Sena Mulatondezya Bulemu Bwa Leza?
Sena Mulatondezya Bulemu Bwa Leza?
“Swebo . . . mbuli ciboniboni, tulabonya bulemu bwa-Leza.”—2 BA-KORINTO 3:18.
1. Ino ncinzi Musa ncaakabona, alimwi ino ncinzi cakacitika kuzwa waawo?
CAKALI cilengaano ciyoosya citanabwenwe amuntu naba omwe. Kali alikke atala aa Mulundu wa Sinai, Musa wakatondezyegwa ncaakalomba. Wakatondezyegwa cintu citanabwenwe amuntu naba omwe—bulemu bwa Jehova. Pele Musa kunyina naakamubona Jehova kumugama buya pe. Takukwe muntu uukonzya kubona mbwabede Leza akuzumanana kupona pe. Muciindi caboobo, Jehova wakamuvwumba “ajanza” Musa kutegwa libe cisinkilizyo kusikila limwi wainda. Kuboneka kuti wakacita oobu kwiinda mukwiimininwa amungelo. Eelyo Jehova wakapa kuti Musa abone buyo kumweka kwabulemu bwa Leza. Alimwi Jehova wakaambaula a Musa kwiinda mumungelo. Ibbaibbele lilacipandulula cakacitika ategwa: “Eelyo Musa naakaseluka kuzwa kucilundu ca-Sinai, . . . busyu bwakwe bwakali kumweka nkaambo kakwaambaula a [Jehova].”—Kulonga 33:18–34:7, 29.
2. Ino ncinzi mwaapostolo Paulo ncaakalemba kujatikizya bulemu butondezyegwa a Banakristo?
2 Amuyeeyele buyo kuti nywebo muli a Musa a mulundu ooyo. Elo kaka inga caba cintu cikondelezya kubona bulemu bwa Singuzuzyoonse bumweka-mweka alimwi akumvwa majwi aakwe! Inga caba coolwe ciinda kubota ikuseluka Mulundu wa Sinai a Musa simwiima akati wacizuminano ca Mulawo! Pele sena mulizyi kuti munzila zimwi Banakristo bakasimpe balatondezya bulemu bwa Leza kwiinda bwakacita Musa? Ikaambo aaka ikapa kukkala ansi akuyeeya kalajanika mulugwalo lwakalembwa amwaapostolo Paulo. Wakalemba kuti Banakristo bananike ‘mbuli cimboni-mboni balatondezya bulemu bwa Jehova.’ (2 Bakolinti 3:7, 8, 18, Ci) Munzila imwi Banakristo ibajisi bulangizi bwaanyika abalo balatondezya bulemu bwa Leza.
Banakristo Mbobatondezya Bulemu bwa Leza
3. Ino mbuti mbotwamuzyiba Jehova kwiinda Musa?
3 Ino mbuti mbotukonzya kutondezya bulemu bwa Leza? Kunyina notwakabona naa kumvwa majwi aa Jehova mbuli bwakacita Musa pe. Nokuba boobo, tulijisi luzibo kujatikizya Jehova lwiinda ali loolo lwakajisi Musa. Jesu tanaakaninga libonya kali Mesiya mane nokwakainda myaka iili 1,500 kuzwa lyakafwa Musa. Aboobo, ambweni Musa tanaakazyi mbuli Mulawo mbowakali kuyoozuzikizyigwa muli Jesu, walo wakafwa kutegwa anunune bantu kulufwu alimwi akumapenzi aaboola acibi. (Ba-Roma 5:20, 21; Ba-Galatiya 3:19) Kunze lyaboobo, Musa wakali kukonzya buyo kwaabona asyoonto makanze mapati aa Jehova, aakayeeme a Bwami bwa Mesiya alimwi a Paradaiso yaanyika ngobuyooleta. Aboobo bulemu bwa Jehova tatububoni ameso eeni pe, pele ameso aalusyomo luyeeme aziyiisyo zili mu Bbaibbele. Kunze lyaboobo, twalimvwa jwi lya Jehova kutali kwiinda mumungelo, pele kwiinda mu Bbaibbele, ikapati mu Makani Mabotu alo aazipandulula kabotu ziyiisyo alimwi amulimo wa Jesu.
4. (a) Ino mbuti Banakristo bananike mbobatondezya bulemu bwa Leza? (b) Ino muunzila nzi aabo ibajisi bulangizi bwaanyika mobatondezya bulemu bwa Leza?
4 Nokuba kuti Banakristo tabatondezyi bulemu bwa Leza kwiinda mukumweka kubusyu, pele masyu aabo alamweka nobaambila bamwi zyabube bwa Jehova bubotu alimwi amakanze aakwe. Kaamba zyamazuba eesu, musinsimi Isaya wakasinsima kuti bantu ba Leza “bayoolwiida bamasi makani aabulemu bwa [Jehova].” (Isaya 66:19) Kunze lyaboobo, ku 2 Ba-Korinto 4:1, 2, tubala kuti: “Mbuli mbutujisi eyi milimo . . . , tulisowede makani, aasisidwe aausya bweeme. Tatweendi cabupyungi pe, nikuba kubisizya lusinizyo lwamakani aa-Leza, anukuti tulaamba lusinizyo antangalala, aboobo tulalilubulula kumanjezeezya aabantu boonse kubusyu bwa-Leza.” Aawa Paulo wakali kugama Banakristo bananike, “basimilimo bacizuminano cipya.” (2 Bakolinti 3:6, Ci) Pele mulimo wabo wabajatikizya bantu banji balo ibajana bulangizi bwabuumi butamani bwaanyika. Imulimo wankamu eezi zyobilo tuutondezyi buyo bulemu bwa Jehova kwiinda muzintu nzyobayiisya pe, pele amuzintu nzyobacita. Mmukuli wesu alimwi ncoolwe ikutondezya bulemu bwa Leza Mupati Kampatila!
5. Ino kuyaambele kwesu kulubazu lwakumuuya kupa citondezyo canzi?
5 Mazubaano, makani mabotu aa Bwami bwa Leza ali mukukambaukwa munyika yoonse kweelana ambwaakasinsima Jesu. (Matayo 24:14) Masi, milaka alimwi amisyobo yoonse yabantu baatambula camaanza obilo makani mabotu alimwi bacinca buumi bwabo ikutegwa bacite kuyanda kwa Leza. (Ba-Roma 12:2; Ciyubunuzyo 7:9) Mbubwenya mbuli Banakristo bakusaanguna, tabakonzyi kuleka kwaamba zintu nzyobakabona akumvwa. (Incito 4:20) Ibantu bainda kutuulunzuma tuli cisambomwi, bali mukutondezya bulemu bwa Leza mazubaano, icintu citanacitikide kuzwa bantu nobakalengwa. Sena muli akati kabo? Ikuyaambele kumuuya kwabantu ba Leza ncitondezyo cakuti Jehova uli mukubalongezya akubakwabilila. Twalanga makamu aajisi nguzu aatulwana, tuli bujisi kuya kumpela calo citondezya kuti muuya wa Leza nkouli alindiswe. Lino atubone ncokuli boobo.
Bantu ba Leza Kunyina Nobakonzya Kulobelela
6. Ino nkaambo nzi ikuba kulubazu lwa Jehova ncokuyandika kuba alusyomo alimwi abusicamba?
6 Amuyeeye buyo kuti naa mwaitwa kunkuta kuti mupe bumboni bujatikizya cigwebenga ciinda kubija. Kamuzyi kuti cigwebenga eeci cilijisi mbunga mpati alimwi cilakonzya kubelesya nzila zyoonse kutegwa mutaciyubununi. Ikutegwa mupe bumboni bujatikizya cigwebenga eeci, kuyandika busicamba alimwi alusyomo lwakuti beendelezi bayoomucingilila kuli ncico. Tuli mubukkale buli boobu. Kwiinda mukupa bumboni bwa Jehova alimwi amakanze aakwe, tuli mukupa bumboni bwamilandu ya Saatani Diabolosi, kumubikka atuba kuti mujayi alimwi mubeji uuyena bantu boonse baansi. (Johane 8:44; Ciyubunuzyo 12:9) Ikuba kulubazu lwa Jehova akukazya Diabolosi kuyandika kuba alusyomo alimwi abusicamba.
7. Ino Saatani uyunga buti, alimwi ino ncinzi ncasola kucita?
7 Masimpe kuti Jehova Ngomupati. Nguzu nzyajisi zilainda kule aali zya Saatani. Tulisyomede kuti Jehova ulakonzya kutuvwuna alimwi uliyandide kucita boobo ikuti naa katumubelekela cakusyomeka. (2 Makani 16:9) Pele, Saatani ngomuleli wamadaimona alimwi abantu batamuyandi Leza. (Matayo 12:24, 26; Johane 14:30) Mbwaanga Saatani wakalosyelwa ansi alimwi ulijisi “bukali bupati,” ulabakazya calunya babelesi ba Jehova akubelesya bantu mbeendelezya munyika kuti babalesye boonse aabo ibakambauka makani mabotu. (Ciyubunuzyo 12:7-9, 12, 17) Ino eeci ucicita buti? Ulacita oobu munzila zitaleli kuli zyotatwe.
8, 9. Ino mbuti Saatani mbwabelesya lweeno, alimwi nkaambo nzi ncotweelede kusala camaano mbotuyanzana limwi?
8 Inzila imwi Saatani njabelesya kusola kutunyonganya nkwiinda mukubikkila maano kuzintu ziyandika mubuumi. Bantu mazubaano balaayandisya mali, balaliyanda alimwi balakuyandisya kulikondelezya. Tabamuyandi Leza pe. (2 Timoteo 3:1-4) Akaambo kakujata bubi muzintu zyakumubili, bantu banji ‘tabaabikkili maano’ makani mabotu ngotubaambila. Tabayandi buya kwiiya kasimpe kali mu Bbaibbele. (Matayo 24:37-39) Ibukkale oobu mbubajisi bulakonzya kututambukila akutweena kutegwa tube batolo kumuuya. Ikuti twatalika kuyandisya zintu zyakumubili alimwi akulikondelezya, iluyando lwesu kuli Leza luyoomana.—Matayo 24:12.
9 Akaambo kaceeci, Banakristo balasala bantu bakuyanzana limwi camaano. Mwami Solomoni wakalemba kuti: “Uuenda abasongo ulasongwaala, pele muzwalani wabafubafuba ulabisizigwa.” (Tusimpi 13:20) ‘Atweende’ abaabo ibatondezya bulemu bwa Leza. Ncintu cibotu kapati ikucita boobo! Notubungana antoomwe abakwesu abacizi bakumuuya kumiswaangano amuziindi zimwi, tulakulwaizyigwa aluyando, lusyomo, lukkomano alimwi abusongo bwabo. Ikuyanzana kubotu boobu kulaayumya makanze eesu aakuzumanana mumulimo wesu.
10. Ino muunzila nzi Saatani mwaabelesya nzila yakufwubaazya kuli baabo ibatondezya bulemu bwa Leza?
10 Inzila yabili Saatani njabelesya nasola kulesya Banakristo boonse kutondezya bulemu bwa Leza njakufwubaazya. Nzila eeyi tayeelede kutugambya. Jesu Kristo naakali mumulimo wakwe anyika wakafwubaazyigwa, kusekwa, kugunisigwa, kusampaulwa mane buya akuswidwa mate. (Marko 5:40; Luka 16:14; 18:32) Banakristo bakusaanguna abalo bakali kufwubaazyigwa. (Incito 2:13; 17:32) Babelesi ba Jehova basunu abalo bapenzyegwa mbubwenya. Kweelana amwaapostolo Petro, balakonzya kwaambwa kuti “basinsimi babeji.” Petro wakasinsima kuti: “Kumazuba aakumamanino kuyoosika basabuzi beenda muzisusi zibi zyamyoyo yabo beni, bayoosabula cakwaamba kuti, Ino kuli kuli kuboola kwakwe ukwakasyomezegwa? Nkaambo . . . zintu zyoonse zicili mbubonya mbozyakabede kuzwa kumalengelo.” (2 Petro 3:3, 4) Bantu ba Leza balafwubaazyigwa kuti kunyina ncobabwenyi kuzintu zili mukucitika. Zyeelelo zyamu Bbaibbele zibonwa kuti nzintu zyansiku. Kubantu banji, mulumbe ngotukambauka baubona kuti ngwabufwubafwuba. (1 Ba-Korinto 1:18, 19) Mbotuli Banakristo, tulakonzya kufwubaazyigwa kucikolo, kumilimo ziindi zimwi nomuba mumukwasyi buya. Kakunyina kunyonganyisyigwa, tulazumanana kutondezya bulemu bwa Leza kwiinda mukukambauka, katuzyi mbubwenya mbwaakazyi Jesu kuti Jwi lya Leza nkakasimpe.—Johane 17:17.
11. Ino mbuti Saatani mbwaabelesya nzila yakupenzya ikutegwa Banakristo balobelele?
11 Inzila yatatu Diabolosi njabelesya nasola kulesya mulimo wesu nkwiinda mukukazyigwa naa kupenzyegwa. Jesu wakaambila batobeli bakwe kuti: “Bazoomwaabila mapenzi akumujaya. Nkabela muzoosulwa kumisyobo yoonse nkaambo kazina lyangu.” (Matayo 24:9) Inzya, mbotuli Bakamboni ba Jehova, twapenzyegwa calunya mumasena manji ansi ano. Tulizyi kuti kaindi Jehova wakasinsima kuti kusulana kuyooba akati kabaabo babelekela Leza abaabo babelekela Saatani Diabolosi. (Matalikilo 3:15) Alimwi tulizyi kuti kwiinda mukuzumanana kusyomeka notuli mumasukusyo, tusinizya kuti Jehova nguweelede kweendelezya kujulu aansi. Ikuzyiba kaambo aaka kulakonzya kutuyumya nociba ciindi notuli mumapenzi mapati. Kunyina kupenzyegwa kuli koonse kukonzya kulesya mulimo wesu ikuti naa twakanza kale kutondezya bulemu bwa Leza.
12. Ino nkaambo nzi ncotweelede kukkomana notuzumanana kusyomeka nokuba kuti Saatani ulatukazya?
12 Sena mulasyomeka nokuba kuti anyika kuli lweeno, kufwubaazyigwa alimwi akupenzyegwa? Ikuti naa mboobo muleelede kukkomana. Jesu wakasyomezya baabo ibakali kuyoomutobela kuti: “Inywe muli acoolwe nibazoomutukila akumupenzya akumutamikizya zintu zibi zyoonse zyakubeja nkaambo kandime. Amukondwe akusekelela, nkaambo bulumbu bwanu bwakujulu mbupati, nkaambo mbubonya obo mbubakapenzya basinsimi ibakali kunembo lyanu.” (Matayo 5:11, 12) Ikusyomeka kwanu kutondezya kuti muuya uusalala wa Jehova uli alindinywe, ikumupa nguzu kuti mutondezye bulemu bwakwe.—2 Ba-Korinto 12:9.
Kuliyumya Akaambo Kakugwasyigwa a Jehova
13. Ino nkaambo nzi kapati ikatupa kuliyumya mumulimo wesu wa Bunakristo?
13 Ikaambo kapati ikapa kuti tuliyumye mumulimo nkakuti tulamuyanda Jehova alimwi akutondezya bulemu bwakwe. Ibantu balabaiya aabo mbobayanda akulemeka, aboobo kunyina wiinda Jehova Leza kumakani aakweelela kuyiigwa. Akaambo kaluyando lwakwe lupati, wakatuma Mwanaakwe anyika kuti acite bukamboni kukasimpe alimwi akunununa bantu bamvwa. (Johane 3:16; 18:37) Mbubwenya mbuli Leza, tulombozya kuti bantu boonse bajane ciindi cakweempwa akufwutulwa; nkakaambo kaako ncotukambaukila. (2 Petro 3:9) Kulombozya kuli boobu kubikkilizya amakanze eesu aakwiiya Leza zitukulwaizya kuzumanana kutondezya bulemu bwakwe kwiinda mumulimo wesu.
14. Ino mbuti Jehova mbwatuyumya ikutegwa tuliyumye mumulimo wesu?
14 Nokuba boobo, icipati citupa kuliyumya mumulimo wesu wa Bunakristo nkugwasyilizyigwa a Jehova. Ulatuyumya akutupa nguzu kwiinda mumuuya wakwe, mumbunga alimwi amu Jwi lyakwe Ibbaibbele. Jehova ‘ulapa lukakatilo’ kuli baabo balisungude kutondezya bulemu bwakwe. Ulaingula mipailo alimwi akutupa busongo kutegwa tumane masukusyo. (Ba-Roma 15:5; Jakobo 1:5) Kunze lyaboobo, Jehova tazumizyi kuti kutusikile masukusyo ngotutakonzyi kuzunda. Ikuti twasyoma Jehova, uyootubikkila mpwaido yakuzwida kutegwa tuzumanane kutondezya bulemu bwakwe.—1 Ba-Korinto 10:13.
15. Ino ncinzi citugwasya kuliyumya?
15 Ikuliyumya mumulimo wesu ncitondezyo cakuti muuya wa Leza uli alindiswe. Mucikozyanyo, amuyeeye buyo ikuti muntu umwi wamulomba kuti kamuyaabwaabila cilyo cimwi kuŋanda aŋanda kakunyina kubabbadalisya bantu. Mwalaililwa kuti mucite oobo kwiinda mukubelesya mali aanu alimwi aciindi canu. Kumane mwatalika kubona kuti bantu basyoonto buyo mbabaciyanda cakulya ncomupa; mane bamwi batalika kumukasya kucaabila. Sena muyeeya kuti inga mwazumanana kubeleka mulimo ooyu lyoonse? Kulangika kuti inga tiimwacita oobo pe. Pele, ambweni mwakatalika kaindi kubeleka canguzu mukumwaya makani mabotu muciindi canu alimwi akubelesya mali aanu. Nkaambo nzi? Sena takali kaambo kakuti mulamuyanda Jehova alimwi kwiinda mumuuya wakwe waulongezya mulimo kwiinda mukumugwasya kuti muliyumye? Oobo mbombubo!
Imulimo Weelede Kuyeeyegwa
16. Ino kuliyumya mumulimo cituletela nzi alimwi abaabo batuswiilila?
16 Mulimo wacizuminano cipya ncipego ciinda kuyandika. (2 Ba-Korinto 4:7) Mbubwenya buyo, mulimo wa Bunakristo uucitwa ambelele zimwi munyika yoonse ncintu ciyandisi. Mbomuya buzumanana kuliyumya mumulimo mulakonzya kucita mbuli Paulo mbwaakalembela Timoteo kuti, “ulalifutula omwini, abalo bakumvwa ulabafutula.” (1 Timoteo 4:16) Amuyeeye buyo eeci ncocaamba. Imakani mabotu ngomukambauka apa kuti ibamwi bajane ciindi cakuti bakapone kukabe kutamani. Mulakonzya kubamba cilongwe ciyumu kapati abaabo mbomugwasya kumuuya. Amuyeeye mbocikonzya kukkomanisya kuyoopona kukabe kutamani mu Paradaiso abaabo mbomwakagwasya kwiiya kujatikizya Leza! Masimpe tabakakulubi kugwasya kwanu. Masimpe eeci cilakkazyika moyo!
17. Ino nkaambo nzi ciindi ncotupona ncocili ciindi nsini kuzwa bantu nobakalengwa?
17 Tupona muciindi nsini kuzwa bantu nobakalengwa. Alimwi kunyina limbi makani mabotu naayookambaukilwa bantu batamuyandi Leza pe. Nowa wakapona munyika iili boobu, alimwi wakaibona mboyakamana. Kweelede kuti wakakkomana ikuzyiba kuti wakaucita cakusyomeka mulimo ngwaakapegwa a Leza wakubamba bwato, mwalo walo alimwi mukwasyi wakwe mobakafwutukila! (Ba-Hebrayo 11:7) Andinywe mulakonzya kujana lukkomano. Amuyeeyele buyo mbomuyoolimvwa mwanooli munyika mpya mwanooyeeya mulimo wanu mumazuba aano aakumamanino, kamuzyi kuti mwakabeleka kusikila mpoceela mukutola ambele makani aa Bwami.
18. Ino ncisyomezyo nzi, alimwi nkukulwaizya kuli buti Jehova nkwapa kubabelesi bakwe?
18 Aboobo atuzumanane kutondezya bulemu bwa Leza. Ikucita boobo ciyooba cintu ncotunooyeeya lyoonse. Alimwi Jehova ulaiyeeya milimo yesu. Ibbaibbele likulwaizya boobu: “Leza tali sikampenda, takonzya kuluba milimo yanu akuyanda nkomwatondezya nkaambo kezina lyakwe, mbomwakabelekela basalala, asunu mucibabelekela. Swebo tuyandisya kuti umwi aumwi wanu ajatisye kusungwaala nkukonya, kukulindila kumaninide mane do kumamanino, kuti mutabi baziluki, pele kamutobela baabo abayoojana ceeco icakasyomezegwa nkaambo kakusyoma akubosya moyo.”—Ba-Hebrayo 6:10-12.
Sena Inga Mwapandulula?
• Ino mbuti Banakristo mbobatondezya bulemu bwa Leza?
• Ino ninzila nzi Saatani nzyabelesya nasola kulesya mulimo wabantu ba Leza?
• Ino ncitondezyo nzi ciliko cakuti muuya wa Leza nkouli alindiswe?
[Mibuzyo yaciiyo]
[Cifwanikiso icili apeeji 9]
Busyu bwa Musa bwakamweka abulemu
[Zifwanikiso izili apeeji 10]
Tulatondezya bulemu bwa Leza mumulimo