“Toli kulamfwu a Bwami bwa Leza.”—Maako 12:34.

NZYOBAAMBA BANTU

Bantu banji basyoma kuti Bwami bwa Leza, kweelana ambobayiisya muzikombelo zya Bunakristo Bwanyika, “mbulelo bwa Leza ibuli mumoyo alimwi amubuumi bwamuntu.”

NCOLYAAMBA BBAIBBELE

Bwami bwa Leza nimfwulumende, kutali mizeezo buyo yamuntu uulibombya kuli Leza. Bwami bwa Leza buyoolela nyika yoonse.—Intembauzyo 72:8; Daniele 7:14.

Aboobo, ncinzi ncaakali kupandulula Jesu naakaamba kuti “Bwami bwa Leza buli akati kanu”? (Luka 17:21) Jesu kunyina naakali kwaamba kuti Bwami bwakali mumyoyo yabaswiilizi bakwe. Ino nkaambo nzi? Akaambo kakuti aciindi eeco Jesu wakali kwaambila ba Farisi. Jesu wakali kwaamba kuti ba Farisi tiibakali kuyoonjila mu Bwami akaambo kakuti bukombi bwabo bwakali bwakuupaupa ameso alimwi butakkomaninwi a Leza. (Matayo 23:13) Nokuba boobo, cakali kweelela kuti Jesu aambe kuti Bwami bwa Leza “buli mukati kanu” naa kweelana ambolyaamba Bbaibbele lya Busanduluzi Bwanyika Mpya kuti “buli akati kanu.” Ino nkaambo nzi? Nkaambo walo, mbuli yooyo wakali kuyooba Mwami wa Bwami oobu, ngonguwe wakaimvwi akati kabo.—Luka 17:21.

“Abuboole Bwami bwako. Akucitwe kuyanda kwako ansi aano mbubonya mbuli kujulu.”—Matayo 6:10.

NCOLYAAMBA BBAIBBELE

Bwami oobu nimfwulumende ya Leza mwalo Jesu Kristo mwali Mweendelezi. (Matayo 28:18; 1 Timoteyo 6:14, 15) Makanze aambubo ngakucita kuyanda kwa Leza kujulu alimwi aanyika. (Matayo 6:10) Aboobo, kwiinda mu Bwami bwakwe, Leza uyakwaamana mapenzi oonse. Bwami buyoocikonzya kucita ceeco mfwulumende zyabantu ncozyaalilwa kucita.

Bwaakutalika kweendelezya Bwami bwa Leza, bantu boonse banoopona muluumuno, banookwabilidwe, alimwi akupona buumi buli kabotu muparadaiso anyika. (Intembauzyo 46:9; Isaya 35:1; Mika 4:4) Malwazi oonse ayoogwisyigwa, nkokuti kunyina muntu uuyoociswa nokuba kufwa. (Isaya 33:24; Ciyubunuzyo 21:4) Nobuba bucembele buyoomana. Bbaibbele lyakasinsima kuti: ‘Lino inyama yakwe ilaba impya kwiinda yamwana; inguzu zyabulombe bwakwe zilajoka.’—Jobu 33:25.

NCOMUKONZYA KUCITA

Kunyina makani ankomwakazyalilwa, ikuti kamucita eezyo Leza nzyamulomba, mulakonzya kuba mulelwa wa Bwami bwa Leza. Bbaibbele lyaamba kuti: “Leza tasalululi, pele muzisi zyoonse kufwumbwa muntu uumuyoowa akucita ziluleme ulatambulwa kulinguwe.”—Milimo 10:34, 35.

“Leza wakujulu uyoobusya bwami butakooyoonyonyoonwa abuniini.”—Daniele 2:44.

NZYOBAAMBA BANTU

Bantu bamwi basyoma kuti mfwulumende zyabantu ziyootalisya Bwami bwa Leza anyika, ambweni kwiinda mukusandula bantu kusyoma nzyobasyoma balo, naa kwiinda mukusoleka kulwanina luumuno alimwi akumvwana.

NCOLYAAMBA BBAIBBELE

Leza nguuyootalisya Bwami kutali bantu. (Daniele 2:44) Ciindi Leza naakali kutalisya Bwami, wakaamba kuti: “Ndime ndakazika mwami wangu.” (Intembauzyo 2:6) Bantu tabakonzyi kuleta Bwami bwa Leza, alimwi tabakonzyi kusinkilizya makanze aambubo, mbwaanga buyoolela kuzwa kujulu.—Matayo 4:17.

NKAAMBO NZI KAAMBO AAKA NCOKEELEDE KUMUJATIKIZYA?

Ncilengwa buya kulombozya kuti bumwi buzuba bantu bayooba aluumuno alimwi alukamantano. Mulakonzya kusoleka kuleta luumuno alimwi alukamantano, pele kuti camwaalila inga mwatyompwa. Kuzyiba kuti Leza nguuyooleta Bwami, kuyoomugwasya kubeleka canguzu kwiinda mukuba mulelwa wa Bwami oobu.