Luzibo Lwini-Lwini lwa Leza Lulatuumbulizya

IBANTU bamwi, Bbaibbele nolyaamba kujatikizya luyando lwa Leza alimwi aluse lwakwe cibapa kubaa mibuzyo iinyonganya mumizeezo. Balabuzya kuti: Ikuti naa Leza uyanda kubumanizya bubi, ulizyi mbobukonzya kumanizyigwa alimwi ulijisi nguzu zyakucita boobo, ino nkaambo nzi bubi ncobuyaabwiindilila? Ipenzi ndyobajisi nkweendelanya twaambo totatwe ootu: (1) Leza ulaanguzu kapati; (2) Leza ulaaluyando alimwi mmubotu; alimwi (3) zintu zibyaabi zyazumanana kucitika. Bayeeya kuti mbwaanga kaambo katatu nkamasimpe, nkokuti kweelede kuti ikaambo kamwi akati katwaambo twakusaanguna tobile takaluzi. Kweelana ambobazilanga zintu, bayeeya kuti Leza takonzyi kubumanizya bubi naa tabikkilide maano.

Kakwiindide mazuba aali mbwaabede kuzwa ciindi World Trade Center mu New York niyakanyonyoonwa, imusololi wacikombelo umwi uzyibidwe kapati mu United States wakaamba kuti: “Ndabuzyigwa . . . ziindi zinji mubuumi bwangu kujatikizya kaambo Leza ncazumizyila ntenda alimwi akupenga kuti kazicitika. Ndeelede kulizuminina kuti tandibuzyi kabotu pe bwiinguzi, alimwi tandisalalidwe pe andime kujatikizya makani aaya.”

Naakali kwaamba mbwaakalimvwa kujatikizya kaambo aaka, syaazibwene mulwiiyo lwabukombi umwi wakalemba kuti kakamubotela kapati “kaambo kamasimpe aako kajatikizya bukombi” kakaambwaa musololi wacikombelo ooyu. Alimwi wakakazuminizya kaambo kasikwiiya umwi wakalemba kuti: “Mbocitakonzyeki kuteelelesya ncokuli mapenzi, ncimwi buyo ambocitakonzyeki kuteelela mbwabede Leza.” Pele, sena ncobeni tacikonzyeki ikuteelela kaambo Leza ncalekelede bubi?

Matalikilo Aabubi

Mukwiimpana ancobakonzya kwaamba basololi bazikombelo, Ibbaibbele kunyina nolitondezya kuti nkaambo katalimvwisyi kabotu Leza ncalekelede bubi. Ikaambo kapati kakonzya kutugwasya kumvwisya makani aajatikizya bubi nkakuzyiba kuti Jehova kunyina naakalenga nyika iizwide bubi pe. Bantu bakusaanguna bobile wakabalenga kabalondokede, kabanyina cibi. Jehova naakalanga mulimo wakwe wakulenga wakabona kuti wakali ‘mubotu loko.’ (Matalikilo 1:26, 31) Makanze aakwe akali aakuti Adamu alimwi a Eva bakomezye Edeni kuti nyika yoonse mbwiizulwa ibe Paradaiso alimwi akuti izule bantu ibakkomene alimwi ibakwabilidwe mubweendelezi bwakwe bwaluyando.—Isaya 45:18.

Ibubi bwakatalika eelyo umwi wazilenge zyamuuya naakatalika kulombozya kukombwa, nokuba kuti kumatalikilo wakali kusyomeka kuli Leza. (Jakobo 1:14, 15) Ibuzangi bwakwe bwakalibonya aanyika iciindi naakayunga bantu bakusaanguna bobile kuti bamusangane mukukazya Leza. Muciindi cakumvwida malailile aa Leza aagaminide aakuti tiibakeelede kulya naa kuguma micelo yamusamu wakuzyiba cibotu acibi, Adamu alimwi a Eva bakabweza imwi yamicelo eeyi akwiilya. (Matalikilo 3:1-6) Kwiinda mukucita boobo, tiibakamumvwida Leza pe, alimwi bakatondezya kuti bakali kuyanda kulyeendelezya lwabo beni.

 Kaambo Kajatikizya Bweendelezi Kakabusyigwa

Ibuzangi oobu bwakacitika mu Edeni bwakabusya kaambo kabweendelezi, kalo ikapati mububumbo boonse. Ibantunsi basikuzanga aabo bakabudooneka bweendelezi bwa Jehova akuti naa bwakali kucitwa munzila iiluleme kuzilenge zyakwe. Sena Mulengi wakaleelede kulemekwa cakumaninina abantu? Sena bantu bakali kuyooba abukkale bubotu kapati ikwiinda mukulyeendelezya lwabo beni?

Kaambo aaka kakulwana bweendelezi bwakwe, Jehova wakakeendelezya munzila iitondezya mbwabelesya luyando lwakwe, bululami, busongo alimwi anguzu munzila yeelede. Naakali kuyanda, naakabelesya nguzu zyakwe kubanyonyoona bazangi mpoonya-mpoonya. Kucita boobu nokwakalibonya kuti mbululami, mbwaanga wakalijisi nguzu zyakubanyonyoona. Pele kucita boobo, nokwatakayiingula mibuzyo yakabusyigwa pe. Kulubazu lumwi, Leza naakali kuyanda naakacilanga buyo cibi kakunyina kutola ntaamu iili yoonse. Kubantu bamwi mazubaano, ikucita boobo kulakonzya kulibonya kuti nenzila mbotu alimwi yaluyando. Nokuba boobo, ayalo ntaamu eeyi noyatakawiingula mubuzyo ngwaakabusya Saatani wakuti bantu balakonzya kupona kabotu kwiinda mukulyeendelezya lwabo beni. Kuyungizya waawo, sena ntaamu eeyi noyatakabakulwaizya bamwi alimwi kuti bazangile nzila zya Jehova? Icakali kuyootobela, mmapenzi aatamani.

Kwiinda mubusongo bwakwe, Jehova wabazumizya bantu kuti balyeendelezye kwaciindi cili mbocibede. Nokuba kuti eeci caamba kulekela bubi kuzumanana kwaciindi cili mbocibede, bantu bapegwa coolwe cakutondezya ikuti naa balakonzya kuzwidilila kulyeendelezya lwabo beni kakunyina kweendelezyegwaa Leza, kabatobela buyo zyeelelo zyabo kujatikizya zintu ziluleme alimwi azitaluleme. Ino ncinzi cacitika akaambo kakucita boobo? Mubukkale boonse bwabantu kwali nkondo, kutalulama, kudyaaminina alimwi akupenga. Ikwaalilwa kwabuzangi bwakacitwa kuli Jehova mu Edeni kuyooyingula twaambo twakabusyigwa cakumaninina mane kukabe kutamani.

Kwaciindi cino, Leza watondezya luyando lwakwe kwiinda mukwaabila Mwanaakwe, Jesu Kristo, iwakaaba buumi bwakwe bwabuntunsi kuba  cituuzyo cacinunuzyo. Eeci capa kuti cikonzyeke kubantu bamumvwida kuti baangululwe kukusinganizyigwa kucibi alufwu kwakaboola akaambo kakutamvwa kwa Adamu. Cinunuzyo capa kuti buumi butamani bukonzyeke kulibaabo boonse ibatondezya lusyomo muli Jesu.—Johane 3:16.

Tulijisi cisyomezyo cikkazyika moyo kuzwa kuli Jehova icitondezya kuti mapenzi ngobajisi bantu ngakaindi buyo kasyoonto. Sintembauzyo wakalemba kuti: “Kaba kaindi kaniini sizibi takooyooba wo; unooyeeya nkwaakabede, pele takooyooba nkuko. Pele babombemyoyo bayoovuba nyika, bayookondwa muluumuno lunji.”—Intembauzyo 37:10, 11.

Buumi Bwakumbele bwa Lukwabililo Alimwi Alukkomano

Ikuzuzikizyigwa kwabusinsimi buli mu Bbaibbele kutondezya kuti iciindi cakuti Leza amanizye malwazi, kuusa alimwi alufwu cili afwaafwi kapati. Amubone zintu zimwi buyo izibotu zicili kumbele nzyaakatondezyegwa mwaapostolo Johane mucilengaano. Wakalemba kuti: “Ndakabona ijulu ipya anyika impya, nkaambo ijulu lyakusaanguna anyika yakusaanguna zyoonse zyakamaninina, alwalo lwizi talukooyoobako limbi. . . . , alakwe Leza mwini uzookala [abantu], azoobe Leza wabo. Nkabela uyoosindula misozi yoonse kumeso aabo, takukooyooba limbi lufu, nikuba kuomoka nikuba kulila nikuba kuciswa, nkaambo zintu zyakale zyamaninina.” Mukaambo katondezya mbozili zyamasimpe zisyomezyo eezyi, Johane wakaambilwa kuti: ‘Lemba kuti majwi aaya alasyomeka alimwi alisinizizye.’—Ciyubunuzyo 21:1-5.

Ino mbuti kujatikizya zyuulu-zyuulu zyatuulunzuma twabantu banyina mulandu ibakafwa kuzwa ciindi nobwakacitika buzangi mu Edeni? Jehova wakasyomezya kuti uya kubabusya bantu ibafwide. Imwaapostolo Paulo wakaamba kuti: ‘Ndijisi lusyomo kuli Leza lwakuti kuyooba kubuka kwabafwu, ibaluleme alimwi abataluleme.’ (Incito 24:15) Aaba bantu banoojisi bulangizi bwakupona munyika oomo “muyooba bululami.”—2 Pita 3:13, Ci.

Mbubwenya mbuli wisi siluyando mbwakonzya kuzumizya mwaanakwe kuti apenge kwiinda mukwaandulwa ikuti kazyi kuti kuli bubotu buyoojanwa mukucita boobo, Jehova wazumizya bantu kupenga kwaciindi cisyoonto anyika. Nokuba boobo, kuli zilongezyo zitamani kumbele kulibaabo bacita kuyanda kwa Leza. Paulo wakapandulula kuti: “Zilenge zyakasampauzigwa, enko kubukanze bwazyo zini pele kubukanze bwayooyo iwakazisampauzya, ikuti kali abulangizi bwakuti azyalo zilenge zini zikalubulwe kubuzike bwabubozi, [zibe] abulubulo bulemu bwabana ba-Leza.”—Ba-Roma 8:20, 21.

Aaya mmakani aamasimpe—ikutali yaayo ngotuswiilila azipekupeku naa ngotubala mumiteende, pele aaya mmakani mabotu. Mmakani aayinda kubota kuzwa kuli “Leza siluumbulizyo loonse,” uutulanganya ncobeni.—2 Ba-Korinto 1:3.

[Zifwanikiso izili apeeji 6]

Iciindi icapedwe kubantu catondezya kuti bantu tabakonzyi kuzwidilila kulyeendelezya kakunyina kweendelezyegwaa Leza

[Kulumba]

Mukwasyi wakucisi ca Somalia: UN PHOTO 159849/M. GRANT; bbomba lyanyukkiliya: USAF photo; nkambi yakupenzezya: U.S. National Archives photo