AMWEEZYEEZYE kuti muleenda mumugwagwa masiku. Mpoonya mwaile kumvwa kuti kuli muntu uumutobela munsi lyanu. Mwaima, ayalo mijinci munsi lyanu yaleka kulimvwisya. Mweenda cakufwambaana, awalo sikumutobela wacita mbubwenya oobo. Aboobo mwatalika kuzuza; mpoonya mwafwambaana kutijila kuŋanda yamulongwe wanu uukkala munsi-munsi. Ciindi mulongwe wanu naajalula mulyango akumutambula muŋanda yakwe, mwaswa ciya akukkalwa moyo.

Ambweni tacinamucitikilide cintu cili boobo, nokuba boobo, kuli zintu zimwi zipa kulibilika izikonzya kumupa kuyoowa. Mucikozyanyo, sena kuli kampenda kamwi nkomulwana ankako nkomuyanda kuzunda pesi mucizumanana kukacita? Sena tiimwali kubeleka kwaciindi cilamfwu akuti tamwiijani ncito nokuba kuti mwasoleka buti canguzu? Sena mulalibilika kujatikizya kucembaala alimwi akuciswa ikulangilwa kumbele? Naa sena kuli cintu cimbi buyo icimupa kuusa?

Kufwumbwa naa ndipenzi nzi limupa kulibilika, sena tamukonzyi kukkomana kuba amuntu ngomukonzya kwaambila nzyomulibilika alimwi uukonzya kumugwasya ciindi nomuyanda kugwasyigwa? Sena mulijisi mulongwe mwini-mwini uuli boobu? Inzya, mulijisi! Mulongwe ooyu ngu Jehova, alimwi mulongwe wanu mbubwenya mbwaakabede kuli Abrahamu sikale, kweelana ambokulembedwe kuli Isaya 41:8-13. Mukapango 10 a 13, mboobu Jehova mbwabaambila babelesi bakwe: “Utayoowi pe, nkaambo ndilaanduwe. Utalibiliki pe, nkaambo ndime Leza wako. Ndilakuyumya, inzya ndilakugwasya, ncobeni ndinookujatilide ajanza lyangu lyalulyo lyabululami. Nkaambo mebo nde Jehova Leza wako, ndilikujatide kujanza lyako lyalulyo, ndendime Yooyo uukwaambila kuti, ‘Utayoowi pe. Mebo ndilakugwasya.’”

Majwi aaya alakulwaizya, tee kayi? Amulibikke mubukkale oobu Jehova mbwaatwaambila atala aawa. Mubukkale oobu, tamwaambwi kuti mweendela antoomwe a Jehova kumujatene mumaanza pe, nokuba kuti majwi aayo alakkomanisya kumvwa. Nokwali kuti mweendela antoomwe anguwe, nokunga janza lyakwe lyalulyo lijatilide janza lyanu lyalumwensyi. Pele muciindi caboobo, Jehova wamutambika ‘janza lyakwe lyalulyo lyabululami’ akumujatilila ‘kujanza lyanu lyalulyo,’ mbuli kuti umukwela buya kutegwa muzwe mubukkale bukatazya kapati momubede. Nacita oobo, wamuyumya-yumya kwiinda mukumwaambila kuti: “Utayoowi pe. Mebo ndilakugwasya.”

Sena Jehova mumubona kuba Taata siluyando alimwi Mulongwe uukonzya kumugwasya ciindi nomuli mumapenzi? Leza ulamubikkila maano, ulabona zicitika mubuumi bwanu alimwi uliyandide kumugwasya. Ciindi nomuli mubuyumu-yumu, Jehova uyanda kuti muliibe akaambo kakuti ulamubikkila kapati maano. Masimpe, Leza “mugwasyi ngotukonzya kujana lyoonse muziindi zyamapenzi.”—Int. 46:1.

Bantu bamwi balapengana mumizeezo akaambo kazintu nzyobakacita musyule alimwi balazumbauzya  naa Leza wakabalekelela. Ikuti naa muli mubukkale oobu, amuyeeye kujatikizya mwaalumi uusyomeka Jobu, iwakalyaambilila ‘mulandu wazibi nzyaakacita kubwana.’ (Job. 13:26) Sintembauzyo Davida awalo wakalimvwa mbubwenya oobo alimwi wakakombelezya Jehova kuti: “Utayeeyi zibi nzyondakacita kubwana alimwi ansotoko zyangu.” (Int. 25:7) Mbwaanga tatulondokede, toonse ‘tulibisyide alimwi tulalezya kubulemu bwa Leza.’—Rom. 3:23.

Mulumbe uujanika kulugwalo lwa Isaya caandaano 41 kumatalikilo wakagamikidwe kubantu ba Leza bansiku. Bakalubizya kapati cakuti Jehova wakayeeya buyo kubabeteka kwiinda mukuzumizya kuti batolwe mubuzike ku Babuloni. (Is. 39:6, 7) Nokuba boobo, Leza wakacili kulangila ciindi naakali kuyoofwutula baabo ibakali kuyakweempwa akupiluka kulinguwe! (Is. 41:8, 9; 49:8) Mazuba aano, Jehova ulaukomezya moyo kuli baabo ibayanda ncobeni kufwidwa luzyalo.—Int. 51:1.

Amulange-lange cakacitikila ba Takuya, * aabo ibakali kusoleka kuleka cilengwa cakweebelela zintu ziletelela muzeezo wakoonana alimwi acakulisobanya kubusankwa. Ciindi aciindi, bakali kupiluka kucilengwa eeci. Ino bakalimvwa buti? “Ndakali kulimvwa kuti ndinyina mpindu naaceya, pele ciindi nondakali kupaila kuli Jehova kulomba kulekelelwa, wakali kundinyamuna kuzwa mubukkale bwangu oobu butyompya.” Ino mbuti Jehova mbwaakacita oobo? Baalu bamumbungano mobakali kuzulilwa ba Takuya bakabaambila kuti kababaambila baalu kufwumbwa ciindi nobakali kukatazyigwa acilengwa eeci. Ba Takuya bakati: “Tiicakali cuuba-uba kubaambila pe, pele kufwumbwa ndacita oobo, ndakali kuyumizyigwa.” Mpoonya baalu bakacita bubambe bwakuti mulangizi wabbazu abaswaye ba Takuya munyendo yabweembezi. Mulangizi wabbazu wakabaambila kuti: “Takuli kuti ndaliboolela buyo kuno pe. Pele ndili waano akaambo kakuti baalu bandaambila kuti ndiboole okuno. Bakasala ndinywe kuti ndimuswaye munyendo eeyi yabweembezi.” Ba Takuya balayeeya kuti: “Ndime ndakali kubisya, nokuba boobo Jehova, kwiinda mukubelesya baalu, wakandigwasya.” Ba Takuya bakazumanana kuyaambele cakuti bakasika nkobaba bapainiya baciindi coonse alimwi lino babelekela kuofesi yamutabi. Mbubwenya mbocakacitika kumukwesu ooyu, Leza uyakumunyamuna kuzwa mubukkale bwanu butyompya.

Bantu banji balalibilika kapati akaambo kakubula mulimo. Bamwi milimo ilamana alimwi cilabayumina kuti bajane nzila zimbi zyakujanina mali. Kamuyeeya buyo mbomukonzya kulimvwa ikuti mulimo wakatazya kujana kuli koonse nkomwaunka. Akaambo kabukkale buli boobu, bantu bamwi inga balimvwa kuti bulemu bulamana. Ino inga wamugwasya buti Jehova? Ambweni takonzyi kumupa mulimo weelela mpoona-mpoona, pele ulakonzya kumugwasya kwiinda mukumupa kuti muyeeye majwi aa Mwami Davida iwakati: “Ndakali mwana lino ndacembaala, nokuba boobo tandinabwene mululami wakalekelezyegwa, nobaba bana bakwe kabalombelela cakulya.” (Int. 37:25) Inzya, Jehova umubona kuti mulayandika kapati, alimwi kwiinda mukubelesya ‘janza lyakwe lyalulyo lyabululami,’ ulakonzya kumugwasya kujana ziyandika kutegwa muzumanane kumubelekela.

Ba Sara ibakkala ku Colombia, bakalibonena nguzu zya Jehova zyakufwutula. Bakali kubeleka mukkampani iisumpukide kapati alimwi bakali kuvwola mali manji kapati, pele mulimo ooyu wakali kubatolela ciindi cinji. Pesi bakali kuyanda kuyungizya mulimo wabo kuli Jehova, aboobo bakacileka  kubeleka akutalika mulimo wabupainiya. Nokuba boobo, mulimo uubelekwa mawoola masyoonto ngobakali kuyanda wakabakatazya kujana. Bakajula kantoolo kakusambalila ice-cream pele asyoonto-syoonto mali akabamanina aboobo bakakajala kantoolo aaka. Ba Sara bakaamba kuti: “Myaka yotatwe yakainda, pele ndilamulumba Jehova, nkaambo ndakacikonzya kuliyumya.” Bakaiya kwiindanya akati kazintu nzyobakali kuyandika ncobeni azintu nzyobakali kuyanda buyo alimwi akutalibilika kujatikizya zyabuzuba butobela. (Mt. 6:33, 34) Mukuya kwaciindi, mupati wamulimo nkobakali kubeleka wakabaita alimwi akubapa mulimo ngomunya ngobakali kubeleka kaindi. Bakamwiingula kuti bakali kukonzya buyo kuzumina mulimo uubelekwa mawoola masyoonto alimwi akuti ccita buyo kuti kababapa ciindi cakucita zintu zyakumuuya. Nokuba kuti ba Sara tabacivwoli mali manji mbuli ngobakali kuvwola kaindi, bacikonzya kuzumanana kucita bupainiya. Baamba kuti muciindi coonse eeci, “Ndakalibonena mboligwasya janza lya Jehova lyaluyando.”

Kulibilika kucembaala ndepenzi alimbi ndyobajisi bamwi. Bantu banji bakkwanya myaka yakucileka kubeleka balalibilika naa bayoojana mali manji aayoobagwasya kutegwa bazumanane kupona buumi buli kabotu. Alimwi balalibilika kujatikizya malwazi aakonzya kuboola mbobayaabucembaala. Cakutadooneka, weelede kuti wakali Davida iwakakombelezya Jehova kuti: “Utandisowi kuciindi cabucembele bwangu; utandilekelezyi pe ciindi nozimana nguzu zyangu.”—Int. 71:9, 18.

Pele ino mbuti babelesi ba Jehova mbobakonzya kupona kakunyina kulibilika kapati mubucembele bwabo? Beelede kuzumanana kumusyoma Leza kabasinizyide kuti uyoobapa nzyobayandika. Masimpe, balakonzya kuti bakalibukkede kaindi, pele lino inga bayandika kuubya-ubya buumi bwabo akukkutila azintu zyakumubili zisyoonto buyo. Balakonzya kujana kuti kulya “cisyumani” muciindi cakulya nyama “yaŋombe iineneede” nkubotu kapati alimwi ambweni eeco inga cabapa kupona buumi buli kabotu! (Tus. 15:17) Ikuti naa mubikkide kapati maano kukkomanisya Jehova, uyoomupa nzyomuyandika nomuba mubucembele bwanu.

Amubone cakabacitikila ba José aba Rose, ibabelekela Jehova mumulimo waciindi coonse kwamyaka iinda ku 65. Kwamyaka minji, bakali kuyandika kulanganya bausyi baba Rose, balo ibakali kuyandika kulanganya ciindi coonse. Ba José abalo bakalaandwidwe akaambo kabulwazi bwakkansa alimwi bakali kusilikwa kubelesya nzila ya chemotherapy (eeyi ninzila iibelesyegwa kusilika bulwazi bwakkansa). Sena Jehova wabagwasya banabukwetene aaba basyomeka? Inzya, pele ino muunzila nzi? Nkwiinda muli ba Tony aba Wendy, banabukwetene bamumbungano ibakabapa ŋanda yakukkala. Ba Tony aba Wendy bakali kuyanda kuti bapainiya baciindi coonse kabakkala mumo kakunyina kubbadela. Myaka yamusyule, kwiinda mukusondela awindo yakucikolo, ba Tony bakali kubabona bunji bwaziindi ba José aba Rose kabaunka mumulimo wakukambauka. Bakali kubayanda akaambo kabusungu mbobakabona muli mbaabo, alimwi eeci cakabakulwaizya kapati. Nobakabona kuti banabukwetene aaba bacembeede bakaaba buumi bwabo boonse kuli Jehova, ba Tony aba Wendy bakakulwaizyigwa kubapa ŋanda. Kwamyaka iili 15 yainda, babagwasya ba José aba Rose, lino ibajisi myaka iili kuma 80. Banabukwetene ibacembeede aaba babona kuti kugwasyigwa ooku abanabukwetene bacili bana-bana ncipego cizwa kuli Jehova.

Andinywe Leza umutambika ‘janza lyakwe lyalulyo lyabululami.’ Sena muyookuzumina kutamba ooku kwiinda mukumupa janza lyanu ooyo uumusyomezya kuti: “Utayoowi pe. Ndilakugwasya”?