Ikuti mwalanga masitetimenti aanu aakubbanki alimwi amapepa aatondezya zikwelete nzyomujisi, atondezya kuti mali aanu aile kumana mbubwenya mbuli musenga uuli mujanza mboukonzya kwiinda akati kaminwe yanu. Ambweni mwakakwatana caino-ino, pele mwakatalika kale kuciindizya kuula zintu. Sena mweelede kupa mulandu ngomukwetene limwi? Mutafwambaani kucita boobo! Amubelekele antoomwe, alimwi akulanga-langa zintu zipa kuti nyoonse nyobilo mulijane mubukkale buli boobu. *

Kucinca. Ikuti mwakali kukkala abazyali banu kamutanakwata naa kukwatwa, ambweni tamunazibila kubbadelela zintu alimwi akwaabanya mali ngomweelede kubelesya. Alimwi ambweni nywebo angomukwetene limwi, mali mwaabona munzila iisiyene. Mucikozyanyo, umwi ulakonzya kayandisya kuula buyo zintu kakuli umwi ulayandisya kuyobola mali. Inga cilatola ciindi kuti banabukwetene bacince alimwi akutalika kubelesya mali munzila njobakamvwana.

Mutawayiwayi. Ba Jim, ibakazwidilila mumakwebo balazumina kuti ciindi nobakazwa akukwata, kutazyeendelezya kabotu zintu kwaakabaletela mapenzi. Baamba kuti: “Akaambo kakuti ndakali kumuka kubbadela zikwelete, mebo abakaintu bangu twakasweekelwa mali manji kapati. Mali akatumanina!”

Kakole Kakubelesya Mali Ngomutabwene. Ncuubauba kuciindizya kuula zintu ikuti kamutaabwene mali kaazwa munkomo. Cilakonzya kuba boobo ikuti bunji bwazintu nzyomuula, mubelesya tukkaadi twakubbanki, Intaneti naa tuncini tumbi. Akaambo kakuti balakonzya kukweleta mali kakunyina buyumuyumu, banabukwetene bapya balakonzya kuyungwa kuciindizya kuula zintu.

Kufwumbwa naa ncinzi cimupa kuciindizya kuula zintu, makani aajatikizya mali alakonzya kumuletela buyumuyumu mulukwatano lwanu. Ibbuku limwi lyaamba kuti, “Banabukwetene banji baamba kuti mali ndepenzi lipati, nokuba kuti inga kabajisi mapenzi manji buti. Kanji-kanji mali ngaapa kuti kube mazwanga.”

Amube amakanze aakubelekela aantoomwe. Muciindi cakupa mweenzinyoko mulandu, amubelekele antoomwe kutegwa muleke kuciindizya kuula zintu. Kumatalikilo aamubandi wanu, amumvwane kuti kunyina nomuyoozumizya makani aaya kumwaandaanya.—Mpoijanika njiisyo eeyi mu Bbaibbele: Baefeso 4:32.

Amulembe mulongo wazintu ziyandika. Mumwezi omwe, amulembe zintu zyoonse nzyomuula noziceya buti. Kucita boobo ciyoomugwasya kuzyiba zintu zimumanina mali alimwi akubona zintu zitayandiki kapati. Ba Jim, ibaambwa kale mucibalo eeci baamba kuti, “Mweelede kucikazya ciyanza cakuciindizya kuula zintu.”

Amulembe mulongo wazintu ziyandika, amubikkilizye zintu mbuli zyakulya, zisani, mali aaleenti, mali aabelesyegwa kumootokala, alimwi azimwi zili boobo. Mpoonya amulembe amuulo wazintu eezyo, kutondezya mali ngomuyeeyela kuti ngaakonzya kubelesyegwa kubbadelela cintu eeco muciindi cipedwe, atwaambe ambweni mumwezi omwe.—Mpoijanika njiisyo eeyi mu Bbaibbele: Luka 14:28.

Mwezi amwezi, amubikke mali ambali aakuula zintu eezyo (zintu mbuli cakulya, mali aaleenti, mungwimba, azimwi buyo). Bamwi balacita oobo kwiinda mukubikka mali mumvwulupu, mali aakuula cintu eeco ciyandika mumvwulupu yomwe. * Ikuti mali akuula cintu eeco amana mumvwulupu, nkokuti balaleka kucuula cintu eeco naa balabweza mali kuzwa mumvwulupu iimbi.

Amuzinzibale kuyeeya mbomuzibona zintu zyakumubili. Lukkomano taluzwi kuzintu zidula nzyajisi muntu. Kayi Jesu wakaamba kuti: “Nokuba kuti muntu kajisi zyintu zinji buti, ibuumi bwakwe tabuzwi kuzyintu eezyo nzyajisi.” (Luka 12:15) Kanji-kanji, mbomuula zintu cilatondezya kuti naa mulaasyoma majwi aaya naa pe.—Mpoijanika njiisyo eeyi mu Bbaibbele: 1 Timoteyo 6:8.

Amucince. Ba Aaron, ibakakwata myaka yobilo yainda baamba kuti: “Kumatalikilo zintu mbuli TV iidula alimwi akuyoolida kubusena bumbi, inga kazili buyo kabotu, pele mukuya kwaciindi zilakonzya kumumanina mali. Twakaiya kutacita zintu zimwi kutegwa tutaciindizyi kuula zintu.”