Lipooti yakapegwa abamucibeela ca Homeland Security baku U.S., yakatondezya kuti mumyaka iinda kukkumi, basilikani babelekela kubbuwa lyandeke bakajata zyintu zili 50 milyoni zitazumizyidwe amulawo. Mu 2011 mulikke buyo, basilikani aaba bakajata ntobolo zili 1,200 kutegwa zitanjizyigwi mundeke. Aabo balaantobolo eezyi bakali kwaamba kuti, bakalilubide kuti banyamwide ntobolo.

Mbunga zilanganya makani aalwiiyo zyatalika kunamatika tuncini mumayunifoomu aabasicikolo kutegwa bana kabatalovwi kucikolo. Bazyali balatuminwa kagwalo kubazyibya ciindi mwanaabo naasika kucikolo alimwi akagwalo kambi kabazyibya naa wamuka kwamaminiti aali 20.

Cikombelo ca Lutheran tacicili ncecikombelo cipati mucisi ca Norway pe. Kwaciindi cakusaanguna, baiminizi bamuŋanda yamilawo ku Norway bakasala kuti milawo ibambululwe kutegwa mfwulumende kaiteendelezyegwi acikombelo eeci.

Buvwuntauzyi bumwi bwakatondezya kuti 60 pesenti yababelesi baku Czech Republic bakaamba kuti balimvwa kuti baleelede kwiingula mafooni, tugwalo twaafooni alimwi atugwalo twaakkompyuta ciindi nobatali kumilimo. Mpoonya babelesi bainda ku 40 pesenti bacibona kuti nkubula bulemu kutaingula magwalo aaya mpoonya-mpoonya.

Nokuba kuti zyakulya nzyobakalima ku India mumyaka iili 20 yainda zyakayungizyigwa a 50 pesenti, alimwi bakayobola mataani aali 71 milyoni aalaisi alimwi awiiti, cisi eeci cicijana buyumu-yumu bwakusanina bantu. Cakulya ncobalya bantu bamucisi oomu cisika buyo ku 40 pesenti yacakulya ciyobwedwe. Kutasyomeka kwabantu baapaula cakulya alimwi akutacibamba kabotu, nkokupa kuti cakulya kaciceya.