SENA kuli cintu cicisa kwiinda kwaalilwa? Inzya nkocili, kuzwidilila ikutali kwamasimpe. Ncotuzyi ncakuti, ikuti mwaalilwa kucita cintu cimwi, mulakonzya kubweza ntaamu kutegwa mululamike zintu. Alimwi mulakonzya kwiiya kuli camucitikila akuba amakanze aakucita kabotu kumbele.

Kuzwidilila ikutali kwamasimpe kuliindene. Kulakonzya kupa muntu kuyeeya mbuli kuti ulazwidilila anu kuti taakwe ncajana. Ciindi muntu naazyiba kuti weelede kucinca, inga zintu zilibijide kale.

Amulange-lange cikozyanyo eeci. Cimwi ciindi Jesu Kristo wakabuzya kuti: “Nimpindu nzi muntu njajana ikuti wavwuba nyika yoonse pele wasweekelwa buumi bwakwe?” (Matayo 16:26) Makani aaya alakonzya kubajatikizya aabo ibabikkila kapati maano kuyandaula mali azyoonse nzyaakonzya kuula, ooku nkuzwidilila ikutali kwamasimpe. Ba Tom Denham, basikupa lulayo kujatikizya nzyayanda kucita muntu mubuumi, bakalemba kuti: “Kuyeeya buyo zyamakani aajatikizya kuba azyuuno zyaatala, kujana mali manji naa ikuba azintu zinji, tacipi kukkutila. Kuyeeya kuti kuzwidilila nkuba amali manji takugwasyi pe alimwi mukuya kwaciindi kulakonzya kumupa kulimvwa kuti kunyina ncomwacita.”

Tacidoonekwi kuti bantu banji mazuba aano balakonzya kukazumina kaambo aaka. Mubuvwuntauzi bumwi ibwakacitwa ku United States kwakajanika kuti amulongo wazintu izili 22 “izipa bantu kuzwidilila mubuumi, ikuba amali manji” kwakali anamba 20. Zintu izyakali kumatalikilo aamulongo ooyu zyakali kubikkilizya akuba abuumi bubotu, kuba abalongwe babotu akuba amulimo muntu ngwayanda.

Aboobo ciindi bantu banji nobabuzyigwa, balakonzya kuzyiba kwiindana kuliko akati kakuzwidilila kwini-kwini akuzwidilila ikutali kwamasimpe. Nokuba boobo, cilakatazya kusala zintu munzila iitondezya kuti kuzwidilila tukubona munzila yeelede.