“Kumatalikilo Leza wakalenga ijulu anyika.”—Matalikilo 1:1.

NCOLYAAMBA BBAIBBELE

Lugwalo lwa Matalikilo 1:1 nolwaamba kuti “kumatalikilo,” lutondezya kuti kaindi Leza wakalenga julu anyika mubuzuba butazyibidwe kabotu. Basayaansi bamazuba aano abalo balazumina kuti julu anyika zilijisi matalikilo. Alimwi bayeeyela kuti julu anyika zyaliko kwamyaka iili 14 bbiliyoni.

Bbaibbele alimwi lilaapandulula “mazuba” aali cisambomwe aakulenga. Nokuba boobo, talyaambi kuti aaya akali mazuba aamawoola aali 24. (Matalikilo 1:31) Masimpe ngakuti, Bbaibbele nolibelesya bbala lyakuti “buzuba,” lyaamba bulamfwu bwaciindi bwiindene-indene. Mucikozyanyo, lyaamba ciindi coonse cakulenga kuti ‘buzuba obuya Jehova Leza naakalenga nyika ajulu.’ (Matalikilo 2:4) Cakutadooneka, ‘mazuba’ aaya aakulenga akatola ciindi cilamfwu kapati.—Intembauzyo 90:4.

NCOCIYANDIKA

Mizeezo iitaluzi yabantu bamwi ibasyoma kuti zyintu zyakalengwa buya, ilakonzya kumupa kuleka kusyoma mu Bbaibbele. Kulubazu lumwi, ikuti Bbaibbele lilijisi makani aamasimpe kujatikizya kulenga, nkokuti mulakonzya kugwasyigwa ‘abusongo bugwasya’ mbolijisi.—Tusimpi 3:21.

“Leza wakaamba kuti, ‘Amwalo munyika muzwe zintu zyuumi, cimwi acimwi mbuli musyobo waco.’”—Matalikilo 1:24.

NCOLYAAMBA BBAIBBELE

Leza kunyina naakalenga buumi kuzwa kutuntu tuniini akupa kuti tusanduke kuba zyintu zipati alimwi zikatazya kumvwisya. Muciindi caboobo, wakalenga ‘misyobo’ iindene-indene yazisyango alimwi abanyama, kumane zyakatalika kuzyalana “cimwi acimwi mbuli musyobo waco.” (Matalikilo 1:11, 21, 24) Kuzyalana ooku ikucizumanana asunu kwapa kuti nyika izule zyintu zyuumi ‘zyamusyobo’ nguwenya ooyo Leza ngwaakalenga kumatalikilo.—Intembauzyo 89:11.

Bbaibbele talitwaambili misyobo yazilenge mboikonzya kucinca, mbubwenya banyama mbobakonzya kucinca ikuti naa kabazyalana mumusyobo omwe. Nokuba kuti bamwi bayeeya kuti kucinca kuli boobu nkusanduka buya, kunyina musyobo uumbi wabuumi uupangika pe. Basayaansi balazumina kuti misyobo yazisyango alimwi abanyama mukuya kwaciindi yacinca aasyoonto.

NCOCIYANDIKA

Kweendelana kwa Bbaibbele mumakani aasayaansi mukupandulula ‘misyobo’ yazyintu zyuumi, kupa kuti kalisyomwa nomuba mumakani aakaindi alimwi amubusinsimi.

“Maanza aangu ngaakatandabika ijulu.”—Isaya 45:12.

NCOLYAAMBA BBAIBBELE

Leza Ngokasensa kanguzu ziteeli. (Jobu 37:23) Eeci cilamvwika nkaambo basayaansi baamba kuti nguzu zilakonzya kucincwa akuba cintu cimwi. Bbaibbele lyaamba kuti Leza mwini Nkasensa ‘kanguzu zinji kapati’ zyalo nzyaakabelesya kupanga julu anyika. (Isaya 40:26) Leza usyomezya kuti uyoobelesya nguzu zyakwe kukwabilila zilenge, nkaambo kujatikizya zuba, mwezi, alimwi anyenyezi, Bbaibbele lyaamba kuti: “[Leza] wakaziimika-nji mane kukabe kutamani.”—Intembauzyo 148:3-6.

NCOCIYANDIKA

Basyaazibwene mumakani aazyintu zyamujulu, ba Allan Sandage, bakaamba kuti: “Basayaansi tabakonzyi kwiingula mibuzyo yoonse. Ikuti naa mwabuzya kaambo ncokuli zilenge, basayaansi tabakonzyi kuwiingula mubuzyo ooyo.” Bbaibbele lilapandulula zilenge munzila yeendelana asayaansi, alimwi lilaingula mibuzyo basayaansi njobatakonzyi kwiingula, kubikkilizya amubuzyo wakuti, Makanze nzi Leza ngajisi kujatikizya nyika alimwi abantu? *