BASYAAZIBWENE mumakani aamboibeleka mincini balagambwa kubona kanyenyene mbokacikonzya kunyamuna cintu icilema kapati kwiinda mbokalema kalo. Kutegwa bamvwisye mbokacikonzya kucita boobo, basyaazibwene ku Ohio State University, U.S.A., bakabelesya pulogilamu yaakkompyuta iicikonzya kupanga zikozyanyo zyambokapangidwe kanyenyene, mbokapona alimwi ambokabeleka. Zikozyanyo zyakapangwa kwiinda mukubelesya ma X-ray alimwi azikozyanyo zyanguzu nzyokabelesya kanyenyene ciindi nokanyamuna cintu cilema.

Cibeela iciyandika kapati cakanyenyene ninsingo njokajisi, yalo iinyamuna zintu zyoonse nzyokaluma kumulomo. Ma soft tissues aajanika munsingo yakanyenyene alajatana acibeela ciyumu cakanyenyene icibambene ansingo alimwi amutwe munzila iiboneka mbuli minwe yamumaanza mboinjilana ikuti abikkwa antoomwe. Umwi wabasikuvwuntauzya wakaamba kuti: “Mbwaabambidwe ma tissue alimwi acibeela ciyumu cakanyenyene cili munsi-munsi aansingo alimwi amutwe zilayandika kapati kutegwa nsingo icikonzye kubeleka kabotu. Mboziswaangene munzila iilibedelede, ma soft tissues acibeela ciyumu cakanyenyene cili munsi aansingo, kuboneka kuti ncecintu cipati icipa kuti nsingo kaicikonzya kunyamuna zintu zilema.” Basikuvwuntauzya basyoma kuti kumvwisya mboibeleka nsingo yakanyenyene kulakonzya kupa kuti kube kuyaambele muzintu nzyobapanga bantu mbuli malobboti.

Ino muyeeya buti? Sena nsingo yakanyenyene antoomwe abumpiyompiyo bwanjiyo bwalo ibupa kuti kaijisi nguzu kapati yakaba akaambo kakusanduka kwazintu naa yakalengwa buya?