya kwaciindi, ndakatalika kuunka kumasi aambi kukucita makwebo, ndakali kupanga mali manji. Tiindakali kujanika aŋanda aboobo kwakanyina kukamantana mumukwasyi. Makwebo akatumana maano cakuti twakacileka akubelekela Jehova. Akaambo kakuti twakacileka kuswaangana, tiitwakali kubabikkila maano bakwesu abacizyi.”

Ino nciiyo nzi ncotwaiya kumakani aaya? Ikubeleka kutegwa mujane mali manji aakonzya kumugwasya kuba azyintu zinji zyakumubili, cilakonzya kumupa kuti Munakristo acegwe—akuleka “kubamba zisani zyakwe zyaatala,” izimuzibya kuti Munakristo. (Ciy. 16:15) Eeci inga capa kuti tuleke kugwasya bakwesu mbotwakali kugwasya kaindi.

Amulilingule

Mulakonzya kwaamba kuti, ‘Eeci tacikonzyi kundicitikila mebo.’ Pele toonse tweelede kuzyilanga kabotu zyintu ziyandika kapati mubuumi. Paulo wakaamba kuti: “Nkaambo kunyina ncotwakaletelela munyika eeyi, alimwi kunyina ncotukonzya kubwezelezya kuzwa mulinjiyo. Aboobo twanoojisi cakulya azyakulivwumba, tunookkutila azyintu eezyi.” (1 Ti. 6:7, 8) Bukkale buliindene kucisi acisi. Cikonzya kulibonya kuti cilayandika kucisi cimbi, muzisi zimbi cilakonzya kulibonya kuti ncakulikondelezya.

Kufwumbwa naa mupona buti, amubone majwi atobela ngaakaamba Paulo aakuti: “Pele, aabo bakanzide kuvwuba banjila mukusunkwa akucegwa mukakole alimwi amuzisusi zinji zyabufwubafwuba alimwi ziletela macise eezyo zitola bantu mukunyonyooka akuloba.” (1 Ti. 6:9) Ooyo uuteegwa takonzyi kukabona kakole nkateegwa. Kabambilidwe kumuca katalibambilide. Ino inga twalikwabilila buti kuzyintu “ziletela macise”?

Kuzyiba zyintu ziyandika kapati kuyakutupa kuti tujane ciindi cakubelekela Jehova akucita ciiyo cesu tobeni. Ciiyo cili boobu cilakonzya kumugwasya Munakristo kuba muntu  “uulibambilide cakumaninina kubeleka mulimo mubotu uuli woonse” mukugwasya bamwi.—2 Ti. 2:15; 3:17.

Kwamyaka misyoonto yainda, baalu bakabayumya akubakulwaizya ba Jarosław. Eeci cakabagwasya kapati kuti bacince. Bakaamba kuti: “Mumubandi umwi, baalu bakapa cikozyanyo camu Magwalo camulombwana muvwubi wakali kuyanda kupona kukabe kutamani pele watakali kuyanda kusambala lubono lwakwe. Mpoonya bakandibuzya kuti naa eeci inga cacitika kulindime. Eeci cakandigwasya kubona ncondakeelede kucita!”—Tus. 11:28; Mk. 10:17-22.

Ba Jarosław bakakkala ansi kuyeeya mbobakali kupona, eelyo bakasala kuti baleke kucita makwebo. Kuzwa nobakagwasyigwa mumyaka yobilo buyo ba Jarosław amukwasyi wabo bakatalika alimwi kubelekela Jehova. Mazuba aano mbaalu. Ba Jarosław baamba kuti: “Ciindi bakwesu abacizyi nobabikkila kapati maano kumakwebo cakuti baleka kusungwaalila zyintu zyakumuuya, inga ndibaambila cakandicitikila kutondezya mbocitagwasyi kuba mujoko lyomwe abantu batasyomi. Tacili cuuba-uba kusyomeka.”—2 Ko. 6:14.

Ba Marek abalo bakaiya ciiyo. Nokuba kuti mulimo ngobakali kubeleka kucisi cimbi wakabagwasya mumukwasyi, cilongwe cabo a Leza abanyina tiicakali kabotu. Nokwakainda ciindi, bakazizyiba zyintu zyakali kuyandika kapati mubuumi bwabo. Ba Marek bakaamba kuti: “Mukuya kwamyaka, ndakali mbuli Baruki wakaindi wakali ‘kuliyandawida zintu zipati.’ Kumane ndakapaila kuli Jehova amoyo woonse kumwambila mapenzi aangu alimwi lino ndilimvwa kuti ndicita kabotu kumuuya.” (Jer. 45:1-5) Ba Marek ino bacita kabotu cakuti inga bapegwa “mulimo mubotu” wakuba mulangizi mumbungano.—1 Ti. 3:1.

Ba Marek bacenjezya baabo banga bayanda kuunka kuzisi zimbi kulangaula milimo iivwolwa mali manji kuti: “Ikuti mwaunka kunze acisi, ncuuba-uba kuwida mukakole munyika eeyi mbyaabi. Akaambo kakutazyiba mwaambo wamucisi eeco, inga capa kuti kamutabandiki abamwi. Mulakonzya kupiluka amali kuŋanda pele akaambo kakuti mulaciswa kumuuya inga tamuyumyi kufwaambaana.”

Kulanga mulimo wakumubili munzila yeelede amukuli wesu wakugwasya bakwesu kuyoomukkomanisya Jehova. Alimwi tulakonzya kupa cikozyanyo cibotu kuli bamwi cikonzya kubakulwaizya kusala kabotu. Aabo batyompedwe bayandika kugwasyigwa, kubacitila luzyalo alimwi bakwesu abacizyi beelede kulilemeka kabotu kutegwa bagwasyigwe. Baalu mumbungano alimwi abamwi basimide balakonzya kugwasya basyominyina kuti kababeleka munzila yeelede kutegwa atabazundi mapenzi.—Heb. 13:7.

Inzya, tutaleki kuswaangana abasyomima akaambo kakujata bubi amilimo yakumubili. (Flp. 1:10) Muciindi caboobo, atube ‘bavwubi kuli Leza’ akubikka Bwami mubusena bwakusaanguna mubuumi bwesu.—Lk. 12:21.

[Bupanduluzi buyungizidwe]

[Zifwanikiso izili apeeji 21]

Sena mulimo wakumubili umupa kuti kamutajaniki kumiswaangano?

[Zifwanikiso izili apeeji 23]

Sena mulabikkila maano kukugwasya bakwesu abacizyi bakumuuya?