Jehova Takooyoocedelelwa
Jehova Takooyoocedelelwa
“Na [cilengaano] camuka, kocilindila, nkaambo ncobeni cilaza, tacikooyoocedelelwa pe.”—HABAKUKU 2:3.
1. Mmakanze nzi aatondezyegwaa bantu ba Jehova, alimwi ino eci cabakulwaizya kucita nzi?
“NDAIMA acilangilo cangu.” Aya ngaakali makanze aamusinsimi wa Leza Habakuku. (Habakuku 2:1) Bantu ba Jehova bamumwaanda wamyaka wa 20 batondezya busungu mbubwena obo. Aboobo babutobela cabusungu ibwiite bwakumuswaangano iwakamunikila zintu zinji kapati wamu September 1922 bwakuti: “Obuno mbobuzuba bwiinda mazuba oonse. Amubone, Mwami ulalela! Ndinywe mbali mukubelesya. Aboobo amwaambilizye, amwaambilizye, amwaambilizye Mwami abwami bwakwe.”
2. Ncinzi ncobakali kukonzya kwaambilizya Banakristo bananike nobakaboozyegwa kuciimo cabusungu mumulimo kuzwa lya Nkondo Yanyika Yakusaanguna?
2 Kuzwa lya Nkondo Yanyika Yakusaanguna, Jehova wakaboozya bananike bacisyeede kuciimo cabusungu mumulimo. Mbubwenya mbuli Habakuku umwi aumwi akati kabo wakali kukonzya kwaambilizya kuti: “Ndaliimika angazi yangu, nkalindile, nkabone ncati ndaambile.” Imabala aa Cihebrayo aasandulwidwe kuti “nkalindile” alimwi akuti “ndaliimika” alabelesyegwa-belesyegwa mubusinsimi bunji.
“Tacikooyoocedelelwa pe”
3. Nkaambo nzi ncotweelede kulangila?
3 Bakamboni ba Jehova mbobaambilizizya mulumbe wa Leza wakucenjezya sunu, lyoonse beelede kucenjela kutobela majwi aakumamanino mubusinsimi bupati bwa Jesu aakuti: “Amulangile, nkaambo tamuzi ciindi ncayoosika mukamwini iŋanda, na uyoosika kumazuba, na mpa[a]kati kamasiku, na nobuumbuluka na cifumofumo. Amulangile, antela uyoomusinkilizya akamujane mucoona. Nkabela mbundamwaambila nywebo, mbubonya mbundaambila boonse. Ndati, Amulangile.” (Marko 13:35-37) Mbubwena mbuli Habakuku alimwi akweelana amajwi aa Jesu, tweelede kulangila!
4. Ino bukkale bwesu bweelene buti aboobo bwa Habakuku bwakuma 628 B.C.E.?
4 Kulangilwa kuti Habakuku wakalemba businsimi bwakwe kuma 628 B.C.E., bwami bwa Babuloni kabutanaba bwami bweendelezya nyika yoonse. Kwamyaka minji, lubeta lwa Jehova kujatikizya Jerusalemu iwakazanga lwakazumananwa kwaambilizigwa. Pele kwakanyina citondezyo cisinizya kujatikizya ciindi lubeta olo nolwakali kuzoocitwa. Nguni wakali kunga wasyoma kuti kwakasyeede buyo myaka iili 21 akuti Babuloni nguwakali kuzoobelesyegwaa Jehova kuunyonyoona? Mbubwena asunu, tatubuzi ‘buzuba aciindi’ bubikkilidwe mamanino aabweende buno, pele Jesu watucenjezya kakucili ciindi kuti: “Amulibambe, nkaambo kuciindi ncimutezi nciconya ncazoosika Mwana a-Muntu.”—Matayo 24:36, 44.
5. Ncinzi ikapati cikulwaizya kujatikizya majwi aa Leza aalembedwe kuli Habakuku 2:2, 3?
5 Elyo kajisi kaambo kabotu, Jehova wakapa Habakuku mulimo oyu uukulwaizya naakati: “Lemba eci cilengano, cimvwike kabotu acilembelo, kuti umwi aumwi acibale cakucijaana. Nkaambo cilengano cilijisi ciindi caco cibikidwe. Cileza bukunkulika, nkabela kumamanino tacikooyoobeja pe. Na camuka, kocilindila, nkaambo ncobeni cilaza, tacikooyoocedelelwa pe.” (Habakuku 2:2, 3) Mazubaano bubi alimwi akulwana zili mukwiindila nyika yoonse mbwiizulwa, icitondezya kuti tuli kwini kumatalikilo aa “buzuba bwa-Jehova obo bupati buyoosya.” (Joeli 2:31) Alakulwaizya kaka majwi aacisyomezyo ngaamba Jehova mwini aakuti: “Tacikooyoocedelelwa pe”!
6. Ino mbuti mbotunga twafwutuka buzuba obo bwalunyonyooko?
6 Aboobo, mbuti mbotunga twafwutuka buzuba obo bwalunyonyooko? Jehova wavwiila kwiinda mukutondezya kwiimpana kuliko akati kabaluleme abataluleme ulaamba: “Moyo wakwe wazimba, t[uu]luleme mukati kakwe. Pele mululami, lusyomo lwakwe ndoluyoomuponya.” (Habakuku 2:4) Ibeendelezi abantu buyo ibalisumpula alimwi ibalyatu balaampuwo yakutila bulowa bwatuulunzuma twabantu banyina mulandu, ikapati munkondo zyanyika yoonse zyobile alimwi amucijayejaye akati kazisi amisyobo. Pele balo ibabelesi ba Leza bananike ibayanda luumuno bakakatila mulusyomo. Aaba ngo “musyobo uululeme uusyomeka.” Musyobo ooyu antoomwe abeenzinyina iba “mbelele zimwi,” batobela malailile aakuti: “Amusyome Jehova lyoonse, nkaambo mu-Mwami Jehova momujenwe indomba iitamani.”—Isaya 26:2-4; Johane 10:16.
7. Ncinzi ncotweelede kucita kweelanaa Paulo mbwaakalibelesya bbuku lya Habakuku 2:4?
7 Kalembela Banakristo ba Hebrayo, imwaapostolo Paulo wakazubulula zili kuli Habakuku 2:4 mukwaambila bantu ba Jehova kuti: “Muleelede kubosya myoyo, kuti mucite luyando lwa-Leza, nomuti kajane ceeco icakasyomezegwa. Nka[a]mbo kucili kaindi kaniini buyo, elyo oyo sikuboola ulasika, takoomuka pe. Pele muntu wangu uuluzi unooyoopona akusyoma, kuti akapilukile cifuteesule, muuya wangu tuukooyookondwa kulinguwe pe.” (Ba-Hebrayo 10:36-38) Ecino tacili ciindi cakulengaana pe naa cakulinjizya mukooze munzila zyakuyandisisya buvwubi naa zyakulikondelezya zibyaabi izyanyika ya Saatani. Ino ncinzi ncotweelede kucita kusikila leelyo “kaindi kaniini buyo” nokayoomana? Swebo tobamusyobo wa Jehova uusalala, mbubwena mbuli Paulo tweelede ‘kudunamina zintu zili kumbele, katuyaabubindaanina kumagolelo kuti tukajane bulumbu’ bwabuumi butamani. (Ba-Filipi 3:13, 14) Alimwi mbubwena mbuli Jesu, tweelede ‘kukakatila nkaambo kalukondo ndotubikkilidwe kumbele.’—Ba-Hebrayo 12:2.
8. Ino “muntu” waambwa kuli Habakuku 2:5 nguni, alimwi nkaambo nzi ncatakazwidilili?
8 Mukwiimpanaa babelesi ba Jehova, ibbuku lya Habakuku 2:5 lipandulula muntu “[u]ulisumpula” uukakilwa kuzuzikizya mbaakani yakwe nokuba kuti “ulakomezya moyo wakwe mbuli cuumbwe.” Nguni muntu ooyu ‘uutakkutili’? Cabulyatu mbuli bwa Babuloni wakuciindi ca Habakuku, ooyu “muntu” uutali omwe ujatikizya mfwulumende zyanyika—kunyina makani naa nzeezyo zisumpula musyobo, zyaci Nazi, zikulwaizya kucinca, noziba zeezyo zyaambwa kuti zyeendelezyegwaa bantu boonse—ulwana nkondo kutegwa akomezye zilawo zyakwe. Alimwi ulazuzya Cuumbwe abantu banyina mulandu. Pele oyu “muntu” silucengo wanyika ya Saatani, uulisumpula, takazwidilili pe ‘mukubunganisizya masi oonse akuyobolola misyobo yoonse.’ Jehova Leza alikke nguukonzya kukamantanya bantu boonse, alimwi uyoocicita eci kwiinda mu Bwami bwabu Mesiya.—Matayo 6:9, 10.
Ipenzi Taanzi Akati Kamapenzi Osanwe Aayoosya
9, 10. (a) Ncinzi Jehova ncazumanana kwaambilizya kwiinda muli Habakuku? (b) Kujatikizya mbono zitaluleme, ino zintu zili buti sunu?
9 Jehova kwiinda mumusinsimi wakwe Habakuku, wazumanana kwaambilizya mapenzi osanwe aatobelene aakali kuzoocitika mukubamba nyika kuti ibe cikkalilo cibotu cabantu ba Leza basyomeka. Aaba bantu babombe myoyo ‘baamba majwi aacikozyanyo’ Jehova ngaambilizya. Kuli Habakuku 2:6 tubala kuti: “Maawe kuliyooyo uuvuzya imbono zitali zyakwe! Cilamana lili? Maawe kuliyooyo uulilemezya zikonkezyo!”
10 Aawa cikankaizigwa nimbono zitaluleme. Munyika motukkede, ibavwubi balazumanana kuyaambele mubuvwubi alimwi ibacete baindila buya kucetaala. Basimakwebo aamisamu iikola alimwi abasilucengo balimukujana mbono zitalivwulili, pele bantu buyo balo balimukufwa nzala. Ibantu ibali 1,500,000,000 mumweelwe wabantu boonse munyika baambidwe kuti mbacete. Bukkale bulasesemya mumasi manji. Aabo ibalangila bululami anyika balalilauka kabati: “Cilamana lili” ciindi camapenzi eci, calampa kaka ciindi kaacitika! Pele, mamanino aaciindi alaafwaafwi! Masimpe icilengaano “tacikooyoocedelelwa pe.”
11. Ncinzi Habakuku ncaamba kujatikizya kutila bulowa bwabantu, alimwi ino nkaambo nzi ncotunga twaamba kuti ikutila bulowa ikucitika anyika sunu kwavwula kapati?
11 Musinsimi waambila mubi ooyu kuti: “Mbuli mbosaalide zisi zinji, bantu boonse basyeede bayookusaala ayebo, nkaambo kabulowa bwabantu alunyonyooko lucitilwa nyika, lucitilwa munzi aboonse bali mulinguwo.” (Habakuku 2:8) Wakomena mulandu wakutila bulowa uuli munyika mazubaano! Jesu cakusalazya wakati: “Boonse babweza ipanga bazoovwinyaunwa kupanga.” (Matayo 26:52) Kakuli mumwaanda wamyaka wa 20 ulikke, izisi alimwi anzubo izyakalaamulandu wakutila bulowa zyakatola lubazu mucijayejaye cabantu ibainda kutuulunzuma tuli mwaanda. Maawe kuli baabo ibatola lubazu mukujaya bantu calunya kuli boobu!
Ipenzi Lyabili
12. Ino ndipenzi nzi lyabili ndyaakalemba Habakuku, alimwi ino mbuti mbotukonzya kusinizya kuti buvwubi butaluzi tabukatugwasyi pe?
12 Ipenzi lyabili, lilembedwe kuli Habakuku 2:9-11 lijatikizya “yooyo uunyanzizya ciinga cakwe impindu iitaluleme, kuti asumpule citeente cakwe, avunwe kumaanza aabubi.” Kuvwuba munzila iitaluleme kwiina ncokuyooleta mbubwena sintembauzyo mbwacisalazya eci naamba kuti: “Utayoowi na muntu uli ambono zinji, na bulemu bwaŋanda yakwe buya bukomena, nkaambo naazoofwa takoozootola cintu; bulemu bwakwe tabukooyoomutobela.” (Intembauzyo 49:16, 17) Aboobo alayandika kubikkila maanu kapati malailile aamwaapostolo Paulo aagwasya aakuti: “Kolailila boonse abo bavubide ecino ciindi, kuti batalinuniki nokuba kusyoma buvubi butasyomeki, pele kusyoma Leza uutufonkweda zintu zyoonse kuti katunga katuligwasya nzizyo.”—1 Timoteo 6:17.
13. Nkaambo nzi ncotweelede kuzumanana kwaambilizya mulumbe wa Leza wakucenjezya?
13 Cilayandika kapati kaka kuti mulumbe wambeta zya Leza waambilizigwe mazubaano! Iba Farisi nobakakasya makamu aabantu kulumbaizya Jesu kuti Mwami “uuboola muzina lya-Jehova,” wakabavwiila kuti: “Ncobeni ndamwaambila kuti na balaumuna aba, mabwe aloompolola.” (Luka 19:38, 40) Mbubwena asunu, ikuti naa bantu ba Leza bakakilwa kubwaambilizya caantangalala ibubi buli munyika, “ibbwe lyamubwaanda liyookwiila.” (Habakuku 2:11) Aboobo atuzumanane cabusicamba ikwaambilizya mulumbe wa Leza wakucenjezya!
Ipenzi Lyatatu Amakani Aamulandu Wakutila Bulowa
14. Ino zikombelo zyanyika zyajatikizigwa mukutila bulowa kuli buti?
14 Ipenzi lyatatu, ilyakaambilizigwaa Habakuku lijatikizya makani aamulandu wakutila bulowa. Habakuku 2:12 waamba kuti: “Maawe kuliyooyo uuyaka munzi abulowa, uubusya idolopo abubi.” Mubweende bwazintu buno, ikutalulama akutila bulowa kanjikanji zyeendelaamwi. Kacilibonya antangalala, izikombelo zyamunyika zyajatikizigwa mucijayejaye cibyaabi cicitidwe. Mucikozyanyo, Inkondo zyama Kruseda, izyakali kulwanwa akati ka Banakristo aba Mozilemu; Ikubeteka Calunya kwakacitwaa ba Katolika mu Spain aku Latin America; Inkondo yaku Europe yakalwanwa kwamyaka ili Makumi Otatwe akati kaba Protesintanti aba Katolika; alimwi ankondo zyanyika zyobile zyalo zyakaindila buya kutila bulowa mumwaanda wamyaka wesu, pele zyoonse zyobile zyakatalikila mu Kristendomu.
15. (a) Ino zisi zyazumanana kucita nzi kwiinda mukugwasilizigwa naa kuzumizigwaa zikombelo? (b) Sena imbunga iilanga zyaluumuno munyika iitegwa United Nations inga yakonzya kumanizya zilwanyo zyamunyika iino?
15 Akati kazintu zibyaabi cini-cini zyakacitika lyankondo yanyika yabili cakali Cijayejaye caba Nazi cakajatikizya tuulunzuma twaba Juda abantu bamwi banyina mulandu ku Europe. Kwainda buyo ciindi cisyoonto kuzwa leelyo ibweendelezi bwaba Katolika mucisi ca France nobwakazumina kuti bwakakakilwa kulesya kutolwa kwazyuulu zyabantu kumasena aaba Nazi nkobakali kujailwa. Pele masi acizumanana kulibambila kutila bulowa, kaagwasilizigwa naa kuzumizigwaa zikombelo. Kayaamba Cikombelo ca Russian Orthodox, imagazini ya Time iimwaigwa mumasi ayiindene-indene onoono yakaluula kuti: “Icikombelo acalo cilimukuyunga kapati kucita zintu nzyocitayeeyelwi: ikugwasilizya mbunga zyankondo zyaku Russia. . . . Kupailila ndeke zyankondo alimwi azilawo zikkala basikalumamba caba cintu cicitwa lyoonse. Mu November ku Danilovsky Monastery ku Moscow, kumutabi mupati wabeendelezi waku Russia cikombelo cakaleleka zilwanyo zyankondo zyaku Russia zibyaabi kapati.” Sena inkamu iilanga zyaluumuno munyika iitegwa United Nations inga yakonzya kulesya zisi kuzumanana kuzuzya nyika ino azibelesyo zyankondo zibyaabi cini-cini? Peepe! Mupepa lyamuteende ilitegwa The Guardian lyaku London kucisi ca England, muntu umwi iwakapegwa bulumbu bwa Nobel bwa Luumuno wakati: “Icintu cigambya ncakuti izisi zyosanwe zisyomwa munkamu iilanga lukwabililo munyika iitegwa UN Security Council nzezisi zyosanwe zidumide buya munyika kukupanga akuuzya zilwanyo zyankondo.”
16. Ncinzi Jehova ncayoocita kujatikizya masi aakulwaizya nkondo?
16 Sena Jehova uyooalobya masi aakulwaizya nkondo? Habakuku 2:13 waamba kuti: “Ncobeni teensi kuli-Jehova wamakamu nkwaazwida aya makani aakuti bantu balikataazye mumulilo akuti zisi zilipenzezye zintu zyabuyo.” “Jehova wamakamu”! Inzya, Jehova ulaamakamu-makamu aabaangelo kujulu aabo mbayoobelesya kunyonyoona bantu azisi ziyandisisya nkondo!
17. Ino masi aabantu basinkondo aakuloba luzibo lwa Jehova luyoosika ali munyika?
17 Ncinzi ciyootobela Jehova aakumana kulobya masi abantu basinkondo? Habakuku 2:14 ilapa bwiinguzi noiti: “Nkaambo nyika iyoozula luzibo lwabulemu bwa-Jehova, mbubonya mbuli maanzi mbwaazuzya lwizi.” Tabuliboteli kaka bulangizi obo! Kuciindi ca Harmagedoni, bweendelezi bwa Jehova buyoosumpulwa kukabe kutamani. (Ciyubunuzyo 16:16) Ulatusyomezya kuti ‘aakkede maulu aakwe uyooalemeka,’ nkokuti inyika ino mpotukkede. (Isaya 60:13) Ibantu boonse bayooyiisigwa kupona munzila njayanda Leza, cakuti iluzibo lwabo lwamakanze aa Jehova mapati luyooba mbuli maanzi manji aazuzya lwizi.
Ipenzi Lyane Alyasanu
18. Ino ipenzi lyane ilyaambwaa Habakuku lijatikizya nzi, alimwi ino lilibonya buti mukulilemeka kwanyika sunu?
18 Ipenzi lyane lilapandululwa kuli Habakuku 2:15 amajwi aya aakuti: “Maawe kuliyooyo uunywisya mweenzinyina mucinywido cabukali bwakwe akumukozya, kuti aebele cintanda cakwe.” Eci citondezya bukkale bwakutalyeendelezya, ciimo cabuzangi canyika mazubaano. Ibwaamu bwayo, ibusumpulwa mane ambunga zyazikombelo zizumizya kucita kufwumbwa ncayanda muntu kwaindila cakuzwa amunzila. Izipenzyo mbuli bulwazi bwasikalileke (AIDS) amalwazi amwi aajanwa kwiinda mukoonana, alimukuyandilila cakufwambaana nyika yoonse mbwiizulwa. Muciindi cakubaa “bulemu bwa-Jehova,” izyalani lino lyabantu bayanda kuba bataanzi lyoonse, liciyabwiindila buya mubusofwaazi kaliyabuswena kuciindi cakunyonyoonwaa Leza. Akaambo kakuti nyika ino iinyina kulyeendelezya ‘yakkuta bweeme, kutali bulemu pe,’ ilaafwaafwi kunywa bukali bwa Jehova mucinywido, calo ciiminina ncayakwiicitila. ‘Ibulemu bwayo buyoovwumbwa abweeme.’—Habakuku 2:16.
19. Ino kwaambilizya kwamatalikilo aapenzi lyasanu ikwakacitwaa Habakuku kujatikizya nzi, alimwi nkaambo nzi majwi aayo ncaali mapati munyika yamazubaano?
19 Kumatalikilo aapenzi lyamusanu kuli majwi aakucenjezya bantu kuti batakombi zikozyanyo zibezedwe. Jehova wakacitya musinsimi kwaambilizya majwi aabukali aaya aakuti: “Maawe kuliyooyo uuambila cisamu kuti, Nyamuka, akwaambila ibbwe litaambi kuti, Buka. Sa eci cilaiisya? Cilivumbidwe ingolida ansiliva; taakwe kuyooya abuniini mukati kaco.” (Habakuku 2:19) Kuzoosikila sunu, Kristendomu antoomwe abanamunji batasyomi balazilemeka iziingano, Mariya, mituni azimwi zipangidwe mucinkozya camuntu acabanyama. Akati kazeezi kwiina cinga cabuka akuvwuna bakombi baco ciindi Jehova nayooleta lunyonyooko. Kweebeka kwangolida ansiliva zisyingulwidwe atala lyazyo kuyooba kwabuyo kuti bwayezyanisigwaa bulemu bwa Leza uupona lyoonse Jehova, alimwi abulemu bwazilenge zyakwe zipona. Atulitembaule kukabe kutamani izina lyakwe litakonzyi kweezyanisigwaa zina limbi kubulemu!
20. Muububambe nzi bwantempele motujisi coolwe cakubeleka mulimo calukkomano?
20 Inzya Leza wesu Jehova, uleelela kutembaulwa koonse nkotunga twamutembaula. Katujisi bulemu bupati kulinguwe, atumvwe notucenjezegwa amajwi aayo aakuti tutakombi mituni. Pele amuswiilile! Jehova ucikanana ategwa: “Pele Jehova mwaali muntempele yakwe iisalala. Umuna kubusyu bwakwe, O nyika yoonse.” (Habakuku 2:20) Cakutadooneka musinsimi aawa wakali kwaamba tempele lyakali ku Jerusalemu. Pele swebo notupona mazubaano, tulaacoolwe cakukomba munzila iisumpukide kapati mububambe bwantempele yakumuuya, mwalo Mwami wesu Jesu Kristo mwabikkidwe kuba Mupaizi Mupati. Aano anyika mubbuwa lyantempele, tulaswaangana, tulabeleka milimo alimwi tulapaila, eelyo mukucita boobo tupa Jehova bulemu bweelede izina lyakwe idemu. Alimwi talulivwulili lukkomano ndotujisi notukomba camoyo woonse kuli Taateesu wakujulu siluyando!
Sena Mulayeeya?
• Ino majwi aa Jehova aakuti: “Tacikooyoocedelelwa,” mwaabona buti?
• Ino mapenzi aakaambilizigwa kwiinda muli Habakuku aiminina nzi mazubaano?
• Nkaambo nzi ncotweelede kuzumanana kwaambilizya makani aa Jehova aakucenjezya?
• Muubbuwa lyantempele lili motujisi coolwe cakubelekela?
[Mibuzyo yaciiyo]
[Zifwanikiso izili apeeji 21]
Mbubwenya mbuli Habakuku, babelesi ba Jehova bamazubaano balizyi kuti Jehova takooyoocedelelwa pe
[Zifwanikiso izili apeeji 24]
Sena mulacikkomanina coolwe cakukomba Jehova mubbuwa lyantempele yakwe yakumuuya?
Nkotwakajana cifwanikiso icili apeeji 22]
Cifwoto cakapegwaa basole baku U.S.