Ba Blessing * bakasika mu Europe kabalangila kujana mulimo wakubamba bantu masusu. Pele nokwakainda mazuba aali 10 kabaumwa, alimwi akukongwa kuti bamukwasyi wabo mbobakasiide kuŋanda balalwanwa, ba Blessing bakasinikizyigwa kutalika mulimo wakuvwuula.

Ba Blessing bakeelede kupanga mali aasika ku 200 kusikila ku 300 euros mubusiku bomwe kutegwa kababbadela cikwelete camali aainda ku 40,000 euros * ngaakali kuyanda mukaintu iwakali kulanganya ŋanda yabamavwuule. Ba Blessing bakaamba kuti: “Kanji-kanji ndakali kuyeeya makani aakutija, pele ndakali kuyoowa ncobakali kuyoocita kumukwasyi wangu ikuti naa ndatija. Ndakanyina cakucita.” Cakuluula cabo cilikozyenye azyakuulula zyabantu babalilwa ku 4 miliyoni bali mubuzike bacita mulimo wakuvwuula mumasi.

Myaka iitandila ku 4,000 yainda, mukubusi uutegwa Josefa bakamusambala banabokwabo. Wakalijana mubuzike muŋanda yamuna Egepita wakajisi mpuwo kapati. Mukwiimpana aba Blessing, kumatalikilo Josefa kunyina naakali kumupenzya simalelaakwe. Pele ciindi naakakaka koonana amukaintu wasimalelaakwe, wakatamikizyigwa kuti wakali kuyanda kumujata. Wakabikkwa muntolongo akwaangwa nsimbi.—Matalikilo 39:1-20; Intembauzyo 105:17, 18.

Josefa wakali muzike wansiku; ba Blessing bakali bazike bamumwaanda wamyaka wa 21. Pele boonse bakajatikizyigwa acilengwa eeci cakaindi cakubba bantu, imulimo wakweendelezya bantu mbuli kuti zintu zyakusambala, wakuyanda buyo kujana mali kutali kubikkila maano kubuumi bwabantu.

Nkondo yakapa kuti cuube-ube kuzisi kujana bazike. Mwami muna Egepita Thutmose III waambwa kuti wakabweza baange bali 90,000 nobakazwa kunkondo ku Kanana. Bana Egepita bakatalika kubelesya baange  aaba mumigoti yamabwe, kuyaka matempele, alimwi akusya mifwolo.

Mubulelo bwabana Roma, nkondo ayalo yakapa kuti bazike bavwule, alimwi zimwi ziindi kuyanda bazike cakali kusololela kunkondo. Kuyeeyelwa kuti kuzikusika mumwaanda wamyaka wakusaanguna, mweelwe wabazike wakali kutandila acisela camweelwe wabantu bamu Rome. Bunji bwabazike bana Egepita alimwi abana Roma bakali kubelesyegwa calunya. Mucikozyanyo, myaka njaakali kulangilwa kupona muzike iwakali kubeleka mumigoti yamabwe yabana Roma yakali kubalilwa buyo kumyaka iili 30.

Mboyakali kuyabuya myaka, buzike bwakaindila buya kubija. Kuzwa mumwaanda wamyaka wa 16 kusika mumwaanda wamyaka wa 19, kusambala bazike akati ka Africa alimwi a America akali makwebo aapa mpindu kapati munyika. Lipooti ya UNESCO yakaamba kuti: ‘Kuyeeyelwa kuti bamaalumi, bamakaintu alimwi abana bali akati ka 25 miliyoni naa 30 miliyoni bakabbigwa mpoonya akusambalwa.’ Myaanda myaanda yazyuulu zyabantu baambwa kuti bakafwa ciindi nobakali kuzabuka lwaanje lwa Atlantic. Ba Olaudah Equiano, imuzike wakafwutuka wakaamba kuti: “Cakali kweetezya kapati akukatazya kusyoma kumvwa kukwiila kwabamakaintu, alimwi akutongela kwababo bakali kuyanda kufwa.”

Cuusisya ncakuti, buzike taali makani aakali kucitika buyo kaindi. Kweelana amboyakaamba mbunga ya International Labour Organization, bamaalumi, bamakaintu, alimwi abana babalilwa ku 21 miliyoni bacibeleka kabali bazike akuvwola buyo mali masyoonto naa kutavwolela limwi. Bazike bamazuba aano babelekela mumigoti yamabwe, mobapangila zisani, mobapangila zitina, mumaanda aabamavwuule, alimwi amumaanda aabantu buyo. Nokuba kuti eeci tacili mumulawo, buzike buli boobu buyabwiindila buya.

Kweendelezyegwa calunya kwapa kuti bazike banji balwanine lwaanguluko. Mumwaanda wamyaka wakusaanguna B.C.E., sikulwana Spartacus alimwi abazike babalilwa ku 100,000 bakasola kuzanga mu Rome nokuba kuti tiibakazwidilila. Mumwaanda wamyaka wa 18, bazike ibakali ansumbu ya Caribbean yaku Hispaniola bakabukila basimalelaabo. Akaambo kakweendelezyegwa calunya nkobakali kucitilwa bazike mumyuunda yanzimbe, cakapa kuti kube nkondo yamucisi mumwenya iyakatola myaka iili 13 calo cakapa kuti cisi ca Haiti cibe alwaanguluko mu 1804.

Nokuba boobo, kulonga kwabana Israyeli kuzwa mu Egepita, cakutadooneka kwakaba kuzwidilila kuzwa mubuzike kutanacitikide kuzwa kaindi. Kulangilwa kuti bantu bali 3 miliyoni—cisi coonse—bakaangululwa mubuzike ku Egepita. Masimpe bakaleelede kwaangululwa. Bbaibbele lipandulula buumi mbobakali kupona mu Egepita kuti bwakali ‘bukkale  bukatazya mumilimo iili yoonse yabuzike.’ (Kulonga 1:11-14) Mane Farao umwi wakabikka mulawo wakujaya bavwanda kutegwa acesye mweelwe wabana Israyeli iwakali kuyaabukomena kapati.—Kulonga 1:8-22.

Kwaangululwa kwabana Israyeli kuzwa mubukkale bwalunya ibwakali mu Egepita kwakalilibedelede nkaambo Jehova nguwakabagwasyilizya. Leza wakaambila Musa kuti: “Ndilaazyi kabotu mapenzi aabo. Ndilaseluka kuyoobavwuna.” (Kulonga 3:7, 8) Kusikila sunu, kufwumbwa nkobabede ba Juda, balasekelela Pobwe Lyakwiindilila mwaka amwaka kwiibaluka ciindi eeci.—Kulonga 12:14.

Bbaibbele lyaamba kuti: “Kuli Jehova Leza wesu kunyina kutalulama,” alimwi litusyomezya kuti tanaacinca pe. (2 Makani 19:7; Malaki 3:6) Leza wakatuma Jesu kuti ‘aambilizye kwaangununwa kubaange . . . , ikwaangununa badyaaminidwe.’ (Luka 4:18) Sena eeci cakali kwaamba kwaangununwa kwini kwamuzike uuli woonse? Peepe. Jesu wakatumwa kuti aangunune bantu kuzwa kubuzike bwacibi alimwi alufwu. Mukuya kwaciindi wakaamba kuti: “Kasimpe kayoomwaangununa.” (Johane 8:32) Naaba mazuba aano, kasimpe nkaakayiisya Jesu kalabaangununa bantu munzila zinji.—Amubone kabbokesi kakuti “ Kwaanguluka Kuzwa Kumusyobo Wabuzike Umwi.”

Mubwini, Leza wakagwasya Josefa alimwi aba Blessing kuzwa mubuzike munzila ziindene. Mulakonzya kwaajana makani aakkomanisya aa Josefa muzyaandaano 39 kusika ku 41 mubbuku lyamu Bbaibbele lya Matalikilo. Kuyandisisya lwaanguluko kwaba Blessing akwalo kulakkomanisya kapati.

Nobakatandwa mucisi cimwi caku Europe, ba Blessing bakaunka ku Spain. Okuya bakaswaanganya Bakamboni ba Jehova mpoonya bakatalika kwiiya Bbaibbele ambabo. Kabakanzide kubambulula bukkale bwabo, bakajana mulimo uuli kabotu mpoonya akwaambila mukaintu iwakali kulanganya ŋanda yabamavwuule nkobakajisi cikwelete kaindi kuti acesye mweelwe wamali aacikwelete ngobakeelede kunoobbadela mwezi amwezi. Bumwi buzuba, ba Blessing bakatambula fooni kuzwa kumukaintu iwakali kulanganya ŋanda yabamavwuule. Wakali kuyanda kulekelela ba Blessing cikwelete akulomba kulekelelwa. Ino ncinzi cakacitika? Awalo wakatalikide kwiiya Bbaibbele a Bakamboni ba Jehova! Ba Blessing bakaamba kuti: “Kasimpe kalakonzya kukwaangulula munzila zigambya.”

Jehova Leza wakacimwa kapati akaambo kalunya ilwakali kucitikila bazike bana Israyeli mu Egepita; kweelede kuti mbwalimvwa amazuba aano kujatikizya kutalulama kucitika. Masimpe, kumana buzike bwamusyobo uuli woonse kuyandika kucinca kupati mubantu. Pele Leza usyomezya kuleta kucinca ooko. “Kuli majulu mapya anyika mpya nzyotulindila swebo kweelana acisyomezyo cakwe, alimwi muli zyeezyi muyooba bululami.”—2 Petro 3:13