Kukomba Mumukwasyi Kulayandika Kutegwa Tukafwutuke

AMUYEEYE mbobuya kuyoosya “buzuba bupati bwa-Leza Singuzuzyoonse!” (Ciy. 16:14) Kaamba mumaambila mbali, musinsimi Mika wakalemba kuti: “Zilundu zilayaaya . . . , amimpata ilaanduka. Zilaba mbuli bunzuka buumpwa amulilo, ambuli maanzi aatika ampwampwa.” (Mik. 1:4) Ino ncinzi ciyakubacitikila bantu ibatakombi Jehova? Ijwi lya Leza lyaamba kuti: “Mubuzuba obo bajayidwe ba-Jehova bayoojanwa moonse munyika kuzwa kumagolelo amwi akusikila kumagolelo amwi.”—Jer. 25:33.

Akaambo kakucenjezya kuli boobu, mitwe yamikwasyi—ibanji akati kabo mbazyali bali balike—beelede kulibuzya kujatikizya bana babo bakomena kuti: ‘Sena bana bangu bayakufwutuka lya Amagedoni?’ Ibbaibbele lilatusyomezya kuti bayakufwutuka ikuti kabajisi cilongwe ciyumu a Jehova aciindi eeco kweelana aciimo cabo.—Mt. 24:21.

Mbociyandika Kuba Aciindi Cakukomba Mumukwasyi

Mbomuli bazyali, amusoleke kubalela bana banu “mulwiiyo lwa-Mwami amumilazyo yakwe.” (Ef. 6:4) Ikwiiya Bbaibbele abana banu ncintu ciyandika kapati. Tuyanda kuti bana besu babe mbuli Banakristo baku Filipi aabo Paulo mbaakalumbaizya akaambo kakumvwida Jehova. Wakalemba kuti: “Bayandwi bangu, mbuli mbumuswiilila lyoonse, teensi kwaamba kuciindi ncendiwo luzutu pele cakwiinda loko kuciindi ecino ncensiwo, ndakumbila kuti musungwaale kukulibelekela lufutuko lwanu cakuyoowa acakuzyangama.”—Flp. 2:12.

Sena bana banu balatobela milawo ya Jehova nomutako? Ino mbuti nobali kucikolo? Ino mbuti mbomukonzya kubagwasya bana banu kuti bazyibe mbociyandika kutobela milawo ya Jehova kutegwa kaibasololela ciindi nomutako?

Kukomba mumukwasyi kulakonzya kubagwasya bana kuba alusyomo luyumu ilukonzya kupa kuti kabamumvwida Jehova anobali balike. Aboobo, atulange-lange zyintu zyotatwe iziyandika kapati izikonzya kumugwasya kutegwa muzumanane kwiiya Bbaibbele mumukwasyi.

Kamuzumanana Kucita Oobo Lyoonse

Ibbaibbele lyaamba kuti Leza ulaita bana bakwe ibangelo aciindi cibikkidwe. (Job. 1:6) Amucite mbubwenya oobo andinywe kubana banu. Amubikke buzuba alimwi aciindi ca Kukomba Mumukwasyi, mpoonya amucitobele lyoonse. Kuyungizya waawo, amusalile limwi buzuba bumbi mbomukonzya kwiiya Bbaibbele ikuti naa tiimwacikonzya kucita oobo mubuzuba mbomwiiya lyoonse akaambo kazyintu zyacitika nzyomwatali kuyeeyela.

Mukuya kwaciindi, tamweelede kuyeeya kuti ikucita ciiyo ca Bbaibbele muziindi zimwi buyo cili kabotu. Kamuyeeya kuti, bana banu mbabasikwiiya Bbaibbele bayandika kapati. Pele, Saatani uyanda kubanyonganya. (1 Pet. 5:8) Ikuti mwaleka Kukomba Mumukwasyi akaambo kakweebelela cipekupeku naa akaambo kazyintu zimwi zitayandiki kapati, Saatani ulamuzunda.—Ef. 5:15, 16; 6:12; Flp. 1:10.

Amubandike Twaambo Tukonzya Kumugwasya Mubuumi

Buzuba bwa Kukomba Mumukwasyi bweelede kuba buzuba bwakwiiya zyintu zikonzya kumugwasya. Ino eeci inga cacitwa buti? Zimwi ziindi, mulakonzya kubandika zyintu zikonzya  kumucitikila mwanaanu kumbele. Mucikozyanyo, inga mwacita zitondezyo zyambomuya kucita mumuunda. Bana balakkomana kucita zyintu nzyobakonzya kucita kabotu. Kwiinduluka nzyomuya kwaamba mumulimo wamumuunda alimwi akuyeeya mbomukonzya kucita ikuti bantu baukaka mulumbe kulakonzya kubagwasya bana kuba basicamba muzibeela zyoonse zyabukambausi.—2 Tim. 2:15.

Alimwi mulakonzya kuziinduluka nzila zikonzya kubagwasya bana banu kubona mbobakonzya kuzunda sunko lyakuyungwa abeenzinyina. Kamubandika twaambo tukonzya kupa bana banu kuzyiba mbobakonzya kwiingula beenzinyina munzila ngubauba. Alimwi mulakonzya kubabuzya kuti baambe masunko aabakatazya, nkwaacitikila, cikonzya kucitika naa bazumina kuyungwa alimwi acikonzya kucitika naa bakaka. Ciindi aciindi, amuziinduluke nzila nzyobakonzya kubelesya nobasunkwa.

Kukomba mumukwasyi kuya kugwasya bazyali kukankaizya mbokugwasya kuba acilongwe a Jehova alimwi akuba basungu mumulimo wakwe. Kujatikizya kaambo aaka, makani aakuluula aababelesi ba Jehova basyomeka aajanika mumamagazini eesu alakonzya kugwasya mwanaanu kuzyiba kuti ikubelekela Jehova ncecintu ciinda kubota. Amumugwasye kuba ambaakani yakucita mulimo wabupainiya, kubelekela ku Bbeteli, kujanika ku Cikolo Cakwiiya Mulimo, naa kucita mulimo waciindi coonse uumbi.

Pele ncomweelede kuzyiba ncakuti: Bazyali bamwi ibayanda kuti mwanaabo acite kabotu balalubizya akaambo kakuti tabamulumbaizyi muzyintu nzyacita kabotu lino, pele babikkila buyo maano muzyintu nzyobayanda kuti akacite kumbele. Nokuba boobo, cilayandika kapati kubakulwaizya bana banu kuba ambaakani yakuya kubelekela ku Bbeteli alimwi kucita mulimo wabumisyinali. Pele, mweelede kucenjela kuti mutamunyemi mwanaanu akaambo kazyintu nzyomuyanda kuti akacite. (Kol. 3:21) Lyoonse kamuyeeya kuti mwanaanu weelede kulisalila kumuyanda Jehova kutali akaambo kakuti nywebo mulayanda kuti acite oobo. (Mt. 22:37) Aboobo amumulumbaizye mwanaanu muzyintu nzyacita kabotu, muciindi cakubikkila buyo maano muzyintu nzyomuyanda kuti akacite. Amumugwasye kuti kazikkomanina zyintu nzyamucitila Jehova. Mpoonya mwanaanu uyakulisalila kubelekela Jehova.

Ciiyo Camukwasyi Ceelede Kuti Kacikkomanisya

Cintu catatu ncomweelede kucita kutegwa Kukomba Mumukwasyi kuzumananane, nkucicita kuti kacikkomanisya. Ino mbuti mbomukonzya kucita boobu? Ndiza zimwi ziindi mulakonzya kuswiilila kuzisobano zyakalekkoodwa naa kweebelela akubandika zili mumavidiyo aa Bakamboni ba Jehova. Ndiza mulakonzya kubala cibalo cimwi camu Bbaibbele antoomwe, aumwi kaiminina muntu umwi iwaambwa mucibalo eeco.

Mu Ngazi Yamulindizi a Sinsimuka! muli zibalo zimwi izijisi twaambo tubotu twakubandika  mumukwasyi. Mucikozyanyo, mulakonzya kubelesya cibalo cijanika aapeeji 31 mumagazini ya Sinsimuka! icijisi mutwe wakuti “Ino Inga Mwaingula Buti?” Mu Ngazi Yamulindizi yabuleya muli cibalo cakuti “Cibeela Cabana.” Cibalo eeci cilacincana acibalo cimbi cabana icakuti “Amubayiisye Bana Banu.”

Twaambo ituli mucibalo cakuti “Bakubusi Balabuzya” mumagazini ya Sinsimuka! tulakonzya kubagwasya bazyali ibajisi bana bakubuka. Tamweelede kuluba kubandika kabbokesi kakuti “Twaambo Twakuyeeya.” Makani aali mukabbokesi aaka alakonzya kubelesyegwa nomubandika mumukwasyi.

Pele amubone kuti ciiyo camukwasyi tacili cakubuzya buyo mibuzyo minji kubana. Mucikozyanyo, bazyali bakulwaizya bana babo kuti kabalemba mutubbuku twabo, kabaamba mbobalimvwa kujatikizya makani aabandikwa lyaciiyo camukwasyi ambobakonzya kwaabelesya mubuumi bwabo. Nokuba boobo, mutabasinikizyi kuti kababala buya cakupozya zyintu nzyobalemba mutubbuku twabo, buyo-buyo bana banu tabani kulikwayi kulemba. Kamubaleka baliibe. Mukuya kwaciindi balakonzya kwaanguluka kumwaambila nzyobalemba.”

Ikuti kukomba mumukwasyi kakucitwa lyoonse, kamubelesya twaambo tugwasya mubuumi bwanu alimwi akuti kakukkomanisya, Jehova uyakumulongezya kapati. Eeci ciyakupa kuti boonse mumukwasyi bayume kumuuya.

Kabbokesi kali apeeji 31]

Amubelesye Nzila Ziindene-indene

“Nitwakali kwiiya abana besu basimbi, mebo abalumi bangu twakali kubandika twaambo tuyakubandikwa kumiswaangano yambungano mpoonya twakali kubaambila bana kuti bazekaule zifwanikiso izitondezya twaambo ntotwakali kubandika. Zimwi ziindi, twakali kucita cisobano camakani aamu Bbaibbele naa kwiinduluka nzyotwakali kuya kwaamba mumulimo wamumuunda. Twakali kucicita ciiyo cesu kweelana aciimo cabana, munzila iikkomanisya alimwi iikulwaizya.”—J.M., United States.

“Kutegwa tumugwasye mwana musankwa wamuntu ngondakali kuyiisya Bbaibbele kuti azyibe mbocakabede kaindi kubelesya bbuku lyakuvwunga, twakalemba bbuku lya Isaya litajisi zyaandano atupango. Twakaanunga mapepa kutegwa libe pepa lyomwe lilamfwu tumane twakabikka tusamu twakujatila mumabali. Mpoonya mwana ooyu wakali kuyanda kubala mbuli mbwaakacita Jesu mucikombelo ku Nazareta. Makani aali kuli Luka 4:16-21 aamba kuti Jesu “Naakalivununa [bbuku lya Isaya] wakajana” cibalo ncaakali kuyandaula. (Is. 61:1, 2) Pele mwana ooyu naakasola kucita oobu, cakamukatazya kujana Isaya 61 kubelesya pepa lilamfwu eeli litajisi zyaandano atupango. Wakagambwa alimwi wakabona kuti Jesu wakalijisi luzyibo mukubelesya mabbuku aakuvwunga, amane wakati: ‘Eelyo kaka Jesu wakali musongo!’”—Y.T., Japan.

[Cifwanikiso icili apeeji 30]

Kuziinduluka-induluka zyintu nzyobeelede kucita naa kwaamba bana banu kulakonzya kubagwasya kuzunda sunko lyakuyungwa abeenzinyina

[Cifwanikiso icili apeeji 31]

Kukomba Mumukwasyi kweelede kuti kakukkomanisya