Amuyiisye Bana Banu Kuba Abulemu

KAAMBYO kaku Nepali kaamba kuti: “Ikuti kamucita zyintu zili kabotu kubantu abalo baya kucita mbweena.” Aaka kaambyo kaamba kuti bantu balamuyanda alimwi balamumfwida lubomba muntu uuli kabotu.

Elyo kaka cilakkomanisya kubona bana basyoonto kabalilemeka! Mulangizi wabbazu waku Honduras wakali kubeleka abana bamisela isiyene-siyene mumulimo waŋanda-aŋanda, wakaamba kuti: “Lyoonse ndijana kuti imwana wakayiisigwa kabotu alimwi uulaabulemu ulamumvwida kapati mukamwini ŋanda.”

Akaambo kakutalemekana kuya bumvwula mazuba aano, kuzyiba mbotweelede kulemeka bamwi inga cilagwasya. Kuyungizya waawo, Imagwalo atukulwaizya kuti tweelede ‘kupona kweelana ambwaamba makani mabotu aajatikizya Kristo.’ (Flp. 1:27; 2 Ti. 3:1-5) Cilayandika kapati ikuyiisya bana besu kuti kababalemeka bantu. Ino inga bayiisyigwa buti kuti kababalemeka ncobeni bantu? *

Bana Balalilemeka Kabotu Kuti Bamwi Kabalilemeka

Bana balalilemeka kabotu nobabona baabo bacita oobo. Aboobo ibazyali balakonzya kuyiisya bana babo kuti kabalilemeka kabotu kwiinda mukulilemeka balo. (Dt. 6:6, 7) Kubandika amwanaanu mbociyandika kwaambaula kabotu cilayandika kapati, pele eeci tacili ncecintu celikke ciyandika kucitwa. Kunze lyaboobo, cikozyanyo cenu cibotu cilakonzya kumugwasya.

Amubone cikozyanyo ca Paula, * wakakomezyegwa amuzyali Munakristo uuli alikke. Ikubalemeka bantu boonse ncilengwa buya. Ino nkaambo nzi? Wakaamba kuti, “Bamaama bakali kucita oobo, aboobo andiswe tobana twakali kutobela ncobakali kucita.” Ba Walter Banakristo bakaisya bana babo basankwa kuti kababalemeka banyina batali Bakamboni. Bakaamba kuti, “Bana bangu bakali kubalemeka banyina akaambo kakubona mbondakali kucita mebo, taaku nindakali kubafwubaazya bakaintu bangu.” Ba Walter bakazumanana kuyiisya bana babo Ijwi lya Leza akupailila kuti Jehova abagwasye. Umwi akati kabo ubelekela  kumutabi wa Bakamboni ba Jehova, kakuli umwi mupainiya. Aaba bana balabayanda alimwi balabalemeka bazyali babo boonse bobilo.

Ibbaibbele lyaamba kuti: “Leza tali Leza walupyopyongano pe, pele ngwaluumuno.” (1 Ko. 14:33) Zyintu zyoonse nzyacita Jehova uzicita kabotu. Banakristo beelede kusoleka kwiiya bube bwa Leza oobu akuzibamba kabotu zyintu muŋanda. Bazyali bamwi bayiisya bana babo kuti kabayala bulo abuzuba kabatanaunka kucikolo, kabazyibikka kabotu zisani mozyeelede akugwasya mumilimo imwi yaaŋanda. Kuti naa bana babona kuti zyintu zibikkidwe kabotu alimwi zilibonya kabotu muŋanda abalo banakuzibikka kabotu zyintu muboona.

Ino bana benu bazibona buti zintu nzyobaiya kucikolo? Sena balakkomana kubona zyintu nzyobabacitila bamayi? Sena nywebo nobazyali mulacita oobo? Mbubwena mbomucita abalo bana mbobana kuzyibona zyintu kucikolo alimwi abamayi. Mweelede kubayiisya kuti kababalumba bamayi babo. Kubalumba bamayi, badokota, baulisya mucintoolo naa bantu buyo kumilimo njobacita, kulakonzya kutondezya kuti tulabalemeka. (Lk. 17:15, 16) Banakristo bacili bana balilemeka kabotu akati kabasicikolonyina beelede kulumbaizyigwa.

Banakristo beelede kuba citondezyo cibotu mumakani aakulilemeka. Cilakkomanisya kubona bakubusi bamumbungano kabatondezya kulilemeka kwiinda mukwaamba kuti, “ndalomba” naa kuti, “ndalumba.” Ciindi bapati nobamulemeka Jehova kwiinda mukuswiililisya kumalailile aapegwa lya miswaangano, abalo bana balakulwaizyigwa kucita boobo. Bana balakonzya kubaiya bamwi kwiinda mukulangilila bantu balilemeka kabotu a Ŋanda ya Bwami. Mucikozyanyo, Andrew uulaamyaka iili yone wakaiya kale kwaamba kuti, “Ndalomba ndiinde,” kuti uyanda kwiinda aali bapati.

Ino ncinzi acimwi ncobakonzya kucita bazyali kutegwa bagwasye bana babo kuti kabalilemeka kabotu? Bazyali beelede kujana ciindi cakubandika abana mbozikonzya kubagwasya zikozyanyo nzyobaiya mu Jwi lya Leza.—Lom. 15:4.

Kamuyiisya Kweelana a Zikozyanyo Zili mu Bbaibbele

Banyina Samuele beelede kuti bakamuyiisya mwanaabo kuti kamufwugamina Mupaizi Mupati Eli. Nobakamutola kutempele, andiza wakalaamyaka yotatwe naa yone. (1 Sam. 1:28) Sena inga mwamuyiisya mwanaanu muniini mbobaanzya, mbuli kwaamba kuti, “mwabuka buti,” “mwalibizya buti,” “kwasiya buti,” naa kufwumbwa cilengwa cicitwa nkomukkala? Mbubwenya mbuli Samuele, bana banu balakonzya ‘kubota kumeso aa-Jehova akumeso aabantu.’—1 Sam. 2:26.

Inga cabota kubelesya zibalo zyamu Bbaibbele kutondezya kwiindana kuliko akati kakulemeka akutalemeka. Mucikozyanyo, Mwami wamu Israyeli Ahaziya watakali  kusyomeka ciindi naakali kuyanda kubonana amusinsimi Eliya, “wakamutumina umwi silutwe wabantu bali makumi osanwe” kuti bakamwiite. Silutwe wakaambila musinsimi kuti baunke limwi. Pele oobu tabusyi mbwaakeelede kwaambilwa muntu wakali kwiiminina Leza. Ino Eliya wakaingula buti? Wakaamba kuti, “Na ndi muntu wa-Leza, mulilo useluke kuzwa kujulu, ukutente webo ankamu yako.” Eeci ncicakacitika ncobeni. “Mulilo wakaseluka kuzwa kujulu, wamutenta walo ankamu yakwe.”—2 Bam. 1:9, 10.

Silutwe wabili abantu bali 50 bakatumwa kuti bakamulete Eliya. Awalo wakasoleka kumwaambila Eliya kuti baunke limwi. Mbubwenya buyo mulilo wakaboola kuzwa kujulu. Pele Silutwe watatu abantu bali 50 wakatumwa kuya kuli Eliya. Ooyu wakamulemeka Eliya. Muciindi cakumusinikizya Eliya, wakafwugama akumukombelezya kuti: “Akaka [o]muntu wa-Leza! Buumi bwangu buyandike mumeso aako, abwalo buumi bwabaaba balanda bako bali makumi osanwe. Tulibwene mulilo mbuwakaseluka kuzwa kujulu akutenta basilutwe bataanzi bobile abantu babo. Pele lino buumi bwangu buyandike mumeso aako.” Sena musinsimi wa Leza naakamwiitila mulilo muntu wakaliyoowede pele wakali kumulemeka? Eeco nicatakabota. Muciindi caboobo, imungelo wa Jehova wakaambila Eliya kuti aunke asilutwe ooyu. (2 Bam. 1:11-15) Sena eeci tacitondezyi mbociyandika kuba abulemu?

Ciindi mwaapostolo Paulo nibakamujata basikalumamba baku Roma, tanaakacibona kuti cakali ciindi cibotu cakwaambaula. Cabulemu wakamubuzya silutwe wakali kweendelezya kuti: “Sena inga wandizumizya kukwaambila cimwi cintu?” Akaambo kaceeci, Paulo wakazumizyigwa kuliiminina.—Mil. 21:37-40.

Jesu naakali kubetekwa bakamuuma lubayi. Nokuba boobo, wakalaazyi majwi aakubelesya kutegwa alikwabilile naakati: “Ikuti naa ndalubizya kwaambaula, kondaambila ncindalubizya; pele ikuti naa ncindaamba cililuzi, ino unduumina nzi?” Taku wakamujanina mulandu Jesu kweelana ambwaakali kwaambaula.—Joh. 18:22, 23.

Ijwi lya Leza lilatupa zikozyanyo zyambotukonzya kwiingula kuti naa twalubizya ambotukonzya kuzumina cintu ncitwakalubizya kaindi naa cintu ncitwatakabikkila maano. (Matl. 41:9-13; Mil. 8:20-24) Mucikozyanyo, Abigayeli wakalilekelela akaambo kakuti mulumaakwe Nabala wakafwubaazya Davida. Amane, Abigayeli wakapa Davida zyakulya zinji. Davida wakacikkomanina ncaakacita Abigayeli cakuti naakafwa Nabala, Davida wakamukwata Abigayeli.—1 Sam. 25:23-41.

Mweelede kuyiisya bana benu kuba abulemu, kunyina makani naa basinikizigwa buya kulemeka bamwi naa balacita oobo akaambo kakuzyibila. ‘Kuti twabamunikila bantu’ munzila eeyi ciyakupa kuti ‘Taateesu wakujulu alemekwe.’—Mt. 5:16.

[Bupanduluzi Buyungizyidwe]