NCOLYAAMBA BBAIBBELE

Akaambo kakuti nyika iyaambwa ijisi zisusi izitamukkomanisyi Leza, nkokuti icaambwa taili nyika iini. Muciindi caboobo, mbantu ibatalemeki Leza, ibalipa kuba basinkondonyina anguwe. (Jakobo 4:4) Bantu ibali munyika eeyi “bayoopegwa cisubulo calubeta lwakunyonyweedwa limwi kukabe kutamani.” (2 Batesalonika 1:7-9) Kulubazu lumwi, bantu ‘ibatali banyika,’ ibamvwida Jesu Kristo bajisi bulangizi bwakupona kukabe kutamani.—Johane 15:19.

Lugwalo lwa 1 Johane 2:17 kumamanino lwaamba kuti: “Ooyo uucita kuyanda kwa Leza unooliko lyoonse mane kukabe kutamani.” Masimpe, muntu ooyo ulijisi bulangizi bwakupona kukabe kutamani mpoonya aano anyika kweelana ambokulembedwe mulugwalo lwa Intembauzyo 37:29 kuti: “Balulami bayookona nyika, alimwi bayookkala alinjiyo lyoonse mane kukabe kutamani.”

“Mutayandi nyika noziba zintu zili munyika. Ikuti naa muntu kayanda nyika, nkokuti iluyando lwa Taata taluko pe mulinguwe.”—1 Johane 2:15.

NCOLYAAMBA BBAIBBELE

Mamanino ayoosika muzibeela zyobilo. Cakusaanguna, Leza uyoonyonyoona bukombi bwakubeja, bwalo ibwiimininwa amuvwuule wiitwa kuti “Babuloni Mupati.” (Ciyubunuzyo 17:1-5; 18:8) Ulyaamba kuti ulasyomeka kuli Leza pele kumwi umvwana abeendelezi batwaambo twacisi banyika. Nokuba boobo, beendelezi aaba bayakumubukila. ‘Bayoomusulaika muvwuule alimwi bayoomusaala akumusiya mantanda, alimwi bayoolya nyama yamubili wakwe akumuumpa amulilo cakumaninina.’—Ciyubunuzyo 17:16.

Mpoonya Leza uyoolwana beendelezi batwaambo twacisi nkokuti “bami bamunyika yoonse.” Antoomwe abasizibi boonse, bayoonyonyoonwa “kunkondo yabuzuba bupati bwa Leza Singuzuzyoonse,” alimwi iyiitwa kuti “Amagedoni.”—Ciyubunuzyo 16:14, 16.

“Amuyandaule Jehova, nywebo nyoonse nobabombe myoyo bamunyika . . . Amuyandaule bululami, amuyandaule kubomba moyo. Ambweni muyoosiswa mubuzuba bwabukali bwa Jehova.”—Zefaniya 2:3.

NCOLYAAMBA BBAIBBELE

Mamanino ayoosika ciindi bantu baakucenjezyegwa cakumaninina kwiinda mukwaambilizyigwa kwa Bwami ba Leza nyika yoonse—mfwulumende yanyika yoonse iiyoonjila mubusena bwabulelo bwabantu. (Daniele 7:13, 14) Jesu Kristo wakaamba kuti: “Makani mabotu aa Bwami aaya ayookambaukwa munyika yoonse kuti bukabe bumboni kumasi oonse, mpoonya mamanino ayoosika.” (Matayo 24:14) Mulimo wakukambauka ooyu walo uutondezya bululami alimwi aluse lwa Leza, ncibeela ‘cacitondezyo’ caciindi cakumamanino. Citondezyo cilabikkilizya ankondo akati kazisi, mizuzumo, nzala alimwi amalwazi.—Matayo 24:3; Luka 21:10, 11.

Kunze aakwaambila limwi zintu iziyoocitika, Bbaibbele alimwi lilaamba bantu mbobanoopona “kumazuba aamamanino.” Tubala kuti: “Kuyooba ziindi zikatazya ncobeni. Nkaambo bantu bayooba basikuliyanda, bayandisya mali, . . . batamvwidi bazyali, . . . batalilesyi, bakali, batayandi bubotu, . . . bayandisya zyakulikondelezya kwiinda kuyandisya Leza.” *—2 Timoteyo. 3:1-5.

Zyoonse eezyi zitondezya ciindi icakatalika lya Nkondo Yakusaanguna Yanyika Yoonse kuma 1914. Alimwi kuzwa mumwaka ooyo, Bwami bwa Leza bwali kwaambilizyigwa munyika yoonse, alimwi Bakamboni ba Jehova bacibona kuti ncoolwe kuzyibwa kuti mbebacita mulimo ooyu. Mane buya, magazini yabo njobabelesya kapati ijisi mutwe wakuti Ngazi Yamulindizi Yaambilizya Bwami bwa Jehova.

“Aboobo amulangile, nkaambo tamuzyi buzuba nociba ciindi.”—Matayo 25:13.