NCOLYAAMBA BBAIBBELE
Lufwu
Ino bafwide bali kuli?
“Uli bulongo buyo, akooko kubulongo nkoelede kupiluka.”—Matalikilo 3:19.
NZYOBAAMBA BANTU
Bantu bamwi bayeeya kuti muntu afwa, uunka kujulu, kuhelo, kubusena bwamyuuya naa kubusena butazyibidwe kabotu. Bamwi basyoma mukuzyalululwa alimwi akuba cintu cimwi cipona. Kulubazu lumwi, aabo bakaka njiisyo zyabukombi basyoma kuti lufwu ngamamanino aamuntu.
NCOLYAAMBA BBAIBBELE
Lugwalo lwa Mukambausi 9:10 lwaamba kuti “taakwe milimo niiba miyeeyo neluba luzibo nebuba busongo mukabanda moyoonjila.” Alimwi Bbaibbele lilapandulula cicitika ciindi bantu alimwi abanyama nobafwa. Lyaamba kuti: “Boonse balaya kubusena bomwe. Bakazwa kubulongo, alimwi balapiluka kubulongo.”—Mukambausi 3:20.
Ino bafwide bali muciimo nzi?
“Muuya wakwe wazwa, ulabweeda kubulongo; mubuzuba oobo mbubonya makanze aakwe oonse alamana.” —Intembauzyo 146:4.
NZYOBAAMBA BANTU
Bantu banji bayiisyigwa kuti iciyoocitikila muntu aakufwa ciyeeme abuumi mbwaakali kupona anyika katanafwa. Ikuti naa wakali kucita zintu zibotu, nkokuti bulumbu bwakwe ndukkomano lutamani; pele kuti naa wakali kucita zintu zibyaabi, nkokuti uyoopya mumulilo uutamani. Alimwi bamwi basyoma kuti bantu beelede kusalazyigwa kuzibi kutegwa beelele kuyookkala a Leza baakufwa. Aabo ibatasalali baambwa kuti kunyina nobayoolubona lukkomano oolo.
NCOLYAAMBA BBAIBBELE
Bafwide kunyina nobakkomana naa kupya mumulilo pe. Kwaamba masimpe, mbokunga kunyina ncobazyi, kunyina cili coonse cibacitikila, alimwi tabakonzyi kubagwasya naa kubacisa bantu bapona. Lugwalo lwa Mukambausi 9:5, 6 lwaamba kuti: “Nkaambo baumi balizi kuti balafwa, pele bafwide tabezi cintu niciba comwe, . . . Luyando lwabo alusulo lwabo abbivwe lyabo, zyoonse zyafwidilila. Tabacijisi caabilo abuniini muzintu zyoonse zicitika ansi.”
Sena kuli bulangizi buliko kujatikizya bafwide?
“Muntu nakonzya kufwa akuponononwa, nendakala buyo mane ndalemununwa.”—Jobu 14:14.
NZYOBAAMBA BANTU
Bantu banji basyoma kuti, ikuti naa muntu waambilwa kuti uunka kuhelo, nkokuti tajisi bulangizi pe. Kupya mumulilo wahelo kwaambwa kuti nkupya kukabe kutamani. Kulubazu lumwi, aabo bali mubusena bwamyuuya, baambwa kuti balakkomana kujulu lilikke buyo kuti basalazyigwa zibi zyabo.
NCOLYAAMBA BBAIBBELE
Bantu boonse ibakafwa, bayoobusyigwa a Mwana wa Leza akuyoopona alimwi anyika. Ibbaibbele lyaamba kuti: “Mutagambwi amakani aaya, nkaambo ciyoosika ciindi eelyo aabo boonse ibali muzyuumbwe nobayoomvwa ijwi lyakwe akuzwa mulinzizyo.” (Johane 5:26, 28, 29) Baakumana kubusyigwa bantu, bukkale bwamuntu umwi aumwi mbobuyootondezya kuti naa uleelela kupegwa buumi butamani naa pe. *
^ par. 14 Kutegwa muzyibe zinji kujatikizya bubuke, amubone cibalo 7 cabbuku lyakuti Ino Ncinzi Cini Bbaibbele Ncoliyiisya? ilyakamwaigwa a Bakamboni ba Jehova, alimwi mulakonzya kulikkopa a www.isa4310.com/toi.
Andiza Inga Mwaakkomanina Ayaaya
MIBUZYO YAMU BBAIBBELE YAINGULWA
Sena Njiisyo ya Helo Njamasimpe? Ino Helo Ninzi Kweelana a Bbaibbele?
Bantu banji basyoma kuti helo mbusena bwakupenzyelwa kukabe kutamani kwalo bantu babi nkobasubulwa. Pele sena Bbaibbele mboliyiisya oobo?
MIBUZYO YAMU BBAIBBELE YAINGULWA
Sena Bbala Lyakuti Puligatoliyo Lilajanika mu Bbaibbele?
Matalikilo aanjiisyo yapuligatoliyo alagambya.
