TUKKITI twakuvwuba kanji-kanji tweenda masiku. Kuboneka kuti malezu agwasya tukkiti ikuzyiba zintu izili afwaafwi alimwi akujata tunyama twakulya, ikapati ciindi nokwasiya-siya.

Amubone kaambo aaka: Malezu aatukkiti alijatene amaseelo aategwa ma tissue alo kumpela aajisi maseelo aategwa ma nerve. Ma nerve aaya alagwasya ikuzyiba kuti kuli zintu izyeenda nokuba kuti zyeenda buyo asyoonto, ikubikkilizya amuwo. Akaambo kaceeci, kakkiti kalakonzya kuzyiba kuti kuli zintu afwaafwi kakunyina kuzibona zintu eezyo—eeci cilakagwasya nokuli mudima.

Mbwaanga malezu alakagwasya kuzyiba kuti kuli muwo, kakkiti inga kalaabelesya ikuzyiba mpocibede alimwi amboceenda cintu ncokayanda kujata. Malezu alimwi alakagwasya kakkiti ikuzyiba mbocili cipati cipulo mpokayanda kunjila kakatananjila. Bbuku litegwa Encyclopædia Britannica lilazuminizya kuti “ncaabeleka malezu bantu bacimvwisya buyo asyoonto; nokuba boobo, kulizyibidwe kuti ikuti naa agelwa, kakkiti inga takacijisi nguzu aciindi eeco.”

Basayaansi bapanga malobboti aajisi ma sensor aabeleka mbuli malezu aakakkiti kutegwa kabacikonzya kwaabelesya kulanga-langa zintu. Syaazibwene musayaansi, Ali Javey, waku University of California, Berkeley wakaamba kuti ma sensor aaitwa kuti e-whiskers anoobeleka milimo iindene-indene iijatikizya malobboti aasumpukide, human-machine user interface alimwi amumakani aajatikizya biology.”

Ino muyeeya buti? Sena mbwaabeleka malezu aakakkiti ncintu cakaboola akaambo kakusanduka kwazintu naa cakalengwa buya?