Tunooyenda Muzina Lya Jehova Leza Wesu

“Swebo tuleenda muzina lya-Jehova Leza wesu lyoonse mane kukabe kutamani.”—MIKA 4:5.

1. Kujatikizya makani aakulilemeka, ino bukkale bwakali buti mumazuba aa Nowa, alimwi ino Nowa wakaindene buti abantu bambi?

IMULOMBWANA wakusaanguna uluulwa mu Bbaibbele kuti wakeenda a Leza ngu Enoki. Iwabili wakali Nowa. Icibalo citwaambila kuti: “Nowa kali muntu uululeme, katajisi kampenda, akati kabasaanyina. Nowa wakali kweenda a-Leza.” (Matalikilo 6:9) Mumazuba naakali kupona Nowa, bantu banji bakalileede kale kuzwa kubukombi busalala. Ibukkale bubi bwakaindilila ibangelo batasyomeki nobakaswaangana abamakaintu akuzyala bana bategwa babbabbani, “basinguzu” naa “bantu basimpuwo” bamumazuba aayo. Nkakaambo kaako kwakali buyo nkondo anyika! (Matalikilo 6:2, 4, 11) Nokuba boobo, Nowa tanaakajisi kampenda alimwi wakali “mukambausi wabululami.” (2 Petro 2:5) Leza naakamulailila kuti apange bwato bwakufwutukila, Nowa wakaswiilila. “Nowa wakacita obo. Wakacita mbubonya mbuli Leza mbwaakamulailila.” (Matalikilo 6:22) Masimpe, Nowa wakeenda a Leza.

2, 3. Ino ncikozyanyo nzi cibotu Nowa ncaakatusiila mazubaano?

² Paulo wakamubikkilizya Nowa mumulongo wabakamboni naakalemba kuti: “Alimwi Nowa, naakacenjezegwa a-Leza kumakani aazintu izyatalina kubonwa, lusyomo ndolwakamugulunganya kubeza bwaato bwakufutusizya bana bakwe, aboobo wakiisampaula inyika, nkabela wakaba sikujana bululami obo buzwa kulusyomo.” (Ba-Hebrayo 11:7) Cabotaace cikozyanyo nceeci! Mbwaanga wakali masimpe kuti majwi aa Jehova taawidi aansi, Nowa wakabelesya ciindi, nguzu alimwi alubono lwakwe kutegwa azuzikizye malailile aa Leza. Mbubwenya buyo, ibanji mazubaano baileka milimo imwi yakunyika akubelesya ciindi, nguzu alimwi alubono lwabo kuti bacite nzyaamba Jehova. Ilusyomo lwabo lulalongezyegwa, aboobo ciyoopa kuti bakafwutuke kubikkilizya abantu bambi.—Luka 16:9; 1 Timoteo 4:16.

³ Kuboneka kuti kusyomeka cakali cintu cikatazya kumukwasyi wa Nowa mbubwenya mbocakabede kuli Enoki, syaanyinakulu Nowa, iwakabandikwa mucibalo cakasaanguna. Mumazuba ngaakali kupona Nowa, bakombi bakasimpe bakali basyoonto mbubwenya mbuli kumazuba aakapona Enoki—bantu bali buyo lusele mbabakali kusyomeka akufwutulwa ku Zambangulwe. Nowa wakakambauka bululami munyika yakajisi nkondo alimwi akutalilemeka. Kunze lyaboobo, walo amukwasyi wakwe bakali kupanga bwato bupati azisamu ikulibambila kupaya kwamaanzi nyika yoonse, nokuba kuti kunyina wakali bwene kale kupaya kwamaanzi. Eeci cakaba cintu cikopanya kuli baabo ibakali kubalangilila.

4. Ino nkulubizya kuli buti kwabantu bamumazuba aa Nowa Jesu nkwaakatonkomeka?

⁴ Icigambya ncakuti, Jesu naakali kwaamba zyamumazuba aa Nowa, tanaakali kwaamba zyankondo, cikombelo cakubeja naa kutalilemeka nokuba kuti eezi zyakali zintu zipati. Ikulubizya nkwaakatonkomeka Jesu kwakali kujatikizya kukaka kucenjezyegwa kwakacita bantu. Wakaamba kuti “bakali kulya akunywa, bakali kukwata akukwatizigwa, kusikila kubuzuba obo  mbwaakanjila mubwaato Nowa.” Sena kulya, kunywa, kukwata, akukwasya cakalilubide? Bakali kupona buyo buumi “bwalyoonse!” Pele kupaya kwamaanzi kwakali munzila, alimwi Nowa wakali kukambauka bululami. Imajwi aakwe alimwi akulilemeka zyakali kubacenjezya. Nokuba boobo, “teebakezi mane kupaya kwamaanzi kwakasika akubatola.”—Matayo 24:38, 39.

5. Ino mbube nzi Nowa alimwi amukwasyi wakwe mbobakali kuyandika?

⁵ Notulanga zyamumazuba aayo, tulabona mboili yabusongo nzila njaakatobela Nowa. Nokuba boobo, mumazuba aayo Kupaya kwamaanzi kakutanacitika, kwakali kuyandika kuba muntu sicamba kutegwa aindane abantu bambi. Nowa amukwasyi wakwe bakali kuyandika kusinizya ncobeni kutegwa bapange bwato bupati akunjizya misyobo yabanyama iiminina beenzinyina mukati. Sena kuli bamwi akati kabaaba basyomeka basyoonto ziindi zimwi ibakayeeya kuti tabeelede kwiindana kapati abambi kutegwa bapone buumi “bwalyoonse”? Nokuba kuti mizeezo iili boobo bakaliijisi zimwi ziindi, kunyina noyakapa kuti lusyomo lwabo luceye. Nokwakainda myaka minji—iinda kumweelwe swebo ngotukonzya kuyandika kuliyumya mubukkale oobu—ilusyomo lwa Nowa lwakapa kuti afwutuke ku Kupaya kwamaanzi. Pele Jehova wakababeteka aabo boonse ibakali kupona buumi “bwalyoonse” akutabikkila maano kuciindi ncibakali kupona.

Inkondo Yabapenzya Bantu Alimwi

6. Ino mbukkale buli buti bwakazumanana naakayuminina maanzi aa Zambangulwe?

⁶ Naakayuminina maanzi aa Zambangulwe, bantu bakatalika bukkale bupya. Nokuba boobo, bantu tiibakalondokede pe alimwi “miyeeyo yamoyo wamuntu” yakazumanana kuba “mibi lyoonse kuzwa kubwanike bwakwe.” (Matalikilo 8:21) Kunze lyaboobo, nokuba kuti madaimona tanaakacili kukonzya kulisandula akuba muciimo camuntu, akacilijisi nguzu. Inyika yakakkede bantu batakombi yakafwambaana kulibonya kuti “yeendelezyegwa amubi” mbubwenya mbuli sunu. Bakombi bakasimpe bakeelede kulwana ‘ameeneeno aa Diabolosi.’—1 Johane 5:19, NW; Ba-Efeso 6:11, 12.

7. Ino mbuti nkondo mboyazumanana munyika yakapaide maanzi?

⁷ Kuzwa kuciindi ca Nimrodi, inyika yakapaide maanzi alimwi yakavwula bantu basilunya. Akaambo kakuvwula kwabantu alimwi akuyaambele mumilimo yasayaansi, inkondo yavwula kapati mazuba mbwaayaabuya. Ilyansiku kwakali icceba, sumo, buta aminkwengwe alimwi a nkalaki. Lino kwakaboola ntobolo zinyamunwa buya azyamavwili kubikilizya antobolo zyamavwili zikali kapati zyakumatalikilo kwamwaanda wamyaka wa 20. Nkondo Yanyika Yakusaanguna yakaletelezya zibelesyo ziyoosya kapati mbuli ndeke, ntobolo zyamavwili zikali, mato ankondo aayendela ansi aameenda alimwi amuya uujaya. Munkondo eeyo, zibelesyo eezi zyakajaya bantu banji citaambiki. Sena eeci cakali cintu ceenzu? Peepe.

8. Ino bbuku lya Ciyubunuzyo 6:1-4 lyazuzikizyigwa buti?

⁸ Mu 1914, Jesu wakabikkwa kuba Mwami wa Bwami bwa Leza bwakujulu, eelyo “buzuba bwa-Mwami” bwakatalika. (Ciyubunuzyo 1:10) Mucilengano citondezyedwe mubbuku lya Ciyubunuzyo, Jesu ulalibonya kali Mwami katantide abbiza lituba kayaabuzunda. Basimabbiza  abamwi balamutobela, aumwi kaiminina penzi liindene alyabeenzinyina ndyaleta kubantu. Umwi wabo ukkwelede abbiza lisalala, eelyo wakapegwa “inguzu zyakugwisya luumuno ansi, kuti bakajayane, alimwi wakapegwa ipanga ipati.” (Ciyubunuzyo 6:1-4) Ibbiza alimwi ayooyo ulitantide ziiminina nkondo, eelyo panga ipati liiminina mweelwe mupati wakunyonyoona kucitwa ankondo kwiinda muzibelesyo zikali. Izibelesyo eezi mazubaano zilabikkilizya mabbomba makali cakunga lyomwe lilakonzya kunyonyoona bantu banji kapati; tundeke tunyamuna mabbomba kutola kuli baabo mbobalwana; kubikkilizya azibelesyo zyamisamu iijaya alimwi azibelesya tuzunda tujaya kufwambaana.

Tulabikkila Maano Kukucenjezya kwa Jehova

9. Ino mbuti mazuba aano mbwaakozyene amazuba aayo Kupaya kwamaanzi kakutanacitika?

⁹ Mumazuba aa Nowa, Jehova wakabanyonyoona bantu nkaambo kankondo yakali kucitwa abantu bakali kuyungwa aba Bbabbani. Ino mbuti mazubaano? Sena nkondo tiidumide mbuli mbokwakabede kaindi? Ilidumide! Kunze lyaboobo, mbubwenya mbuli kumazuba aa Nowa, ibantu sunu bali mukucita milimo yabuzuba abuzuba, kabasola kupona buumi “bwalyoonse,” akukaka kumvwida kucenjezya kuli mukucitwa. (Luka 17:26, 27) Sena kuli kaambo kakudoonekela kuti naa Jehova uyoobanyonyoona bantu alimwi? Peepe.

10. (a) Ino nkucenjezyegwa kuli buti kupegwa cakwiinduluka-induluka mubusinsimi bwa Bbaibbele? (b) Ino ninzila nzi ilikke yamaano iiyandika kutobela?

¹⁰ Kakucili myaanda yamyaka kuti Kupaya kwamaanzi kucitike, Enoki wakasinsima zyakunyonyoona kwakali kuyoocitika mumazuba eesu. (Juda 14, 15) Awalo Jesu wakaamba zyakuboola kwa “mapenzi mapati.” (Matayo 24:21) Basinsimi abambi bakaamba kujatikizya ciindi eeco. (Ezekiele 38:18-23; Daniele 12:1; Joeli 2:31, 32) Alimwi mubbuku lya Ciyubunuzyo, tubala kujatikizya bupanduluzi busalede bwakunyonyoona kwamamanino. (Ciyubunuzyo 19:11-21) Umwi aumwi wesu kumugama, ulamwiiya Nowa alimwi akuba musungu mukukambauka bululami. Tulabikkila maano kukucenjezya kwa Jehova alimwi akubagwasya caluyando beenzuma kutegwa abalo bacite mbubwenya. Aboobo, mbubwenya mbuli Nowa, tuleenda a Leza. Inzya, cilayandika kuli umwi aumwi uuyanda kupona kuti azumanane kweenda a Leza. Ino mbuti mbotukonzya kucita oobo twalanga mapenzi ngotusikilwa abuzuba? Tuleelede kuba alusyomo luyumu mukuzuzikizyigwa kwamakanze aa Leza.—Ba-Hebrayo 11:6.

Amuzumanane Kweenda a Leza Mumazuba Aamanyongwe

11. Ino muunzila nzi motwiiya Banakristo bamumwaanda wamyaka wakusaanguna?

¹¹ Mumwaanda wamyaka wakusaanguna, Banakristo bananike bakali kwaambwa kuti “batobela  Nzila ya Mwami.” (Milimo 9:2, Ci) Ibuumi bwabo boonse bwakayeeme alusyomo muli Jehova alimwi a Jesu Kristo. Bakatobela nzila Simalelaabo njaakainda. Mazubaano, Banakristo basyomeka balacita oobo.

12. Ino ncinzi cakacitika Jesu naakamana kusanina bantu camaleele?

¹² Mboluyandika lusyomo bulatondezyegwa mucintu cakacitika mumulimo wa Jesu. Ciindi cimwi, camaleele Jesu wakasanina nkamu yabaalumi basika ku 5,000. Bantu bakagambwa alimwi bakakkomana. Pele amubone cakatobela. Tubala kuti: “Nobakabona malele ngaakacita bakati, Ncobeni oyu ngumusinsimi uuelede kusika ansi. Mpoonya Jesu, mbwaakaziba kuti bali kuyanda kumutola cakumusungilizya kuti abe Mwami wabo, wakabweeda alimwi kudundu alike.” (Johane 6:10-15) Masiku aayo wakaunka kubusena bumbi. Kuboneka kuti Jesu wakatyompya banji naakakaka kuba mwami. Kayi wakatondezya kuti wakali musongo alimwi wakalijisi nguzu zyakukonzya kupa bantu nzyobayandika kumubili. Pele tiicakaningasika ciindi ca Jehova cakuti Jesu atalike kulela kali Mwami. Alimwi, Bwami bwa Jesu bwakali bwakujulu kutali anyika pe.

13, 14. Ino nkuzilanga buti zintu banji nkobakatondezya, alimwi ino mbuti mbobakasunkwa caboola kumakani aalusyomo lwabo?

¹³ Pele, bantu bakamutobela Jesu cakuti mwaainda wakali mujaate-mujaate kusikila bamujana ‘kutala lyalwizi,’ kweelana ambwaamba Johane. Nkaambo nzi ncobakamutobeleda kakuli wakabakakila kuti abe mwami wabo? Ibanji bakatondezya kuti zintu bakazibweza munzila yakunyama, bakaamba cakusinizya kujatikizya zintu zyakumubili Jehova nzyaakapa munkanda mumazuba aa Musa. Eeci cakatondezya kuti bakali kuyanda kuti Jesu azumanane kubapa cakulya. Jesu naakabona makanze aabo aalubide, wakatalika kubayiisya kasimpe ikakali kukonzya kubagwasya kululamika mizeezo yabo. (Johane 6:17, 24, 25, 30, 31, 35-40) Ibamwi bakaŋuŋuna, ikapati naakaamba cikozyanyo eeci: “Ncobeni ndamwaambila kasimpe, Mwatalya mubili wa-Mwana a-Muntu, mwatanywa bulowa bwakwe, tamukwe buumi mulindinywe. Oyo uulya mubili wangu, akunywa bulowa bwangu uli abuumi ubutamani, alimwi ndiyoomubusya kubuzuba bwakumamanino.”—Johane 6:53, 54.

¹⁴ Zikozyanyo zya Jesu ziindi zinji zyakali kukulwaizya bantu kuti batondezye naa bakulombozya masimpe kweenda a Leza. Acalo cikozyanyo eeci cakajisi makanze aakozyene. Pele cakabusya manyongwe. Tubala kuti: “Banjibanji babasikwiiya bakwe, nobakamvwa obo bakati, Majwi aya mayumu, nguni uuti amvwe?” Jesu wakazumanana kupandulula kuti bakeelede kuyandaula bupanduluzi bwamajwi aaya bwakumuuya. Wakati: “Muuya nguupa buumi, mubili ngwabuyo, majwi ngendakamwaambila muuya, mbuumi.” Nokuba boobo banji kunyina nobakaswiilila, aboobo cibalo ciluula kuti: “Nkaambo kaako basikwiiya bakwe banjibanji bakapiluka, tabacili kweenda limbi awalo.”—Johane 6:60, 63, 66.

15. Ino nkuzilanga buti zintu bamwi babatobeli ba Jesu nkobakaba ankuko?

¹⁵ Nokuba boobo, basikwiiya bakwe Jesu tiibakamuccija boonse pe. Masimpe kuti basikwiiya basyomeka tiibakacimvwisya Jesu ncaakaamba. Pele bakazumanana kuba alusyomo luyumu mulinguwe. Petro umwi wabasikwiiya aabo basyomeka wakatondezya mbobakalimvwa boonse naakaamba kuti: “Omwami, tuye  kuli? Nduwe oojisi majwi aabuumi ubutamani.” (Johane 6:68) Elo kaka ciimo eeci ncibotu alimwi ncikozyanyo cibotu!

16. Mbuti mbotukonzya kusunkwa, alimwi ino nkuzilanga buti zintu nkotweelede kuba ankuko?

¹⁶ Andiswe mazubaano tulakonzya kusunkwa mbuli bwakasunkwa basikwiiya bakusaanguna. Ambweni tulakonzya kutyompwa akaambo kakuti zisyomezyo zya Jehova tiizyazuzikizyigwa kufwambaana kweelana ambotwali kuyanda swebo kutugama. Tulakonzya kuyeeya kuti ibupanduluzi bwa Magwalo aali mumabbuku eesu aamba zyamu Bbaibbele mayumu kumvwa. Mbwalilemeka Munakristoma bulakonzya kututyompya. Sena inga catugwasya kucileka kweenda a Leza akaambo katwaambo ootu naa tumbi buyo? Peepe! Basikwiiya bakaleka kutobela Jesu bakatondezya kuyeeya kwabuntu. Tatweelede kucita mbubakacita pe.

“Swebo Tatuli Baabo Bapilukila Musule Akunyonyoonwa”

17. Mbuti mbotukonzya kugwasyigwa kuzumanana kweenda a Leza?

¹⁷ Mwaapostolo Paulo wakalemba kuti: “Magwalo aya oonse akazwa kuli-Leza.” (2 Timoteo 3:16) Kwiinda mu Bbaibbele, Jehova ulatwaambila cakusalazya kuti: “Njeeyi inzila, amweende mulinjiyo.” (Isaya 30:21) Ikumvwida Jwi lya Leza kulatugwasya ‘kucenjela mbotweenda.’ (Ba-Efeso 5:15) Ikubala Bbaibbele alimwi akuzinzibala kuyeeya ncotwiiya kulatugwasya ‘kweenda mulusinizyo.’ (3 Johane 3) Masimpe, kweelana a Jesu mbwaakaamba, “muuya nguupa buumi, mubili ngwabuyo.” Ibusolozi bulikke busyomeka mbotukonzya kubelesya kusololela ntaamo zyesu mbwakumuuya, bwalo ibuboola kwiinda mu Jwi lya Jehova, mumuuya wakwe alimwi amumbunga yakwe.

18. (a) Ino ncinzi bantu batali basongo ncobacita? (b) Ino ndusyomo luli buti ndotuyanda kuba andulo?

¹⁸ Mazubaano, aabo bakopana akaambo kakuyeeya kwabuntu naa kutazuzikizyigwa kwazintu nzyobali kulangila ziindi zinji balatalika kubikkila maano kuzintu zyamunyika. Mbwaanga balacileka kupakamana, babona kuti ‘kulangila’ tacili cintu ciyandika pe, eelyo basala kubikkila maano kuzintu nzyobayanda beni muciindi cakubikka zintu zya Bwami kumbele. (Matayo 24:42) Kweenda munzila iili boobo taali maano pe. Amubone majwi aa mwaapostolo Paulo aakuti: “Swebo endiswe tuyoopiluka cifuteesule akufwa pe, ndiswe baabo abajisi kusyoma kuyoofutusya myuuya yesu.” (Ba-Hebrayo 10:39) Mbubwenya mbuli Enoki a Nowa, tupona mumazuba aamanyongwe. Andiswe tulijisi coolwe cakweenda a Leza mbuli ncobakajisi. Kwiinda mukucita boobu, tulijisi bulangizi businizyide bwakuti zisyomezyo zya Jehova tuyoozibona kazizuzikizyigwa, ikunyonyoonwa kwabantu babi akuleta nyika mpya yabululami. Bwabotaace bulangizi mboobu!

19. Mbuti Mika mbwapandulula nzila njobeelede kutobela bakombi bakasimpe?

¹⁹ Musinsimi Mika wakasololelwa amuuya wakaamba boobu kujatikiya zisi zili munyika kuti ‘ziyooyenda muzina lyamizimu yazyo.’ Kumane boobo wakaligama kubikkilizya abakombi bambi basyomeka ategwa: “Swebo tuleenda muzina lya-Jehova Leza wesu lyoonse mane kukabe kutamani.” (Mika 4:5) Ikuti naa makanze aanu alikozyene amakanze aa Mika, amukakatile kuli Jehova kufwumbwa mazuba abe aamanyongwe buti. (Jakobo 4:8) Akube kulombozya kwesu kwamoyo woonse kuli umwi aumwi wesu ikweenda a Jehova Leza wesu lino mane kukabe kutamani!

Ino Inga Mwaingula Buti?

• Ino nkukozyanya kuli buti kuliko akati kamazuba aa Nowa alimwi amazubaano?

• Ino ninzila nzi Nowa amukwasyi wakwe njobakatobela, alimwi mbuti mbotukonzya kwiiya lusyomo lwabo?

• Ino nkuzilanga buti zintu nkobakatondezya bamwi babatobeli ba Jesu?

• Ino ncinzi Banakristo bakasimpe ncobakanzide kucita?

[Mibuzyo yaciiyo]

[Zifwanikiso izili apeeji 30]

Mbubwenya mbuli kumazuba aa Nowa, bantu sunu balimaninide mukucita milimo yabo yalyoonse

[Cifwanikiso icili apeeji 31]

Mbotuli baambilizi ba Bwami, “endiswe tuyoopiluka cifuteesule”