Bunji bwabantu balazuminizya kuti nzyobacita bantu bambi zililuzi naa pe. Mucikozyanyo, kujaya muntu, kujata naa koona muntu cakumusinikizya alimwi akutundulula bana mumakani aakoonana micito iizyibidwe abantu banji kuti taiyandiki. Mpoonya bululami, luse alimwi alweetelelo mbube bukulwaizyigwa kapati. Pele ino mbuti kujatikizya zintu mbuli, kusala muntu wakoonana limwi, kwaamba masimpe alimwi ambotukonzya kukomezya bana? Bantu banji bayeeya kuti tacikwe makani ambwaasala muntu. Bayeeya kuti kusala kuli koonse kuli buyo kabotu. Kanji-kanji bantu balapanga zyakusala kweelana ambolimvwa alimwi ambobayeeya bantu babazingulukide kujatikizya makani aayo. Sena lyoonse cili kabotu kucita boobo?

Kanji-kanji tulapanga zyakusala iziyeeme ambotulimvwa kujatikizya ciluzi alimwi acitaluzi. (Baroma 2:​14, 15) Nobaba bana basyoonto balazyiba ciindi nobateendelezyegwa kabotu alimwi balalipa mulandu ciindi nobacita cintu citaluzi. Mbotuyaabukomena, tulaiya kujatikizya ciluzi acitaluzi kuzwa kubantu mbotuyanzana limwi naa kuzwa kucikombelo nkotuzulilwa. Ciindi notupanga zyakusala, manjezeezya eesu akayiisyigwa alatwaambila kujatikizya ciluzi alimwi acitaluzi.

Kuzyiba ciluzi alimwi acitaluzi kulakonzya kutugwasya kutondezya lweetelelo, kulumba, bululami alimwi aluzyalo kubantu. Kunze lyaboobo, kulatugwasya kulilesya kutacitila bamwi zintu zikonzya kubacisa naa zikonzya kupa kuti tusampuke alimwi akulipa mulandu.

Sena lyoonse cilagwasya kucita zintu kweelana ambotulimvwa? Mukubusi wazina lya Garrick wakaamba boobu kujatikizya buumi mbwaakasala: “Ndakali kupona kufwumbwa mbondakali kuyanda.” Pele wakajana kuti kucita cintu ncaakali kuyeeyela kuti nceciluzi, tiikwakali kumugwasya. Wakapandulula kuti buumi bwakwe tiibwakali kukkomanisya nkaambo bwakali bwakutalilemeka mumakani aakoonana, kubelesya misamu iikola, bucakolwa alimwi abukali.

Kunze lyakutobela mbotulimvwa, kanji-kanji tulabikkila maano kujatikizya bantu bamwi mbobakonzya kukubona kusala kwesu. Aboobo tulakonzya kwiiya kuluzyibo ndobajisi alimwi abusongo. Tulalemekwa abanamukwasyi, balongwe alimwi abantu bakubusena nkotukkala ciindi notucita cintu ncobayeeya kuti nceciluzi.

Sena lyoonse cilagwasya kutobela mbobalimvwa bantu bamwi? Ciindi naakacili mukubusi, Priscila wakali kucita zintu nzyobakali kucita bamusela wakwe nzyaakali kuyeeya kuti zyakaliluzi alimwi wakali kujatikizyigwa mukoonana kwabantu batakwetene. Pele nokuba kuti bamwi bakali kubona kuti ncaakali kucita cakaliluzi, walo kunyina naakakkomene. Wakaamba kuti: “Kucita zintu nzyobakali kucita bantu boonse tiikwakali kundikkomanisya. Cakandipa kucita zintu zyatakaluzi alimwi akubikka buumi bwangu muntenda.”

Mbotulimvwa alimwi ambobalimvwa bamwi kulagwasya kapati kucikonzya kwiindanya ciluzi acitaluzi. Pele kucita boobo talili lyoonse nokugwasya. Zimwi ziindi tulakonzya kuliletela mapenzi alimwi abamwi akaambo kakuti tatuzyi ciyoozwa mpawo akaambo kakusala kwesu. (Tusimpi 14:12) Alimwi buya ciindi notubona kuti nzyotuyeeya alimwi anzyobayeeya bamwi zililuzi, tacaambi kuti tatukonzyi kulijana muntenda iili yoonse naa kuti tatuyandiki kupanga kucinca kuli koonse. Amana buya, zintu izyakali kubonwa kuti taziluzi kaindi, lino zibonwa kuti zili buyo kabotu, mpoonya bukkale ibwakali kubonwa kuti buli kabotu lino bubonwa kuti tabuli kabotu.

Sena kuli busolozi bugwasya kwiindanya ciluzi alimwi acitaluzi? Sena kuli zyeelelo zyakulilemeka nzyotukonzya kutobela mazuba aano zyalo izitakatupi kuusa kumbele?

Cikkomanisya ncakuti, nkokuli nkotukonzya kujana busolozi bujatikizya makani aakulilemeka ibukonzya kutugwasya toonse tacikwe makani ankotukkala. Cibalo citobela cilabandika nkotukonzya kujana busolozi buluzi ibugwasya kwiindanya ciluzi alimwi acitaluzi.