Mibuzyo Yabasikubala

Sena Jesu Kristo naakatuma baapostolo bali 12 kuti bakakambauke, wakabaambila kuti babweze nkoli akusama mpato?

Ibamwi baamba kuti Makani Mabotu aajanika mumabbuku otatwe aamba Jesu mbwaakatuma baapostolo, alakazyanya. Pele kwiinda mukukozyanisya zibalo eezi tulakonzya kuzyiba masimpe. Cakusaanguna, atubone Maako a Luka nzyobakalemba. Maako wakaamba kuti: “[Jesu] wakabalailila kuti kutabi cintu ncobatolelezya mulweendo lwabo ccita buyo nkoli—tiibakeelede kutolelezya cakulya, nkomo yakubikkila cakulya, naaba mali mumpotomona zyabo—pele bakeelede buyo kusama mpato alimwi tiibakeelede kusama zisani zyobilo.” (Mk. 6:7-9) Luka wakalemba kuti: “Kutabi cintu ncomutolelezya mulweendo, noiba nkoli noiba nkomo yacakulya, nociba cinkwa naaba mali aansiliva; nokuba kuba acisani cimbi ambali.” (Lk. 9:1-3) Aawa tulakonzya kubona kukazyanya kuliko. Kweelana a Maako, baapostolo bakaambilwa kubweza nkoli akwaanga mpato zyabo, kakuli Luka wakalemba kuti taku nobakeelede kutolelezya cili coonse, noiba nkoli. Luka taku naakaamba zyampato mbuli Maako.

Kutegwa tumvwisye Jesu ncaakali kupandulula aciindi aawa, atubone majwi ajanika mu Makani Mabotu oonse otatwe. Muzibalo zyaambwa kale alimwi acibalo cili ku Matayo 10:5-10, baapostolo bakaambilwa kuti batasami “zisani zyobilo.” Kuboneka kuti aumwi mwaapostolo wakalisamide cisani comwe. Aboobo taku nobakeelede kubweza cimbi camulweendo. Mbubwenya buyo, bakalisamide mpato. Maako wakaamba kuti “bakeelede buyo kusama mpato.” Ino mbuti kujatikizya nkoli? Bbuku litegwa The Jewish Encyclopedia lyaamba kuti: “Cilibonya kuti cakali cilengwa caba Hebrayo bansiku kutolelezya nkoli.” (Matl. 32:10) Maako wakaamba kuti “kutabi cintu ncobatolelezya” baapostolo ccita buyo nkoli njobakajisi ciindi Jesu naakali kubapa malailile. Aboobo, balembi ba Makani Mabotu bakali kukankaizya malailile aa Jesu aakuti batalimusyi akaambo kakuyanda kuya kubweza zyintu zimbi.

Aaka kaambo wakakakankaizya Matayo walo wakalimvwida malailile aa Jesu ciindi eeco mpoonya akwaalemba. Jesu wakaamba kuti: “Mutabwezi ngolida niiba nsiliva nouba mukuba mumpotomona zyanu, niiba nkomo yazilyo zyamu lweendo noziba zisani zyobilo noziba mpato niiba nkoli, nkaambo similimo uleelede kupegwa zilyo.” (Mt. 10:9, 10) Ino mbuti kujatikizya mpato nzyobakasamide baapostolo alimwi ankoli nzyobakajisi mumaanza? Jesu tanaakabaambila kuti basowe zyintu nzyobakajisi kale, pele wakali kubaambila kuti batabwezi zimbi. Ino nkaambo nzi ncaakabaambilida boobu? Nkaambo “similimo uleelede kupegwa zilyo.” Aaka nkakakali kaambo kapati kamalailile a Jesu alimwi akali kweendelana a Makani aakwe aa Cilundu nkwaakaamba kuti tiibakeelede kulibilika kujatikizya nzyobakeelede kulya, kunywa naa kusama.—Mt. 6:25-32.

Izibalo zya Makani Mabotu ciindi cakusaanguna mulakonzya kubona mbuli kuti zilakazyanya, pele zyoonse zyaamba buyo kaambo komwe. Baapostolo bakeelede kuunka mbubonya mbobakabede kutegwa batanyonganizyigwi azyintu zimbi. Ino nkaambo nzi? Akaambo kakuti Jehova wakali kuzyoobapa nzyobayandika.

 Ino “bakaintu bamwi banji” mbaakali kwaamba Solomoni mbaani?—Muk. 2:8, BT.

Tatuli masimpe, pele kuboneka kuti bakali bamakaintu bakali ampuwo kapati Solomoni mbaakabona bakali kusika kunkuta yamwami.

Kubbuku lya Mukambausi caandano 2, Solomoni wakaamba zyintu ziindene-indene nzyaakacita kubikkilizya amayake aakwe mapati. Wakayungizya kwaamba kuti: “Ndakalijisi nsiliva angolida zinji, aciyobwedo cabami abasololi bazisi ziniini. Ndakajana baalumi abakaintu baimbi abakaintu bamwi banji zili nzezibotezya muntu.”—Muk. 2:8, BT.

Bantu bamwi bayeeya kuti ‘bamakaintu’ mbaakali kwaamba Solomoni bakali bamakaintu mbaakakwete bakumasi aambi alimwi abasimamambe bakwe balo bakamupa kunjila mubukombi bwakubeja. (1 Bam. 11:1-4) Nokuba boobo, kuli kulubizya mubupanduluzi oobu. Solomoni naakalemba majwi aaya, wakalijisi kale “bakaintu bamwi banji.” Aciindi eeco, Jehova Leza wakacili kumukkomanina nkaambo wakamusololela kulemba mabbuku aamu Bbaibbele. Pele eeci tiicakazumanana mumyaka yakatobela ciindi naakakwata bamakaintu banji bamasi, abasimamambe alimwi akutobela bukombi bwakubeja.

Mubbuku lya Mukambausi, Solomoni wakaamba kuti “wakali kuyandaula majwi aabotezya, alimwi wakaliluleme kukulemba majwi aalusinizyo.” (Muk. 12:10) Cakutadooneka wakalaazyi mabala aakuti “mwanakazi,” “namalelo,” alimwi “asimamambe,” nkaambo wakali kwaabelesya mabala aaya mumalembe aakasololelwa amuuya. (Tus. 5:18; 12:4; 18:22; Muk. 9:9; Lwi. 6:8, 9) Pele kubbuku lya Mukambausi 2:8, mabala aaya taku naakabelesyegwa pe.

Ibbala lya Cihebrayo lisanduludwe kuti “bakaintu bamwi banji” lyakabelesyegwa buyo ciindi comwe mu Bbaibbele. Basikwiiya balazumina kuti bupanduluzi bwini tabuzyibidwe kabotu. Basanduluzi banji ba Bbaibbele baamba kuti majwi aali ku Mukambausi 2:8 aamba bamakaintu banji. Busanduluzi bumwi bubelesya mabala aakuti “mukaintu, abamakaintu,” ikupandulula kaambo nkakonya aaka.

Solomoni wakalizyibidwe kapati cakuti mwami mwanakazi waku Seba naakamvwa mpuwo yakwe wakamuswaya alimwi wakacikkomanina ncaakabona. (1 Bam. 10:1, 2) Eeci cisololela kukaambo komwe ndiza ikakapa kuti Solomoni aambe kuti “bakaintu bamwi banji.” Ndiza wakali kwaamba bamakaintu balaampuwo bakali kumuswaya kunkuta yakwe ciindi naakacili kukkomaninwa a Leza.