Sena Bantu Mubabona Mbuli Mbwababona Jehova?
Sena Bantu Mubabona Mbuli Mbwababona Jehova?
“Kutabi mipampo kumubili . . . zizo zyoonse zigwasyanye”—1 KOR. 12:25.
1. Ino mwakalimvwa buti nomwakanjila buyo muparadaiso yakumuuya?
ICIINDI notwakazwa munyika mbyaabi akutalika kuyanzana abantu ba Jehova, cakutadooneka twakakkomana aluyando alimwi akubikkilana maanu kuli akati kabo. Elo kaka kuli lwiindano lupati abantu basulaikana alimwi batamvwani ibeendelezyegwa a Saatani! Twakanjila muparadaiso yakumuuya iijisi luumuno alimwi alukamantano.—Is. 48:17, 18; 60:18; 65:25.
2. (a) Ino ncinzi cikonzya kupa kuti tutababoni bweelede bamwi? (b) Ino ncinzi ncotweelede kucita?
2 Pele mukuya kwaciindi, tulakonzya kutalika kubalanga munzila iiteelede bakwesu akaambo kakutalondoka. Ikutalondoka kwesu kulakonzya kupa kuti tukomezye kulubizya kwabakwesu muciindi cakubikkila maanu kubube bubotu mbobajisi. Atwaambe kuti tulaluba kubabona mbuli mbwababona Jehova. Ikuti eeci catucitikila, nkokuti nceciindi cakulilingula akubona bambi kweelana ambwababona Jehova.—Kul. 33:13.
Jehova Mbwababona Bakwesu
3. Ino Bbaibbele likozyanisya imbungano ya Bunakristo kunzi?
3 Mbuli mbokulembedwe ku 1 Ba-Korinto 12:2-26, mwaapostolo Paulo wakakozyanisya imbungano ya Banakristo bananike amubili wamuntu uujisi “zizo zinji.” Mbubwenya mbuli zizo zyamubili mboziindene, bantu bali mumbungano baliindene mbobabede alimwi anzyobakonzya kucita. Nokuba boobo, Jehova ulabatambula bonse. Ulamuyanda alimwi ulamulumba aumwi mumbungano. Aboobo, Paulo awalo utukulwaizya kuti boonse bali mumbungano ‘bagwasyanye.’ Eeci cilakonzya kukatazya nkaambo bube bwabamwi bulakonzya kwiindana kapati abwesu.
4. Ino nkaambo nzi ncotweelede kucinca kujatikizya mbotubabona bakwesu?
4 Zimwi ziindi tulakonzya kubikkila maanu kukulezya kwabakwesu. Kwiinda mukucita boobo, tubona atala-tala buyo. Pele Jehova walo ulabona koonse atala alimwi amukati, atwaambe kuti muntu woonse mbuli mbwabede. Swebo tubikkila buyo maanu kukantu kasyoonto nkotutayandi mumuntu, pele Jehova ulabona muntu woonse, kubikkilizya abube boonse bubotu mbwajisi muntu. Twanoosola kuba mbuli Jehova, tuyoopa kuti kube muuya waluyando alukamantano mumbungano.—Ef. 4:1-3; 5:1, 2.
5. Nkaambo nzi taceelede kubeteka bamwi?
5 Jesu wakalizi kuti bantu batalondokede balijisi cilengwa cakupana milandu. Wakalaya kuti: “Mutabeteki, kuti mutabetekwi anywebo.” (Mt. 7:1) Amubone kuti mumwaambo wakusaanguna Jesu kunyina naakaamba kuti: “Mutabeteki”; wakaamba kuti: “Amuleke kubeteka.” Wakalizi kuti banji akati kabaswiilizi bakwe bakajisi kale cilengwa cakubeteka bamwi. Sena andiswe mbotubede oobo? Ikuti naa mboobo, tweelede kusola canguzu kucinca, kutegwa tutabetekwi andiswe. Masimpe, tunyina nguzu zyakubeteka muntu ngwabelesya Jehova nokuba kwaamba kuti ooyo muntu teelede kuba mumbungano. Mukwesu ulakonzya kuba atumpenda, pesi ikuti Jehova wazumanana kumubelesya, sena inga cabota swebo kumukaka? (Joh. 6:44) Sena tulasyoma ncobeni kuti Jehova ulaisololela imbunga yakwe alimwi akuti kwayandika kucinca kumwi, uyoocita oobo muciindi cakwe ceelede?—Amubale Ba-Roma 14:1-4.
6. Ino mbuti Jehova mbwababona babelesi bakwe?
6 Ibubotu bwa Jehova mbwakuti ulakonzya kubona Munakristo aumwi mbwakonzya kuyooba aakuba muntu uulondokede munyika mpya. Alimwi ulizi kuyaambele kwakumuuya aumwi nkwaacita. Aboobo, tajisi kaambo kali koonse kakubikkila maanu kukukompama kwakwe. Ku Intembauzyo 103:12 tubala kuti: “Mbuli kujwe mbokuli kule kuzwa kumbo, mbuboobu mbwaalampya insotoko zyesu kuzwa kulindiswe.” Elo tulalumba kaka kujatikizya kaambo aaka!—Int. 130:3.
7. Ino ncinzi ncotwiiya kuli Jehova kujatikizya mbwaakamubona Davida?
7 Mu Magwalo, tulabona bumboni bwakuti Jehova ulakonzya kubikkila buyo maanu kububotu buli mumuntu. Leza wakaamba Davida kuti “mulanda wangu Davida, iwakabamba imbeta zyangu akunditobela camoyo woonse akucita ziluleme luzutu mumeso aangu.” (1 Bam. 14:8) Tulizi mubwini kuti Davida kuli zintu zimwi nzyaatakacita kabotu. Nokuba boobo, Jehova wakasala buyo kubikkila maanu kububotu bwakwe nkaambo wakalizi kuti moyo wa Davida wakali mubotu.—1 Mak. 29:17
Amubone Bakwesu Mbuli Mbwababona Jehova
8, 9. (a) Ino muunzila nzi motunga twaba mbuli Jehova? (b) Ino mbuti eeci mbocinga capandululwa, alimwi ncinzi ncotukonzya kwiiya?
8 Jehova ulakonzya kubona zili mumoyo, pesi swebo tatukonzyi. Aaka nkakaambo kabotu kakuti tatweelede kubeteka beenzuma. Tatuzi zyoonse zili mumoyo wamuntu. Tweelede kusola kwiiya Jehova kwiinda mukutabikkila maanu kukutalondoka kwamuntu, kwalo mukuya kwaciindi kuyoomana. Sena taikonzyi kuba mbaakani mbotu yakuba mbuli nguwe? Ikucita boobu kuyoopa kuti kube luumuno akati kabakwesu abacizi.—Ef. 4:23, 24.
9 Mucikozyanyo, amuyeeye ŋanda yakaindi iitabambwi kabotu—ciluli cilibonya kuti ciyanda kuwa, mpulungwido zyakapwaika, mabalo aajata makkapulosi aile kuloka. Bunji bwabantu inga balanga aŋanda eeyo akwaamba kuti yeelede kumwaigwa, taiboneki kabotu. Pele umwi uujisi muzeezo uumbi inga waibona munzila iimbi. Inga wailangisisya akubona kuti iŋanda lwayo ninjumu alimwi ilakonzya kuyakululwa. Wayuula ŋanda alimwi akwiibambulula kuti iboneke kabotu. Basimweenda nzila baibona baamba kuti eeyi ŋanda nimbotu, munzi mubotu. Sena inga twaba mbuli muntu ooyu wakayakulula ŋanda? Muciindi cakubikkila maanu kukompama kwabakwesu, sena tatukonzyi kubona bube bubotu buli muli mbabo alimwi anzyobakonzya kucita mukuyaambele kumuuya? Twacita oobo, tulakonzya kubayanda bakwesu akaambo kabubotu buli muli mbabo, mbuli mbwacita Jehova.—Amubale Ba-Hebrayo 6:10.
10. Ino lulayo luli ku Ba-Filipi 2:3, 4 inga lwatugwasya buti?
10 Imwaapostolo Paulo wakapa lulayo lukonzya kutugwasya kuba acilongwe cibotu abantu boonse bali mumbungano. Wakaambila Banakristo kuti: “Mutaciti cintu niciba comwe cabbivwe nanka cakulisumpula, pele umwi aumwi akati kanu alibombye mumoyo, akuyeeya kuti mweenzuma mubotu kwiinda ndime. Tamweelede kuyeeya kuligwasya nubeni luzutu, pe, umwi aumwi uleelede kwiingasila kugwasya mweenzinyina.” (Flp. 2:3, 4) Ikulicesya kuyootugwasya kubona bamwi munzila yeelede. Kubabikkila maanu bamwi alimwi akulanga buyo bubotu buli muli mbabo akwalo kuyootugwasya kubabona mbuli mbwababona Jehova.
11. Ino nkucinca kuli buti kwajatikizya mbungano zimwi?
11 Mazuba aano, kucinca kucitika munyika kwapa kuti bantu balongele mumasi mumwi. Mumadolopo mumwi lino muli bantu bazwa mumasena aaindene-indene. Bamwi bakalongela kubusena mbotukkala bakabotelwa mukasimpe kamu Bbaibbele, alimwi batusangana mukukomba Jehova. Aaba “bazwa kuzisi zyoonse akumisyobo yoonse akumikowa yoonse akumyaambo yoonse.” (Ciy. 7:9) Akaambo kaceeci, imbungano zinji zyapangwa abantu bazwa mumasena aamunyika yoonse.
12. Ino mbuti mbotweelede kuzumanana kumubona aumwi mumbungano, alimwi nkaambo nzi eeci ncocikonzya kukatazya zimwi ziindi?
12 Mumbungano yesu, inga twayandika kubikkila maanu kukubona kuti twazumanana kumubona munzila yeelede aumwi. Eeci cituyeezya lulayo lwamwaapostolo Petro lwakuba “[a]luyandano lwabunyina lwinilwini” alimwi “[akuyandana] camyoyo acanguzu.” (1 Pet. 1:22) Kuba aluyando lwini-lwini kulakonzya kukatazya mumbungano yabantu bazwa mumasi aaindene-indene. Zilengwa zyabakombima ziliindene kapati azyesu, zyalo zibikkilizya lwiiyo, makwebo alimwi amusyobo wabo. Sena mulajana buyumu-yumu kukumvwisya mbobayeeya naa mbobacita bamwi bamusyobo uumbi? Abalo balakonzya kulimvwa mbubwenya oobo kujatikizya ndinywe. Kunyina makani azeezyo, toonse tulaigwa kuti: “Amuyande babunyina [boonse, NW].”—1 Pet. 2:17.
13. Ino nkuyeeya kuli buti nkotweelede kucinca?
13 Inga kwayandika kucinca mbotuyeeya kutegwa tujalule myoyo yesu muluyando lwabakwesu boonse. (Amubale 2 Ba-Korinto 6:12, 13.) Sena kuli notwaamba kuti: “Mebo tandisalululi, pesi . . .” mpoonya tulatalika kwaamba bube bumwi butali kabotu mbotubona kuti bulajanika mubantu bamusyobo umwi? Kuyeeya kuli boobu inga kwatondezya kuyandika kwakugusya mizeezo yakusalulula njotukonzya kuba ayalo. Inga twalibuzya kuti: ‘Sena ndilasola lyoonse kubaziba bantu bajisi zilengwa ziindene azyangu?’ Kulilingula kuli boobu inga kwatugwasya kuti tucikonzye kubazumina alimwi akubayanda bakwesu bamunyika yoonse.
14, 15. (a) Amupe zikozyanyo zyabaabo bakacinca kujatikizya mbobakali kubabona bantu bamwi. (b) Ino mbuti mbotukonzya kubaiya?
14 Ibbaibbele lilijisi zikozyanyo zibotu zyabantu bakacinca kuyeeya kwabo, umwi wabaabo wakali mwaapostolo Petro. Mbwaakali mu Juda, Petro naatakanjila muŋanda yamuntu wa Bamasi. Amuyeeye buyo mbwaakalimvwa naakaambilwa kuti akaswaye kuŋanda yamuntu umwi wa Bamasi uutapaludwe uutegwa Korneliyo! Petro wakacinca kuyeeya kwakwe, wakaziba kuti kwakali kuyanda kwa Leza kuti bantu bamisyobo yoonse babe mumbungano ya Bunakristo. (Inc. 10:9-35) Saulo, iwakazooba mwaapostolo Paulo, awalo wakazoocinca akuleka kusalulula. Wakazumina kuti wakali basulide kapati Banakristo akuti “[wa]kali kupenzesya loko imbungano ya-Leza akwiindinganya.” Nokuba boobo, ciindi Mwami Jesu naakamululamika Paulo, wakacinca kapati mane akutalika kutobela busolozi kuzwa kubantu mbaakali kupenzya.—Gal. 1:13-20.
15 Cakutadooneka tulakonzya kucinca kwiinda mukugwasyigwa amuuya wa Jehova. Ikuti twajana kuti kuli bube bumwi bwakusalulula mbotwatali kubwene, atusoleke kubugwisya alimwi “[a]kulondola lujatano luzwa ku-Muuya kucaanzyo caluumuno.” (Ef. 4:3-6) Ibbaibbele litukulwaizya kuti tube “aluyandano, ikuti luyandano ncecaanzyo cabuumi bulondokede.”—Kol. 3:14.
Ikwiiya Jehova Mumulimo Wesu
16. Ino mmakanze nzi ngajisi Leza kujatikizya bantu?
16 Mwaapostolo Paulo wakalemba kuti: “Kwa-Leza takulangililwi ciwa pe.” (Rom. 2:11) Nkuyanda kwa Jehova kuti bantu bamisyobo yoonse bamukombe. (Amubale 1 Timoteo 2:3, 4.) Kutegwa acite oobo, wapanga bubambe bwakuti “makani mabotu aateeli” akambaukwe “kubamasi boonse akumisyobo yoonse akumyaambo yoonse akumikowa yoonse.” (Ciy. 14:6) Jesu wakati: “Muunda ninyika.” (Mt. 13:38) Ino kaambo aaka kaamba nzi kumukwasyi wanu?
17. Ino mbuti mbotukonzya kubagwasya bantu bamisyobo yoonse?
17 Tabali boonse bakonzya kuunka kunze aacisi kutegwa bakakambaukile bantu mulumbe wa Bwami. Nokuba boobo, tulakonzya kubakambaukila mulumbe ooyu bantu bazwa mumasena aamunyika yoonse ibakkala mucilawo cesu. Sena tulapakamana kuzyoolwe zyakukambaukila bantu bamisyobo yoonse, ikutali buyo baabo mbotukambaukila lyoonse? Aabe makanze aanu kusikila bantu batana kukambaukilwa.—Rom. 15:20, 21.
18. Ino nkubikkila maanu kuli buti nkwaakacita Jesu kubantu?
18 Jesu wakayandisisya kubagwasya bantu boonse. Taakwe naakakambaukila buyo kubusena bomwe. Cibalo cimwi camu Bbaibbele citwaambila kuti “wakali kuya bweendeenda muminzi yoonse amutunzi toonse.” Mpoonya, “naakabona makamu aabantu wakabafwida luzyalo” aboobo wakabagwasya.—Mt. 9:35-37.
19, 20. Ino ninzila nzi zimwi motukonzya kutondezya kubikkila maanu kubantu bamisyobo yoonse mbuli mbwacita Jehova alimwi a Jesu?
19 Ino muunzila zili buti momukonzya kutondezya muuya uuli boobu? Bamwi basola kukambaukila mumbazu zimwi zyamuzilawo zyabo mutabelekelwi kapati. Zilawo eezi inga zilabikkilizya masena aamakwebo, masena aakusobanina, muzitisyini, naa maanda aajisi mulyango walubaya uukkiigwa. Bamwi basola kwiiya mwaambo uumbi kutegwa bacikonzye kukambaukila bantu bakanana mwaambo ooyo ibali mucilawo cabo naa bantu aabo batakambaukilwi lyoonse. Kwiiya kwaanzya mumwaambo wabo inga kwatondezya kuti mulababikkila maanu kapati. Ikuti kamutakonzyi kwiiya mwaambo uumbi, inga mwacita kabotu kukulwaizya baabo bakonzya kucita oobo. Masimpe tatweelede kubatyompya naa kubuzya kaambo ibamwi ncobasola kukambaukila bantu bazwa kucisi cimbi. Bantu boonse balayandika kuli Leza, andiswe tuyanda kubabona mbwababona walo.—Kol. 3:10, 11.
20 Kubona bantu mbuli mbwababona Leza caamba kubakambaukila boonse, kunyina makani abukkale bwabo. Bamwi balakonzya kuba bantu banyina aakoona, basitombe, naa bapona buumi bwakutalilemeka. Ikuti bantu bamwi kabatucitila zintu calunya, tacaambi kuti tweelede kubona musyobo wabo woonse kuti tauli kabotu. Paulo wakapenzyegwa abantu bamwi, pesi eeci tiicakamupa kuti aleke kukambauka kubantu bamusyobo wabo. (Inc. 14:5-7, 19-22) Wakajisi lusyomo lwakuti bantu bamwi baya kuswiilila.
21. Ino mbuti kubona bantu mbuli mbwababona Jehova mbokuyoomugwasya?
21 Cilisalede lino kuti kubona bantu munzila yeelede—mbwababona Jehova—kulayandika notucita zintu abakwesu mbotukkala limwi, bamunyika yoonse, alimwi abantu mbotukambaukila. Notuzumanana kubona bantu mbuli mbwababona Jehova, tuyoopa kuti kube luumuno alukamantano. Mpoonya tuyoocikonzya kugwasya bamwi kumuyanda Jehova, Leza ‘uutasalululi’ pele uutondezya luyando kuli boonse, nkaambo “boonse nzilenge zyamaanza aakwe.”—Job. 34:19.
Sena Inga Mwaingula?
• Ino nkubabona kuli buti bakwesu nkotuteelede kuba ankuko?
• Ino mbuti mbotukonzya kumwiiya Jehova kujatikizya mbotubabona bakwesu?
• Nziiyo nzi nzyomwaiya kujatikizya mbotweelede kubabona bakwesu bamunyika yoonse?
• Ino mbuti mbotukonzya kumwiiya Jehova kujatikizya mbotubabona bantu notuli mumulimo?
[Mibuzyo yaciiyo]
[Cifwanikiso icili apeeji 26]
Ino mbuti mbomukonzya kubaziba bantu bamusyobo uumbi?
[Cifwanikiso icili apeeji 28]
Ino muunzila nzi momukonzya kusikila bantu banji amakani mabotu?