‘Amumukazye Diabolosi’ Mbuli Mbwaakacita Jesu

“Amumukazye Saatani, uyoomucija.”—JAK. 4:7.

1. Ino Jesu wakazyi kuti uyookazyigwa buti naakali anyika, alimwi ino ncinzi cakali kuyoocitika?

JESU Kristo wakalizyi kuti uyookazyigwa a Diabolosi. Kaambo aaka kakalisalede kuzwa kumajwi Leza ngaakaambila cilenge camuuya icakazanga calo cakali kwaambaula kwiinda munzoka. Leza wakaamba kuti: “Njoobusya inkondo akati kanduwe amwanakazi [imbunga yakujulu iikozyanyisyigwa amukaintu wa Jehova], akati kalunyungu lwako alunyungu lwakwe. Walo [Jesu Kristo] uyookuuma amutwe, ayebo uyoomuluma kukasinde.” (Matl. 3:14, 15; Ciy. 12:9) Kulumwa kukasindi cakali kwaamba kuti Jesu wakali kunoopenga buyo aasyoonto kwiinda mukujaigwa naakali anyika mbwaanga Jehova wakali kuyoomubusya mubulemu bwakujulu. Pele ikuumwa kumutwe cakali kwaamba kuti Diabolosi wakali kuyoojaigwa, ilufwu lunyina bulangizi bwabubuke.—Amubale Incito 2:31, 32; Ba-Hebrayo 2:14.

2. Ino nkaambo nzi Jehova ncaakali masimpe kuti Jesu uyoozwidilila mukukazya Diabolosi?

² Jehova wakali aalusyomo lwakuti Jesu uyoozwidilila mumulimo wakwe akumukazya Diabolosi ciindi naakali anyika. Ino nkaambo nzi Jehova ncaakali masimpe mumakani aaya? Nkaambo kakuti kuzwa naakamulenga kujulu myaka minjaanji yakainda, wakamulangilila akuzyiba kuti “mufuzi” ooyu walo uuli ngo “mutaanzi kuzyalwa kuzilenge zyoonse” wakali kumumvwida alimwi wakali kusyomeka. (Tusimpi 8:22-31, BT; Kol. 1:15) Aboobo, Jesu naakaboola anyika alimwi Diabolosi naakazumizyigwa kuti amusunke  mane kusikila kulufwu, Leza wakajisi lusyomo lwakuti Mwanaakwe simuzyalwa alikke uyoozwidilila mukukazya Diabolosi.—Joh. 3:16.

Jehova Ulakwabilila Babelesi Bakwe

3. Ino Diabolosi ubalanga buti babelesi ba Jehova?

³ Jesu wakaamba kuti Diabolosi ngo “mwami wenyika” akucenjezya basikwiiya bakwe kuti bayoopenzyegwa mbubwenya mbwaakapenzyegwa awalo. (Joh. 12:31; 15:20) Inyika yeendelezyegwa a Saatani Diabolosi ilibasulide Banakristo bakasimpe akaambo kakuti babelekela Jehova alimwi mbakambausi babululami. (Mt. 24:9; 1 Joh. 5:19) Diabolosi ubikkila kapati maano kubananike balo mukuya kwaciindi ibayoolela antoomwe a Kristo mu Bwami bwakujulu. Saatani alimwi ulabapenzya Bakamboni ba Jehova ibajisi bulangizi bwakuyoopona kukabe kutamani muparadaiso anyika. Ijwi lya Leza litucenjezya kuti: “Sinkondonyoko Saatani uleendeenda mbuli syuumbwa wabutambo akuya buyandaula ngwati lume.”—1 Pet. 5:8.

4. Ino ncinzi citondezya kuti bantu ba Leza bazwidilila mukukazya Diabolosi mazuba aano?

⁴ Mbwaanga tuli mbunga iigwasyigwa a Jehova Leza, tulazwidilila mukukazya Diabolosi. Amulange-lange twaambo ootu: Kwamyaka iili 100 yainda, imfwulumende zyalunya zyasola kunyonyoona Bakamboni ba Jehova boonse anyika. Pele mweelwe wa Bakamboni wazumanana kuyaambele walo lino uutandila ku 7,000,000 mumbungano ziinda ku100,000 munyika yoonse. Beendelezi basilunya ibakali kupenzya bantu ba Jehova mbambabo bakagwisyigwa naa kujaigwa.

5. Ino mbuti lugwalo lwa Isaya 54:17 mbolwazuzikizyigwa kubabelesi ba Jehova?

⁵ Kaambila mbungano yabana Israyeli bansiku, Leza wakabasyomezya kuti: “Taakwe cilwisyo niciba comwe cibumbwa kukulwisya nduwe cikonzya kujana coolwe, andimi zyoonse zibuka kukubeteka uyoozipa mulandu. Nciceeco caabilo cabalanda ba-Jehova akululamikwa kwabo kuzwa kulindime.” (Is. 54:11, 17) Cisyomezyo eeco cilazuzikizyigwa kujatikizya bantu ba Leza munyika yoonse “kumazuba [aano] aakumamanino.” (2 Tim. 3:1-5, 13) Tulazumanana kumukazya Diabolosi, alimwi taakwe cilwisyo cili coonse icazwidilila mukusola kunyonyoona bantu ba Leza nkaambo kakuti Jehova uli akati kesu.—Int. 118:6, 7.

6. Ino businsimi bwa Daniele butwaambila nzi kujatikizya ciyoocitikila bulelo bwa Diabolosi kumbele?

⁶ Mamanino aabweende boonse bwazyintu bubyaabi oobu alo alaafwaafwi kusika, zibeela zyoonse zyabulelo bwa Saatani ziyoonyonyoonwa cakumaninina. Kasololelwa amuuya wa Leza, Daniele wakasinsima kuti: “Mumazuba aabaami abo, Leza wakujulu uyoobusya bwami butakooyoonyonyoonwa abuniini mane kukabe kutamani, anguzu zyabo tazikooyoosiilwa bantu bambi. Obo bwami buyoopwayaula akumanisya mami aya oonse, alimwi bwalo buyooima nji kukabe kutamani.” (Dan. 2:44) Eeci caakucitika, bulelo bwa Saatani alimwi abwabantu batalondokede buyoomana. Zibeela zyoonse zyabweende oobu bwa Diabolosi ziyoomaninina, eelyo Bwami bwa Leza buyoolela nyika yoonse kakunyina kukazyigwa.—Amubale 2 Petro 3:7, 13.

7. Ino tuzyi buti kuti babelesi ba Jehova aumwi kumugama balakonzya kuzwidilila mukukazya Diabolosi?

⁷ Takudoonekwi pe kuti mbunga ya Jehova iyookwabililwa alimwi iyoozumanana kulongezyegwa a Leza. (Amubale Intembauzyo 125:1, 2.) Ino mbuti kujatikizya ndiswe? Ibbaibbele litwaambila kuti tulakonzya kuzwidilila mukukazya Diabolosi mbubwenya mbwaakacita Jesu. Masimpe, businsimi mbwaakaamba Kristo kwiinda mumwaapostolo Johane butondezya kuti nokuba kuti balakazyigwa a Saatani, “inkamu impati” yabantu ibajisi bulangizi bwakuyoopona anyika bayoofwutuka mamanino aabweende oobu. Magwalo aamba kuti baloongolola kabati: “Lufutuko lulazwa kuli-Leza wesu uukede acuuno cabwami aku-Mwanambelele [Jesu Kristo].” (Ciy. 7:9-14) Ibananike baambwa kuti balamuzunda Saatani,  alimwi beenzinyina, “imbelele zimwi,” abalo balazwidilila nobamukazya. (Joh. 10:16; Ciy. 12:10, 11) Pele ikuzwidilila mukukazya Diabolosi kuyandika kusolekesya alimwi akupaila kapati kulomba ‘kuvunwa kumubi.’—Mt. 6:13.

Icikozyanyo Cibotu Kapati Mukukazya Diabolosi

8. Ino ndisunko nzi lyakusaanguna Diabolosi ndyaakabelesya kuli Jesu munkanda, alimwi ino mbuti Kristo mbwaakacita?

⁸ Diabolosi wakasola kulesya Jesu kusyomeka. Ciindi Jesu naakali munkanda, Saatani wakabelesya masunko mukusola kupa Jesu kuti aleke kumvwida Jehova. Nokuba boobo, Jesu wakatondezya cikozyanyo cibotu kapati mukukazya Saatani. Naakamana kuliimya kulya kwamazuba aali 40, kulangilwa kuti Jesu wakafwa nzala kapati. Saatani wakaamba kuti: “Kuti koli Mwana a-Leza, ambila mabwe aya, abe insima.” Pele Jesu wakakaka kubelesya nguzu nzyaakapedwe a Leza kuti aligwasye mwini. Muciindi caboobo, Jesu wakati: “Kulilembedwe kuti, Teensi insima ilike njaaponena muntu, ulaponena amajwi oonse aazwa kumulomo wa-Leza.”—Mt. 4:1-4; Dt. 8:3.

9. Ino nkaambo nzi ncotweelede kumukazya Diabolosi eelyo nasola kubelesya zyintu nzyotulombozya?

⁹ Mazuba aano, Diabolosi ubelesya zyintu nzyobalombozya babelesi ba Jehova. Aboobo tweelede kukanza kukaka kusunkwa mumakani aajatikizya koonana kutali kwamumulawo, kwalo ikudumide munyika eeyi iitalilemeki. Ijwi lya Leza lilaamba cakukankaizya kuti: “Ma! Sa tamuzi kuti bataluleme tabakonzyi kuyoovuba Bwami bwa-Leza? Mutalyeeni pe. Nibaba basibwaamu nibaba basikukomba mituni nibaba basimamambe nibaba batete kuzibi nibaba baalumi boona baaluminyina . . . tabakooyoovuba Bwami bwa-Leza.” (1 Kor. 6:9, 10) Aboobo, cilisalede kuti bantu bapona buumi bwakutalilemeka balo ibatayandi kucinca, tabakazumizyigwi kupona munyika mpya ya Leza.

10. Kweelana acilembedwe kuli Matayo 4:5, 6, ino ndisunko nzi alimbi ndyaakabelesya Saatani mukusola kulesya Jesu kusyomeka?

¹⁰ Kujatikizya limwi akati kamasunko ngaakasunkwa Jesu munkanda, Magwalo aamba kuti: “Diabolosi wakamutola kumunzi mulemu, wakamwiimika ansonge yantempele, wakamwaambila wati, Kuti koli Mwana a-Leza, uliwaale ansi, nkaambo kulilembedwe kuti, Uzoolailila baangelo bakwe kulinduwe, bazookunyampule amaanza aabo, kuti utalicisi cituta cako kubbwe.” (Mt. 4:5, 6) Saatani wakali kwaamba kuti eeci cakali kuyoopa Jesu kucita cintu cimwi cigambya ikusinizya kuti wakali Mesiya. Pele mubwini, ikucita boobu kwakali kuyooba kubisya, ikulisumpula kwalo nkwaatakali kuyookkomanina Leza. Aboobo, Jesu wakazumanana kusyomeka kuli Jehova akwiingula kwiinda mukuzubulula lugwalo. Wakati:  “Alimwi kulilembedwe kuti, Utasunki Jehova Leza wako.”—Mt. 4:7; Dt. 6:16.

11. Ino mbuti Saatani mbwakonzya kutusunka, alimwi ino ncinzi cikonzya kucitika?

¹¹ Saatani ulakonzya kutusunka kuti tutalike kuyandaula bulemu munzila ziindene-indene. Alimwi ulakonzya kusola kutuyunga kuti tutobele nyika munsamino alimwi akulibamba naa kutola lubazu mukulikondelezya kutaluzi. Pele ikuti twaunduluzya lulayo lwamu Bbaibbele akutobela zyamunyika, sena inga twalangila kukwabililwa abangelo kuzyintu zilangilwa kucitika akaambo kabukkale buli boobu? Nokuba kuti Mwami Davida wakeempwa zibi nzyaakacita a Bateseba, kunyina naakakwabililwa kuzyintu zyakali kuyoocitika akaambo kazibi zyakwe. (2 Sam. 12:9-12) Tutasunki Jehova munzila zitaluzi, ambweni kwiinda mukubamba cilongwe anyika.—Amubale Jakobo 4:4; 1 Johane 2:15-17.

12. Ino ndisunko nzi lilembedwe kuli Matayo 4:8, 9, alimwi ino mbuti Mwana wa Leza mbwaakacita?

¹² Sunko limbi ndyaakabelesya Diabolosi munkanda lyakali kujatikizya kupa Jesu bwami bwaansi. Saatani wakamutondezya Jesu mami oonse aamunyika abulemu bwangawo akwaamba kuti: “Ezi zyoonse ndakupa, kuti wafugama akundikomba.” (Mt. 4:8, 9) Aaya akali makanze mabyaabi kaka aakuyanda kukombwa kwalo kweelede Jehova alikke alimwi akoongelezya Jesu kuti aleke kusyomeka kuli Leza! Kwiinda mukuzumanana kulombozya kukombwa, ooyu mungelo iwakali kusyomeka musyule, wakaba sizibi akaambo kabulyatu, eelyo wakazooba mubi, sikutepaula, Saatani Diabolosi. (Jak. 1:14, 15) Pele mukwiimpana, Jesu wakalikanzide kuzumanana kusyomeka kuli Usyi wakujulu, aboobo wakati: “Koya, uwe Saatani, nkaambo kulilembedwe kuti, Nguwe Jehova Leza wako ngoelede kukomba, nguwenya alike ngoelede kumanina milimo.” Aboobo Jesu alimwi wakamukazya Diabolosi cakusinizya. Imwana wa Leza taakali kuyanda kuba wanyika ya Saatani, eelyo wakakaka kumukomba ooyu mubi.—Mt. 4:10; Dt. 6:13; 10:20.

“Amumukazye Saatani, Uyoomucija”

13, 14. (a) Kwiinda mukutondezya Jesu mami oonse aamunyika, ino ncinzi Diabolosi ncaakali kusola kumupa? (b) Ino mbuti Saatani mbwasola kutunyonganya?

¹³ Kwiinda mukumutondezya mami oonse aamunyika, Diabolosi wakali kuyanda ikupa Jesu nguzu zinji kapati zitanapedwe kumuntu uuli woonse. Saatani wakayeeya kuti nzyaakabona Jesu zyakali kuyoomukkomanisya alimwi akumupa kusinizya kuti ulakonzya kuba muleli wacisi singuzu munyika yoonse. Mazuba aano, Diabolosi tasoli kutupa mami, pele ulasola kunyonganya myoyo yesu kwiinda muzyintu nzyotubona, nzyotumvwa alimwi anzyotuyeeya.

¹⁴ Diabolosi nguweendelezya nyika eeyi. Nkokuti, nguweendelezya sikapepele alimwi amiteende yamunyika. Aboobo, tacigambyi kuti zyintu nzyoipa nyika, mbuli zyintu zyakweebelela, kuswiilila, alimwi akubala zizwide kutalilemeka alimwi alunya. Ikwaambilizya makwebo aamunyika kupa kuti tutalike kulombozya kuula zyintu zinji nzyotutayandi. Kwiinda munzila zili boobu, Diabolosi ulazumanana kutusunka kuyandisya zyintu zyakumubili zyalo zikonzya kukkomanisya meso, matwi alimwi amizeezo yesu. Pele ciindi notukaka kweebelela, kuswiilila akubala zyintu ziteendelani anjiisyo zyamu Magwalo, mubwini twaamba kuti: “Koya, uwe Saatani.” Aboobo twiiya Jesu ciindi notwiikaka cakutazungaana nyika ya Saatani iisofweede. Citondezyo cakuti tatuli banyika cilalibonya notulizyibya cabusicamba kuti tuli Bakamboni ba Jehova alimwi abatobeli ba Kristo kumilimo, kucikolo, kuli basimukoboma alimwi akubasazima.—Amubale Marko 8:38.

15. Ino nkaambo nzi kukazya Saatani ncokuyandika kupakamana lyoonse?

¹⁵ Naakasola ciindi catatu katazwidilili kunyonganya lusyomo lwa Jesu muli Leza, “Diabolosi wakamusia.” (Mt. 4:11) Nokuba boobo, Saatani tanaakayanda kucileka kusunka Jesu, nkaambo twaambilwa kuti: “Aboobo Diabolosi naakamanizya misunko yakwe yoonse  [munkanda], wakamuleka kusikila aciindi cimbi ceelede.” (Lk. 4:13, NW) Notuzwidilila mukukazya Diabolosi, tweelede kumulumba Jehova. Pele alimwi tweelede kuzumanana kulomba lugwasyo kuli Leza, mbwaanga Diabolosi uyoopiluka kuti atusunke alimwi muciindi cakwe ceelede—alimwi kutali buyo ciindi ncotuyeeyela kuti inga twasunkwa. Aboobo, tweelede kupakamana lyoonse, katulibambilide kuliyumya mumulimo wa Jehova notusunkwa buti.

16. Ino Jehova utupa nguzu nzi, alimwi nkaambo nzi ncotweelede kuzipailila?

¹⁶ Kutegwa tugwasyigwe mukukazya Diabolosi, tweelede kupaila kulomba nguzu ziinda mububumbo boonse, muuya uusalala wa Leza, katujisi lusyomo lwakuti tulapegwa. Uyoopa kuti tucikonzye kucita zyintu nzyotutakonzyi kucita munguzu zyesu tobeni. Jesu wakabasyomezya basikumutobela kujatikizya muuya wa Leza naakaamba kuti: “Nywebo, [nomutalondokede aboobo] nobabi, mbomuzi kupa bana banu zintu zibotu, Usowanu uuli kujulu sena takooindilila kubapa Muuya Uusalala abakumbila kulinguwe?” (Lk. 11:13) Atuzumanane kupaila kuli Jehova kulomba muuya wakwe uusalala. Kwiinda mukugwasyigwa anguzu eezyi, tulakonzya kuzwidilila mumakanze eesu aakukazya Diabolosi. Kunze lyamupailo uupailwa lyoonse amoyo woonse, tweelede kusama zilwanyo zyoonse zyamuuya zizwa kuli Leza kutegwa ‘tukonzye kwiima mumeneeno aa Diabolosi.’—Ef. 6:11-18.

17. Ino ndukondo nzi ilwakamugwasya Jesu mukukazya Diabolosi?

¹⁷ Kuli acimbi icakamugwasya Jesu mukukazya Diabolosi, calo icikonzya kutugwasya andiswe. Bbaibbele lyaamba kuti: “Nkaambo kalukondo ndwaakabikilwa kunembo [Jesu], wakazyandamana [kucisamu cakupenzyezya], wakaubaula buusu, eno sunu ulikede kululyo lwacuuno ca-Leza.” (Heb. 12:2) Tulakonzya kuba alukkomano luli boobu kwiinda mukusumpula bulelo bwa Jehova, kulemeka zyina lyakwe alimwi akuyeeya bulumbu bwabuumi butamani buli kumbele. Elo kaka tuyookkomana ciindi Saatani amicito yakwe yoonse yaakugwisyigwa kukabe kutamani alimwi ciindi ‘babombemyoyo nobayoovwuba nyika, akukondwa muluumuno lunji!’ (Int. 37:11) Aboobo, amuzumanane kumukazya Diabolosi mbuli mbwaakacita Jesu.—Amubale Jakobo 4:7, 8.

Ino Inga Mwaingula Buti?

• Ino mbumboni nzi buliko bwakuti Jehova ulabakwabilila bantu bakwe?

• Ino mbuti Jesu mbwaakapa cikozyanyo mukukazya Saatani?

• Ino mmuunzila nzi momukonzya kumukazya Diabolosi?

[Mibuzyo yaciiyo]

[Cifwanikiso icili apeeji 29]

Kuba aacilongwe anyika kutupa kuba basinkondonyina a Leza

[Cifwanikiso icili apeeji 31]

Jesu wakakaka Saatani naakali kusola kumupa mami oonse aamunyika