KU INDONESIA, ansumbu nsyoonto iitegwa Sangir Besar, kwakali kukkala bacizyi botatwe. Kaindi, bacizyi aaba bakali kubelekela aantoomwe kunkomwe. Bakalizyibidwe kapati ansumbu eeyi akaambo kamulimo wabo wakugwasya bantu kumvwisya Bbaibbele. Pele aciindi aawa, bakali kucita mulimo umbi wiimpene.

Bakali kunjila mumaanzi akubwezelela mabwe mapati mpoonya akwaaleta kunkomwe. Mabwe aamwi akali mapati mbuli bbola. Kumane, bacizyi aaba bakali kukkala atuuno akutalika kwaapwayaula kubelesya nsando kusikila twaba tubwe tusyoonto kapati kwiinda ji lyankuku. Bamana, bakali kwaabikka mutubbakete akwaanyamuna kutola kuŋanda. Mpoonya bakali kwaabikka mumasaka mapati aakali kukonzya kunyamunwa mumatulaki akuyoobelesyegwa kupanga mugwagwa.

Ba Hulda bakali umwi wabacizyi aaba. Bukkale bwabo bwakali kubazumizya kubeleka mulimo ooyu wakupwaya mabwe kwaciindi cinji kwiinda beenzinyina. Kanji-kanji, mali ngobakali kujana bakali kwaabelesya kugwasya mukwasyi wabo. Nokuba boobo, kuli mbaakani ayimbi njobakajisi. Bakali kuyanda kuula tabbuleti kutegwa kabacikonzya kubelesya JW Library^® app. Ba Hulda bakalizyi kuti mavidiyo azibeela zimwi izili mu app eeyi, zyakali kukonzya kubagwasya kulimvwisya Bbaibbele alimwi akubakambaukila kabotu bantu.

Ba Hulda bakali kubeleka mawoola obilo abuzuba mafwumofwumo kwamwezi omwe acisela, kupwayaula mabwe aakali kukonzya kwiizuzya ŋola yakatulaki kasyoonto. Kumamanino, bakacikonzya kuba amali aakkwana kuula tabbuleti.

Ba Hulda bakaamba kuti: “Nokuba kuti ndakali kukatala kapati alimwi akulicisa akaambo kakupwayaula mabwe, ndakaziluba zyoonse eezyi ciindi nondakatalika kubelesya tabbuleti kulibambila miswaangano ya Bunakristo alimwi akwiibelesya mubukambausi.” Alimwi bakaamba kuti tabbuleti eeyi yakabagwasya kapati lyabulwazi bwa Covid-19, mbwaanga bakali kucikonzya kukkonekita kumiswaangano yambungano alimwi akukambauka. Eelo kaka tulikkomene kuti ba Hulda bakacikonzya kwiizuzikizya mbaakani yabo!