Ba Don aba Margaret * bakakkomana kuswaigwa amwanaabo musimbi antoomwe amukwasyi wakwe. Kujatikizya cakulya camamanino ncobakali kuyanda kulida antoomwe, ba Margaret basyaazibwene mumakani aakujika balo ibakacita litaya, bakajika cakulya citegwa makkaloni (macaroni) alimwi acciizi (cheese), icakulya ncobayandisya kapati bazyukulu babo bobilo.

Ciindi boonse nobakakkede, ba Margaret bakaleta cakulya akucibikka akati katebulu. Nobakacivwununa cakulya, bakagambwa kujana kuti kwakali buyo musinza wacciizi mumutiba! Ba Margaret bakaluba kubikka makkaloni, * yalo iyakali kuyandika kapati.

Tacikwe makani aciimo naa luzyibo ndotujisi, toonse tulalubizya. Tulakonzya kulubizya kwiinda mukwaamba majwi aatali kabotu naa kucita cintu icili kabotu pele aciindi icitali kabotu, naa ambweni kuluba kucita cintu cimwi ciyandika. Nkaambo nzi kulubizya ncokucitika? Ino tweelede kukulanga buti? Sena kulakonzya kweelebwa? Kukulanga munzila iili kabotu kulubizya inga kwatugwasya kujana bwiinguzi kumibuzyo eeyi.

Ciindi notwacita cintu cimwi icili kabotu, tulakkomana kulumbaizyigwa alimwi akulimvwa kuti tuleelede kulumbaizyigwa. Ciindi notwalubizya, noliba leelyo notwatacita acaali naa bantu bamwi tiibakubona kulubizya ooko, sena tatweelede kuzumina buyo kuti twalubizya? Kutegwa tucite boobo tuyandika kulicesya.

Ikuti katuli bantu balisumpula, tulakonzya kusola kuubya-ubya kulubizya kwesu, kupa muntu uumbi mulandu, naa kukazya buya kuti tiitwalubizya. Kucita boobu kanji-kanji kusololela buyo kumapenzi. Penzi inga tiilyamana, alimwi bantu ibanyina mulandu balakonzya kupenga kakunyina akaambo. Nokuba kuti tulakonzya kuzwidilila lino kusisa kulubizya kwesu, tweelede kuyeeya kuti kumbele, “umwi aumwi wesu uyoolyaambilila mwini kuli Leza.”—Baroma 14:12.

Leza ukulanga munzila yeelede kulubizya. Mubbuku lya Intembauzyo, Leza waambwa kuti “ngusiluse alimwi ngusilweetelelo”; “tatuyandawidi tumpenda ciindi coonse, nokuba kutubikkilila lyoonse mane kukabe kutamani.” Ulizyi kuti bantu tabalondokede alimwi ulituzyi kabotu tumpenda ntotwakazyalwa aantuto, “ulaibaluka kuti tuli bulongo buyo.”—Intembauzyo 103:8, 9, 14.

Kuyungizya waawo, mbubwenya mbuli usyi siluse, Leza uyanda kuti andiswe tobana bakwe, kulubizya katukulanga mbuli mbwakulanga walo. (Intembauzyo 130:3) Caluyando, Jwi lyakwe lilapa lulayo alimwi abusolozi bunji ibukonzya kutugwasya kulwana kulubizya kwesu alimwi akwabamwi.

Kanji-kanji ikuti muntu walubizya, inga upa bantu bambi mulandu naa kupa twaambo twakulitamizya kujatikizya cintu ncaakaamba naa kucita. Muciindi cakucita boobo, ikuti majwi ngomwaamba amunyemya muntu umwi, inga cabota kulilekelela buyo, akubambulula mpomwalubizya mpoonya akuzumanana kuba acilongwe amuntu ooyo. Sena kuli cintu citali kabotu ncomwakacita calo icakamunyonganya nywebo lwanu naa muntu uumbi? Muciindi cakulimvwa  bubi naa kupa bamwi mulandu, inga cabota kubeleka buyo canguzu kutegwa mubambe twaambo. Kutatanyana kupa bamwi mulandu inga kwapa buyo kuti muntu azumanane kunyema alimwi akupa kuti penzi likomene. Muciindi caboobo, amwiiye kukulubizya kwanu, amubambulule aawo aayandika alimwi akucita iceelede kucitwa.

Nokuba boobo, ikuti muntu uumbi nguwalubizya, ncuuba-uba kucita zintu munzila iitondezya kuti tiitwakkomana. Pele inga cainda kubota kutobela lulayo lwa Jesu Kristo lwakuti: “Aboobo, zintu zyoonse nzyomuyanda kuti bantu bamucitile, anywebo nzyomweelede kubacitila.” (Matayo 7:12) Ciindi nomwalubizya, naaba asyoonto buyo, tacidoonekwi kuti inga mwayanda kuti bamwi bamufwide lubomba naa kutakubikkila buyo maano kulubizya ooko. Aboobo sena andinywe inga tiimwasolekesya kutondezya luzyalo luli boobo kuli bamwi?—Baefeso 4:32.

Kweelana ambolyaamba bbuku limwi lipandulula mabala, kulubizya kulaboola akaambo “kakutazilanga kabotu zintu, kutazyiba twaambo toonse tujatikizyidwe naa kutabikkila maano. Tweelede kuzumina kuti aciindi cimwi, muntu uuli woonse ulakonzya kuba akampenda kamwi akati katootu itwaambwa atala aawa. Nokuba boobo, kulubizya kulakonzya kuceya ikuti twalanga-langa njiisyo zimwi zyamu Magwalo iziyandika kapati.

Njiisyo imwi ijanika mulugwalo lwa Tusimpi 18:13, ilwaamba kuti: “Ikuti muntu wavwiila katanaamvwisya kabotu makani, mbufwubafwuba alimwi nkulijazya nsoni.” Masimpe, ikusaanguna kumvwa makani woonse mbwaabede alimwi akuyeeya mbomweelede kwiingula, inga camugwasya kuti mutaambi caambaambe naa kucita zintu cakutayeeya. Kusaanguna kuzyiba twaambo toonse tujatikizyidwe kulayandika kapati nkaambo kugwasya kutaimpya ikucita zintu alimwi akulubizya.

Njiisyo aimbi yamu Bbaibbele yaamba kuti: “Kamusoleka kusikila mpomugolela kukkala muluumuno abantu boonse.” (Baroma 12:18) Amusolekesye kukulwaizya muuya waluumuno alimwi alukamantano. Ciindi nomubeleka abamwi, amubabikkile maano akubalemeka alimwi amusolekesye kubalumbaizya akubakulwaizya. Kwiinda mukucita boobo, cilakonzya kuuba-uba kubalekelela ciindi nobaamba majwi aatali kabotu naa kucita cintu citali kabotu, alimwi ciindi nobatulubizyila cintu cipati, tulakonzya kutubamba twaambo munzila iili kabotu.

Amubone naa kuli cintu cibotu ncomukonzya kwiiya kukulubizya ooko. Muciindi cakuyandaula twaambo twakulitamizya kujatikizya cintu ncomwakaamba naa kucita, amucibone kuti eeci ncoolwe cakwiiya kuba abube bubotu. Sena inga mwayandika kubutondezya kapati bube bwakukkazika moyo, kuba aluzyalo naa kulilesya? Ino mbuti kujatikizya kubomba moyo, luumuno alimwi aluyando? (Bagalatiya 5:22, 23) Kwiinda mukucita boobo, mulakonzya kuzyiba cintu ncomuteelede kuyoocita ciindi ciboola. Amusole kulijata kwiinda mukutafwambaana kunyema. Kuba abube bwakuseka-seka inga kwamugwasya kucesya mazwanga.

Kukulanga munzila iili kabotu kulubizya cilakonzya kutugwasya kukulwana munzila iili kabotu ciindi nokwacitika. Inga catugwasya kuba aluumuno alimwi akukkala muluumuno abamwi. Ikuti twasolekesya kwiiya kukulubizya kwesu, tuyooba bantu basongo alimwi bantu banootukkomanina kapati. Tatukatyompwi kapati akaambo kakulubizya kwesu naa kulipa milandu. Kuzyiba kuti abamwi balwana kulubizya kwabo kuyoopa kuti tubayande kapati. Ciinda zyoonse, tulakonzya kugwasyigwa kwiinda mukwiiya luyando lwa Leza alimwi ambwatulekelela camoyo woonse.—Bakolose 3:13.

Sena kulubizya kwaba Margaret ibaambwa kumatalikilo kwakanyonganya ciindi cikkomanisya ncowakajisi mukwasyi? Peepe. Boonse bakabona buyo mbocakali kusesya eeco icakacitika, kwaambisya ba Margaret, nokuba boobo, bakakkomana kulya cakulya eeco icatakajisi makkaloni! Mumyaka yakatobela, bazyukulu aabo bobilo bakabalwiida bana babo cintu eeco icakacitikide alimwi azintu zikkomanisya nzyobakali kuyeeya kujatikizya bamakaapanyina. Tiibakabijilwa pe, kayi ooko kwakali kulubizya buyo!