Mwaapostolo Paulo wakalipakamene kuntenda iyakali kukonzya kuboola akaambo kalweeno lwa Saatani, pele Banakristonyina bamwi tiibakapakamene pe. Mucikozyanyo, ibamwi mumunzi wa Korinto kulibonya kuti bakali kuciindizya kulisyoma. Bakali kuyeeya kuti bakali bayumu kapati mukasimpe cakuti tiibakali kukonzya kuwa. (1Kor. 10:12) Nkakaambo kaako Paulo ncaakabacenjezya kuti: “Ndililibilikide kuti mbubonya nzoka mboyakoongelezya Eva mubucenjezu bwayo, mizeezo yanu inga ilasofwaazyigwa akumupa kuleka kusyomeka camoyo woonse akusalala nkomweelede kutondezya Kristo.”—2Kor. 11:3.

Ikubikkila maano kwa Paulo kutondezya kuti tamweelede kuliiba pe. Ikuti naa muyanda kwiizunda nkondo iilwana mizeezo yanu, mweelede kwiizyiba ntenda iiboola akaambo kalweeno kutegwa mulikwabilile kulinjiyo.

Ino lweeno ninzi? Mucibalo eeci, lweeno lwaamba kubelesya makani aatali aancobeni kutegwa moongelezye bantu kuyeeya munzila imwi alimwi akucita zintu munzila imwi. Bamwi baamba kuti lweeno caamba “bubeji, kupilinganya twaambo, luuni, koongelezya kwabucenjezu akulwana mizeezo yamuntu,” alimwi bakozyanisya lweeno “kunzila zitaluzi, zibyaabi alimwi zyabumpelenge.”—Kweelana abbuku litegwa Propaganda and Persuasion.

Ino lweeno ndubi buti? Ndubi kapati, luli mbuli muya uujaya uutanunki alimwi asyoonto-syoonto lweeno oolu lulakonzya kunyonganya mizeezo yesu. Akaambo kakuti lweeno tatukonzyi kulubona bwini mboluli lubyaabi kapati, ba Vance Packard ibakaiya mbobalilemeka bantu bakaamba kuti: “Bunji bwesu tuli mukuyungwa akoongelezyegwa kapati katutalimvwide.”  Syaazibwene umwi wakaamba kuti kwiinda mukuyungwa andulo, bamaalumi alimwi abamakaintu bamwi cabapa “koongelezyegwa kutola lubazu mumicito iigambya,” mbuli ‘kujayana, nkondo, kuciindizya kusumpula musyobo, kusulaika bukombi alimwi azintu zimwi zyabufwubafwuba.’—Kweelana abbuku litegwa Easily Led—A History of Propaganda.

Mbwaanga bantu balya maila balakonzya kutucenga alweeno lwabo, sena walo Saatani taindi aawo na? Kayi walo ulibazyi kabotu bantu mbobapona kuzwa nobakalengwa. “Nyika yoonse” ili mumaanza aakwe. Aboobo ulakonzya kubelesya cintu cili coonse cijanika munyika kutegwa amwaye bubeji bwakwe. (1Joh. 5:19; Joh. 8:44) Saatani wazwidilila kapati ‘mukoofwaazya mizeezo yabantu’ cakuti lino ‘wayeena nyika yoonse.’ (2Kor. 4:4; Ciy. 12:9) Ino inga mwalutantamuka buti lweeno lwakwe?

Jesu wakapa mulawo ooyu kujatikizya kulikwabilila kulweeno: ‘Amuzyibe kasimpe, eelyo kasimpe kayoomwaangununa.’ (Joh. 8:31, 32) Ciindi nokuli nkondo, sikalumamba weelede kuzyiba nkwakonzya kubuzya makani aamasimpe, nkaambo sinkondonyina ulakonzya kumwaya makani aakubeja kutegwa amucenge. Aboobo ino nkuli nkomukonzya kujana makani aamasimpe? Jehova watupa makani aamasimpe aaya mu Jwi lyakwe Ibbaibbele. Mulindilyo mulakonzya kujana makani aali woonse ngomuyandika kutegwa mulikwabilile kulweeno lwa Saatani.—2Tim. 3:16, 17.

Pele bwini mbwakuti, silweeno mupati, Saatani ulaazyi kabotu makani aaya. Aboobo ubelesya bweende bwazintu oobu kutegwa atutyompye kwiiya akubala Bbaibbele. Mutacegwi mutukole twakwe twabucenjezu! (Ef. 6:11) ‘Amukazyibe cakumaninina’ kasimpe. (Ef. 3:18) Kutegwa mucikonzye kucita oobo, mweelede kubeleka canguzu. Alimwi amukayeeye kaambo aaka ikayandika kapati nkaakaamba mulembi wazina lya Noam Chomsky walo iwakati: “Kunyina muntu naba omwe uukonzya kumubikkila kasimpe mumoyo wanu pe. Pele nywebo lwanu kumugama mweelede kukayandaula kutegwa mukajane.” Aboobo “nywebo lwanu kumugama mweelede kukayandaula” kwiinda ‘mukuvwuntauzya cakulomya mu Magwalo abuzuba.’—Mil. 17:11.

Amuyeeye kuti Saatani tayandi kuti kamuyeeya kabotu naa kubelesya maano. Nkaambo nzi? Nkaambo kakuti kweelana abbuku limwi, lweeno “lulalangilwa kuzwidilila kapati ikuti bantu balesyegwa kuyeeyesya cakubikkila maano.”  (Media and Society in the Twentieth Century) Aboobo mutakkutili kwiile kuzumina buyo kufwumbwa ncomwamvwa. (Tus. 14:15) Amubelesye maano ngaakamupa Leza alimwi akuyeeya kabotu kutegwa kasimpe mukapange kuba kanu.—Tus. 2:10-15; Rom. 12:1, 2.

Basyaazibwene mukulwana nkondo balakonzya kubelesya lweeno kutegwa basinkondonyina batyompwe akubula nguzu zyakulwana. Balakonzya koongelezya basinkondonyina kuti balwane mulicabo naa kubapa kuti bazanduke kunkamu yankondo mpati. Kwaambwa kuti Mupati wabasikalumamba waku German wakazuminizya kuti ikaambo kamwi ikakapa kuti bazundwe mu Nkondo Yakusaanguna Yanyika Yoonse nkakuti, bantu “bakanyonganizyigwa alweeno lwabasinkondonyina cakuti bakabula cakucita.” Saatani ubelesya nzila zikozyenye azeezyi mukusola kwaandaanya akuzunda bantu ba Leza. Ulacita oobo kwiinda mukubusya mazwanga akati kabakwesu alimwi abacizyi naa ikubapa kulizandula kumbunga ya Jehova akaambo kamatongoosi aamwi naa zintu zimwi zilibonya mbuli kuti taziluleme.

Muteenwi pe! Amulekele Jwi lya Leza kuti limusololele. Mucikozyanyo, mumakani aakubamba lukamantano akati kabakwesu abacizyi, Ibbaibbele litukulwaizya kuzumanana “kulekelelana camoyo woonse” alimwi akufwambaana kubamba twaambo nokuli mazwanga. (Kol. 3:13, 14; Mt. 5:23, 24) Lilatucenjezya kuti tatweelede kulizandula kumbungano. (Tus. 18:1) Amulilingule kutegwa mubone naa mulijatikizyidwe alweeno lwa Saatani. Amulibuzye kuti: ‘Ino ncinzi cakali kweendelezya mizeezo yangu ciindi nondakali mubukkale buli boobu? Sena ndakali kweendelezyegwa amuuya wa Leza naa amuuya wanyika?’—Gal. 5:16-26; Ef. 2:2, 3.

Sikalumamba takonzyi kulwana kabotu ikuti waleka kumusyoma kapati musololi wakwe. Aboobo basilweeno balasoleka kunyonganya lumvwano luliko akati kasikalumamba alimwi amusololi wakwe. Balakonzya kubelesya lweeno mbuli lwakuti: “Mutabasyomi basololi banu!” alimwi “Mutabalekeli kuti bamujazye pe!” Kutegwa bazwidilizye makanze aabo mabi aali boobu, balakonzya kuciindizya kwaamba kulezya kumwi nkobajisi basololi aabo. Saatani awalo mbwacita oobu. Lyoonse ulasolekesya kupa kuti mutalike kubudooneka bweendelezi mbwabikkide Jehova.

 Mbuti mbomukonzya kulikwabilila? Amube amakanze aakukakatila kumbunga ya Jehova alimwi akutobela bweendelezi mbwabikkide—nokuba kuti kuli kulezya kumwi nkomukonzya kubona mubeendelezi. (1Tes. 5:12, 13) “Mutafwambaani kulekela mizeezo yanu kunyonganizyigwa” ciindi nomwamvwa makani aakubeja aambwa abasiluleyo naa bantu buyo bambi ibayanda kunyonganya mizeezo yanu—nokuba kuti makani aayo ngobaamba inga aboneka mbuli kuti ngamasimpe. (2Tes. 2:2; Tit. 1:10) Amutobele lulayo ndwaakapegwa Timoteyo. Amukakatile kukasimpe nkomwakaiya alimwi mutalubi nkomwakakaiya. (2Tim. 3:14, 15) Cakutadooneka kuli bumboni bunji ibutondezya kuti mulakonzya kwiisyoma nzila Jehova njaali kubelesya kwamyaka minji lino ikutusololela munzila yakasimpe.—Mt. 24:45-47; Heb. 13:7, 17.

Alimwi mutalubi kuti lweeno lwa Saatani lumwi lulalibonya caantangalala. Zimwi ziindi ubelesya kukonga—“eeyi njimwi yanzila yalweeno njaali kubelesya kwaciindi cilamfwu.” (Easily Led—A History of Propaganda) Mucikozyanyo, bana Asuri bakali kubakonga basinkondonyina kwiinda “mukubelesya lweeno” kweelana ambwaakaamba syaazibwene umwi waku Britain wazina lya Philip M. Taylor. Saatani ubelesya nzila yakuyoowa bantu, kuyoowa kupenzyegwa, kuyoowa lufwu alimwi amisyobo imbi yakumukonga kutegwa mucileke kubelekela Jehova.—Is. 8:12; Jer. 42:11; Heb. 2:15.

Mutalekeli Saatani kubelesya kuyoowa kuti kumutyompye naa kumupa kuti muleke kusyomeka. Jesu wakaamba kuti: “Mutabayoowi aabo bajaya mubili pele kuzwa waawo taakwe cimbi ncobakonzya kucita.” (Lk. 12:4) Amube alusyomo lutazungaani mucisyomezyo ca Jehova cakuti uyoomulanganya akumupa “nguzu zigambya iziinda zyabantu” alimwi akuti uyoomugwasya kuti mutayoowi akukongwa kuli koonse ikukonzya kuboola.—2Kor. 4:7-9; 1Pet. 3:14.

Cakutadooneka, ambweni mulakonzya kusikilwa bukkale buyoosya bwalo ibukonzya kumupa kuzungaana. Pele mutaalubi majwi aayumya-yumya Jehova ngaakaambila Joshua aakuti: “Koyuma akuba sicamba. Utayoowi nokuba kukankama, nkaambo Jehova Leza wako unooli anduwe kufwumbwa nkounka.” (Jos. 1:9) Ikuti naa mwalibilika, amufwambaane kuunka kuli Jehova kwiinda mumupailo akumwaambila zyoonse nzyomulibilika. Kuti mwacita oobo, mulakonzya kuba masimpe kuti “luumuno lwa Leza . . . luyookwabilila myoyo yanu amizeezo yanu” kutegwa mube anguzu izyakutantamuka lweeno lwa Saatani.—Flp. 4:6, 7, 13.

Sena muliluyeeyede lweeno ndwaakabelesya mwiiminizi wabana Asuri, Rabisake, kubantu ba Leza? Ncaakali kusola kwaamba ncakuti, ‘Kunyina uukonzya kumuvwuna kuli bana Asuri. Naba Leza wanu Jehova takonzyi kucita cili coonse pe.’ Mpoonya cakutawayawaya wakayungizya kuti: ‘Jehova lwakwe nguwakatwaambila kuti tuunyonyoone munzi ooyu.’ Ino Jehova walo wakaamba nzi kujatikizya majwi aaya? Wakati: “Utayoowi pe akaambo kamajwi aayo ngoomvwa ngobaamba babelesi bamwami wa Asuri aakundisampaula.” (2Bam. 18:22-25; 19:6) Kumane wakatuma mungelo walo iwakanyonyoona bana Asuri ibali 185,000 mubusiku bomwe buyo!—2Bam. 19:35.

Sena kuli nomwakeebelela kale filimu yakajisi muntu umwi ooyo ngomwakabona caantangalala kuti wakali kweenwa alimwi akucitilwa cakutalulama? Sena mwakajana kuti mulalyaambauzya akuyeeya kuti: ‘Utasyomi pe! Bali mukukweena!’ Andinywe amweezyeezye kuti bangelo baloongolola kulindinywe akumwaambila kuti: “Mutacengwi pe abubeji bwa Saatani!”

Aboobo mutaswiilili kulweeno lwa Saatani. (Tus. 26:24, 25) Amumuswiilile Jehova akumusyoma muzintu zyoonse nzyomucita. (Tus. 3:5-7) Amwaatobele majwi aaluyando ngaakaamba aakuti: “Kosongwaala mwanaangu, ukkomanisye moyo wangu.” (Tus. 27:11) Kuti mwacita oobo, nkokuti muyoocikonzya kuzunda nkondo iilwana mizeezo yanu.