Amutambule Muuya wa Leza Kutali Wanyika

“Tiitwakatambula muuya wanyika, pele twakatambula muuya uuzwa kuli Leza, kutegwa tuzizyibe zyintu Leza nzyaakatupa amaanza obilo.”—1 KO. 2:12.

1, 2. (a) Ino muunzila nzi Banakristo bakasimpe mbobali munkondo? (b) Ino mibuzyo nzi njotutiilange-lange?

BANAKRISTO bakasimpe bali munkondo. Sinkondoma ulaanguzu, ulicenjede alimwi ulizyibide kulwana. Ulijisi cilwanyo cilaanguzu kapati ncabelesya alimwi wabazunda bantu banji. Pele eeci taceelede kututyompya naa kutupa kulimvwa kuti tatukonzyi kumuzunda. (Is. 41:10) Tulijisi cilikwabilizyo cikonzya kutugwasya munkondo iili yoonse.

² Nkondo yesu taili yakumubili; njakumuuya. Sinkondoma ngu Saatani Diabolosi alimwi cilwanyo cipati ncabelesya “muuya wanyika.” (1 Ko. 2:12) Aboobo cilikwabilizyo cipati ncotujisi mukuzunda zilwanyo zya Saatani, muuya wa Leza. Kutegwa tuzunde munkondo eeyi akuzumanana kuba acilongwe a Leza, tweelede kulomba muuya wa Leza akutondezya micelo yamuuya mubuumi bwesu. (Gal. 5:22, 23) Ino muuya wanyika ninzi alimwi wakatalika buti kuyunga bantu? Ino inga twazyiba buti kuti tulayungwa amuuya wanyika? Alimwi ncinzi ncotukonzya kwiiya kuli Jesu kujatikizya kutambula muuya wa Leza akukazya muuya wanyika?

Nkaambo nzi Muuya Wanyika Ncoudumide?

3. Ino muuya wanyika ninzi?

³ Muuya wanyika eeyi nguwa Saatani, “mweendelezi wanyika eeyi,” alimwi uli mukukazya muuya uusalala wa Leza. (Joh. 12:31; 14:30; 1 Jo. 5:19) Muuya wanyika ninguzu ziyunga bantu kucita zyintu zibi. Ooyu muuya upa kuti bantu kabakazya kuyanda kwa Leza amakanze aakwe.

4, 5. Ino muuya wa Saatani wakaduma buti?

⁴ Ino muuya wa Saatani wakaduma buti? Cakusaanguna, Saatani wakeena Eva mumuunda wa Edeni. Wakamucenga kuti kulyeendelezya kuyoobagwasya mubuumi. (Matl. 3:13) Eelo kaka Saatani ngusilweeno! (Joh. 8:44) Kwiinda mumukaintu, awalo Adamu wakatyola mulawo wa Jehova. Akaambo kakusala kwa Adamu, bantu bakatalika kubisya akuyungwa a Saatani kuti kabatamvwi.—Amubale Baefeso 2:1-3.

⁵ Alimwi Saatani wakabayunga bangelo bamwi balo bakaba madaimona. (Ciy. 12:3, 4) Ooku kuzangila Leza kwakacitika Zambangulwe lyamu ciindi ca Nowa kalitanacitika. Ibangelo aaba bakali kuyeeya kuti balakonzya kuba kabotu kuti baleka milimo njobapedwe  kujulu akucita kufwumbwa ncobayanda anyika. (Jud. 6) Kwiinda mukugwasilizyigwa amadaimona aaya aajisi mibili yamuuya, Saatani uluujisi ‘kweena bantu boonse baansi.’ (Ciy. 12:9) Cuusisya ncakuti, bunji bwabantu taakwe ncobazyi kujatikizya kuyunga kwamadaimona.—2 Ko. 4:4.

Sena Mweendelezyegwa Amuuya Wanyika?

6. Ino mbuti muuya wanyika mboukonzya kutuyunga?

⁶ Bunji bwabantu taakwe ncobazyi kujatikizya kuyunga kwa Saatani, pele Banakristo bakasimpe balizizyi nzila nzyabelesya. (2 Ko. 2:11) Mubwini, muuya wanyika taukonzyi kutuyunga ccita kuti twauzumizya. Atulange-lange mibuzyo yone iikonzya kutugwasya kubona naa tweendelezyegwa aamuuya wa Leza naa wanyika.

7. Ino ninzila nzi yomwe njabelesya Saatani kutwaandaanya kuli Jehova?

⁷ Ino zyakulikondelezya nzyondisala zitondezya kuti ndili muntu uuli buti? (Amubale Jakobo 3:14-18.) Saatani ulasolekesya kutwaandaanya aa Leza kwiinda mukutoongelezya kuba basilunya. Diabolosi ulizyi kuti Jehova ulibasulide basilunya. (Int. 11:5) Aboobo, Saatani ubelesya mabbuku, mavidiyo, nyimbo alimwi azisobano zyamu makkompyuta—zyalo zikulwaizya bwaamu alimwi alunya—kukondelezya zisusi zyesu zyanyama. Saatani ulakkomana kufumbwa kuti katucita zibi nozyiceya nokuba kuti tulayandisya kucita zibotu.—Int. 97:10.

8, 9. Ino mibuzyo nzi iijatikizya kulikondezya njotweelede kulibuzya?

⁸ Munzila imwi, muuya wa Leza ukulwaizya baabo bautambula kuba bantu basalala, basiluumuno alimwi balaaluzyalo. Tweelede kulibuzya kuti, ‘Sena zyakulikondelezya nzyondisala zindikulwaizya kuba abube bubotu?’ Busongo buzwa kujulu tabuli boobo “buupaupa ameso.” Aabo beendelezyegwa amuuya wa Leza tabakambaukili buyo basimukobonyina kuti kabasalala akuba basiluumuno, pele abalo tabaikkomanini micito yalunya abwaamu nomuba mumaanda aabo.

⁹ Jehova ngonguwe alikke uuyelede kubelekelwa. Nokuba boobo, Saatani uyookkomana kuti twamukomba nociba ciindi comwe buyo mbuli mbwaakali kuyanda kuti Jesu acite. (Lk. 4:7, 8) Tulakonzya kulibuzya kuti: ‘Sena zyintu nzyondisala kulikondezya zilandipa ciindi cakuti ndibelekele Leza alikke? Sena nzyondisala kucita inga zyapa kuti cindikatazye kuzunda muuya wanyika? Sena ndeelede kucinca zyintu nzyondisala nzyondiya kucita kumbele aamazuba?’

10, 11. (a) Kujatikizya zyintu zyakumubili, ino muuya wanyika ukulwaizya nzi? (b) Ino Ijwi lya Leza lyakasololelwa amuuya litukulwaizya nzi?

¹⁰ Ino zyintu zyakumubili ndizibona buti? (Amubale Luka 18:24-30.) Muuya wanyika ukulwaizya “zisusi zyameso” kwiinda mukupa bantu kuti babe balyato alimwi akuyandisisya zyintu zyakumubili. (1 Jo. 2:16) Wapa kuti bantu bayandisye buvwubi. (1 Ti. 6:9, 10) Ooyu muuya utupa kusyoma kuti zyintu zyakumubili zilakonzya kutukwabilila. (Tus. 18:11) Aboobo, ikuti katuyandisya mali kwiinda Leza, nkokuti twazundwa a Saatani. Tweelede kulibuzya kuti, ‘Sena ndilazyibikkila kapati maano zyintu zyakumubili azyakulikondelezya?’

¹¹ Ijwi lya Leza lyakasololelwa amuuya litukulwaizya kuti tutani kwaayandisyi mali pele lilatwaambila kuti tweelede kubeleka canguzu kutegwa tujane ziyandika mumukwasyi wesu. (1 Ti. 5:8) Muuya wa Leza ulabagwasya aabo bautambula kuti kabaiya bube bwa Jehova bwabwaabi. Balababikkila kapati maano bantu ikutali kuzyintu, aboobo balaaba kuti kabacikonzya. (Tus. 3:27, 28) Alimwi kubelekela Leza bakubikka ambele kutali mali pe.

12, 13. Kwiindana amuuya wanyika, mbuti muuya wa Leza mboukonzya kutugwasya?

¹² Ino nondililemeka nditondezya muuya uuli buti? (Amubale Bakolose 3:8-10, 13.)  Muuya wanyika utola ambele milimo yakumubili. (Gal. 5:19-21) Tulakonzya kuzyiba muuya uutweendelezya notuli mubuyumu-yumu ikutali buyo nozyeenda kabotu zyintu, mbuli ciindi mukwesu naa mucizyi Munakristo naatatubikkili maano, naatunyemya, anaatubisizya. Kuyungizya waawo, notuli tolikke mumaanda eesu tulakonzya kutondezya muuya uutweendelezya. Kulilanga-langa kulakonzya kutugwasya. Amulibuzye kuti, ‘Kwamyezi iili cisambomwe yainda, sena ndacikonzya kuba abube mbuli bwa Kristo naa ndajokela kuziyanza zibi muŋambawido amumicito?’

¹³ Muuya wa Leza ulakonzya kutugwasya kuti ‘tusamunune buntu bwesu bwakaindi amicito yambubo akulisamika buntu bupya.’ Eeci ciyootugwasya kutegwa tuzumanane kuba aluyando abuuya. Tuna kubalekelela bamwi kuti batubisizya nokuba kuti kaambo nkapati. Nokuba kuti zyintu tiizyeenda bweelede tuyoolilesya kucita zyintu munzila “[ya]kulutila, bukali, kunyema, kubwenta alimwi amajwi aakusampaula.” Muciindi caboobo, tuyooba ‘amoyo mutete walubomba.’—Ef. 4:31, 32.

14. Ino bantu banji balibona buti Jwi lya Leza?

¹⁴ Sena ndilazibikkila maano akuziyanda zyeelelo zyamu Bbaibbele zyakulilemeka? (Amubale Tusimpi 3:5, 6.) Muuya wanyika utondezya buzangi ku Jwi lya Leza. Aabo beendelezyegwa amuuya ooyu tabazyibikkili maano zibeela zimwi zyamu Bbaibbele, basyoma tunsiyansiya twabantu amakani abasyaabusongo. (2 Ti. 4:3, 4) Bamwi tabalibikkili maano buya Jwi lya Leza. Bantu bali boobo balalidooneka Bbaibbele alimwi amboligwasya, pele basyoma busongo bwabo. Balazyuubya-ubya njiisyo zyamu Bbaibbele kujatikizya bumambi, koonana kwabaaluminyina naa kwabamakaintunyina, akulekana. Bayiisya kuti “bubotu mbubi, bubi mbubotu.” (Is. 5:20) Sena muuya ooyu ulatujatikizya andiswe? Ciindi notuli mumapenzi sena tusyoma busongo bwabantunsi kubikkilizya amizeezo yesu? Naa tutobela lulayo lwamu Bbaibbele?

15. Muciindi cakusyoma busongo bwesu, ino ncinzi ncotweelede kucita?

¹⁵ Muuya wa Leza utupa kuti katulilemeka Bbaibbele. Mbuli sintembauzyo jwi lya Leza tulibona kuti ndilampi kuzituta zyesu alimwi lilamunikila inzila zyesu. (Int. 119:105) Muciindi cakusyoma busongo bwesu, tusyoma Jwi lya Leza kuti lilatugwasya kuzyiba cibotu acibi. Tatwiiyi buyo kulemeka Bbaibbele pele tulayiya akuyandisya mulawo wa Leza.—Int. 119:97.

Amwiiye Cikozyanyo ca Jesu

16. Ino kuba “[a]mizeezo ya Kilisito” kubikkilizya nzi?

¹⁶ Kutegwa tutambule muuya wa Leza,  tweelede kuba “[a]mizeezo ya Kilisito.” (1 Ko. 2:16) “Kuba amizeezo njiyonya njaakajisi Kilisito Jesu” caamba kuzyiba mbwaakali kuyeeya ambwaakali kucita zyintu akwiiya cikozyanyo cakwe. (Lom. 15:5; 1 Pe. 2:21) Atulange-lange mbotukonzya kucita oobo.

17, 18. (a) Ino ncinzi ncotwiiya kuli Jesu kujatikizya mupailo? (b) Ino nkaambo nzi ncotweelede ‘kuzumanana kulomba’?

¹⁷ Amupailile muuya wa Leza. Katanasunkwa, Jesu wakapailila muuya wa Leza kuti umugwasye. (Lk. 22:40, 41) Andiswe tweelede kulomba muuya usalala wa Leza. Jehova ulapa cabuyo alimwi cabuuya muuya wakwe kuli baabo bamulomba alimwi ibajisi lusyomo. (Lk. 11:13) Jesu wakaamba kuti: “Amuzumanane kulomba, eelyo ciyoopegwa kulindinywe; amuzumanane kuyandaula, eelyo muyoojana; amuzumanane kukonkomona, eelyo muyoojulilwa.”—Mt. 7:7, 8.

¹⁸ Nomulomba muuya wa Jehova kuti umugwasye, mweelede kuzumanana kulomba ncomuyanda. Tweelede kupaila lyoonse. Ziindi zimwi, Jehova ulazumizya kuti ibamulomba batondezye mbobaciyandisyisya cintu eeco alimwi akubona lusyomo lwabo mboluli luyumu katana ingula mipailo yabo. *

19. Ino ncinzi Jesu ncaakali kucita lyoonse, alimwi nkaambo nzi ncotweelede kumwiiya?

¹⁹ Amumulemeke Jehova amoyo woonse. Jesu wakali kucita zyintu zikkomanisya Bausyi lyoonse. Aciindi cimwi, Jesu wakali kuyanda kuti zyintu zicitwe munzila yakwe kutali ya Bausyi. Pele akaambo kalusyomo wakaambila Bausyi kuti: “Kutacitiki kuyanda kwangu, pele akucitike kuyanda kwako.” (Lk. 22:42) Amulibuzye kuti, ‘Sena ndilamulemeka Leza nokuba kuti cilakatazya?’ Kumulemeka Leza ncintu ciyandika kapati kuti katuyanda buumi. Tweelede kumulemeka amoyo woonse nkaambo Nguwakatulenga alimwi Nguwakatupa buumi. (Int. 95:6, 7) Kunyina ceeleede kubweza busena bwakumulemeka. Leza takonzi kutuyanda kuti katutamulemeki.

20. Ino buumi bwa Jesu bwakazingulukide aanzi alimwi nkaambo nzi ncotweelede kumwiiya?

²⁰ Amulizyibe kabotu Bbaibbele. Jesu naakali kukazya Saatani, wabelesya Magwalo. (Lk. 4:1-13) Naakali kwaambaula abasizikombelo bakali kumukazya, Jesu wakabelesya nguzu zyakali mu Jwi lya Leza. (Mt. 15:3-6) Buumi bwakwe boonse Jesu bwakazingulukide akuzyiba akuzuzikizya mulawo wa Leza. (Mt. 5:17) Aswebo tweelede kuzumanana kwiiya Ijwi lya Leza likonzyakutuyumya. (Flp. 4:8, 9) Kujana ciindi cakukomba olikke naa mumukwasyi cilakonzya kutukatazya. Atujane ciindi nokuba kuti tujisi bubi.—Ef. 5:15-17.

21. Ino mbubambe nzi bukonzya kutugwasya kulimvwisya kabotu Jwi lya Leza akuzibelesya nzyotwiiya?

²¹ “Muzike musyomesi uucenjede” watugwasya kuba aciindi cakwiiya Bbaibbele tobeni alimwi akuba aciiyo camukwasyi kwiinda mukubikka bubambe bwa Kukomba Mumukwasyi mvwiki amvwiki. (Mt. 24:45) Sena mulacibelesya kabotu ciindi eeci? Kutegwa mube amizeezo ya Kristo, sena mulakonzya kubikkilizya nzyaakali kuyiisya Jesu ciindi nomwiiya? Mulakonzya kubelesya Watch Tower Publications Index kutegwa mujane twaambo ntomuyanda kuzyiba kujatikizya nzyomwiiya. Mucikozyanyo, kuzwa mumwaka wa 2008 kusikila mumwaka wa 2010,  mumagazini yakumwaya kubuleya muli zibalo zili 12 zijisi mutwe wakuti “Ncotwiiya Kuli Jesu.” Mulakonzya kubelesya zibalo eezi ciindi nomucita ciiyo. Mumagazini ya Sinsimuka! mulajanika zibalo zyaamba kuti “Ino Inga Mwaingula Buti?” Eeyi mibuzyo yakabambilwa kuyungizya luzyibo lwanu mu Jwi lya Leza. Ino inga tiimwabikkilizya ziiyo zili boobu nomukomba Mumukwasyi?

Tulakonzya Kwiizunda Nyika

22, 23. Ino ncinzi ncotweelede kucita kutegwa twiizunde nyika?

²² Kutegwa tusololelwe amuuya wa Leza, tweelede kuukazya muuya wanyika. Tacili cuuba-uuba kuuzunda muuya ooyu. Cilakonzya kutukatazya. (Jud. 3) Pele tulakonzya kuuzunda. Jesu wakaambila basikwiiya bakwe kuti: “Munyika munoojisi mapenzi, pele amuyume! Mebo ndaizunda nyika.”—Joh. 16:33.

²³ Andiswe tulakonzya kwiizunda nyika naa twaukazya muuya wanjiyo alimwi akucita kufwumbwa ncotukonzya kutegwa tutambule muuya wa Leza. Masimpe, “ikuti Leza kali andiswe, ino nguni uukonzya kutulwana?” (Lom. 8:31) Kwiinda mukutambula muuya wa Leza akutobela malailile aamu Bbaibbele, tuyakukkutila, tuyakuba aluumuno, lukkomano alimwi tuyakuba abuumi butamani munyika mpya iili afwaafwi kusika.

[Bupanduluzi buyungizidwe]

Sena Muciyeeyede?

• Nkaambo nzi muuya wanyika ncoudumide kapati?

• Ino mibuzyo nzi yone njotweelede kulibuzya?

• Ino zyintu nzi zyotatwe nzyotwiiya kuli Jesu kujatikizya kutambula muuya wa Leza?

[Mibuzyo yaciiyo]

[Caption on page 8]

Ino bangelo bamwi bakaba buti madaimona?

[Cifwanikiso icili apeeji 10]

Saatani ubelesya muuya wanyika kuyunga bantu, pele tulakonzya kuuzunda

[Cifwanikiso icili apeejik 11]

Sena Muciyeeyede?

• Nkaambo nzi muuya wanyika ncoudumide kapati?

• Ino mibuzyo nzi yone njotweelede kulibuzya?

• Ino zyintu nzi zyotatwe nzyotwiiya kuli Jesu kujatikizya kutambula muuya wa Leza?