AMUSUNKE LUZYIBO LWANU

Amukkwenyune aalembedwe kuti kaliluzi naa takaluzi.

KALILUZI TAKALUZI

1. Bakamboni ba Jehova Mbanakristo.

2. Bakamboni ba Jehova basyoma kuti zintu zyakalengwa mumazuba aali 6 aajisi mawoola aali 24.

3. Bakamboni ba Jehova tabazumini busilisi bwakucibbadela.

4. Bakamboni ba Jehova balaazumina Magwalo oonse aali mu Bbaibbele.

5. Bakamboni ba Jehova babelesya buyo Bbaibbele ndyobakasandulula.

6. Bakamboni ba Jehova bakalicinca Bbaibbele lyabo kutegwa kalyeendelana anzyobasyoma.

7. Bakamboni ba Jehova balakaka kubeleka milimo iibelekwa kugwasya buleya.

8. Bakamboni ba Jehova balabanyansya bantu bamuzikombelo zimbi.

Kutegwa mujane bwiinguzi, amubone mapeeji aatobela.

1.  1 KALILUZI. Tulasolekesya kutobela nzyaakayiisya Jesu Kristo alimwi ambwaakali kucita zintu. (1 Petro 2:21) Nokuba boobo, tuliindene munzila zinji atubunga twabukombi twiitwa kuti ntwa Bunakristo. Mucikozyanyo, swebo tusyoma kuti Jesu Mwana wa Leza kweelana amboliyiisya Bbaibbele; tali cibeela ca Butatu pe. (Marko 12:29) Tatusyomi kuti muntu ulazumanana kupona afwa alimwi tatusyomi kuti Magwalo aamba kuti Leza ulabasubula bantu mumulilo uutamani wahelo. Kuyungizya waawo, tatusyomi kuti aabo beendelezya mumilimo yabukombi beelede kupegwa mazina aalibedelede aabasumpula kwiinda bamwi.—Mukambausi 9:5; Ezekieli 18:4; Matayo 23:8-10.

2. 2 TAKALUZI. Tulasyoma kuti Leza ngowakalenga zintu zyoonse. Pele tatuzumini nzyobaamba bantu banji ibasyoma kuti zintu zyakalengwa mumazuba aali 6 aajisi mawoola aali 24. Ino nkaambo nzi? Akaambo kakuti mizeezo minji yabantu basyoma boobu tayeendelani ancolyaamba Bbaibbele. Mucikozyanyo, bamwi baamba kuti mazuba aali 6 ngaakalenga zintu Leza akali mazuba aajisi mawoola aali 24. Pele ibbala lyakuti “buzuba” kweelana ambolibelesyegwa mu Bbaibbele lilakonzya kwaamba ciindi cili mbocibede. (Matalikilo 2:4; Intembauzyo 90:4) Kunze lyaboobo, bamwi bayiisya kuti nyika yaliko kwamyaanda yamyaka misyoonto buyo. Pele Bbaibbele litondezya kuti nyika abubumbo zyakaliko kaindi mazuba aali 6 aakulenga kaatanatalika. ¹—Matalikilo 1:1

3. 3 TAKALUZI. Tulabuzumina busilisi bwakucibbadela. Mane buya, tobamwi tuli basilisi mbuli mbwaakabede Munakristo wamumwaanda wamyaka wakusaanguna iwakali kwiitwa kuti Luka. (Bakolose 4:14) Nokuba boobo, tulabukaka busilisi buli boonse ibukazyanya anjiisyo zyamu Bbaibbele. Mucikozyanyo, tatuzumini kubikkwa bulowa akaambo kakuti Bbaibbele lilakasya kucita boobo.—Milimo 15:20, 28, 29.

   Nokuba boobo, tulayandaula busilisi bwiinda kubota notwaciswa naa banamukwasyi. Bwini mbwakuti, misamu iigwasya kutasweekelwa bulowa bunji iyakapangilwa kugwasya Bakamboni lino ilabagwasya boonse banamaleya. Muzisi zinji, mulwazi ulakonzya kusala busilisi butakonzyi kumuletela mapenzi aaboola akaambo kakubikkwa bulowa, mapenzi mbuli malwazi aaboola akaambo kakubikkwa bulowa bujisi tuzunda, malwazi aanyonganya bukwabilizi bwamubili, alimwi akulubizya kwabasilisi.

4. 4 KALILUZI. Tulasyoma kuti Magwalo oonse aali mu Bbaibbele “akasololelwa a Leza alimwi alagwasya.” (2 Timoteyo 3:16) Magwalo aaya abikkilizya Cizuminano Cakaindi alimwi a Cizuminano Cipya, kweelana ambozivwula kwaambwa. Kanji-kanji zibeela zya Bbaibbele eezyi tuzyaamba kuti Magwalo aa Chihebrayo alimwi a Magwalo aa Banakristo aa Chigiriki. Kwiinda mukwaamba boobu, tweeleba muzeezo uutaluzi wakuti zibeela zimwi zyamu Bbaibbele zyakaleka kubeleka.

5.  5 TAKALUZI. Tulabelesya ma Bbaibbele aaindene-indene notwiiya Bbaibbele. Nokuba boobo, mumyaambo mobajisi Bbaibbele lya Busanduluzi Bwanyika Mpya, tuvwula kulibelesya akaambo kakuti lilijisi zina lya Leza, lililuzi, alimwi talikatazyi kumvwa. Amubone kujatikizya kulembwa kwazina lya Leza lyakuti Jehova. Mumajwi aantalisyo aa Bbaibbele limwi, kuli mazina aabantu bali 79 ibakatola lubazu mukulemba Bbaibbele eelyo. Nokuba boobo, mu Bbaibbele ndimunya eelyo tiibakalilemba zina lya Jehova Leza, walo uuli ngo Sikulyaanza! Pele mwalo mu Bbaibbele lya Busanduluzi Bwanyika Mpya, zina lya Leza lyakabikkwa mumasena moonse molyakali kujanika mumalembe aakusaanguna. ²

6. 6 TAKALUZI. Ciindi notwajana kuti nzyotwakali kusyoma tazyeendelani ancolyaamba Bbaibbele, tulacinca. Kaindi katutanatalika kumwaya Bbaibbele lya Busanduluzi Bwanyika Mpya mu 1950, twakali kubelesya ma Bbaibbele aakaliko aciindi eeco alimwi twakali kusyoma kweelana anzyotwakali kubala muma Bbaibbele aayo.

7. 7 TAKALUZI. Mulimo wesu ulabagwasya bantu banji. Twagwasya bantu banji kuleka micito yabo iiletela ntenda, mbuli kubelesya misamu iikola alimwi akuciindizya kunywa bukoko. Zikolo zyesu zyakuyiisya kubala akulemba zyabagwasya bantu banji munyika yoonse kwiiya kubala akulemba. Alimwi ciindi nokwacitika ntenda, tulagwasyilizya kupa ziyandika kuli Bakamboni abatali Bakamboni. Tulasola kubaumbulizya alimwi akubagwasya kumuuya bantu ibacitikilwa ntenda. ³

8. 8 TAKALUZI. Tulalutobela lulayo lwamu Bbaibbele lwakuti “amubalemeke bantu bamisyobo yoonse,” tacikwe makani anzyobasyoma. (1 Petro 2:17) Mucikozyanyo, nokuba kuti muzisi zimwi kuli Bakamboni banji, tatubayungi basitwaambo twacisi naa basikubamba milawo kuti bakasye naa kulesya mulimo watubunga tumwi twabukombi. Alimwi tatwaambili basikubamba milawo kuti babikkile banamaleya milawo iijatikizya mbotulilemeka alimwi abukombi bwesu. Muciindi caboobo, tuyanda kuti bantu boonse kabaangulukide mbubwenya andiswe mbotuyanda kuti katwaangulukide.—Matayo 7:12.

Cibalo eeci cijisi makani aazwa awebbusaiti yesu iizumizyidwe ya jw.org. Kutegwa mwiiye zinji, amuunke aalembedwe kuti KUJATIKIZYA NDISWE > MIBUZYO IIVWULA KUBUZYIGWA..