Ilugwalo Kuli Nowa

“NOMUYANDWA ba Nowa, ndabala ziindi zinji mu Bbaibbele kujatikizya ndinywe alimwi ambomwakayaka bwato mbomwakafwutukila amukwasyi wanu ciindi ca Zambangulwe.”

Mbolwakatalika lugwalo ndwaakalemba musimbi ujisi myaka iili 15 utegwa Minnamaria wakalemba musunko wabana bacikolo bamyaka iili 14 kusikila ku 21. Musunko wakabambwa aba Finnish postal services, Federation for Finnish Mother Tongue Teachers alimwi aba Finnish Literature Society. Basicikolo bakeelede kulemba lugwalo luyeeme abbuku limwi. Lwakeelede kulembelwa muntu wakalemba bbuku naa muntu ujanika mubbuku oomo. Bamayi bakasala magwalo aayinda ku 1,400 ngobakalemba bana bacikolo akupa baabo bakali kweendelezya musunko naa kucconga. Basikweendelezya bakasala lugwalo lwakainda kubota, bali kkumi bakali mucibeela cabili alimwi bali kkumi bakali mucibeela catatu. Minnamaria wakakondwa kuzyiba kuti lugwalo lwakwe lwakali mucibeela catatu.

Nkaambo nzi Minnamaria sicikolo mukubusi ncaakalembela lugwalo lwakwe kuli Nowa imuntu wakakkala myaka iitandila ku 5,000 yainda? Waamba kuti: “Ibbaibbele cakali cintu cakusaanguna ncondakali kuyeeya. Bantu baambwa mu Bbaibbele ndakabazyiba kapati. Ndabala zinji kujatikizya bantu aaba cakuti ndibabona mbuli kuti balapona. Ndakasala Nowa nkaambo buumi bwakwe bwakali kukkomanisya kapati alimwi buliindene abokwaangu.”

Ilugwalo lwa Minnamaria kuli Nowa lwakamana amajwi aakuti: “Ucili cikozyanyo calusyomo alimwi akumvwida. Buumi bwako bukulwaizya boonse babala Bbaibbele kubelekela lusyomo lwabo.”

Lugwalo oolu lwamukubusi ubala Bbaibbele ncikozyanyo cibotu cakuti Bbaibbele mubwini “lili abuumi, lili anguzu” kubantu boonse, ibana alimwi abapati.—Ba-Hebrayo 4:12.