BUKKALE bwaba Kari bulabacitikila bantu banji. Bamukabunga kabasyaazibwene mukusilika bulwazi bwamizeezo baku United Kingdom bakajana kuti, akati kababelesi bali 5 baku Britain bali boonse, omwe wakali kwaamba kuti kutyompwa kwakali kubapa kuciswa, alimwi akati kabantu bali 4 bali boonse, omwe wakali kulila kumulimo akaambo kakuvwula kwazyakucita. Mizeezo yakujana musamu uucesya-cesya kutyompwa yakavwula kapati mumwaka omwe ciindi makwebo aamucisi eeci naatakali kucita kabotu.

Ino ncinzi cimupa kutyompwa?

• Kubula lukwabililo, ambweni akaambo kakubula mali naa penzi limbi buyo

• Kuba azintu zinji zyakucita

• Kuzwangana

• Kucitikilwa cintu cuusisya

Ino mbuti kutyompwa mbokwamujatikizya?

• Kuciswa-ciswa

• Kuba akabuko

• Kuba acilabila

• Kuusa

• Kutayandwa abalongwe

 Kutyompwa kupa kuti bubambe bumwi bwamumubili butalike kubeleka, nkokuti ibubambe bwakufwambaana kulanga-langa zintu. Mahomoni alatalika kuzwa kutegwa mutalike kuyoya cakufwambaana, moyo kaubalika, alimwi akupa kuti bulowa butalike kabalika kapati. Kuyungizya waawo, maseelo aamumubili abusani bumwi izyakayobwedwe zilatalika kwiinda munsinga zyabulowa. Kuti zintu zyoonse eezyi kazicitika cakufwambaana kwiinda mbozyeelede, inga camupa kutyompwa. Zyamana kucitika zyoonse eezyi, mubili wanu ulatalika alimwi kubeleka kabotu. Pele kuti naa zintu eezyi zyazumanana, zilakonzya kumupa kuciswa bulwazi bwakulibilika kapati, mbuli mootokala wiide kulila pele kauteendi. Aboobo ikwiiya mbomukonzya kukulwana kutyompwa kulakonzya kumukwabilila kumalwazi aboola akaambo kakutyompwa.

Kutyompwa kukugama takujayi pe. Ibamukabunga kalanganya mizeezo yabantu bakajana kuti: “Kutyompwa mbube bwamuntu, ibuli mbuli katambo kabbanjo: ikuti kalizyigwa asyoonto takakonzyi kulimvwisya; pele alimwi ikuti kalizyigwa canguzu kalakonzya kudunsuka. Kuciindizya kutyompwa kulajaya, pele kutaciindizya kutyompwa takujayi pe. Aboobo cintu ciyandika nkucikonzya kulyeendelezya.”

Akambi kaambo keelede kulangwa-langwa kujatikizya kutyompwa nkakuti, bantu baliindene mbobalengedwe alimwi ambobapona. Aboobo cintu cikonzya kutyompya umwi, umwi tacikonzyi kumutyompya. Icaamba kuti mulalangilwa kutyompwa kuti lyoonse kamucita zintu zilibilisya kapati cakuti tamujani ciindi cakulyookezya naa kucita zintu zyacibukilambuta.

Kutegwa “baliyumye” kupenzi lyakutyompwa, bamwi bantu basala kunywa bukoko, kubelesya misamu iikola, naa kufweba tombwe. Bamwi balatalika kuciindizya kulya naa kutola ciindi cilamfwu kweebelela TV naa kubelesya kkompyuta, izilengwa zitakonzyi kulimana penzi lyakutyompwa, pele zilakonzya kuliindizya buya. Ino mbuti lino mbotukonzya kwiiya kulwana penzi lyakutyompwa?

Bantu banji bacikonzya kwaalwana mapenzi aamubuumi aaleta kutyompwa kwiinda mukubelesya malailile aagwasya aajanika mu Bbaibbele. Sena andinywe busongo oobu inga bwamugwasya? Amuulange-lange mubuzyo ooyu kwiinda mukubelesya twaambo ootu tone tuzyibidwe kuti ntotupa kutyompwa.

 1 KUBULA LUKWABILILO

Kunyina muntu naba omwe uukwabilidwe cakumaninina. Ibbaibbele lyaamba kuti, “Bantu boonse buyo balasikilwa ziindi zyalufu azyamapenzi.” (Mukambausi 9:11) Mbuti mbomukonzya kuliyumya kuti kamulimvwa kubula lukwabililo? Amusole nzila eezyi.

• Amwaambile mulongwe naa munamukwasyi ngomusyoma. Buvwuntauzi butondezya kuti lugwasyo lwabalongwe lyoonse lulatugwasya kulwana kutyompwa. Masimpe, “muzwalani ulayandisya kuziindi zyoonse, alimwi munyina wazyalilwa mapenzi.”—Tusimpi 17:17.

• Mutani kubikkili maano kuzintu zibyaabi zyakamucitikila. Nkaambo kucita boobo inga kwamumana nguzu. Alimwi buya, ambweni zintu nzyomuyoowa tazikonzyi akucitika. Nkakaambo kaako Bbaibbele ncolyaamba kuti: “Mutani kulibiliki zyabuzuba butobela, nkaambo buzuba butobela bunooli azyakulibilika zyambubo. Buzuba buli boonse bulijisi mapenzi aambubo.”—Matayo 6:34.

• Amugwasyigwe anguzu zyamupailo. Lugwalo lwa 1 Petulo 5:7 lwaamba kuti: “Kamuwaala makatazyo aanu oonse kulinguwe, nkaambo ulamubikkila maano.” Leza ulatondezya kuti ulatulanganya kwiinda mukutupa luumuno lwamumizeezo alimwi akutusyomezya kuti kunyina ‘nayootulekelezya’ kuti katumusikila mumupailo kulomba luumbulizyo alimwi alugwasyo muziindi zyamapenzi.—Bahebulayo 13:5; Bafilipi 4:6, 7.

2 KUBA AZINTU ZINJI ZYAKUCITA

Mulimo weendelwa musinzo mulamfwu abuzuba, kubala, kulanganya bana, naa bazyali bacembeede kulakonzya kumupa kutyompwa. Nokuba boobo, kuyeeya kucileka kucita zintu zyaambwa aatala aawa, takukonzyi kugwasya. (1 Timoteyo 5:8) Pele, ino ncinzi cikonzya kumugwasya mubukkale buli boobu?

• Kamukkazyika moyo, alimwi kamujana ciindi cakulyookezya. Ibbaibbele lyaamba kuti: “Inkankamanza yomwe iili aluumuno nimbotu kwiinda maanza obile aazwide milimo iikataazya iitakutyi moyo.”—Mukambausi 4:6.

• Amulibikkile mbaakani zigwasya, alimwi akupona buumi buuba-uba. (Bafilipi 1:10) Amulange-lange mbomukonzya kuubya-ubya buumi bwanu, ambweni kwiinda mukucesya-cesya zintu nzyomuula naa ciindi cakubeleka.—Luka 21:34, 35.

Ba Kari, ibaambwa kale mucibalo eeci, bakakkala aansi akulanga-langa buumi bwabo. Bakalemba kuti: “Ndakabona kuti ndakali kupona buumi bwakuliyanda.” Bakaasambala makwebo aabo alimwi akutalika mulimo uubelekwa mawoola masyoonto. Bakaamba kuti: “Bukkale bwesu bwayaansi aasyoonto, pele mebo abakaintu bangu twaanguluka kupenzi lyakutyompwa, alimwi tulijisi ciindi cinji cakuba aantoomwe amukwasyi alimwi abalongwe. Tandikonzyi kulekela cintu cili coonse kunyonganya luumuno lwamumizeezo ndondijisi lino.”

 3 KUZWANGANA

Kuzwangana abamwi, ikapati kumilimo, kulakonzya kutyompya kapati. Ikuti kamuli mubukkale buli boobu, mulijisi twaambo tunji tukonzya kumugwasya.

• Ikuti muntu umwi wamutyompya, amusole kukkazika camba. Mutasoseli mulilo. Lugwalo lwa Tusimpi 15:1 lwaamba kuti: “Kuvuwa kabotu kulalesya bukali, pele majwi mabi alabusya inkondo.”

• Amusole kubamba twaambo kumbali alimwi cabulemu, eeci ciyootondezya kuti mulamulemeka muntu ooyo.—Matayo 5:23-25.

• Amusole kubona mbwalimvwa alimwi ambwayeeya muntu ooyo. Kucita boobo kuyoomugwasya ‘kumuka kukalala’ nkaambo kupa kuti mulibikke muciimo camuntu ooyo. (Tusimpi 19:11) Alimwi kulakonzya kumugwasya kulibona munzila bamwi mbobamubona.

• Kamulekelela. Kulekelela takukkomanisyi buyo pe. Pele alimwi musamu mubotu. Ibuvwuntauzi bumwi bwamu 2001 bwakatondezya kuti, “mizeezo iitalekeleli” ipa moyo alimwi abulowa ‘kubalika kapati,’ pele moyo uulekelela ulacesya-cesya kutyompwa.—Bakolose 3:13.

4 KUCITIKILWA ZINTU ZYUUSISYA

Ba Nieng, ibakkala ku Cambodia, bakaswaangana amapenzi manji ausisya kapati. Mu 1974, bakalicisa ciindi bbomba nolyakabboloka kubbuwa lyandeke. Mwaka wakatobela, bana babo bobilo, banyina, alimwi abalumi babo bakafwa. Mu 2000, ŋanda alimwi azintu zyabo zimwi zyakapya. Aciindi eeco, bakali kuyanda kulijaya.

Nokuba boobo, ba Nieng bakaijana nzila mbokali kukonzya kuliyumya. Mbubwenya mbuli ba Kari, bakabala Bbaibbele akugwasyigwa kapati cakuti zintu nzyobakabala zyakabakulwaizya kuti abalo bagwasye bamwi. Cakuluula caba Nieng, cituyeezya cibalo cabasikuvwuntauzya baku Britain camu 2008. Mubuvwuntauzi oobu bakajana kuti, inzila imwi iigwasya ‘kuliyumya kukutyompwa, nkupa bamwi zintu nzyobayandika munzila imwi,’ kucita boobo kwali kulumbaizyigwa mu Bbaibbele kwaciindi cilamfwu.—Milimo 20:35.

Kuyungizya waawo, ba Nieng bakaba abulangizi bwini-bwini bwabuumi bubotu kumbele, ciindi mapenzi woonse aapenzya bantu naayoomana. Aboobo, ‘luumuno luyoovwula’ munyika yoonse.—Intembauzyo 72:7, 8.

Bulangizi bwini-bwini alimwi abusongo bwakuliyumya kukutyompwa, zyoonse kunyina kumbi nkozijanika kunze lyamu Bbaibbele. Bantu banji bagwasyigwa kale kwiinda mubbuku eeli lilibedelede alimwi ligwasya. Anywebo mulakonzya kugwasyigwa.