ZIPAPA zyankumba-nkumba zipa kuti nkumba-nkumba kazikwabilidwe mubukkale bukatazya nozili mulwizi. Akaambo kakuti zilakwabilila munzila eeyi, eeci cakapa kuti basyaazibwene bayandisye kwiiya mbozipangidwe zipapa zyankumba-nkumba kabajisi makanze aakuyanda kupanga myootokala iikonzya kukwabilila bantu alimwi akuyaka maanda aakonzya kukwabilila bantu bakkala mumo.

Amulange-lange cicitika: Basyaazibwene bakalanga-langa misyobo yobilo yazipapa—musyobo uutegwa bivalve (zipapa eezyi zivwubete buya) alimwi autegwa spiral (zipapa zilibonya mbuli sipuliŋi uusuumene).

Kujatikizya musyobo wacipapa uutegwa bivalve, kwakajanwa kuti cipapa eeci cilaatubundu-bundu twalo itupa kuti kaikwabililwa kuntenda. Mukwiimpana amusyobo wacipapa uutegwa bivalve, musyobo wacipapa uutegwa spiral upangidwe mbuli sipuliŋi uusuumene calo icipa kuti kaikwabililwa nokwacitika ntenda. Mbozipangidwe zipapa eezyi kupa kuti nokwacitika ntenda, nkumba-nkumba kaikwabilidwe kuntenda.

Abalo basikuvwuntauzya bakeezyanisya kuyuma kwazipapa zyankumba nkumba akuyuma kwazintu nzyobakapanga izikozyenye azipapa zyankumba-nkumba kubelesya 3-D pulinta. Mubuvwuntauzi oobu kwakajanika kuti zipapa zyankumba-nkumba nziyumu kapati kwiinda zintu eezyo nzyobakapanga izikozyenye azipapa zyankumba-nkumba.

Kujatikizya buvwuntauzi oobu, magazini iitegwa Scientific American yaamba kuti: “Ikuti mwaakuba acoolwe cakweenzya mootokala uupangidwe mbuli cipapa cankumba-nkumba, nkokuti munooyenzya mootokala weebeka alimwi uukwabilila.”

Ino muyeeya buti: Sena zipapa zyankumba-nkumba zyakabako kwiinda mukusanduka naa zyakalengwa buya?