Kweenda Mumuuya Kutugwasya Kupona Kweelana Akulyaaba Kwesu

“Inzila njimweendela ibe yamu-Muuya, aboobo mutakaciti zisusi zyanyama.”—GAL. 5:16.

1. Ino ndubbapatizyo nzi lwakacitika lya Pentecoste?

LYA PENTECOSTE 33 C.E., basikutobela Jesu bakaamba myaambo iindene-indene nobakamana kubbapatizyigwa amuuya uusalala. Bakatondezya kuti batambula cipego camuuya kwiinda mukucita maleele. (1 Kor. 12:4-10) Ino cipego eeci alimwi amakani ngaakapa Petro zyakabajatikizya buti bantu? Banji “bakayaswa kumyoyo.” Naakabakulwaizya Petro, bakeempwa akubbapatizyigwa. Makani aansiku atondezya kuti: “Abo abakatambula makani aakwe bakabapatizigwa, mbubonya buzuba obo bakayungililwa bantu bati kabe myaanda iili makumi otatwe.” (Inc. 2:22, 36-41) Kweelana ambwaakalailila Jesu, kweelede kuti bakabbapatizyigwa mumaanzi muzyina lya Taata, lya Mwana alya muuya uusalala.—Mt. 28:19.

2, 3. (a) Amwaambe lwiindano luliko akati kakubbapatizyigwa amuuya uusalala alimwi akubbapatizyigwa muzyina lyamuuya uusalala. (b) Ino nkaambo nzi Banakristo bakasimpe boonse bamazuba aano ncobeelede kubbapatizyigwa mumaanzi?

 ² Pele, sena kuli lwiindano luliko akati kakubbapatizyigwa amuuya uusalala alimwi akubbapatizyigwa muzyina lyamuuya uusalala? Inzya. Aabo babbapatizyigwa amuuya uusalala balazyalululwa kabali bana ba Leza bamuuya. (John 3:3, BT.) Balananikwa kuti bakabe bami abapaizi mu Bwami bwa Leza bwakujulu, alimwi baba cibeela camubili wa Kristo wakumuuya. (1 Kor. 12:13; Gal. 3:27; Ciy. 20:6) Aboobo oolu ndolubbapatizyo—ikubbapatizyigwa amuuya uusalala—Jehova ndwaakacita lya Pentecoste alimwi akuya kumbele, naakali kusala baabo ibayakuba basikulelanyina a Kristo. (Rom. 8:15-17) Ino mbuti kujatikizya lubbapatizyo lwamumaanzi, muzina lyamuuya uusalala, ilucitwa lyoonse kumiswaangano yaalubazu, yabbazu ayacooko iicitwa abantu ba Jehova mazuba aano?

³ Banakristo bakasimpe balabbapatizyigwa mumaanzi ikutondezya kuti balilyaabide cakumaninina kuli Jehova Leza. Oobo mbocibede kulibaabo bajisi bwiite bwakujulu. Pele kubbapatizyigwa mumaanzi nintaamu iiyandika akuzyuulu zyabamaalumi abamakaintu bamumazuba aano ibajisi bulangizi bwakupona kukabe kutamani anyika. Kunyina makani abulangizi muntu mbwajisi, ikubbapatizyigwa mumaanzi, muzyina lya Taata alya Mwana alya Muuya Uusalala nintaamu iiyandika muntu njaelede kubweza kutegwa atambulwe kuli Leza. Banakristo boonse ibabbapatizyigwa boobu beelede ‘kuzumanana kweenda mumuuya.’ (Amubale Ba-Galatiya 5:16.) Sena mweenda mumuuya akupona kweelana akulyaaba kwenu?

Ncocaamba ‘Kweenda Mumuuya’

4. Ino ‘kweenda mumuuya’ caamba nzi?

⁴ ‘Kweenda mumuuya’ kubikkilizya kuzumina kweendelezyegwa amuuya. Munzila imwi, caamba kusololelwa amuuya muzyintu zyoonse nzyomucita abuzuba. Caandaano 5 calugwalo lwa Ba-Galatiya citondezya lwiindano luliko akati kakweendelezyegwa amuuya uusalala alimwi azisusi zyanyama.—Amubale Ba-Galatiya 5:17, 18.

5. Ino kweendelezyegwa amuuya uusalala kubikkilizya kukaka milimo iili buti?

⁵ Ikuti kamweendelezyegwa amuuya uusalala, mulasolekesya kukaka milimo yanyama. Milimo eeyi ibikkilizya “bwaamu, busofwaazi, zisusi zibi, kukomba mituni, bulozi, inkondo, bulwani, lukazyanyo, inyemo, insulano, mipampo mipampo, impilingano, ibbivwe, inkolwi, injalalando.” (Gal. 5:19-21) Nkokwaamba kuti ‘mwajazya muuya milimo yanyama’ naa mwabelesya muuya kujaya milimo yanyama. (Rom. 8:5, 13) Ciyakumugwasya kuyeeya naa kubikkila maano kumakani amuuya alimwi akuzumina kweendelezyegwa anguwo, muciindi cakuzumina kweendelezyegwa azisusi zyanyama.

6. Amupe cikozyanyo icipandulula muntu ncaelede kucita kutegwa atondezye micelo yamuuya.

⁶ Wanoobeleka mulindinywe muuya uusalala, mulaba abube bumukkomanisya Leza, “micelo ya-Muuya.” (Gal. 5:22, 23) Nokuba boobo, mulizyi kuti muyandika kubeleka canguzu kuti mube abube oobu. Mucikozyanyo: Mulimi walima muunda. Mubwini, kuyandika zuba alimwi amaanzi; ikuti kazitako zyintu eezyi kunyina  ncayakutebula. Tulakonzya kukozyanisya muuya uusalala kuzuba. Muuya uusalala ulayandika kapati kutegwa tutondezye micelo yamuuya. Nokuba boobo, ino ncinzi mulimi ncakonzya kutebula ikuti naa tabeleki canguzu? (Tus. 10:4) Inzya, mbomubamba moyo wanu kulabujatikizya bube alimwi akuvwula kwamicelo yamuuya njomujisi. Aboobo amulibuzye kuti, ‘sena ndilauzumizya muuya uusalala kuti uzyale micelo kwiinda mukuzumina kweendelezyegwa anguwo?’

7. Ikuti naa kamuyanda kuba amicelo yamuuya uusalala, ino nkaambo nzi kubala akuzinzibala kuyeeya ncokuyandika kapati?

⁷ Kutegwa bakabe abutebuzi bunji, balimi balazitilila zisyango zyabo. Kutegwa mube amicelo yamuuya, muyandika maanzi aakasimpe aajanika mu Bbaibbele alimwi aapegwa kwiinda mumbungano ya Bunakristo mazuba aano. (Is. 55:1) Kweelede kuti mwakaambila bantu banji kuti Magwalo Aasalala akasololelwa amuuya uusalala. (2 Tim. 3:16) Alimwi muzike musyomesi uucenjede ulatugwasya kumvwisya kasimpe kamu Bbaibbele. (Mt. 24:45-47) Kaambo kalisalede. Ikuti katuyanda kusololelwa amuuya uusalala tweelede kubala akuzinzibala kuyeeya nzyotubala mu Jwi lya Leza. Ikuti naa mulacita oobo, mwiiya zikozyanyo zibotu zyabasinsimi ibakali “kuyandaulisya akufwemfweta [naa kumvwuntauzya]” makani ngobakapedwe. Alimwi buya abalo bangelo balatondezya kuti balaabikkila maano makani aakumuuya aajatikizya Lunyungu lwakasyomezyegwa alimwi ambungano ya Banakristo bananike.—Amubale 1 Petro 1:10-12.

Kweendelezyegwa Amuuya Uusalala—Mubuti?

8. Ino nkaambo nzi ncomuyandika kapati kulomba Jehova kuti amupe muuya wakwe?

⁸ Tacaambi buyo kubala akuzinzibala kuyeeya pe. Mweelede kuzumanana kulomba Jehova kuti amugwasye akumusololela. Ulakonzya “kucita loko mane akwiinda zyoonse nzitukumbila nanka nzituyeeya.” (Ef. 3:20; Lk. 11:13) Pele, ino inga mwaingula buti ikuti muntu wamubuzya kuti: “Nkaambo nzi ncondeelede kuzumanana kumulomba Leza ikuti naa walo ulizyi kale ‘zyintu nzindibula kanditana kumubuzya’?” (Mt. 6:8) Cintu ncomuteelede kuluba ncakuti, ikulomba muuya uusalala ncitondezyo cakuti musyoma Jehova kuti amugwasye. Mucikozyanyo, ikuti umwi muntu wamulomba kuti mumugwasye, mulasolekesya kumugwasya akaambo kakuti wamulomba, icitondezya kuti ulamusyoma. (Amweezyanisye Tusimpi 3:27.) Mbubwenya buyo, Jehova ulakkomana nomumulomba kuti amupe muuya uusalala, aboobo uyakumupa.—Tus. 15:8.

9. Ino mbuti kujanika kumiswaangano mbokukonzya kumugwasya kuti kamweendelezyegwa amuuya wa Leza?

⁹ Icimbi cikonzya kumugwasya kuti mweendelezyegwe amuuya wa Leza nkujanika kumiswaangano yambungano, yaalubazu ayabbazu, alimwi ayacooko. Muyandika kusolekesya kujanika kumiswaangano alimwi akuswiililisya. Kucita boobu inga kwamugwasya kumvwisya “makani malamfwu aabulondo bwa Leza.” (1 Kor. 2:10) Akwalo kwiingula lyamiswaangano kuli mbokugwasya. Amuyeeye miswaangano njomwakajanika munsondo zyone zyainda. Ino mwakatambika ziindi zyongaye kutegwa mwiingule, ikwaamba zyintu nzyomusyoma? Mumakani aaya, sena kuli mbazu momutaciti kabotu njomwabona kuti mweelede kubelekelawo? Ikuti kakuli boobo, amusale cakucita munsondo zitobela. Jehova ulabona kuti  mulijisi luyandisisyo lwakutola lubazu kwiinda mukwiingula alimwi uyakumupa muuya uusalala uuyakumugwasya kumvwisya zyintu zibandikwa lyamiswaangano.

10. Ino kweenda mumuuya kubikkilizya kutola lubazu mumulimo nzi?

¹⁰ Ikweenda mumuuya kulabikkilizya akuzumina kutambwa ooku nkotubala ku Ciyubunuzyo 22:17: “Muuya anabwiinga balaamba kuti, Boola. Ayooyo uuswiilila alakwe aambe kuti, Boola. Ayooyo uufwide nyota aboole. Amuntu woonse uuyanda anywe cabuyo maanzi aabuumi.” Muuya, uubeleka kwiinda mukabunga kabananike, ulatutamba kumaanzi aabuumi. Ikuti mwakakuzumina kutamba kwakuti “boola,” sena andinywe mulilibambilide kwaamba kuti, “Boola”? Eelyo kaka eeci ncoolwe cipati, ikutola lubazu mumulimo wakugwasya bantu kuti bakafwutuke.

11, 12. Ino muuya uusalala ujisi lubazu nzi mumulimo wakukambauka?

¹¹ Imulimo ooyu uuyandika kapati lino ulimukusololelwa amuuya uusalala. Tulabala kujatikizya muuya uusalala mbowakagwasya bamamisyinali bamumwaanda wamyaka wakusaanguna kuti bakakambaukile muzilawo zipya. Mwaapostolo Paulo antoomwe abeenzinyina “bakakasigwa Muuya Uusalala kwaamba makani mu-Asiya” alimwi amu Bituniya. Tatuzyi bwini muuya mbowakabakasya kunjila mumasena aaya, nokuba boobo cilisalede kuti muuya wakasololela Paulo kujila mucilawo cipati ca Europe. Wakabona cilengaano camuntu waku Makedoniya, kalomba kugwasyigwa.—Inc. 16:6-10

¹² Amazuba aano, muuya wa Jehova ulausololela mulimo wakukambauka uucitwa nyika yoonse. Jehova tacibelesyi zilengaano kutondezya kwakugama; muciindi caboobo, ulabasololela bananike amumuuya uusalala. Alimwi muuya uusalala ulabakulwaizya bakwesu abacizyi kukambauka akuyiisya kusikila mpobagolela. Cakutadooneka, andinywe mulatola lubazu mumulimo ooyu uuyandika kapati. Sena inga mwayungizya lukkomano lwenu mumulimo ooyu uukkomanisya?

13. Ino mbuti mbomukonzya kulibombya kubusolozi bwa muuya uusalala? Amupe Cikozyanyo.

¹³ Mulakonzya kulibombya kubusolozi bwamuuya uusalala kwiinda mukutobela malailile ngobapegwa bantu ba Leza. Amubone cikozyanyo ca Mihoko, mucizyi mukubusi uukkala ku Japani. Naakali mupainiya mupya, wakali kuyoowa kucita nyendo zyakupilukila; wakali kulimvwa kuti tanaakali kukonzya kwaambaula munzila iikonzya kukkomanisya mukamwini ŋanda. Aciindi mpoonya aawa, kwakamwaigwa Mulimo Wesu wa Bwami iwakajisi malailile aatondezya mbokupangwa nyendo zyakupilukila. Alimwi kwakamwaigwa broshuwa yakuti A Satisfying Life—How to Attain It. Yakagwasya kapati mucilawo ca Japani. Mihoko wakaatobela malailile aakali kutondezya mboyakeelede kubelesyegwa broshuwa eeyi, ikapati kujatikizya mbokupangwa nyendo zyakupilukila. Mpoonya wakali kutalisya ziiyo zya Bbaibbele kubantu ibakakakide mulweendo lwakusaanguna. Waamba kuti: “Ndakaba aziiyo zinji—izisika ku 12 aciindi comwe—cakuti bamwi ndakabalomba kuti balindile asyoonto. Masimpe, ikuti kamweenda mumuuya akutobela malailile ngobapegwa babelesi ba Jehova, muyakutebula cakuvwuzya.

Amusyome Muuya wa Leza

14, 15. (a) Ino mbuti bantu batalondokede mbobakonzya kupona kweelena akulyaaba kwabo? (b) Ino mbuti mbomukonzya kujana balongwe bainda kubota?

¹⁴ Mbomuli babelesi basalidwe a Leza, mulijisi  mulimo ngomweelede kubeleka. (Rom. 10:14) Mulakonzya kulimvwa kuti tamukonzyi kuuzuzikizya mulimo ooyu. Pele, mbubonya mbuli bananike, ngu Leza uumuzulizya naa kupa kuti mweelele. (Amubale 2 Ba-Korinto 3:5.) Mulakonzya kupona kweelana akulyaaba kwenu kwiinda mukusolekesya kusikila mpomugolela alimwi akusyoma muuya wa Leza.

¹⁵ Mubwini, tacili cuuba kulindiswe tobantu batalondokede ikupona kweelana akulyaaba kwesu kuli Jehova, Leza wesu uulondokede. Cintu cimwi cikonzya kumunyonganya ncakuti bantu bamwi mbomwakali kumvwana limwi balakonzya kugambwa nobabona kuti bukkale bwenu bwacinca alimwi balakonzya kutalika ‘kumuvwiya.’ (1 Pet. 4:4) Pele mutalubi kuti lino mujisi balongwe bapya, kwaambisya Jehova alimwi a Jesu Kristo. (Amubale Jakobo 2:21-23.) Alimwi cilayandika kapati kubazyiba bakwesu abacizyi bamumbungano yenu, ibali ncibeela ‘cabunyina’ bwanyika yoonse. (1 Pet. 2:17; Tus. 17:17) Kwiinda mumuuya wakwe, Jehova uyakumugwasya kuti mube abalongwe ibanikumugwasya kucita zyintu zili kabotu.

16. Ino nkaambo nzi ncomukonzya ‘kubotelwa mumakompami,’ mbuli Paulo?

¹⁶ Nokuba kuti mujisi balongwe babotu mumbungano, cilakonzya kumuyumina kulanganya mapenzi aamusikila lyoonse. Zyintu zimucitikila zimwi ziindi zilakonzya kumunyonganya cakuti inga mwalimvwa mbuli kuti muli mumulongo wamapenzi. Muziindi zili boobu muyandika kapati kulanga kuli Jehova, kumulomba kuti amupe muuya uusalala. Mwaapostolo Paulo wakalemba kuti: “Ciindi ncinkompeme nciconya ncindi singuzu.” (Amubale 2 Ba-Korinto 4:7-10; 12:10.) Paulo wakalizyi kuti muuya wa Leza ulakonzya kumuyumya muntu nali mumapenzi aali woonse. Aboobo, inguzu zya Leza zilakonzya kumuyumya kufwumbwa ciindi nomumaninwa nguzu alimwi anomuyandika lugwasyo. Paulo wakalemba kuti ‘wakali kubotelwa mumakompami.’ Ciindi naakatyompedwe, ndendilyo naakali kubona mbowakali kumugwasya muuya. Andinywe mulakonzya kulimvwa boobu.—Rom. 15:13.

17. Ino mbuti muuya uusalala mbuukonzya kumugwasya kuti mukasike nkomuya?

¹⁷ Tuyandika muuya wa Leza kutegwa tukonzye kupona buumi bwakulyaaba kulinguwe. Amuyeeye kuti muyabweenzya bwato ibutontwa amuwo. Imbaakani yenu njakubelekela Jehova kukabe kutamani. Muuya uusalala uli mbuli muuwo ngomuyanda kuti utonte bwato bwenu kutegwa mukasike kabotu nkomuya. Tamuyandi kupupululwa amuuya wanyika ya Saatani. (1 Kor. 2:12) Mweelede kuzyiba muwo uukonzya kutonta bwato bwenu. Ooyu muuya uusalala. Kwiinda mu Jwi lya Leza alimwi amumbungano yakwe yeendelezyegwa amuuya, muuya uusalala uyakumusololela munzila yeelede.

18. Ino mujisi makanze nzi lino, alimwi nkaambo nzi?

¹⁸ Ikuti naa mwali kwiiya Bbaibbele a Bakamboni ba Jehova akukkomana kuswaangana ambabo, pele tamuna kubweza ntaamu ziyandika zyakulyaaba akubbapatizyigwa, amulibuzye kuti, ‘Ino ncinzi cindipa kuwaya-waya?’ Ikuti kamuuzyi mulimo nguubeleka muuya uusalala mukuzuzikizya makanze aa Jehova mazuba aano alimwi akuziba mbuubeleka, nkokuti amubweze ntaamu zyeelede kweelana azyintu nzyomwakaiya. Jehova uyakumulongezya kapati. Uyakumupa muuya wakwe uusalala. Ikuti naa mwakabbapatizyigwa myaka iili mbwiibede yainda, masimpe mwalibonena mbuubeleka muuya uusalala. Mwakamvwa akulibonena mbuli Jehova mbwakonzya kumuyumya amuuya wakwe. Oobo mbocinoobede lyoonse—inzya, mane kukabe kutamani. Aboobo, amube amakanze aakuzumanana kweenda mumuuya uusalala.

Sena Muciyeeyede?

• Ino ‘kweenda mumuuya’ caamba nzi?

• Ino ncinzi cikonzya kumugwasya ‘kuzumanana kweenda mumuuya’?

• Ino mbuti mbomukonzya kupona kweelana akulyaaba kwenu?

[Mibuzyo yaciiyo]

[Cifwanikiso icili apeeji 15]

Mbubwenya mbuli kulima muunda, kubamba moyo wenu kuyandika kubeleka canguzu

[Zifwanikiso izili apeeji 16, 17]

Sena mweendelezyegwa amuuya wa Leza?