Ikuti Munamukwasyi Kacisidwe
“Bataata nibakali kuyanda kubasaina kuzwa mucibbadela, twakalomba badokota babo kuti batwaambile nzyobakajana nobakabapima bulowa. Badokota bakatwaambila kuti malizauti akali buyo kabotu, pele bakaalanga alimwi. Bakagambwa kujana kuti, malizauti obilo taakali kabotu! Bakalilekelela mpoonya bakaita dokota umwi uucibwene. Bataata bakayumya. Pele tulikkomene kapati kuti twakabuzya mibuzyo.”—Maribel.
Kamutanaunka kucibbadela, amulembe mbwalimvwa mulwazi amisamu njanywa
Kubonana abadokota alimwi akukkala mucibbadela cilalemya. Mbubwenya mbotwabona kuli cakacitikila ba Maribel, cilayandika kugwasyigwa amulongwe naa munamukwasyi alimwi eeci inga cafwutula buumi. Mbuti mbomukonzya kumugwasya munamukwasyi uuciswa?
Kamutanaunka kucibbadela. Amumugwasye mulwazi kulemba mbwalimvwa alimwi amisamu njanywa aciindi eeco. Alimwi amulembe mibuzyo njomweelede kubuzya badokota. Amumugwasye mweenzinyoko kuyeeya makani oonse aajatikizya bulwazi bwakwe alimwi abantu bakacisidwe bulwazi oobo mumukwasyi. Mutayeeyeli kuti badokota balaazyi kale makani aaya naa kuti bayoomubuzya kujatikizya ngawo.
Amubikkile maano, amubuzye mibuzyo cabulemu, alimwi akulemba twaambo tuyandika
Nomuli kucibbadela. Amubone kuti nywebo alimwi amulwazi mulazimvwisya nzyobaamba badokota. Amubuzye mibuzyo, pele mutanoobandiki cankazi. Amumuleke mulwazi kuti abuzye mibuzyo alimwi akulyaambilila. Amuswiililisye, alimwi akulemba twaambo tuyandika. Amubuzye kujatikizya busilisi bumbi bukonzya kupegwa. Zimwi ziindi, cilakonzya kugwasya kumwaambila mulwazi kuti abuzye abamwi.
Amubandike nzyaamwaambila dokota, akulanga misamu njomwapegwa
Nomwazwa kucibbadela. Amubandike amulwazi nzyomwaambilwa kucibbadela. Amubikkile maano kubona kuti mulwazi unywa misamu yeelede. Amumukulwaizye kuti kanywa misamu kweelana ambobakaamba badokota alimwi akubazyibya kuti naa watalika kumvwa bubi akaambo kamusamu ngwanywa. Amumukulwaizye mulwazi kuti atatyompwi abukkale bwakwe, akwaatobela malailile aambi ngaakapegwa, mbuli kubweza misamu aimwi. Amumugwasye kwiiya zinji kujatikizya bukkale bwakwe.
Nomuli Mucibbadela
Amubone kuti mafoomu oonse alembwa kabotu-kabotu
Amukkazike moyo alimwi akupakamana. Mulwazi iwapegwa bulo mucibbadela inga kalibilika alimwi akulimvwa kubula nguzu. Kwiinda mukukkazika moyo alimwi akupakamana, mulakonzya kugwasya bantu boonse kukkalwa moyo akucita zintu bweelede. Amubone kuti mapepa aatondezya kuti mwapegwa bulo alembwa kabotu-kabotu. Amulemeke kusala kwamulwazi kujatikizya busilisi mbwayanda. Ikuti kacisidwe kapati, amulemeke nzyaakalemba alimwi anzyobakonzya kwaamba bantu mbaakapa nguzu zyakumwiiminina. *
Amubaambile bamadokota kucinca nkomwabona
Amubweze ntaamu. Mutayoowi kwaamba mbomulimvwa. Kusama cabulemu alimwi akulilemeka kwanu kuli kabotu kulakonzya kupa kuti bamadokota bamubikkile maano kapati mulwazi alimwi akumupa busilisi bubotu kwiinda. Muzibbadela zinji, mulwazi ulalangwa-langwa abamadokota baindene-indene. Mulakonzya kubagwasya kwiinda mukubaambila nzyobaamba bamadokota abamwi. Nywebo mulimuzyi kabotu mulwazi, aboobo amwaambe kucinca kuli koonse nkomwabona.
Amucite kufwumbwa ncomukonzya pele kakunyina kunyonganya
Amutondezye bulemu akulumba. Bantu babeleka mucibbadela kanji-kanji inga balikatede. Amubacitile zintu mbubwenya mbomuyanda kuti kabamucitila andinywe. (Matayo 7:12) Amubalemeke akaambo kaluzyibo ndobajisi ambobalubelesya, mbobacita mulimo wabo cabusicamba, alimwi akubalumba akaambo kakusolekesya kwabo. Kulumba kuli boobu kulakonzya kubakulwaizya kucita kabotu.
Kunyina muntu uukonzya kweeleba kuciswa. Pele kwiinda mukubelesya bupampu alimwi alugwasyo, mulakonzya kumugwasya mweenzinyoko naa munamukwasyi kulimvwa kabotu mubukkale bukatazya.—Tusimpi 17:17.
^ par. 8 Milawo alimwi azilengwa zijatikizya mulwazi nzyayanda zilainda kubusena abusena. Amubone kuti mapepa oonse aamulwazi aamba nzyayanda kujatikizya busilisi alilembedwe moonse muyandika alimwi akuti akalembwa ino-ino.
Andiza Inga Mwaakkomanina Ayaaya
SINSIMUKA!
Ncolyaamba Bbaibbele kujatikizya buumi
Amwiiye ncolyaamba Bbaibbele kujatikizya kuciswa alimwi abusilisi.
