Ibapya Mukabunga Keendelezya

MULI Bwatatu mafwumofwumo mu August 24, 2005, ibamukwasyi wa Beteli waku United States awaku Canada kabaswaangene kwiinda mukweebelela muswaangano wamafwumofwumo acipekupeku, bakamvwa kwaambilizya kukkomanisya. Kutalikila mu September 1, 2005 ibapya bobilo ba Geoffrey W. Jackson a Anthony Morris Watatu, bakaba ba Kabunga Keendelezya ka Bakamboni ba Jehova.

Mukwesu Jackson wakatalika mulimo wabupainya mu February 1971 ku Tasmania, kunsumbu yacisi ca Australia. Mu June 1974, wakakwata Jeanette (Jenny). Kwiinde buyo kaindi kasyoonto, bakasalwa kuba bapainiya baalubazu. Kuzwa mu 1979 kusikila mu 2003, bakabeleka kabali bamisyinali ku Tuvalu, Samoa, aku Fiji—nsumbu zyaku South Pacific. Kabali munsumbu, Mukwesu Jackson amukaintu wakwe bakagwasya kapati mumulimo wakusandulula mabbuku aajisi makani aa Bbaibbele. Kutalikila mu 1992, Mukwesu Jackson wakabeleka mu Kkomiti ya Mutabi mu Samoa, alimwi kuzwa mu 1996, wakazumamana amulimo ooyu ku Fiji. Mu April 2003, walo alimwi a Jenny bakaba bamukwasyi wa Beteli wa United States alimwi bakatalika kubeleka mu Cibeela Cigwasilizya Basanduluzi. Kumane Mukwesu Jackson wakaba mugwasyi wa Kkomiti ya Kuyiisya ya Kabunga Keendelezya.

Mukwesu Morris wakanjila mulimo wabupainiya mu 1971 mu United States. Mu December mumwaka ooyo, wakakwata Susan, bakazumanana abupainiya kwamyaka iitandila kuli yone kusikila naakazyalwa mwana musankwa wakusaanguna wazina lya Jesse. Nikwakainda ciindi bakazyala aumbi mwana musankwa wazina lya Paul. Mukwesu Morris wakanjila alimwi mulimo waciindi coonse mu 1979 kali mupainiya waciindi coonse. Mukaintu wakwe wakamusangana bana nibakatalika cikolo. Mukwasyi ooyu wakabeleka ku Nsumbu yaku Rhode, kubikkilizya aku North Carolina mu United States kubusena kwakabulide bakambausi. Ku North Carolina, Mukwesu Morris wakaba mulangizi wabbazu uugwasyilizya, abalo bana bakatalika mulimo wabupainiya waciindi coonse. Jesse a Paul bakaitwa kumutabi waku United States aumwi naakaba amyaka iili 19. Kumane Mukwesu Morris wakatalika mulimo wabbazu. Mumwaka wa 2002, walo alimwi a Susan bakaitwa ku Beteli akutalika mulimo wabo mupya mu August 1. Mukwesu Morris wakabeleka mu Cibeela Cilanganya zya Mulimo ku Patterson kumane wakaba mugwasyi ku Kkomiti ya Mulimo ya Kabunga Keendelezya.

Ikubikkilizya abaabo bobilo bapya, Kabunga Keendelezya kabambwa abantu aaba, C. W. Barber; J. E. Barr; S. F. Herd; M. S. Lett; G. Lösch; T. Jaracz; G. H. Pierce; A. D. Schroeder; D. H. Splane; a D. Sydlik. Boonse bamu Kabunga Keendelezya Mbanakristo bananike.