1. Ino nkulombozya kuli buti kwakuzyalwa ankuko nkotujisi toonse, alimwi ino kubikkilizya nzi?

INO mulimvwa buti ciindi muntu umwi ngomuzyi alimwi ngomulemeka naaliluba zina lyanu, naa ambweni buya tanaamubikkila maano? Bukkale buli boobu bulakonzya kutyompya kapati. Nkaambo nzi? Cili boobu akaambo kakuti ncizyalwa buya kuyanda kuzyibwa. Bulemu mbotuyanda kupegwa kubantu bulaindilila akuzyibwa buyo; tulayanda kuzyibwa mpotweendela azintu nzyotwakacita mubuumi.—My. 11:16; Job. 31:6.

2, 3. Mbuti kulombozya kulumbaizyigwa mbokukonzya kubonwa munzila iitaluzi? (Amubone cifwanikiso icili kumatalikilo aacibalo.)

² Nokuba boobo, mbubwenya buyo mbuli kulombozya kumbi kunji, kulombozya kwesu kwakuyanda kulumbaizyigwa kulakonzya kwiindilila, kunyonganizyigwa akutalondoka kwesu. Kulakonzya kutupa kuyanda kulemekwa munzila iiteelede. Nyika ya Saatani ikulwaizya kuba ampuwo alimwi akulemekwa kwalo ikupa kuti twaalilwe kulemeka yooyo iweelede kulemekwa alimwi akukombwa, nkokuti Taateesu wakujulu, Jehova Leza.—Ciy. 4:11.

 ³ Mumazuba aa Jesu, basololi bazikombelo bamwi bakali kukubona munzila iitaluzi kulemekwa. Jesu wakabacenjezya basikumutobela kuti: “Amubacenjelele balembi ibayandisya kweendeenda kabasamide zisani zilamfwu, ibayanda kwaanzyigwa cabulemu kumisika akuyandisya zyuuno zyakumbele [“zibotu kapati,” bupanduluzi buyungizyidwe] muzikombelo amasena aalemenede kucilalilo.” Wakazumanana kwaamba kuti: “Aaba bayoopegwa cisubulo cipati.” (Lk. 20:46, 47) Mukwiimpana, Jesu wakalumbaizya mukamufwu mucete iwakasanga mali masyoonto kapati walo uulangilwa kuti tanaakabikkilwa maano abamwi. (Lk. 21:1-4) Tacidoonekwi buya kuti mbwaakali kukubona kulemekwa Jesu kwakaliindene kapati ambobakali kukubona bamwi. Cibalo eeci cilatugwasya kuzumanana kukubona munzila yeelede, nkokuti munzila njakkomanina Jehova Leza.

4. Ino nkulemekwa kuli buti ikwiinda kubota, alimwi ino nkaambo nzi?

⁴ Aboobo ino nkulemekwa kuli buti ikwiinda kubota nkotweelede kuyandisisya kuba ankuko? Takuli kulemekwa bantu nkobayandaula mulwiiyo, mumakwebo alimwi amuzyakulikondelezya zili munyika iino. Muciindi caboobo, nkulemekwa nkwaakatupandulwida Paulo mumajwi aaya aakuti: “Lino mbwaanga mulimuzyi Leza, naa andaambe kuti lino mbwaanga mulizyibidwe a Leza, ino kayi mupilukila nzi kuzintu zyantalisyo izitagwasyi alimwi zinyina mpindu akuyanda kuzibelekela alimwi?” (Gal. 4:9) Eelo kaka eeci ncoolwe citaliboteli ‘kuzyibwa a Leza,’ Mweendelezi Mupati wabubumbo boonse! Ulilibambilide kuba acilongwe ciyumu andiswe. Syaazibwene umwi wakaamba kuti, “tulaba bantu bayandika kapati kulinguwe.” Ciindi Jehova natubona kuba balongwe bakwe, tulapona buumi bulaampindu.—Muk. 12:13, 14.

5. Ino ncinzi ncotukonzya kucita kutegwa tuzyibwe a Leza?

⁵ Musa wakalongezyegwa munzila iili boobo. Ciindi naakakombelezya Jehova kutegwa amugwasye kuzizyiba kabotu nzila zyakwe, Jehova wakaingula kuti: “Eeci ncoolomba acalo ndilacicita, nkaambo ndakufwida luzyalo alimwi ndilikuzyi zina.” (Kul. 33:12-17) Andiswe tulakonzya kujana zilongezyo zibotu ciindi notuzyibwa cacigaminina a Jehova. Pele ino ncinzi ncotukonzya kucita kutegwa tuzyibwe a Jehova? Tweelede kumuyanda alimwi akwaaba buumi bwesu kulinguwe.—Amubale 1 Bakorinto 8:3.

6, 7. Ncinzi cikonzya kupa kuti tusweekelwe cilongwe cesu a Jehova?

⁶ Nokuba boobo, tweelede kuzumanana acilongwe cesu cibotu a Taateesu wakujulu. Mbubwenya mbuli Banakristo bana Galilaya aabo Paulo mbaakalembela, andiswe tweelede kutantamuka “zintu zyantalisyo izitagwasyi alimwi zinyina mpindu,” izyamunyika eeyi kubikkilizya abulemu bwanzizyo. (Gal. 4:9) Banakristo bamumwaanda wamyaka wakusaanguna aabo Paulo mbaakalembela bakayaambele kusikila mane bakazyibwa a Leza. Nokuba boobo, Paulo wakaamba kuti bakwesu mbabonya aaba ‘bakapilukila’ alimwi kuzintu zinyina mpindu. Munzila imwi Paulo wakali kubaambila kuti: “Kulampa nkomwazwa, nkaambo nzi ncomupilukila alimwi kuzintu zyabufwuba-fwuba, zinyina mpindu nzyomwakasiya musyule?”

⁷ Sena andiswe inga twalijana mubukkale buli boobu mazuba aano? Inzya. Mbubwenya mbuli Paulo, ciindi cakusaanguna notwakamuzyiba Jehova, kweelede kuti twakaleka kuyanda kuba ampuwo munyika ya Saatani. (Amubale Bafilipi 3:7, 8.) Ambweni twakazikaka zyoolwe zyakuba alwiiyo lwaatala, naa zyoolwe zyakusumpulwa kumulimo naa kucita makwebo aakali kukonzya kutupa kujana mali manji. Kuba aluzyibo mukwiimba naa muzisobano zyakubalika  kwakali kukonzya kutupa kuba ampuwo alimwi akuvwuba, pele zyoonse twakazikaka. (Heb. 11:24-27) Eelo kaka inga kwaba kutayeeya cabusongo ikuti lino twatalika kubona kusala kubotu nkotwakacita kuti kwakatupa ‘kwiindwa zyoolwe’! Kuyeeya kuli boobo kulakonzya kutupa kuyandaula zintu zyamunyika eeyi nzyotwakabona kale kuti zili akati ‘kazintu izitagwasyi alimwi zinyina mpindu.’

8. Ino ncinzi cikonzya kutugwasya kuyumya makanze eesu kutegwa tuzyibwe a Jehova?

⁸ Mbuti mbotukonzya kuyumya makanze eesu kutegwa tuzyibwe a Jehova ikutali kuzyibwa anyika? Kutegwa tucite oobo, tweelede kuyeeya twaambo tobilo ituyandika kapati. Kakusaanguna nkakuti, Jehova lyoonse ulabalemeka aabo bamubelekela cakusyomeka. (Amubale Bahebrayo 6:10; 11:6) Babelesi bakwe boonse ulabalumba kapati, alimwi ukubona “kutalulama” kutababikkila maano aabo ibasyomeka kulinguwe. Lyoonse Jehova “ulibazyi aabo ibazulilwa kulinguwe.” (2Tim. 2:19) “Uliizyi nzila yabalulami” alimwi ulizyi mbwakonzya kubavwuna kuzwa mumasunko.—Int. 1:6; 2Pet. 2:9.

9. Amupe zikozyanyo zitondezya Jehova mbwaakatondezya luyando kubantu bakwe.

⁹ Zimwi ziindi, Jehova ulatondezya mbwabayanda bantu bakwe munzila zilibedelede. (2Mak. 20:20, 29) Mucikozyanyo, amubone Jehova mbwaakafwutula bantu bakwe a Lwizi Lusalala ciindi nobakali kutobelwa abasikalumamba basinguzu ba Farao. (Kul. 14:21-30; Int. 106:9-11) Icakacitika cakali kugambya kapati cakuti bantu kubusena ooko bakacili kwaamba kujatikizya ncico myaka iitandila ku 40 yakatobela. (Jos. 2:9-11) Eelo kaka cilakulwaizya kapati kulindiswe kuyeeya kujatikizya Jehova mbwatondezya luyando alimwi anguzu munzila iili boobu ciindi notulangila businsimi bwakulwanwa a Gogo waku Magogo! (Ezk. 38:8-12) Aciindi eeco, tuyookkomana kapati akaambo kakuti twakayandaula bulemu bwa Leza wesu ikutali bwamunyika.

10. Ino ninzila nzi imwi mwatulemeka Jehova njotweelede kubikkila maano?

¹⁰ Alimwi tweelede kukabikkila maano kaambo kabili ikayandika kapati: Jehova ulakonzya kutulemeka munzila nzyotutakonzyi kuyeeyela. Aabo ibacita milimo mibotu kutegwa babonwe abantu baambilwa kuti tabakatambuli bulumbu naaceya kuli Jehova. Nkaambo nzi? Akaambo kakuti balatambula bulumbu bwabo boonse ciindi nobalumbaizyigwa abamwi. (Amubale Matayo 6:1-5.) Nokuba boobo, Jesu wakaamba kuti Usyi ‘ulabona zisisidwe’ kuli baabo ibatapegwi bulumbi ibubeelede akaambo kazintu zibotu nzyobacitila bamwi. Ulaibona milimo eeyo alimwi ulamulumbula umwi aumwi kweelana amilimo yakwe. Nokuba boobo, zimwi ziindi Jehova ulatulumbula munzila nzyotutayeeyeli. Atulange-lange zikozyanyo zimwi.

11. Ino mbuti Jehova mbwaakamulemeka mukaintu uucili mwana-mwana Mariya?

¹¹ Nicakasika ciindi cakuti Mwana wa Leza azyalwe kali muntu, Jehova wakasala nakalindu uulicesya, Mariya, kuti abe banyina mwana ooyu uulibedelede. Mariya wakali kukkala mumunzi musyoonto wa Nazareta, uuli kulamfwu a Jerusalemu alimwi atempele lyanguwo lyeebeka. (Amubale Luka 1:26-33.) Nkaambo nzi Mariya ncaakasalwa kupegwa coolwe eeci? Wakaambilwa amungelo Gabriyeli kuti “Leza wakukkomanina.” Mariya wakatondezya mbwaakasimide kumuuya ciindi naakaambaula abbululu wakwe Elizabeta. (Lk. 1:46-55) Inzya, Jehova wakalimubwene Mariya, alimwi wakamupa coolwe eeci ncaatakali kuyeeyela akaambo kakusyomeka kwakwe.

12, 13. Ino kulemekwa kweelede kwakapegwa buti ciindi Jesu naakazyalwa alimwi anaakatolwa kutempele ciindi nokwakainda mazuba aali 40?

 ¹² Mpoonya ciindi Jesu naakazyalwa, Jehova kunyina naba omwe ngwaakalemeka akati kabeendelezi bakajisi mpuwo alimwi abeendelezi bamu Jerusalemu a Betelehemu kwiinda mukubazyibya cakacitika. Bangelo bakalibonya kubeembezi balicesya aabo ibakali musyokwe kabeembela mbelele. (Lk. 2:8-14) Kumane beembezi aaba bakaunka kuyoomubona mwana iwakazwide aakuzyalwa. (Lk. 2:15-17) Eelo kaka ceelede kuti cakabagambya ba Mariya alimwi a Josefa kubona Jesu mbwaakalemekwa munzila iili boobo! Amubone kwiindana kuliko kujatikizya mbwacita zintu Jehova alimwi anzila mbwacita zintu Diabolosi. Ciindi Saatani naakatuma basikupandulula bweende bwanyenyeezi kuti bakamuswaye Jesu abazyali bakwe, bantu boonse bamu Jerusalemu bakakalala kapati kujatikizya mulumbe wakuzyalwa kwa Jesu. (Mt. 2:3) Kwakaambilizyigwa caantangalala ooku ikujatikizya kuzyalwa kwa Jesu, kwakapa kuti bana banji ibatakajisi mulandu bajaigwe.—Mt. 2:16.

¹³ Nokwakainda mazuba aali 40 kuzwa ciindi Jesu naakazyalwa, Mariya wakaleelede kutuula cipaizyo kuli Jehova kutempele mu Jerusalemu, ikulampa makkilomita aali 9 kuzwa ku Betelehemu. (Lk. 2:22-24) Ciindi Mariya, Josefa alimwi a Jesu nobakali mulweendo, Mariya weelede kuti wakali kweezyeezya naa bapaizi ibakali kubeleka aciindi eeco, bakali kuyakwaamba majwi aamwi aalibedelede kutondezya mulimo ngwaakali kuyooba anguwo kumbele. Inzya wakalemekwa, pele ikutali munzila Mariya njaakali kuyeeyela. Muciindi caboobo, Jehova wakabelesya mwaalumi “mululami alimwi mukombi” wazina lya Simeoni, antoomwe amukamufwu iwakajisi myaka iili 84, imusinsimi mukaintu Ana, kutegwa bazuminizye kuti mwana ooyu wakali kuyooba Mesiya iwakasyomezyedwe, naa Kristo.—Lk. 2:25-38.

14. Ino nzilongezyo nzi nzyaakatambula Mariya kuzwa kuli Jehova?

¹⁴ Ino mbuti kujatikizya Mariya? Sena Jehova wakazumanana kumutondezya bulemu bweelede akaambo kakumulanganya alimwi akumukomezya cakusyomeka Mwanaakwe? Inzya, wakacita oobo. Leza wakapa kuti milimo yakwe alimwi amajwi aakwe alembwe mu Bbaibbele. Kulibonya kuti, Mariya tanaakacili kukonzya kweenda a Jesu mumyaka yotatwe acisela yamulimo wakwe. Ambweni akaambo kakuba mukamufwu, Mariya wakalikkede ku Nazareta. Pele nokuba kuti wakaindwa zyoolwe zinji, wakacikonzya kuba a Jesu ciindi naakali kuyanda kufwa. (Joh. 19:26) Pele nokwakainda ciindi, Mariya wakali mu Jerusalemu antoomwe abasikwiiya nobwakali kuyaabuswena buzuba bwa Pentekoste ciindi muuya uusalala nowakatilwa. (Mil. 1:13, 14) Kweelede kuti awalo wakananikwa antoomwe abamwi ibakaliko. Kuti naa mbocakaba oobo, caamba kuti wakapegwa coolwe cakuba kujulu a Jesu mane kukabe kutamani. Eelo kaka takuliboteli kulongezyegwa kuli boobu akaambo kakusyomeka kwakwe!

15. Ciindi Jesu naakali anyika, mbuti Jehova mbwaakatondezya kuti ulamuyanda Mwanaakwe?

¹⁵ Jesu kunyina naakali kuyanda kupegwa bulemu abasololi bazikombelo alimwi abasimapolitikisi ibakaliko ciindi ncaakali kupona. Pele kweelede kuti wakakulwaizyigwa kapati ciindi Jehova naakamubikkila maano mubukkale botatwe kwiinda mukwaambaula cacigaminina kuzwa kujulu. Mbwaakamanina buyo kubbapatizyigwa mu Mulonga wa Jordano, Jehova wakaamba kuti: “Ooyu Mwanaangu ngweyandisya, ngwekkomanina.” (Mt. 3:17) Cakutadooneka, kunze buyo lya Jesu, Johane Mubbapatizi ngonguwe alikke wakaamvwa majwi aayo.  Mpoonya, kakuceede mwaka omwe kuti Jesu afwe, baapostolo bakwe botatwe bakamvwa Jehova kaamba kujatikizya Jesu kuti: “Ooyu Mwanaangu ngweyandisya, ooyo ngwekkomanina. Amumuswiilile.” (Mt. 17:5) Bukkale bwamamanino, kakuceede mazuba masyoonto kuti Jesu afwe, Jehova wakaambaula alimwi anguwe kuzwa kujulu.—Joh. 12:28.

16, 17. Ino mbuti Jehova mbwaakamulemeka Jesu munzila njaatakali kuyeeyela?

¹⁶ Nokuba kuti Jesu wakalizyi kuti wakali kuyoofwa munzila yamasampu, ikwaambwa kuti ngusikusampaula Leza, wakapaila kuti kuyanda kwa Jehova kucitwe kutali kwakwe. (Mt. 26:39, 42) “Wakaliyumya acisamu cakupenzyezya, wakaubaula kuusyigwa nsoni,” akaambo kakutayanda bulemu bwamunyika, pele bolikke buzwa kuli Bausyi. (Heb. 12:2) Ino mbuti Jehova mbwaakatondezya bulemu oobo?

¹⁷ Kali anyika, Jesu wakatondezya kuti wakali kuyanda kupegwa bulemu mbwaakajisi kacili kujulu a Bausyi. (Joh. 17:5) Kunyina aatondezyedwe kuti Jesu kuli ncaakali kuyanda cimbi kwiinda waawo. Kunyina naakali kulangila kuti kuli kusumpulwa kumbi kuli koonse kujulu. Pele ino Jehova wakacita nzi? Wakamulemeka Jesu munzila njaatakali kuyeeyela kwiinda mukumubusya “akumupa cuuno caatala” alimwi akumupa cintu cimwi catakapedwe kale amuntu uumbi, nkokuti buumi butafwi! * (Flp. 2:9; 1Tim. 6:16) Eelo kaka wakalemekwa munzila iilibedelede Jesu akaambo kakusyomeka kwakwe!

18. Ino ncinzi ciyootugwasya kutantamuka muuya wakuyanda kukkomaninwa anyika eeyi?

¹⁸ Ncinzi ciyootugwasya kutantamuka muuya wakuyanda kukkomaninwa anyika eeyi? Amucibikke mumizeezo kuti Jehova lyoonse ulabalemeka babelesi bakwe basyomeka alimwi akuti ziindi zinji ulabalongezya munzila nzyobatayeeyeli. Nguni uuzizyi zilongezyo nzyotutakonzyi kuyeeyela izitulindila kumbele? Pele kwalino, notuliyumya kubuyumu-yumu akumasunko aamunyika eeyi mbyaabi, atuyeeye lyoonse kuti nyika eeyi, antoomwe abulemu buli boonse mboikonzya kupa, zilamana. (1Joh. 2:17) Taateesu siluyando, Jehova, ‘tali Leza uutaluleme pe uunga waluba milimo yesu alimwi aluyando ndotwakatondezya kuzina lyakwe.’ (Heb. 6:10) Inzya, uyootupa bulemu bweelede, ambweni buya munzila nzyotutakonzyi kuyeeyela lino!