BANTU balabula kwakukkala akaambo katwaambo twiindene-indene. Bamwi, mbuli ba Joe, inga kuli mapenzi aabageme ngobajisi. Bambi, mbuli ba Martín, babona buumi mbobapona bantu boonse kuti tabujisi mpindu, aboobo basala kupona buumi bwiindene. Bamwi balabula kwakukkala akaambo kabucete, ntenda zilicitikila, kulwana mumaanda, kubelesya misamu iikola naa kuciindizya kunywa bukoko, bulwazi bwamumizeezo, kubula mali aakubbadelela ŋanda, alimwi akumaninwa mulimo.

Aciindi cimwi penzi lyakubula kwakukkala lyakalidumide kapati kumasi aacisumpuka naa kubantu bakazwa munkondo naa batajisi mali mucisi, pele lino penzi eeli, kweelana ambwaakaamba syaazibwene mumakani aakwiiya mbobubeleka bongo, Paul Toro, “lyaba penzi lipati kapati kumasi aasumpukide.” * Twaambo itupa kuti cibe boobo tulabikkilizya amilawo yamfwulumende iitatobelwi yakugwasya mikwasyi iitajani mali manji alimwi alwiindano iluyaabukomena akati kabantu bajisi mali abatajisi.

Bantu banji balalibilika zyabuzuba butobela. Nokuba boobo, bamwi bakucesya kulibilika ooku kwiinda mukulanga-langa ncolyaamba Bbaibbele kujatikizya ziboola  kumbele—makani ngotutiilange-lange. Bbaibbele alimwi lilakonzya kutugwasya kwiinda mukupa njiisyo zikonzya kutugwasya lino—njiisyo zigwasya mumakani aamali alimwi akuba abuumi bubotu, mbuli mbobakalibonena ba Joe aba Martín.

Ba Cindi ibakali kubabona ba Joe mulaibbulali mobakali kubeleka bakaamba kuti: “Ba Joe bakali kulibonya mbuli kuti mbasongo, balalilemeka alimwi balalicesya.” Mbwaanga ba Cindi bakali Bakamboni ba Jehova, bakali kubapa ba Joe mamagazini aa Ngazi Yamulindizi alimwi a Sinsimuka! alimwi bakabatamba ku Ciibalusyo Calufwu lwa Kristo mu 2007. Kumuswaangano ooyu, bantu bakabatondezya luzyalo alimwi abulemu, aboobo bakatalika kujanika kumiswaangano lyoonse. Alimwi bakazumina kwiiya Bbaibbele amwaalumi umwi wamumbungano.

Ba Joe bakaumbulizyigwa azintu nzyobakali kwiiya, aboobo bakatalika kuzitobela njiisyo zyamu Bbaibbele, nokuba kuti eeci cakali kuyandika kucinca kumwi kupati mubuumi bwabo. Mucikozyanyo, bakaiya kuti buumi ncipego kuzwa kuli Leza iceelede kulemekwa alimwi akuti kufweba kusofwaazya mubili. (Intembauzyo 36:9) Aboobo, bakacileka kufweba, kweelana anjiisyo iijanika ku 2 Bakorinto 7:1 yakuti: “Atulisalazye kuzintu zyoonse zisofwaazya mubili.” Kusala kwaba Joe tiikwakabagwasya buyo kuba abuumi buli kabotu, pele alimwi kwakabagwasya kubelesya kabotu mali.

Akaambo kakuti bakalubikkila maano lulayo lwamu Bbaibbele lwaamba kuti tweelede kucita kufwumbwa ncotukonzya kutegwa tulanganye nzyotuyandika, ba Joe bakatalika kuyandaula mulimo. * (1 Batesalonika 4:11, 12) Lugwalo lwa Mukambausi 2:24 lwaamba kuti: “Kumuntu, kunyina cintu cibotu kwiinda kulya, kunywa alimwi akukkomana mumilimo njabeleka canguzu.” Lukkomano oolu lulaboola akaambo kakuti bantu balatulemeka, nkaambo mulimo uucitwa cakusyomeka upa kuti bantu kabatulemeka. Alimwi upa kuti katugwasya babulide.—Baefeso 4:28.

Ba Cindi bakaamba kuti akaambo kakubona kuti ba Joe bakalicincide ncobeni, “bantu mumbungano bakabakkomanina. Bamwi bakabagwasya kuyandaula ŋanda iili kabotu alimwi azintu zimwi nzyobakali kuyandika.” Ba Joe bakazumanana kuyaambele mane bakabbapatizyigwa akuba umwi wa Bakamboni ba Jehova. Lino nobakulwaizya bantu kujana busongo buzwa kuli Leza ibujanika mu Bbaibbele, balaamba kweelana azyakabacitikila.—Tusimpi 3:13, 14.

Ba Martín ibakatalika kuyanda kuzyiba ncobaponena nobakajisi myaka iili 20, bakaamba kuti: “Ndakaunka kuzikombelo akuli basyaabusongo alimwi ndakali kubelesya misamu iikola, kandiyeeya kuti ndilazyiba ncotuponena. Pele tiindakagwasyigwa pe.” Bakakkala ku California, U.S.A. kwaciindi cisyoonto mpoonya bakaunka ku Hawaii. Bakaamba kuti: “Ndakali kuyeeya kuti ndaijana paradaiso.” Pele buyale bubotu bwacisi tiibwakacikonzya kumana buumba mbobakali kulimvwa. Bakaamba kuti: “Ndakatyompwa kapati cakuti ndakatalika kuyeeya kulijaya.” Eeci ncecakali ciindi nobakalila kapati akulomba Leza kuti, “Ikuti naa nkoli, ndakomba kondigwasya kukujana.”

 Ba Martín bakayeeya kuti kuli nkobakabwene cikwankwani cakalembedwe kuti “Ŋanda ya Bwami ya Bakamboni ba Jehova.” Bakaunka kuyoojanika kumiswaangano ya Bunakristo. Bakaamba kuti: “Ndakanjila kandijisi masusu malamfwu acilezu, alimwi zisani nzyondakasamide, ndakazisama kwamyezi minji kakunyina kucinca. Nokuba boobo, bakanditambula amaanza obilo.” Ba Martín bakazumina kwiiya Bbaibbele alimwi lyoonse bakali kweenda kuzwa kuŋanda yabo, kunkomwe kuya kudolopo kuyooiya Bbaibbele.

Ba Martín lino bakatalika kujana bwiinguzi kumibuzyo njobakajisi. Akaambo kaceeci, bakaleka kulimvwa kutyompwa alimwi bakalujana lukkomano ndwaakaamba Jesu naakati: “Balikkomene aabo bazyi kuti bayandika kusololelwa a Leza.”—Matayo 5:3.

Ba Martín bakacinca mbobabubona buumi alimwi eeci cakalibonya nobakatalika kutobela njiisyo zyamu Bbaibbele, njiisyo yakulanganya buumi bwabo, yalo yakabagwasya aba Joe, ibaambwa kale. Ba Martín bakatalika kubikkila maano mbobakali kulibonya, alimwi Bakamboni bakabagwasya kujana mulimo abusena kwakukkala. Bakaamba kuti: “Kaindi, ndakazyibidwe kuba mwaalumi uutajisi kwakukkala, pele lino bantu bakagambwa kucinca nkondakacita.”

Kumbele, ba Martín bakajokela ku Argentina, kwalo nkobakabbapatizyigwa akuba umwi wa Bakamboni ba Jehova. Lino balacikkomanina coolwe ncobajisi cakugwasya bantu balaanzala yakumuuya kujana bwiinguzi kumibuzyo njobajisi iijatikizya buumi.

Jeremiya, mubelesi wa Leza wakaindi, wakapona muciindi camapenzi mapati. Sinkondo silunya wakanjilila munzi wabo akubweza bantu banji kubatola mubuzike. (Malilo 1:3) Nokuba kuti bakamusiya, Jeremiya wakasweekelwa zyoonse nzyaakajisi. Kali mubuumba, wakapaila kuti: “Koyeeya mapenzi aangu ambondituntulika.”—Malilo 3:19.

Nokuba kuti wakapenga, Jeremiya tanaakatyompwa pe. Ino nkaambo nzi? Kaambo kamwi nkakuti wakalizyi kuti Jehova takonzyi kumulekelezya. (Jeremiya 1:8) Ikambi  nkakuti wakali kubala Magwalo, alo aasinsima ciindi bucete akupenga noziyakumana, mpoonya kuyooba luumuno lwini-lwini akukwabililwa.—Intembauzyo 37:10, 11.

Bukkale oobu buyoobako, ikutali akaambo kanguzu zyabantu, pele kwiinda mumfwulumende iilondokede yiitwa kuti Bwami bwa Leza. (Daniele 7:13, 14) Mwami wa Bwami oobo ngu Jesu Kristo, walo naakali anyika, iwakatondezya lweetelelo kubacete. (Luka 7:22; 14:13) Mubulelo bwakwe, “balulami bayoozwidilila, alwalo luumuno luyoovwula . . . Uyoovwuna mucete uukwiilila lugwasyo, uupengede alimwi amuntu uuli woonse uutajisi mugwasyi. Uyoobavwuna kukudyaamininwa akunkondo.”—Intembauzyo 72:7, 12, 14.

Mukuyiisya kwakwe, Jesu wakabikkila kapati maano ku Bwami bwa Leza. (Luka 4:43) Alimwi wakayiisya bantu kupaila kuti: “Abuboole Bwami bwako. Akucitwe kuyanda kwako ansi aano mbubonya mbuli kujulu.” (Matayo 6:9, 10) Ino buumi anyika bunooli buti Bwami bwa Leza bwaakutalika kweendelezya cakumaninina? Bbaibbele lilatwaambila zintu zikkomanisya ziyoocitika. Mucikozyanyo, kujatikizya balelwa ba Bwami bwa Leza lyaamba kuti:

• “Bayooyaka maanda akukkala mulingawo, bayoosyanga myuunda yamisaansa akulya micelo yanjiyo. Tabakayaki maanda kuti muntu uumbi akakkale nguwe mulingawo, alimwi tabakasyangi myuunda kuti muntu uumbi akalye nguwe micelo yanjiyo. . . . Basale bangu bayakwiikkomanina kapati milimo yamaanza aabo.”—Isaya 65:21, 22.

• “Bayookkala umwi aumwi munsi lyamusaansa wakwe amunsi lyamukuyu wakwe, alimwi takukabi muntu naba omwe uuyoobayoosya, nkaambo majwi aaya azwa kumulomo wa Jehova wamakamu.”—Mika 4:4.

Bulangizi oobu bulakonzya kutuumbulizya ciindi notuli mumasunko. Aciindi nciconya, njiisyo zyamu Bbaibbele zilakonzya kutugwasya kupona buumi bulaampindu noliba lino, mbubwenya mbuli ba Joe, ba Martín, alimwi abantu bamwi banji mbobalibonena. Masimpe, Mulengi wesu, Jehova Leza, utusyomezya kuti: “Ooyo uundiswiilila uyookkala kaliibide alimwi takanyongani akaambo kakuyoowa mapenzi.” (Tusimpi 1:33) Tusyoma kuti majwi aaya ayoomubeda aamasimpe mubuumi bwanu!