4. Amubikkile Maano Ikuti Kamulida Mobasambala Zyakulya

Ba Jeff, ibakajisi myaka iili 38 yakuzyalwa, alimwi ibakali kulibonya kabotu mubili, bakaunka amukwasyi wabo kuyoolida nkobasambala zyakulya kubusena bumwi ibuli aafwaafwi adolopo lya Pittsburgh, Pennsylvania, ku U.S.A. Nikwakainda mwezi omwe, ba Jeff bakafwa akaambo kabulwazi bwamuni. Ino bakaciswa buti bulwazi oobu? Bakalya hanyisi wakajisi bulwazi bwa hepatitis A.

MUMASI aasumpukide, bantu banji balida musambalilwa zyakulya muciindi cakulijikila. Nokuba boobo, mumasi ngoonya aaya, zyakulya eezyi nzyobasambala zyaambwa kuti nzyezileta malwazi aajanika muzyakulya.

Masimpe, ikuti mwasala kulida mobasambala zyakulya, muyoojana kuti kuli uula zyakulya, uusalazya muncikini, alimwi akujika. Nokuba boobo, mulakonzya kusala nkomukonzya kulida, ncomukonzya kulya, alimwi ambomukonzya kuzibamba zyakulya ncomuyanda kutoleezya kuŋanda.

● Amulange-lange mbobubede busena.

Ba Daiane ibakkala ku Brazil, bakaamba kuti: “Ikuti twaunka kucintoolo cakulida ciindi cakusaanguna, ndilalanga-langa kutegwa ndibone naa alasalala matebulu, tusani twaatebulu, mitiba, alimwi abasikwaaba zyakulya. Ikuti kabalaadooti, tulazwa abusena oobo akulangaula busena bumbi bwakulida.” Mumasi aamwi, aabo ibalanganya buumi bwabantu, balalanga-langa mumasena aakulida akujala zintoolo zitasalali, alimwi inga balalemba mazyina aazintoolo zisalala azitasalali kutegwa banamaleya babale.

● Amucenjele ikuti kamuyanda kutoleela zyakulya kuŋanda.

Cibeela cimwi caku cisi ca U.S.A. icilanganya zyakulya alimwi amisamu cakakulwaizya kuti: “Ikuti naa kulainda mawoola obilo kamutanasika kuŋanda [alimwi kulapya kwiinda a 32°C] mutatoleezyi zyakulya kuŋanda.” Ikuti kamuyanda kutoleela cakulya, amufwambaane kuunka kuŋanda akucibikka mufiliji.

Ikuti mwazitobela nzila eezyi zyone zyaambidwe muzibalo eezyi zitobelene, inga mwacikonzya kubamba cakulya canu kutegwa kacili kabotu.

[Kabbokesi/Cifwanikiso icili apeeji 17]

AMUBAYIISYE BANA BANU: “Tulabayiisya bana besu kuti kabatalyi zyakulya zitali kabotu.”—Oobo mbobakaamba ba Noemi, baku Philippines