Mbubwenya buyo, toonse tulangila bukkale buyoosya citaambiki ibuli mbuli “guwo pati,” bwalo Jesu mbwaakaamba kuti “mapenzi mapati.” (Matayo 24:21) Kunyina nkotukonzya kutijila kutegwa twaayelebe mapenzi aaya aaboola. Pele kuli ncotukonzya kucita kutegwa tulikwabilile. Ino inga twacita nzi?

Mu Mulumbe wakwe Waacilundu, Jesu Kristo wakaamba kuti: “Aboobo amuzumanane kusaanguna kuyandaula Bwami [bwa Leza] abululami bwakwe.” (Matayo 6:33) Muunzila nzi mbotukonzya kucita boobo?

Amusaangune kuyandaula Bwami bwa Leza. Eeci caamba kuti Bwami bwa Leza tweelede kububona kuti ncecintu ciyandika kapati kwiinda cintu cimbi cili coonse. (Matayo 6:25, 32, 33) Nkaambo nzi ncotweelede kububona boobo? Nkaambo kakuti bantu tabakonzyi naaceya kwaamana mapenzi aabantu. Bulikke Bwami bwa Leza mbobukonzya kucita cintu eeci cikatazya kapati.

Amuyandaule bululami bwakwe. Tweelede kusolekesya kutobela milawo ya Leza iiluleme alimwi anjiisyo zyakwe. Nkaambo nzi? Nkaambo kakuti ikuti naa twalisalila lwesu tobeni ciluzi acitaluzi, eeco inga caleta mapenzi aataambiki. (Tusimpi 16:25) Pele kuti naa twapona kweelana azyeelelo zya Leza, tuyoopa kuti akkomane alimwi tuyooba abuumi bukkomanisya.—Isaya 48:17, 18.

Amuzumanane kusaanguna kuyandaula Bwami bwa Leza alimwi abululami bwakwe. Jesu wakacenjezya kuti ibamwi balakonzya kunyonganizyigwa akutalika kuyeeya kuti balakonzya kujana lukwabililo kwiinda mukuba amali manji kapati. Bamwi balakonzya kulekela kulibilika kwamubuumi kubatyompya  cakuti mane balaalilwa kujana ciindi cakuyandaula Bwami bwa Leza.—Matayo 6:19-21, 25-32.

Nokuba boobo, Jesu wakasyomezya kuti aabo bagwasyilizya Bwami bwa Leza banoojisi nzyobayandika lino alimwi bayooba azilongezyo zitamani kumbele.—Matayo 6:33.

Nokuba kuti basikwiiya ba Jesu bamumwaanda wamyaka wakusaanguna bakali kusaanguna kuyandaula Bwami bwa Leza abululami bwakwe, kunyina nobakaabona mamanino aakucisa alimwi akupenga koonse nobakacili kupona. Pele bakalikwabilidwe. Munzila nzi?

Bakali kupona kweelana azyeelelo zya Leza ziluleme alimwi eeci cakabakwabilila kumapenzi ngobakajisi aabo ibakali kuunduluzya ncaakaamba Leza. Lusyomo lwabo luyumu lwakuti Bwami bwakali kuyooboola lwakabagwasya kuliyumya nomuba muzintu zikatazya kapati mubuumi. Alimwi Leza wakabapa “nguzu zigambya iziinda zyabantu” kutegwa baliyumye kumapenzi ngobakali kujana.—2 Bakorinto 4:7-9.

Banakristo bamumwaanda wamyaka wakusaanguna bakaatobela malailile aa Jesu aakusaanguna kuyandaula Bwami. Bakakambauka makani mabotu aa Bwami kumasena oonse nkobakabede. (Bakolose 1:23) Sena kuli bacita oobo amazuba aano?

Inzya! Bakamboni ba Jehova balizyi kuti kusyeede buyo ciindi cisyoonto kuti Bwami bwa Leza bunyonyoone bweende bwazintu oobu. Aboobo balacita kufwumbwa ncobakonzya kutobela malailile aa Jesu aakuti: “Makani mabotu aa Bwami aaya ayookambaukwa munyika yoonse kuti bukabe bumboni kumasi oonse, mpoonya mamanino ayoosika.”—Matayo 24:14.

Ino muyoocita buti kujatikizya makani mabotu? Tumukulwaizya kuti mube mbuli bantu bamumwaanda wamyaka wakusaanguna ibakali kukkala ku Bereya mudolopo lyaku Makedoniya. Ciindi nobakamvwa makani mabotu aa Bwami kumwaapostolo Paulo, “bakaliyandide kapati mumyoyo” kwaatambula. Mpoonya ‘bakavwuntauzya cakulomya mu Magwalo’ kutegwa basinizye naa mulumbe wakwe wakali kweendelana a Magwalo, kumane bakazitobela nzyobakaiya.—Milimo 17:11, 12.

Andinywe inga mwacita mbubwenya oobo. Kwiinda mukusaanguna kuyandaula Bwami bwa Leza abululami bwakwe, muyoojana lukwabililo lino alimwi muyookkala muluumuno lutamani akuliiba kumbele aamazuba.