Kamutanakwatana, cakali kulibonya mbuli kuti nywebo angomukwetene limwi muleendelana muzintu zinji. Lino kutyompwa kwanyonganya cilongwe canu cakuti mulimvwa mbuli kuti muli muntolongo yomwe angomukwetene limwi, muciindi cakukkomana kuba antoomwe.

Mulakonzya kucibambulula cilongwe canu. Pele cakusaanguna mweelede kuzyiba cimupa kutyompwa.

Kuzyiba masimpe. Zintu nzyomucita buzuba abuzuba, mbuli kubeleka, kukomezya bana alimwi akulanganya bamakwe, aasyoonto-syoonto zilakonzya kumana lukkomano lwamulukwatano. Kuyungizya waawo, mapenzi aacibukilambuta ambweni kubula mali naa kulanganya wamumukwasyi umwi uuciswa bulwazi butola ciindi kupona, kulakonzya kunyonganya lukwatano lwanu.

Mapenzi aalibonya mbuli kuti taakonzyi kumana. Kanji-kanji bantu nobeebana inga tabakubikkili maano kutamvwana kukonzya kuba akati kabo. Pele ciindi bakwatana, inga nobazyiba mbobateendelani muzintu zimwi mbuli kubandika, kubelesya mali, alimwi ambokumanwa mapenzi. Mapenzi ngobakali kuliyumya buyo, lino inga kabatacikonzyi kuliyumya.

Kutabikkila maano mbwalimvwa umwi. Akaambo kamajwi mabi, micito mibi alimwi atwaambo tutabandikwi akumanizyigwa, mukuya kwaciindi zintu eezyi zilakonzya kupa mulumi naa mukaintu kuleka kutondezya mbwalimvwa kumweenzinyina akutalika kutondezya mbwalimvwa kumuntu uumwi.

Kutazuzikizyigwa kwazintu nzyomwakali kulangila. Bamwi nobanjila mulukwatano inga bayeeya kuti bamujana muntu uubeelede. Nokuba kuti kuyeeya boobo inga kaluli luyando, pele kulakonzya kuleta mapenzi. Mbwaatalikila buyo mapenzi, muzeezo wakuti bakakwatana amuntu ‘uubeelede’ ulamana. Kumane, balatalika kuyeeya kuti bakalubizya kukwatana amuntu ooyo.

Amubikkile maano kubube bubotu bwayooyo ngomukwetene limwi. Amusole nzila eeyi: Amulembe bube botatwe bubotu mbwajisi ngomukwetene limwi. Amukayobole kapepa aako ambweni kusyule aacifwoto cabwiinga bwanu. Ciindi aciindi amukalange kapepa aako kutegwa kamuyeezye kaambo ncomwakamuyandila ngomukwetene limwi. Kubikkila buyo maano kubube bubotu bwamuntu ngomukwetene limwi kukulwaizya luumuno alimwi kuyakumugwasya kulekelelana ikuti naa mwaimpana.—Mpoijanika njiisyo eeyi mu Bbaibbele: Baloma 14:19.

Amujane ciindi cakuba antoomwe. Kamutanakwatana ambweni mwakali kujana ciindi cakucita zintu antoomwe. Ciindi cakweebana cakali ciindi cikkomanisya alimwi mwakali kubikka bubambe bwakucitila antoomwe zintu. Mulakonzya kucita oobo noliba lino. Nywebo angomukwetene limwi amujane ciindi cakuba nyobilo buyo mbuli kuti muceebana. Kucita boobo kuyakumugwasya kuyumya cilongwe canu alimwi akumugwasya kumana mapenzi.—Mpoijanika njiisyo eeyi mu Bbaibbele: Tusimpi 5:18.

Amwaambe mbomulimvwa. Ikuti majwi naa cintu cimwi ncaacita ngomukwetene limwi camunyemya, sena inga mwaciluba buyo? Ikuti kamutakonzyi kucita oobo, amutondezye kusima kwiinda mukutaba acilengwa cakutaambauzyanya. Amwaabandike makani aayo cakufwambaana, ikuti kacikonzyeka buzuba mbubonya oobo.—Mpoijanika njiisyo eeyi mu Bbaibbele: Baefeso 4:26.

Amwaazyibe makanze aamuntu ngomukwetene limwi alimwi ambomulimvwa. Kanji-kanji inga kunyina uuyanda kunyemya mweenzyinyina acaali. Amumuzyibye oobo mweenzyinyoko kwiinda mukulilekelela kuzwa aansi aamoyo ikuti naa mwacita cintu cimwi camunyemya. Kumane amubandike zintu zigaminide nyoonse nzyomweelede kucita kutegwa mutanoonyemezyanyi cakutazyiba. Amulutobele lulayo lwamu Bbaibbele lwakuti: “Amufwidilane luzyalo, mube amoyo mutete walubomba, akulekelelana camoyo woonse.”—Baefeso 4:32.

Mutaciindizyi kujatikizya zintu nzyomulangila. Bbaibbele lyaamba kuti aabo bakwatana “banoojisi mapenzi.” (1 Bakolinto 7:28) Aboobo, ciindi nomwajana mapenzi aali boobo, tamweelede kufwambaana kwaamba kuti mwakalubizya kukwatana. Muciindi caboobo, amubelekele antoomwe kumanizya mapenzi alimwi ‘akuzumanana kweengelelana akulekelelana camoyo woonse.’—Bakolose 3:13.