Amumukazye Saatani Eelyo Uyoomuccija!

“Amulibombye kuli-Leza. Amumukazye Saatani, uyoomucija.”—JAKOBO 4:7.

1, 2. (a) Nkampenda kali nkajisi Diabolosi katondezyegwa mumajwi alembedwe mubbuku lya Isaya caandano 14? (b) Ino mibuzyo nzi njotulaalange-lange?

DIABOLOSI ncecikozyanyo cibi cakulisumpula. Kulisumpula kwakwe kulabonwa mumajwi aakalembwa amusinsimi wa Leza Isaya. Kwamyaka iinda kumwaanda Bbabbuloni katanaba mweendelezi wanyika yoonse, bantu ba Jehova bakatondezyegwa kabaamba majwi aaya ku “mwami wa-Babuloni” kuti: “Wakaamba mumoyo wako kuti, Nkatante kujulu. Nkaimike cuuno cangu cabwami kujulu lyanyenyeezi zya-Leza. . . . Nkakozyane a-Leza Mupati.” (Isaya 14:3, 4, 12-15; Myeelwe 24:17) Ikulisumpula kwa “mwami wa-Babuloni” kwaalikozyenyi amuuya wa Saatani, “leza waansi aano.” (2 Bakolinti 4:4, Ci) Pele kulisumpula kwa Saatani kuyoomana, mbuli bwami bwa Bbabbuloni mbobwakamana ceeteezya.

² Nokuba boobo, ikuti Diabolosi kacipona, tulakonzya kulibilika amibuzyo mbuli bwayeeyi yakuti: Sena tweelede kumuyoowa Saatani? Nkaambo nzi ncakulwaizya bantu kupenzya Banakristo? Mbuti mbotunga twamuzunda Diabolosi?

Sena Tweelede Kumuyoowa Diabolosi?

3, 4. Nkaambo nzi Banakristo ibananike abeenzinyina ncobatamuyoowi Diabolosi?

³ Majwi aakulwaizya kapati ku Banakristo bananike mmajwi aa Jesu Kristo aakuti: “Mutayoowi zintu ezyo nzimuti penzegwe. Amubone, Diabolosi ulawaala bamwi banu muntolongo, kuti mukasunkwe, elyo muyooba mumapenzi mazuba aali ikumi. Kosyomeka mane do kusikila kulufu, lino njookupa musini wabuumi.” (Ciyubunuzyo 2:10) Bananike abeenzinyina bajisi bulangizi bwaanyika tabamuyoowi Diabolosi. Kutayoowa ooku nkobajisi tabuli busicamba bwakuzyalwa ambubo pe. Kulaboola akaambo kakuti balamuyoowa Leza alimwi ‘balayuba mucenzule camababa aakwe.’—Intembauzyo 34:9; 36:7.

⁴ Basikwiiya ba Jesu Kristo cakutayoowa bakatondezya kuti balasyomeka kusikila kulufwu nokuba kuti bakali kupenzyegwa. Noliba leelyo buzangi bwakasinsimwa nobwakatalika, sikwiiya zyabukombi Cyprian wakaamba boobu kujatikizya baali kulyaamba kuti Mbanakristo bamumwaanda watatu kuti: “Macise akutundululwa ziboola akaambo kakupenzyegwa tazibapi kuyoowa Banakristo, nkaambo nguzu zya Mwami nzipati kwiinda nguzu zya Diabolosi.”  (Treatise XI, On the Exhortation to Martyrdom, 10) Nokuba boobo, imwaapostolo Paulo wakatondezya kuti Diabolosi ulakonzya kuleta lufwu. Sena eeco taceelede kutupa kuyoowa?

5. Ino ncinzi ncotwiiya kubbuku lya Ba-Hebrayo 2:14, 15?

⁵ Paulo wakaamba kuti Jesu wakaba muntu uujisi bulowa alimwi anyama “kuti kukufwa kwakwe akamwaye oyo uujisi nguzu zyalufu, nkokuti Saatani, alimwi kuti akabavune boonse abo abakavubidwe buzike muciindi coonse cabuumi bwabo, nkaambo kakuyoowa lufu.” (Ba-Hebrayo 2:14, 15) Mbwaanga ‘nguujisi nguzu zyalufu,’ Saatani wakeendelezya Juda Iskariote alimwi mpoonya wakabelesya beendelezi baba Juda abana Roma kujaya Jesu. (Luka 22:3; Johane 13:26, 27) Nokuba boobo, kwiinda mulufwu lwakwe lwacituuzyo, Jesu wakanununa bantu basizibi kubweendelezi bwa Saatani akupa kuti tube acoolwe cakuba abuumi butamani.—Johane 3:16.

6, 7. Nkusikila aali Saatani mpakonzya kuleta lufwu?

⁶ Nkusika aali Diabolosi mpajisi nguzu zyakuleta lufwu? Kuzwa Saatani naakatalika milimo yakwe mibi, bubeji bwakwe alimwi abusolozi bwakwe bwapa kuti bantu kabafwa. Eeci cili boobu nkaambo Adamu wakabisya akuleta cibi alufwu kubantu. (Ba-Roma 5:12) Kuyungizya waawo, babelesi ba Saatani bali anyika bapenzya bakombi ba Jehova, ziindi zimwi kubapenzya kusikila bafwa mbubwenya mbobakacita kuli Jesu Kristo.

⁷ Nokuba boobo, tatweelede kuyeeya kuti Diabolosi inga waleta lufwu kumuntu uuli woonse ngwayanda kujaya. Jehova ulabakwabilila aabo Bakwe alimwi kunyina nayoolekelela Saatani kunyonyoona bakombi bakasimpe boonse anyika. (Ba-Roma 14:8) Masimpe, Jehova ulazuminizya kupenzyegwa kucitwa kubantu bakwe boonse alimwi ulazuminizya lufwu lucitika kuli bamwi akaambo kakupenzyegwa a Diabolosi. Nokuba boobo, Magwalo alapa bulangizi bubotu bwabubuke kuli baabo bali mu “bbuku lyakwiibalusya” lya Leza alimwi kunyina ncakonzya kucita Diabolosi ikulesya kujolwa kubuumi!—Malaki 3:16; Johane 5:28, 29; Incito 24:15.

Nkaambo nzi Saatani Ncatupenzyela?

8. Nkaambo nzi Diabolosi ncabapenzyela babelesi ba Leza?

⁸ Ikuti katuli babelesi ba Leza basyomeka, kuli kaambo kapati Diabolosi ncatupenzyela. Ujisi makanze aakuti tucileke kusyoma. Tulijisi cilongwe cibotu Ataata wesu wakujulu, alimwi Saatani ujisi makanze aakunyonyoona cilongwe eeci. Eeci taceelede kutugambya pe. Mu Edeni, Jehova wakasinsima kuti kunakuli kusulana akati ka “mwanakazi” wacikozyanyo  alimwi ‘anzoka’ alimwi aakati “kalunyungu” lwabo. (Matalikilo 3:14, 15) Imagwalo aamba Diabolosi kuba “muzoka waciindi” alimwi aamba kuti ciindi cakwe ncisyoonto alimwi bukali bwakwe mbupati. (Ciyubunuzyo 12:9, 12) Kusulana akati “kalunyungu” kwazumanana, aabo babelekela Jehova cakusyomeka beelede kulangila kupenzyegwa. (2 Timoteo 3:12) Sena mulikazyi kaambo keni Saatani ncamupenzyela boobu?

9, 10. Ino Diabolosi watalisya makani nzi, alimwi akonzyenyi buti ambobalilemeka bantu?

⁹ Diabolosi wakatalisya makani aabweendelezi. Alimwi watalisya makani aakozyenyi amakani abweendelezi, wadooneka lusyomo lwabantu ndobajisi mu Mulengi wabo. Saatani wakaleta mapenzi kumuntu uululeme Jobu. Nkaambo nzi? Kutegwa Jobu atazumanani kusyomeka kuli Jehova. Mukaintu wa Jobu alimwi abeenzinyina botatwe “baumbulizi bakatezi” bakacita makanze aa Diabolosi aciindi eeco. Mbuli mbokwatondezyegwa mubbuku lya Jobu, Diabolosi wakakazya Leza, kaamba kuti kunyina muntu uyoozumanana kusyomeka kuli Nguwe ikuti Saatani wazumizyigwa kumusunka muntu ooyo. Pele Jobu kunyina naakaleka kusyomeka, akutondezya kuti Saatani mubeji. (Jobu 1:8–2:9; 16:2; 27:5; 31:6) Diabolosi ulabapenzya Bakamboni ba Jehova mazuba aano kutegwa bacileke kusyomeka akutondezya kuti kukazya kwakwe nkwamasimpe.

¹⁰ Ikuzyiba kuti Diabolosi ulatupenzya akaambo kakuti uyandisya kuti tuleke kusyomeka kuli Leza kulakonzya kutugwasya kuba basicamba akuyuma. (Deuteronomo 31:6) Leza wesu Mweendelezi Wakoonse-koonse alimwi uyootugwasya kuzumanana kusyomeka. Lyoonse atumukkomanisye Jehova kwiinda mukuba bantu basyomeka, kutegwa ape bwiinguzi kuli yooyo uumusampaula, Saatani Diabolosi.—Tusimpi 27:11.

“Utuvune Kumubi”

11. Ino ncinzi caambwa notulomba kuti, “Utatweenzyi mukutepaulwa”?

¹¹ Ikusyomeka tacili cintu cuuba-uba pe; kuyandika kupaila camoyo woonse. Majwi aamupailo wacikozyanyo alagwasya kapati. Jesu wakati: “Utatweenzyi mukutepaulwa, utuvune kumubi, nkaambo Bwami mbubwako, anguzu abulemu, mane kukabe kutamani.” (Matayo 6:13) Jehova tatusunki kuti tubisye. (Jakobo 1:13) Nokuba boobo, Magwalo ziindi zimwi amwaamba kuti ucita milimo naa upa kuti zintu zicitike, pele uzyizuminizya buyo. (Rute 1:20, 21) Kwiinda mukupaila mbuli Jesu mbwaakacita, tulomba Jehova kuti atatulekeli mukutepaulwa. Alimwi uyootumvwa, nkaambo Magwalo atusyomezya kuti: “Leza wasyomeka, ikuti takoozoozumina kuti mutepaulwe kwiinda inguzu zyanu, pele antoomwe alutepauzyo ulacita cipolelo, kuti mukabe alukolelo.”—1 Ba-Korinto 10:13.

12. Nkaambo nzi ncotupaila kuti: “Utuvune kumubi”?

¹² Naakamana kwaamba zyamusunko mumupailo wacikozyanyo, Jesu cakweelela wakaamba kuti: “Utuvune kumubi.” Busanduluzi bumwi bwama Bbaibbele amwi bwaamba kuti: “Utuvune kububi” (Cizuminano Cipya) naa “Utucingilile kububi.” (Contemporary English Version) Nokuba boobo, mu Magwalo majwi aakuti “utuvune” alabelesyegwa kapati kujatikizya bantu alimwi Makani aali ku Matayo aamba Diabolosi kuba “Sikusunka,” muntu. (Matayo 4:3, 11) Aboobo cilayandika kupailila lufwutuko kuzwa “kumubi,” Saatani Diabolosi. Usola kutoongelezya kuti tumubisyile Leza. (1 Ba-Tesalonika 3:5) Notulomba kuti, “Utuvune  kumubi,” tulomba Taata wesu wakujulu kutusololela akutugwasya kutegwa tutazundwi a Diabolosi.

Mutazundwi aa Diabolosi

13, 14. Nkaambo nzi bana Korinto ncobakeelede kucinca mbobakali kumweendelezya muntu watakali kulilemeka mumbungano?

¹³ Paulo naakakulwaizya Banakristo baku Korinto kuba bantu balekelela, wakalemba kuti: “Nkabela mwalekelela muntu cintu, ndamulekelela ambebo. Nkaambo mebo, na ndamulekelela cintu, nkaambo kandinywe nkindakamulekelela kumeso aa-Kristo, kuti tutapubbulwi kuli-Saatani, nkaambo tatuli bafubafuba batezi makanze aakwe mbwaabede.” (2 Ba-Korinto 2:10, 11) Saatani ulakonzya kutuzunda munzila zinji, pele nkaambo nzi Paulo ncaakaambila majwi aazubululwa aaya?

¹⁴ Paulo wakasinsa bana Korinto nkaambo kakuti bakalekela muntu watakali kulilemeka kuzumanana kuba mumbungano. Eeci ceelede kuti cakamukkomanisya Saatani, nkaambo mbungano yakali ampuwo yakuti yakali kulekelela ‘bwaamu akati kabo, bwaamu oobo bwatakali kubonwa akati kabahedeni.’ Kumamanino sikucita zibi ooyu wakagusyigwa mumbungano. (1 Ba-Korinto 5:1-5, 11-13) Muntu ooyo wakazyi kweempwa. Ikuti bana Korinto nibakakaka kumulekelela muntu ooyo akumujola mumbungano, Diabolosi naakabazunda munzila imwi. Munzila nzi? Nibakaba basilunya alimwi banyina luse, mbuli Saatani. Ikuti muntu wakeempwa ‘naakainda kulemenwa abuusu bunji’ akucileka kukomba Leza, ikapati baalu bakali kuyooba amulandu kuli Leza siluse, Jehova. (2 Ba-Korinto 2:7; Jakobo 2:13; 3:1) Masimpe kunyina Munakristo mwini-mwini uuyanda kutobela Saatani kwiinda mukuba walunya, mukali alimwi uuyina luse.

Kukwabililwa Azilwanyo zya Leza

15. Ninkondo iili buti njotulwana alimwi kuzunda kwesu kuyeeme aali?

¹⁵ Ikuti katuyanda kuvwunwa kuli Diabolosi, tweelede kulwana nkondo yakumuuya amyuuya mibi. Kuzunda myuuya mibi eeyi iijisi nguzu kuyeeme akusama kwesu “zilwanyo zyoonse zya-Leza.” (Ba-Efeso 6:11-18) Zilwanyo eezi zilabikkilizya a “cikwabilizyo cabululami.” (Ba-Efeso 6:14) Mwami Saulo wamu Israyeli yansiku tanaakamvwida Leza eelyo wakasweekelwa muuya uusalala. (1 Samuele 15:22, 23) Pele ikuti katucita bululami akusama zilwanyo zyakumuuya, tuyooba amuuya uusalala wa Leza abukwabilizi buyandika kuli Saatani abangelo bakwe babi, imadaimona.—Tusimpi 18:10.

16. Mbuti mbotunga twazumanana kukwabililwa kumyuuya mibi?

¹⁶ Kutegwa tuzumanane kukwabililwa kumyuuya mibi, akati kazintu zimwi nzyotweelede kucita nkubala akwiiya Jwi lya Leza lyoonse, kwaabelesya kabotu mabbuku aapegwa a “mubanzi uuzi uusyomekede.” (Luka 12:42) Aboobo tunoojisi makani aakumuuya mumizeezo yesu kweelana alulayo lwa Paulo lwakuti: “Bakwesu, makani aakumamanino ngaaya. Kufumbwa zintu zisinizye, kufumbwa zintu zilemekeka, kufumbwa zintu ziluleme, kufumbwa zintu zisalala, kufumbwa zintu ziyandika, kufumbwa zintu zili ampuwo imbotu, na kuli ciyanza niciba cimwi cibotu nanka cintu niciba cimwi citembaulika, amuziyeeyesye zintu ezi.”—Ba-Filipi 4:8.

17. Ncinzi ciyootugwasya kuzwidilila mukukambauka makani mabotu?

 ¹⁷ Jehova ulatupa kuti, “zituta [zyesu] zibambwe kukusamikwa a-Makani Mabotu aaluumuno.” (Ba-Efeso 6:15) Kutola lubazu lyoonse mumiswaangano ya Bunakristo kulatupa kuba bantu balibambilide kukambauka makani mabotu aa Bwami bwa Leza. Elo tulakkomana kaka kwiinda mukugwasya bantu kwiiya kasimpe ka Leza akuba alwaanguluko lwakumuuya! (Johane 8:32) ‘Ipanga lya-Muuya, nkukuti ijwi lya-Leza’ lilayandika kutegwa tulicingilile kunjiisyo zyakubeja ‘akumwaisya mampangala mayumu.’ (Ba-Efeso 6:17; 2 Ba-Korinto 10:4, 5) Kulibelesya kabotu Ijwi lya Leza lilembedwe, Ibbaibbele, kulatugwasya kuyiisya kasimpe akutukwabilila kutazundwa abucenjezu bwa Diabolosi.

18. Mbuti mbotukonzya “kwiima mumeneeno aa-Diabolosi”?

¹⁸ Paulo wakatalisya mubandi wakwe wa zilwanyo zyesu zyakumuuya kwiinda mukwaamba kuti: “Amuyume mu-Mwami amunguzu zyakwe impati. Amusame zilwanyo zyoonse zya-Leza, kuti mukonzye kwiima mumeneeno aa-Diabolosi.” (Ba-Efeso 6:10, 11) Ibbala lya Cigiliki lilembedwe kuti “kwiima” lyaamba sikalumamba wiimvwi mucibaka cakwe. Tulaima nji munkondo yakumuuya, nokuba kuti Saatani ulabelesya nzila zinji zyabucenjezu kusola kunyonganya lukamantano lwesu, kusofwaazya njiisyo naa kutupa kuti tucileke kusyomeka kuli Leza. Pele makanze aa Diabolosi tanaazwidilila pe alimwi kunyina naayoozwidilila! *

Amumukazye Diabolosi, Eelyo Uyoomuccija

19. Ninzila nzi yomwe motukonzya kumukazya Diabolosi?

¹⁹ Tulakonzya kuzwidilila munkondo yesu yakumuuya yakulwana Diabolosi amyuuya yeendelezyegwa anguwe. Tatweelede kumuyoowa Saatani nkaambo sikwiiya Jakobo wakalemba kuti: “Amulibombye kuli-Leza. Amumukazye Saatani, uyoomucija.” (Jakobo 4:7) Nzila imwi yakukazya Saatani canguzu azilenge zyamyuuya nzyabeleka limwi nkwiinda mukutajanika mumicito yamizimu naa kutayanzana abaabo batola lubazu mulinzyizyo. Magwalo cakusalazya alatondezya kuti babelesi ba Jehova tabeelede kujatikizigwa mubulozi, kulingula nyenyeezi, basikusonda abasimizimo. Ikuti katujisi bubi mumilimo ya Bunakristo alimwi katuli bayumu kumuuya, tatweelede kuyoowa kuti muntu umwi ulakonzya kutucitila zyamasalamuzi.—Myeelwe 23:23; Deuteronomo 18:10-12; Isaya 47:12-15; Incito 19:18-20.

20. Mbuti mbotukonzya kumukazya Diabolosi?

²⁰ ‘Tulamukazya Diabolosi’ kwiinda mukutobela zyeelelo zyamu Bbaibbele akasimpe kwiinda mukwiima nji kumukazya. Inyika ileendelana a Saatani nkaambo ngo leza wayo. (2 Ba-Korinto 4:4) Aboobo tulakaka zintu zyamunyika, mbuli kulisumpula, kuliyanda, kutalilemeka, lunya alimwi akuyandisya zintu zyakumubili. Tulizyi kuti Diabolosi wakaccija Jesu naakakaka kuzundwa anguwe kwiinda mukubelesya Magwalo naakali kusunkwa munkanda. (Matayo 4:4, 7, 10, 11) Mbubwenya buyo, Saatani ‘uyootuccija’ ikuti katumumvwida Jehova alimwi akusyoma Nguwe kwiinda mumupailo. (Ba-Efeso 6:18) Kwiinda mukugwasyigwa a Jehova Leza a Mwana wakwe uuyandwa, kunyina uukonzya kutucisa, kunyina naba Diabolosi!—Intembauzyo 91:9-11.

Bupanduluzi buyungizidwe

Ino Inga Mwaingula Buti?

• Sena tweelede kumuyoowa Saatani Diabolosi?

• Nkaambo nzi Saatani ncapenzyela Banakristo?

• Nkaambo nzi ncotupailila kuvwunwa kuzwa “kumubi”?

• Mbuti mbotunga twazwidilila kulwana nkondo yakumuuya?

[Mibuzyo yaciiyo]

[Cifwanikiso icili apeeji 8]

Cakutayoowa bakasyomeka kusikila kulufwu

[Cifwanikiso icili apeeji 9]

Diabolosi takonzyi kusinkilila bubuke bwabaabo bali mumizeezo ya Jehova

[Cifwanikiso icili apeeji 10]

Sena mulapaila kuti muvwunwe kuzwa “kumubi”? Basikutobela ba Kristo bakusaanguna

[Cifwanikiso icili apeeji 11]

Sena mulisamide “zilwanyo zizwa kuli Leza”?