Syaazibwene mulwiiyo lwasayaansi lujatikizya lwizi ku University of Cambridge, ku Britain, wazyina lya Peter Wadhams, waamba kuti: “Caanda cijanika ciindi camainza aakooko ncisela buyo kuti naa twaceezyanisya acaanda cakaliko myaka iili 30 yainda.” Mumwaka wa 2012, mato aasika ku 50 akaibelesya nzila yamumaanzi iitwa kuti Northern Sea Route yalo yakapangwa akaambo kakucinca mboikasaala nyika.

Basikuvwuntauzya bakajana kuti mukupa wabamatumbu mazuba masyoonto kuzwa nibatumbuka ulijisi tuzunda tubotu twamisyobo-misyobo yiinda ku 700, twalo ntobatakali kuyeeyela. Basikuvwuntauzya bacibeleka kutegwa bazyibe tuzunda ootu mbotumukwabilila mwana muvwanda kumalwazi alimwi ambotugwasya kugaya cakulya mwida.

Basyaazibwene musayaansi baku Britain bakacita buvwuntauzi mwalo mobakasunka banamutekenya baciswa cisyini alimwi abaabo bakoledwe bukoko ikweenzya mootokala wakucengeezya. Mpoonya, bakajana kuti aabo baciswa cisyini bakali kumuka kucita zyintu kwiinda baabo bakoledwe bukoko.

Akaambo kakuyanda meja aabazovwu, mwaka amwaka mu Africa kulajaigwa bazovwu banji kapati calo citanacitikide kuzwa kaindi. Aciindi cimwi, bazovwu banji bakadubulwa atala aamitwe, alimwi kulibonya kuti bantu ibakali kubadubula bakali mucipolopela.

Mumyaka iili 27 yainda, cisela cama coral aapona aajanika kubusena butegwa Great Barrier Reef akafwa. Basayaansi baamba kuti cijaya ma coral aaya ndiguwo lyamulwizi, kuvwula kwanswi ziitwa kuti crown-of-thorns starfish, alimwi akukasaala kapati kwamulwizi.