“Mukumweka Kwako Motubona Mumuni”

MUMUNI ncintu cimwi ncotuubya-ubya, tuuyeeya buyo leliya notwaubona kuti wabula alimwi akuti simukoboma wacaala mumudima. Cilakkomanisya kwaamba kuti, “ikuzwa mumuni wesu” nkuuzuba—lilasyomeka. Akaambo kamumuni uuzwa kuzuba, tulakonzya kubona, kulya, kuyoya alimwi akupona.

Mbwaanga mumuni ulayandika kubuumi bwesu, eeci taceelede kutulamya pe notubala bbuku lya Matalikilo ikuti mumuni wakalibonya mubuzuba bwakusaanguna bwakulenga. “Leza wakaamba kuti, Akube mumuni. Mpoonya awo mumuni wakaba.” (Matalikilo 1:3) Ibaalumi ibakali kupa bulemu bali mbuli Mwami Davida lyoonse bakalizyi kuti buumi alimwi amumuni zyakazwa kuli Jehova. Davida wakalemba kuti: “Mulinduwe mokabede kasensa kabuumi. Mukumweka kwako motubona mumuni.”—Intembauzyo 36: 9.

Imajwi aa Davida alabeleka mumbazu zyobilo, munzila yacigaminina alimwi amucikozyanyo. Ibbuku litegwa The Encyclopædia Britannica lyaamba kuti: “Mumuni, nguupa kuti katubona.” Eelyo lilayungizya kuti: “Imeso ngayiinda kufwambaana kutola twaambo kubongo bwamuntu kwiinda zizyo zyoonse.” Mbwaanga zintu zinji nzyotwiiya tulazyiiya akaambo kacipego cakubona, calo ciyanda mumuni ikutegwa cibeleke kabotu, imumuni awalo ulabelesyegwa mu Magwalo munzila yamucikozyanyo.

Aboobo, Jesu wakabaambila basikwiiya bakwe kuti: “Ndime mumuni w[a]nyika, uundicilila takooyooenda mumudima, pele uyooba amumuni wabuumi.” (Johane 8: 12) Imumuni wacikozyanyo Jesu ngwaakaamba akali makani aajatikizya kasimpe nkaakakambauka kalo kakali kukonzya kumunikila mizeezo alimwi amyoyo yabaswiilizi bakwe. Niyakamana myaka iili mbwiibede kabali mumudima munzila yakumuuya, basikwiiya ba Jesu bakakonzya kumvwisya makanze aa Leza kujatikizya bantu alimwi bulangizi bwa Bwami. Masimpe ooyu wakali “mumuni wabuumi,” mbwaanga luzyibo oolo lwakali kukonzya kubasololela kubuumi butamani. Jesu wakaamba boobu mumupailo kuli Bawisi bakujulu naakati: “Mboobu buumi ubutamani, kuti bazibe nduwe, Leza mwini-mwini, ooli olike, ayooyo ngookatuma, nguwenya Jesu Kristo.” (Johane 17:3) Tutani kuubyi-ubyi mumuni wakumuuya!